2 Tɩmote 1:7: “Vʋʋsem sõngã Wẽnnaam sẽn kõ tõndã pa kɩt tɩ d yaa rabɛɛmb ye”

“Bala vʋʋsem sõngã Wẽnnaam sẽn kõ tõndã pa kɩt tɩ d yaa rabɛɛmb ye. La a kõta tõnd pãnga, nonglem, la yam-vẽenem.”—2 Tɩmote 1:7, Dũni-paalgã lebgre.

“Ka rabeem la Wẽnd kẽes d sũurẽ ye, b kõo tõnd b Vʋʋsem sẽn ya pãnga la nonglem la tõog-m-menga.”—2 Tɩmote 1:7, Sebr Sõngo.

2 Tɩmote 1:7 goamã võore

Wẽnnaam tõe n sõnga ned t’a paam raood n tõog n maan sẽn yaa tɩrga. Wẽnnaam pa rat tɩ d bas tɩ rabeemã tõog-d ye. Bala rabeemã tõe n kɩtame tɩ d pa tõog n maan bũmb nins sẽn tat a yamã ye.

Bɩ d gom zʋg-sõma a tãabã Wẽnnaam sẽn kõtã, tɩ b gomd rẽ yell vɛrse wã pʋgẽ wã sẽn tõe n sõng-d to-to tɩ d tõog d rabeemã.

“Pãnga.” Kiris-nebã tõog n talla raood n tũ a Zeova, bɛɛb wʋsg la zu-loe-kɛgems taoore. B pa tar n leb poorẽ rabeem yĩng ye. (2 Korẽnt rãmbã 11:23-27) Bõe n sõng-ba? Rẽ wɛɛngẽ, tẽn-tʋmd a Poll yeelame yaa: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.” (Filip rãmbã 4:13) Wẽnnaam tõe n kõo neb nins sẽn tũud-a wã “pãng ning sẽn yɩɩd ninsaal rẽndã,” tɩ b tõog n mao ne zu-loɛɛg buud fãa.—2 Korẽnt rãmbã 4:7.

“Nonglem.” Yaa kiris-ned sã n nong Wẽnnaam ne a sũur fãa la a na n tõog n t’a tall raood n maan sẽn yaa tɩrga. Woto me, kiris-ned sã n nong neb a taabã, na n kɩtame t’a lʋɩɩsd b raabã taoore, baa nebã sã n namsd-a, wall baa rẽ sã n tõe n tũ ne a yõore.—Zã 13:34; 15:13.

“Yam-vẽenem.” Biiblã pʋgẽ, b sã n gomd ned sẽn tar yam-vẽenem yelle, naoor wʋsgo yaa kiris-ned sẽn tõe n tik Biiblã saglsã zug n bãng n yãk yam yell la b gomda. Ned sẽn tar yam-vẽenem kelld n talla yam-sõngo, baa sã n wa pa nana ne-a. A sẽn yãkd yam ninsã wilgdame t’a geta yɛlã wa Wẽnnaam sẽn get-b to-to wã, la t’a miime tɩ zood ning a sẽn tar ne Wẽnnaamã n tar yõod n yɩɩd neb a taabã sẽn tagsd bũmb ningã.

B sẽn yeel bũmb ning n yaool n na n togs 2 Tɩmote 1:7 goamã

Yiib Tɩmote sebrã sẽn be Biiblã pʋgẽ wã yaa lɛtr tẽn-tʋmd a Poll sẽn gʋls n tool a zo-nongr la a tʋmd-n-taag a Tɩmote. Lɛt-kãng pʋgẽ, a Poll sagla a Tɩmote sẽn da yaa bi-bɩɩgã t’a kell n tʋm Wẽnnaam tʋʋmdã ne a sũur fãa. (2 Tɩmote 1:1, 2) Tõe t’a Tɩmote ra yaa ned sẽn zoet yãnde, tɩ rẽ ra tõe n kɩt t’a pa tõog n tʋm ne a sũur fãa kiris-neb tigingã pʋgẽ wa sẽn da segdã ye. (1 Tɩmote 4:12) A Poll tẽega a Tɩmote tɩ b kõ-a-la kũuni, rat n yeel tɩ tʋʋmd sẽn yaa toor zall tigingã pʋgẽ. A yeel-a lame t’a ra zoe rabeem a sã n wa sagend a tẽed-n-taasã a sẽn yaa yel-gɛt tigingã pʋgẽ wã yĩnga, t’a ra zoe rabeem a sã n wa moond koe-noogã, la b sã n wa namsd-a a tẽebã yĩnga.—2 Tɩmote 1:6-8.

Yaa sɩd tɩ yaa a Tɩmote la a Poll taas gom-kãensã, la sõngda neb nins fãa sẽn dat n tũ Wẽnnaam rũndã-rũndã wã tɩ b bas b yam t’a na n sõng-b lame tɩ b tõog n maan a raabã, baa sẽn wa n yaa yell ninga.