Zood tallg baoodame tɩ y tʋm zood tʋʋmde

Zood yẽbga nonglem zugu. Y sã n zãmsd n paasd a Zeova zugu, y nonglmã ne-a na n paasame. Y nonglmã ne Wẽnnaam sã n paasdẽ, y na n tʋll n sõgen-a lame n paase. Rẽ na n tusa yãmb tɩ y lebg a Zezi Kirist karen-biiga. (Matɩe 28:19) Y sã n lagem a Zeova Kaset rãmbã zag-kãsenga, y tõe n yõga zood ne Wẽnnaam wakat sẽn-kõn-sa yĩnga. Bõe la y segd n maane?

Y segd n wilga nonglem ne Wẽnnaam n sak a tõodã. “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.”—1 Zã 5:3.

Tũ-y y sẽn zãmsd bũmb ningã. A Zezi togsa kɩbar sẽn wilgd rẽ. Rao sẽn tar yam n me a roog pĩig zugu. Tɩ yalem me a roog bĩisr zugu. Saag ne seb-kãseng sẽn wa n wa, roog ning b sẽn me pĩigã zugã pa lʋɩ ye, tɩ roog ning b sẽn me bĩisrã zugã lʋɩ n wã bõga. A Zezi yeelame tɩ neb nins sẽn kelgd a zãmsgã n tũudẽ wã wõnda rao ning sẽn tar yam sẽn me a roog pĩig zugã. La neb nins sẽn kelgd a zãmsgã n pa tũudẽ wã wõnda yalma sẽn me bĩisr zugã. Bʋg la y rat n wõneg bãmbã b yiibã sʋka?—Matɩe 7:24-27.

Rɩk-f-meng-n-kõ wã. Woto rat n yeelame tɩ y pʋʋs a Zeova n yeel-a tɩ y rat n maana a raabã wakat sẽn-kõn-sa yĩnga. Y sã n maand Wẽnnaam daabã, wilgdame tɩ y ya a Zezi Kirist karen-biiga.—Matɩe 11:29.

Lisgu. “Bɩ y yik n deeg koom lisgu la y pʋʋs ne Zusoaba yʋʋre tɩ y sũura paam pekre tɩ y yel-wẽna yi.”—Tʋʋma 22:16.

Bɩ y kẽes y meng zãng-zãng Wẽnnaam sõgenegã pʋgẽ. “Yãmb sẽn maand bũmb ning fãa, tʋm-y ne y sɩɩga fãa a Zeova yĩng la pa ninsaalbã yĩng ye.”—Kolos rãmbã 3:23, NW.