Israyɛll nebã yii Sinayi tãngẽ wã n pasg Paaran weoogã n ta tẽng b sẽn boond tɩ Kadɛɛs. Beenẽ, a Zeova yeela a Moyiiz yaa: ‘Yãk rap 12 n tʋm tɩ b tɩ ges Kanaã tẽngã mam sẽn na n kõ Israyɛll nebã. Yãk rao a ye Israyɛll buud fãa pʋgẽ.’ A Moyiiz sɩd yãka rap 12 n yeel-b yaa: ‘Kẽng-y Kanaã n tɩ ges tẽngã sã n yaa sõma n sakd koodo, tẽngã neb sã n tara pãng bɩ b pa tar pãnga, la b sã n tara tẽns sẽn gũbg lals bɩ b sã n bee fu-rot pʋsẽ.’ A Zozuwe ne a Kalɛɛb ra bee rap 12 sʋka.

Rasem 40 poore, rap 12 lebg n waame. B zãa kankama, grenaad biisi, ne reezẽ biisi. B sẽn wa wã, b yeelame: ‘Tẽngã yaa sõma, la nebã tara pãng wʋsgo, tɩ b tẽnsã lals me yaa bɛda.’ La a Kalɛɛb yeelame yaa: ‘Tõnd tõe n tõog-b lame. Yik-y tɩ d kẽnge.’ Fo mii bũmb ning sẽn kɩt t’a yeel woto wã bɩ? Bala yẽ ne a Zozuwe ra miime t’a Zeova na n sõng-b lame. La rap 10 sẽn kellã yeelame: ‘Kanaã nebã yaa bɛda la wogdo. Tõnd sã n yas b taoore, d yaa wa sʋya.’

Israyɛll nebã sũurã sãamame, tɩ b yeel yaa: ‘Wa-y tɩ d yãk ned a to t’a lʋɩ d taoore, tɩ d leb Ezɩpti. Bala tõnd sã n kẽng Kanaã, b na n kʋʋ tõndo.’ A Zozuwe ne a Kalɛɛb yeelame yaa: ‘Da kɩɩs-y-yã a Zeova ye. Ra zoe-y rabeem ye. A Zeova na n sõnga tõndo.’ La Israyɛll nebã pa kelg-b ye. B baoome meng n na n kʋ-ba.

Bõe la a Zeova maan-yã? A yeela a Moyiiz yaa: ‘Baa bũmb nins fãa mam sẽn maan n kõ Israyɛll nebã, b ket n kɩɩsda mam goamã. M na n kɩtame tɩ b pa weoogã pʋgẽ yʋʋm 40, n ki be. Yaa b kambã, n paas a Zozuwe ne a Kalɛɛb bal n na n paam n kẽ tẽng ning mam sẽn yeel tɩ m na n kõ-b lame wã.’

Israyɛll nebã sẽn wa n be weoogẽ wã, neb n yik n kɩɩs a Moyiizi. Yaa a Koore, a Datã, a Abiram n paas neb kobs-yi la pis-nu. B yeela a Moyiiz yaa: ‘Tõnd yamã yii foo. Bõe yĩng tɩ yaa foo n lʋɩt tõnd taoore, t’a Aarõ yaa maan-kʋʋdb kãsma? A Zeova bee ne tõnd fãa. Pa ne foo la a Aarõ bal ye.’ B sẽn yeelã pa yɩ a Zeova noog ye. Bala b sẽn kɩɩs a Moyiizã, yaa yẽ la b kɩɩs-yã.

A Moyiiz yeela a Koore ne a nebã yaa: ‘Beoogo, rɩk-y y wisdã laas n wa sɛk-roogẽ wã. A Zeova na n wilga sẽn yaa ned ning la a yãk-yã.’

Vẽkembeoogã, a Koore ne rap kobs-yi la pis-nu wã waa a Moyiiz nengẽ sɛk-roogẽ wã. B sẽn ta, b maana wa yaa bãmb la maan-kʋʋdbã, n yõog wisdu. A Zeova yeela a Moyiiz ne a Aarõ yaa: ‘Lak-y n bas-y-yã a Koore ne a nebã.’

A Koore kẽnga a Moyiiz nengẽ sɛk-roogẽ wã, la a Datã ne a Abiram la b zakã rãmb zãgsame tɩ b kõn kẽng ye. A Zeova yeela Israyɛll nebã tɩ b serg n bas a Koore ne a Datã la a Abiram fu-rotã. Israyɛll nebã sɩd lakame. A Datã ne a Abiram la b zakã rãmb yiime n yals b fu-rotã noore. Zĩig pʋgẽ, tẽngã pãrga zĩis a yi, tɩ b fãa lʋɩ bokẽ wã n ki. Sɛk-roogẽ wã me, bugum n yi yĩngr n wa rɩ a Koore ne rap kobs-yi la pis-nu wã.

A Zeova yeela a Moyiiz yaa: ‘Kɩt tɩ buud fãa taoor soab wa ne rasaare, tɩ f gʋls a yʋʋrã a rasaarã zugu. Gʋls a Aarõ yʋʋrã Leevi buudã rasaar zugu. Ning rasabã fãa sɛk-roogẽ wã, la ned ning mam sẽn yãkã rasaar na n yii fɩlɛɛr-dãmba.’

Vẽkembeoogã, a Moyiiz wʋka rasabã fãa n wa wilg taoor-dãmbã. A Aarõ rasaarã ra yii fɩlɛɛr-dãmba, hal n wom biisi. Woto, a Zeova wilga vẽeneg tɩ yaa a Aarõ la a yãk-yã, t’a yaa maan-kʋʋdb kãsma.