A Zeova yeela a Moyiiz yaa: ‘Rʋ tãngã zugu. M na n gʋlsa m noyã kug-wals zug n kõ foo.’ A Moyiiz rʋʋ tãngã, n pa be rasem 40 la yʋnd 40. A sẽn wa n be be wã, a Zeova gʋlsa noy piig sẽn tar yõod wʋsg kug-walsã zug n kõ-a. B boonda no-kãens tɩ tõod piigã.

Israyɛll nebã wa n tẽedame t’a Moyiiz pa na n le wa ye. B yeela a Aarõ yaa: ‘Tõnd datame tɩ ned lʋɩ tõnd taoore. Maan wẽnnaam n kõ tõnd t’a lʋɩ tõnd taoore!’ T’a Aarõ yeel-b yaa: ‘Kõ-y maam yãmb sãnemã.’ A Aarõ yẽnega sãnemã n maan nag-bila. Nebã yeelame: ‘Nag-bi-kãngã la tõnd Wẽnnaam. Yẽ n yiis tõnd Ezɩpti!’ B sɩngame n yĩgimd nag-bilã taoor n pʋʋsd-a, la b maan kibsa. B sẽn maanã yaa wẽng bɩ? N-ye. Bala b ra yeela a Zeova tɩ yẽ a ye bal la b na n tũ. La b pa maan woto ye.

A Zeova yãa b sẽn maanã, n yeel a Moyiiz yaa: ‘Sigi, tɩ nebã kɩɩsa maam, n pʋʋsd wẽn-faoogo.’ A Moyiiz sigame, la a ra zãada kug-wals a yiibã.

A sẽn wa n kolg Israyɛll nebã sẽn beẽ wã, a wʋma b sẽn yɩɩnde. A yãa b sẽn saoode, la b yĩgimded nag-bil taoore. A Moyiiz sũurã yika wʋsgo, t’a lob kug-wals a yiibã tẽnga, tɩ b wã zãnga. Zĩig pʋgẽ, a sãama nag-bilã. A soka a Aarõ yaa: ‘Bõe la nebã yeel foo, tɩ fo sak n maan bõn-kãngã sẽn yaa wẽng wʋsgã?’ T’a Aarõ yeel-a yaa: ‘Ra yik f sũur ye. Fo mii nebã sẽn yaa to-to. B ra rata wẽnnaam. Mam deega b sãnemã n yẽneg n maan nag-bil n kõ-ba.’ A Aarõ ra pa tog n sak n maan woto ye. A Moyiiz le rʋʋ tãngã n kos a Zeova t’a kõ nebã sugri.

A Zeova kõo neb nins sẽn sak yẽ wã sugri. Fo pa ne tɩ Israyɛll nebã ra tog n sakame t’a Moyiiz lʋɩ taoor n wilg-b sor sɩda?

A Moyiiz sẽn wa n be Sinayi tãngã zugã, a Zeova yeel-a lame t’a maan fu-roog tɩ Israyɛll nebã wat be n pʋʋsd yẽ. B boonda fu-roogã tɩ sɛk-roogo. Yaa fu-roog b sẽn tõe n sik n le tɩ tilg zĩig a to, b kẽnda sasa.

A Zeova yeela a Moyiiz yaa: ‘Yeel Israyɛll nebã tɩ b wa ne kũun tɩ b maan sɛk-roogã.’ Nebã waa ne sãnem, wanzuri, zũudu, la onigs kuga. B leb n waa ne lamd gĩs-bãanega, rũms gãndo, gĩs sẽn maan ne bʋʋs kõbdo, la bũmb a taaba. B ra wata ne kũun wʋsgo, hal t’a Moyiiz yeel-b tɩ b bas woto tɩ sekame.

Rap la pagb wʋsg sẽn mi tʋʋm sõma sõngame n maan sɛk-roogã. A Zeova kõ-b-la yam tʋʋmdã yĩnga. Kẽer ra wĩida lamdo, la b wʋgd futu, tɩ sãnda peesd kug la raado, t’a taab yẽnegd sãnemã n maand bũmb toor-toore.

Nebã maana sɛk-roogã wa a Zeova sẽn yeelã bal kɛpɩ. B maana rido-neere, n na n welg sɛk-roogã zĩis a yiibu. Yaa zĩ-sõngã ne zĩ-sõng sẽn yɩɩdã. B kẽesa kãabg-koglgã zĩ-sõng sẽn yɩɩdã pʋgẽ. B maan-a-la ne sãnem la ne akasiya raado. Zĩ-sõngã pʋgẽ, b ninga fɩtl-doagendg b sẽn maan ne sãnem, taable, ne tẽn-kugri, tɩ b na n yõogd wisd a zugu. Sɛk-roogã zak pʋgẽ, b ninga yʋʋr sẽn yaa bedre, b sẽn maan ne zũudu, la tẽn-kugri, tɩ b na n yõogd maand be. Kãabg-koglgã ra na n tẽegda Israyɛll nebã tɩ b yeela a Zeova tɩ b na n sak-a lame.

A Zeova yãka a Aarõ ne a kom-dibli wã tɩ b na n yɩ maan-kʋʋdba, n tʋmd sɛk-roogẽ wã. Bãmb n da tog n ges sɛk-roogã yelle, la b maand maandã n kõt a Zeova. Yaa a Aarõ sẽn yaa maan-kʋʋdb kãsmã bal n da tar sor n na n kẽ zĩ-sõng sẽn yɩɩdã pʋgẽ. Yʋʋmdã pʋgẽ, a ra kẽeda be vugr bala, n maan maoong yẽ mengã yel-wẽn yĩnga, a zakã rãmb la Israyɛll nebã fãa yel-wẽn yĩnga.

Israyɛll nebã sẽn yi Ezɩptã yʋʋmd poore, b maana sɛk-roogã n sa. Masã, b tara zĩig b sẽn tõe n kẽng n tɩ pʋʋs a Zeova.

A Zeova kɩtame tɩ sawadg puk sɛk-roogã zugu, sẽn na yɩl n wilg t’a sũur nooma ne roogã. Sawadgã sã n yas roogã zugu, nebã ra pa yikd ye. La sawadgã sã n zẽke, b bãngdame tɩ b tog n yikame n sɩng kẽna. B ra sikda sɛk-roogã, n tũ sawadgã.