Yãmb mii a Zeova Kaset rãmb a wãna? Tõe tɩ kẽer yaa yãmb yagse, y tʋmd-n-taas bɩ y karen-bi-taase. Tõe me tɩ b zoe n wa sõsa ne yãmb Biiblã zugu. La a Zeova Kaset rãmbã yaa ãnd dãmba? Bõe yĩng tɩ b kẽnd nebã nengẽ n sõsd ne-ba?

Tõnd me yaa wa neb a taabã. D yaa buud toor-toor neba, tɩ d minimdã la d tarmã me pa yembr ye. Tõnd sʋkã, kẽer da bee tũudum a taab pʋsẽ, tɩ sãnda pʋd n da pa tẽed Wẽnnaam ye. La ned fãa wa n paamame t’a Zeova Kaset soab sõng-a t’a maag a yĩng n zãms Biiblã. (Tʋʋma 17:11) D sak n deega d sẽn zãms bũmb ningã, n yãk yam n na n tũ Wẽnnaam a Zeova.

Biiblã zãmsgã nafda tõndo. Tõnd me tara zu-loees la pãn-komsem wa neb a taabã. La d sẽn modgd n tũud Biiblã noyã daar fãa wã yĩnga, d yãtame tɩ d vɩɩmã lebgda sõma n yɩɩd pĩndã. (Yɩɩl Sõamyã 128:1, 2) Woto yaa bʋʋm sẽn kɩt tɩ d togsd nebã d sẽn bãng bũmb nins Biiblã pʋgẽ wã.

Tõnd tũuda Wẽnnaam noyã. Wẽnnaam noyã bee Biiblã pʋgẽ. D sã n tũud no-kãense, d vɩɩmã yaa noogo, d waoogda nebã, n yaa pʋ-peelem dãmb la nin-sõmã. Wẽnnaam noyã tũub kɩtdame me tɩ d yaa neb sẽn nong laafɩ la bãane, tɩ d zagsã neb nong taab la b tar manesem sõma. A Zeova Kaset rãmbã sẽn mi tɩ “Wẽnnaam pa tũusd nebã” yĩnga, b fãa sẽn be dũniyã gill zugã yaa saam-biisi, tɩ welgr kae b sʋk ye. Baa ne tõnd ned kam fãa sẽn yaa wa neb a taabã, d yaa nin-buiid sẽn yaa toor fasɩ.—Tʋʋma 4:13; 10:34, 35.

• Bõe yĩng tɩ d tõe n yeel t’a Zeova Kaset rãmbã me yaa wa neb a taabã?

• A Zeova Kaset rãmbã sẽn zãmsd Biiblã kɩtame tɩ b maand bõe?

Neb wʋsg tagsdame tɩ yaa tũudum paalle. La sẽn yɩɩd yʋʋm 2700 masã, Biiblã pʋgẽ b boola neb nins sẽn da tũud Wẽnnaam sɩd-sɩdã tɩ Wẽnnaam “kaset rãmba.” (Ezai 43:10-12) Hal n tãag yʋʋmd 1931 wã tɩ b ra boonda tõnd tɩ Biiblã Zãmsdba. Bõe yĩng tɩ d pʋd d mens masã t’a Zeova Kaset rãmba?

Wilgda Wẽnnaam ning d sẽn tũudã. B sẽn wa n gʋls Biiblã tɩ Wẽnnaam yʋʋrã sẽn yaa Zeova wã bee be sẽn yɩɩd naoor tus a yopoe. Biibl dãmb wʋsg pʋgẽ, b ledga yʋ-kãngã ne Zusoaba bɩ Wẽnnaam. La Wẽnnaam sɩd-sɩdã togsa a Moiiz a yʋ-peellã sẽn yaa Zeova wã, la a yeel woto: “Yõwã na n yɩɩ mam yʋʋr wakat fãa.” (Yikri 3:15) A sẽn vẽneg a yʋʋrã, a welga a meng fasɩ ne wẽn-faadã. D sẽn paam tɩ b boond-d t’a Zeova Kaset rãmbã yaa zu-zẽkre!

Wilgda tõnd tʋʋmd sẽn yaa a soaba. Hal sẽn sɩng ne nin-tɩrg a Abɛlle, wẽn-tũudb wʋsg n zĩnd n kõ kaseto, n wilg tɩ b tẽeda a Zeova. Sɩd me, Biiblã sõdga “kaset dãmb wʋsgo,” wa a Nowe, a Abrahaam, a Saara, a Moiiz, a Davɩɩd la neb a taab sẽn zĩnd pĩnd wẽndẽ. (Hebre dãmba 11:4–12:1) Tõnd data ne d sũy fãa n kõ kaseto, tɩ nebã bãng sɩdã Wẽnnaam zugu, wa ned b sẽn bool bʋʋd zĩigẽ t’a na n kõ kaset n sõng bʋʋm soaba.

Tõnd dɩkda a Zezi togs-n-taare. Biiblã pʋgẽ, b boonda a Zezi tɩ “kaset soab sẽn yaa tɩrg la sɩda.” (Wilgri 3:14) A Zezi meng yeelame tɩ yẽ ‘wilga nebã Wẽnnaam yʋʋre,’ la a kɩs kaset sẽn yaa sɩd Wẽnnaam zugu. (Zã 17:26; 18:37) Dẽnd b segd n boonda kiris-neb hakɩkã t’a Zeova Kaset rãmba. Nin-kãensã segd n sõnga nebã tɩ b bãng Wẽnnaam yʋʋrã. Yaa woto la a Zeova Kaset rãmbã modgd n maandẽ.

• Bõe yĩng tɩ Biiblã Zãmsdbã pʋd b mens t’a Zeova Kaset rãmba?

• Hal sẽn sɩng wakat bʋg la a Zeova tar kaset rãmb tẽngã zugu?

• Ãnd n yaa a Zeova Kaset soab sẽn ka to?

Biiblã ra reng n togsame tɩ Kiristã kũum poore, neb n na n yik pipi kiris-nebã sʋk n zãms b taabã yɛl sẽn pa yit Biiblã pʋgẽ. (Tʋʋma 20:29, 30) Sɩd yɩɩ woto. Nin-kãensã kalma a Zezi sẽn zãms nebã bũmb ninsã ne sẽn da pʋʋsd-b wẽn-faadã sẽn tẽed bũmb ninsã, tɩ rẽ kɩt tɩ tũudum sẽn pa Kirist tũudum hakɩk sɩnge. (2 Tɩmote 4:3, 4) La bõe n wilgd t’a Zeova Kaset rãmbã sẽn wʋmd Biiblã goam võor to-to rũndã-rũndã wã sɩd zemsame?

A Zeova wa n kɩtame tɩ sɩdã puki. A Zeova ra pĩnd n togsame tɩ ‘sɛɛbã wakate, bãngr hakɩkã na n paasa wʋsgo.’ (Daniɛll 12:⁠4) Yʋʋmd 1870 wã sẽnese, neb sul-bil sẽn da baood sɩdã wa n bãngame tɩ egiliizã rãmb zãmsda nebã bũmb wʋsg sẽn pa yit Biiblã pʋgẽ. Rẽ kɩtame tɩ b sɩng n na n bao n bãng Biiblã sẽn sɩd yetã. A Zeova ning-​⁠b-​⁠la bark tɩ b bãnge.

B zãmsa Biiblã ne b sũy fãa. Sul-kãngã b sẽn da boond tɩ Biiblã Zãmsdbã sẽn da zãmsd Biiblã to-to wã yaa sõma. Tõnd me maanda wa bãmba. B ra yãkda gomde, n vaees Biiblã n wʋm a vɩʋʋgã sõma. B sã n yã vɛrse t’a võorã yaa toogo, b gẽesda vɛrse rãmb a taab sẽn na n sõng-b tɩ b wʋm a võorã. B sã n wʋm a võorã, n ges tɩ pa kɩɩsd Biiblã goam a taabã, b gʋlsda rẽ n bĩngi. Dẽnd yaa Biiblã n wẽnegd n sõng-b tɩ b wʋm a goamã võore. Rẽ n sõng-b tɩ b bãng sɩdã Wẽnnaam yʋʋrã la a Rĩungã wɛɛngẽ, la a sẽn da rat tɩ ninsaalbã vɩɩm la tẽngã yɩ to-to. B leb n bãnga bũmb ning sẽn maand ned kũum poore, la b bãng me tɩ sẽn ki-bã na n wa vʋʋgame. Woto fãa kɩtame tɩ b paam b mens ne ziri la minimd sẽn da piuugi.​—⁠Zã 8:⁠31, 32.

Yʋʋmd 1879 wã tɛka, b bãngame tɩ wakat taame tɩ b segd n kɩt tɩ dũniyã gill neb bãng sɩdã. Yʋʋm-kãng bala, b yiisa sebr ning sẽn boond tɩ Gũusg Gasgã Moonda a Zeova Rĩungã, sẽn ket n yit rũndã-​rũndã wã. Masã, d moonda Biiblã sẽn yet bũmb ninsã tẽns 240 pʋgẽ, ne sẽn ta buud-goam 750. Sɩd-sɩdã, bãngr hakɩkã zɩ n piuug n ta woto ye.

• Kiristã kũum poore, bõe n maane?

• A Zeova Kaset rãmbã maana wãn n lebg n bãng sɩdã?

A Zeova Kaset rãmbã ra zãmsda Biibl dãmb sẽn pa bãmb dẽnda, la b yiisd n kõt nebã. La b wa n mikame tɩ yaa sõma tɩ bãmb mengã yiis Biibl sẽn na n sõng nebã tɩ b “bãng sẽn yaa sɩdã,” bala yaa woto la Wẽnnaam rata. (1 Tɩmote 2:​3, 4) Rẽ n so tɩ yʋʋmd 1950 wã, b yiisa Biiblã sɛb kẽer ne ãngilindi, tɩ b boond tɩ New World Translation (Traduction du monde nouveau). B lebg-​⁠b lame tɩ kell n zems kɛpɩ ne Biiblã sɛb b sẽn gʋls ne nug tẽn-kʋdem wẽndẽ wã. B yiisa Biibl kãng ne buud-​goam sõor sẽn yɩɩd 130 masã.

Yɩɩ tɩlae tɩ b paam Biibl t’a goamã võor yaa nana. Nebã sẽn gomd b buud-goamã to-​⁠to wã toeemdame. Biibl dãmb wʋsg me gom-biis ra yaa kʋda, tɩ b võorã yaa toogo. Sẽn paase, b paama Biiblã seb-kʋd neb sẽn yã. Woto sõng-​⁠b lame tɩ b wʋm pĩnd buud-goam nins pʋgẽ b sẽn gʋls Biiblã pipi wã, rat n yeel tɩ hebre, arameẽ la gɛrk.

Yɩɩ tɩlae tɩ b paam Biibl t’a goamã zems ne Wẽnnaam sẽn sɩd yeelã. B sã n na n lebg Biible, segdame tɩ zems ne Wẽnnaam sẽn sɩd yeelã, la b ra lebg-a wa b mensã sẽn dat ye. Biibl dãmb wʋsg pʋsẽ, b yaool n yãka Wẽnnaam yʋ-peellã sẽn yaa Zeova wã.

Yɩɩ tɩlae tɩ b paam Biibl sẽn zẽkd Wẽnnaam yʋʋrã. (2 Sãmwɛll 23:2) Traduction du monde nouveau wã sẽn yaa Biibl ning a Zeova Kaset rãmbã sẽn lebgã pʋgẽ, b lebs n ninga Wẽnnaam yʋ-peellã zĩis 7000 wa sẽn da yaa to-to pipi Biibl dãmbã pʋgẽ wã. Pĩnd Biibl seb-pɛdg la sẽn be tẽngrã. B sẽn maag b yĩng n vaeesã kɩtame tɩ Biiblã b sẽn lebgã zems ne Wẽnnaam sẽn sɩd yeelã, t’a kareng me be yamleoogo. Y tara Biibl kãngã y buudã gomd pʋgẽ tɩ y pa tar me, modg-y n karemd-y a Zeova Gomdã daar fãa.—Zozue 1:8; Yɩɩl Sõamyã 1:2,3.

• Bõe n wa n kɩt t’a Zeova Kaset rãmbã na n lebg Biiblã b toore?

• Bõe la ned ning fãa sẽn dat n bãng Wẽnnaam daabã tog n maand daar fãa?