Rap nins a Zozuwe sẽn tʋmã taa Zeriko. B tɩ kẽe pag a ye zakẽ. Pagã yʋʋr la a Rahaab. Zeriko rĩmã bãngame, n tʋm sodaas a Rahaab zakẽ wã. A Rahaab ra kɩtame tɩ rap a yiibã rʋ a roogã zug n solge. Sodaasã sẽn wa wã, a Rahaab belg-b lame tɩ b rɩk sor a to n looge. Rẽ poore, a yeela rap a yiibã yaa: ‘M na n sõnga yãmba, bala m miime t’a Zeova bee ne yãmba, la tɩ yãmb na n wa reega tẽngã. La m kot-y lame tɩ y fãag m zakã rãmba.’

Rapã yeela a Rahaab yaa: ‘Neb nins fãa sẽn na n wa pa fo roogẽ wã pa na n ki ye. Rɩk wĩ-moomd n loe fo fenetrẽ wã, tɩ bũmb pa na n maan f zakã rãmb ye.’

A Rahaab loee wĩir a fenetrẽ wã, tɩ rap a yiibã tũ be n sigi. B teesa tãmsẽ wã, n tɩ solg be rasem a tãabo, n yaool n na n leb a Zozuwe nengẽ. Israyɛll nebã pasga Zʋrdẽ kʋɩlgã, n na n tɩ zab n deeg tẽngã. Zeriko n yɩ pipi tẽng b sẽn zab n deege. A Zeova yeel-b lame tɩ daar fãa bɩ b kẽn n gilg tẽngã vugri. B maana rẽ rasem a yoobe. La rasem a yopoe daarã, b gilga tẽngã naoor a yopoe. Rẽ poore, maan-kʋʋdbã peeba b bardã, tɩ tã-biisã kelem ne b pãng fãa. Tẽngã lals lʋɩɩme, la a Rahaab roogã sẽn da me n tong ne lalgã pa lʋɩ ye. A sẽn teeg a Zeova wã, yẽ ne a zakã rãmb põsame.

Kanaã tẽns a taabã wʋma bũmb ning sẽn maan Zeriko wã. B nanambsã yãka yam n na n naag taab n tɩ zab ne Israyɛll nebã. La Gabawõ nebã maana yam. B yãka neb tɩ b yeelg fu-kʋd sẽn pãrse, n kẽng a Zozuwe nengẽ n tɩ yeel yaa: ‘Tõnd yii tẽng sẽn zãre. Tõnd wʋmame tɩ b gom a Zeova yelle, la bũmb nins fãa a sẽn maan n kõ yãmb Ezɩpt la Mowaab tẽnsẽ wã. Tõnd kotame tɩ y ra wa zab ne tõnd ye. La tõnd na n lebga yãmb tʋm-tʋmdba.’

A Zozuwe ra tẽedame tɩ b sẽn yeel tɩ b yita tẽng sẽn zãrã yaa sɩda, t’a yeel-b tɩ Israyɛll nebã pa na n zab ne-b ye. Rasem a tãab poore, a Zozuwe bãngame tɩ b yagame, la tɩ b wẽneg n bee Kanaã. A soka Gabawõ nebã yaa: ‘Bõe yĩng tɩ yãmb yag ziri?’ Tɩ b leoke: ‘Rabeemã yõka tõndo. Tõnd miime tɩ yãmb Wẽnnaam a Zeova zabdame n sõngd yãmba. Da kʋ-y tõnd ye.’ A Zozuwe maana wa a sẽn da yeelã, a pa kʋ-b me ye.

Kanaã nanambs a nu ne b tãb-biis n yik n na n tɩ zab ne Gabawõ nebã. A Zozuwe ne a tãb-biisã kẽna yʋng tõre, n na n tɩ fãag Gabawõ nebã. B sɩnga zabrã yibeoogã pĩnda. Kanaã nebã ra zoet n teesda zĩig fãa. La b sẽn kẽngẽ fãa, a Zeova kɩtdame tɩ sa-pɩlem sẽn yaa bɛd-bɛd lʋɩ n kʋ-ba. A Zozuwe kosa a Zeova, t’a kɩt tɩ wĩntoogã yals n kaoos n pa yẽrg ye. Wĩntoogã ra zɩ n maan woto ye. Bõe yĩng t’a kos a Zeova t’a kɩt tɩ wĩntoogã yalse? Bala a ra teega a Zeova. Wĩntoogã yalsa daarã tõre, hal tɩ Israyɛll nebã tõog Kanaã nanambsã la b tãb-biisã fãa.