Yɛlã sã n wa kɩt tɩ y yam yi vɩɩmã

A Adriana sẽn yit Berzɩllã yeelame: “Tagsg a woto da namsda maam n pa satẽ ye. Rẽ n so tɩ m wa tags tɩ sẽn são yaa m sẽn na n kʋ m menga.”

RẼ YĨNGA, yɛlã zoe n looga y nug tɩ kɩt tɩ y yam pa le be vɩɩmã bɩ? Sã n yaa woto, y wʋmda a Adriana sẽn yeelã võore. A ra maanda yɩɩr wʋsgo, t’a sũurã sãam hal t’a pa le tẽed manegr ye. Logtoɛɛmbã yeelame t’a bẽeda yam-ka-m-meng bãagã.

D gom a Kaoru me yelle. Yaa rao sẽn yit Zapõ. A ra geta a roagdb sẽn kʋʋl la sẽn ka keem yelle. Ad a sẽn yeele: “Wakat-kãng me, m tʋʋmã zĩigẽ zu-loeesã ra yaa wʋsgo. Wa n kɩtame tɩ m yam ka rɩɩbo, la m pa gõe sõma me ye. M wa n tagsdame tɩ m yellã tɩɩm yaa m sẽn na n ki.”

A Ojebode yaa rao sẽn yit Nizeriya. A yeelame: “Wakat fãa, m sũurã ra sãamdame, tɩ m tar yãbr bala. Kɩtame tɩ m da baood m sẽn tõe n maan n kʋ m menga.” Zu-noogo, a Ojebode, a Kaoru ne a Adriana pa kʋ b mens ye. La yʋʋmd fãa, yaa sẽn ta neb tusa n kʋʋd b mense.

YƐ LA Y TÕE N PAAM SÕNGRE?

Neb nins sẽn kʋ b mensã sʋka, wʋsg yaa rapa. B wʋsg pa tɩ kos sõngre, b sẽn zoe yãnd yĩnga. A Zeezi yeelame tɩ yaa bãad-rãmbã n baood tɩbsgo. (Luk 5:31) Dẽnd yãmb sũurã sã n sãamame hal n kɩt tɩ y tagsd tɩ y sẽn kiid n são, d kot-y lame tɩ y kos sõngr n da zoe yãnd ye. Neb wʋsg sẽn bẽed yam-ka-m-meng bãagã yeelame tɩ logtoɛɛmbã tɩbsgã sõngdame tɩ b tõogd n maood ne b sũ-sãamsã. A Ojebode, a Kaoru ne a Adriana paama logtoɛɛmb sõngre. Masã, b sũ-sãamsã boogame.

Sẽn na yɩl n sõng ned t’a mao ne a sũ-sãamsã, logtoɛɛmbã tõe n kõ-a-la tɩto, bɩ n yãk wakat n sõsd ne-a, n tõog n wʋm a yellã võore. Tõe n yɩɩ tɩtã la sõsgã me n naag taaba. Neb nins sẽn bẽed yam-ka-m-meng bãagã ratame tɩ b roagdbã la b zo-rãmbã tall sũ-mare, la b yɩ wʋmdba. Ninsaal pa tõe n paam zoa hakɩɩk a to n zʋʋg Wẽnnaam a Zeova ye. Ne a Gomdã sẽn yaa Biiblã maasem, a sõngda tõnd tɩ d paamd belsg meng-menga.

YÃMB YELLÃ TARA TƖƖM BƖ?

Naoor wʋsgo, neb nins sẽn bẽed yam-ka-m-meng bãagã tɩbsgã wogendame. B tog n toeema bũmb kẽer b vɩɩmã pʋgẽ me. Yãmb sã n bẽeda yam-ka-m-meng bãagã, y tõe n maana wa a Ojebode, n tags beoog-daar sẽn na n yɩ neerã yelle. Ad a sẽn yeele: “M da tagsda Ezayi 33:24 goamã pidsgã yelle. Vɛrse wã wilgdame tɩ wakat n na n wa zĩnd tɩ ‘tẽngã ned kõn yeel t’a ka keem ye.’” Wa a Ojebode, y sã n bʋgsd Wẽnnaam sẽn pʋlem tɩ dũni-paalgã pʋgẽ ‘toog’ pa na n le zĩndã na n kenga y raoodo. (Vẽnegre 21:1, 4) A pʋlmame tɩ toog buud fãa na n saame. Y sũ-sãamsã na n saa wakat fãa yĩnga. Y ‘kõn tol n leb n tẽeg sẽn zĩnd pĩndã yell ye, y kõn leb n tags b yell ye.’—Ezayi 65:17.

Biiblã vɛrse-rãmb sẽn tõe n sõng-yã

Wẽnnaam wʋmda y sũ-sãamsã võore.

“Mam yaa Sẽn-Ka-Saab sẽn yaa fo Wẽnnaam, soab ning sẽn gãta fo nug-rɩtg n yet-f yaa: ‘Da zoe rabeem ye. Mam wat n na n sõnga foom.’”—Ezayi 41:13.

A Zeova wʋmda tõnd sũ-sãamsã võor n yɩɩd ninsaal buud fãa. A rat n sõng-d lame me.

Bʋgs-y Wẽnnaam Gomdã zugu.

“A Eli . . . kosa kũum n yeele: ‘Sẽn-Ka-Saabo, . . . reeg-y m vɩɩmã.’”—1 Rĩm-dãmbã 19:4.

A Ojebode yeelame: “M sẽn bʋgsd Wẽnnaam Gomdã zugã sõngda maam. M bãngame tɩ no-rɛɛs a Eli me ra tara m tagsa wã buudu.”

Rɩk-y yam Biiblã kibay pʋgẽ.

“Mam [a Zeezi] yõka Wẽnnaam sɛɛg fo [a Pɩyɛɛr] yĩng sẽn na yɩl tɩ f tẽebã ra koms zãng ye.”—Luk 22:32.

Tʋm-tʋmd a Pɩyɛɛr sẽn kɩɩs t’a pa mi a Zeezi naoor a ta wã poore, a sũur sãamame hal t’a yãb ne sũ-sãang wʋsgo. A Kaoru yeelame: “A Pɩyɛɛr kibarã sõnga maam tɩ m bãng t’a Zeova ne a Zeezi fãa ra wʋmda a sũ-sãangã võore. Rẽ kenga maam raoodo.

Y ‘kõn tol n leb n tẽeg sẽn zĩnd pĩndã yell ye, y kõn leb n tags b yell ye.’—Ezayi 65:17