A Zeova Kaset rãmbã pa tar taoor-lʋɩtb sẽn tʋmd n deegd yaood ye. Wa b sẽn da maand to-⁠to pipi kiris-nebã wakatẽ wã, rũndã-rũndã me, yaa yel-gɛtb sẽn tar minim la b yãkd tɩ b get Wẽnnaam nebã a sẽn boond t’a piisã yelle. (Tʋʋma 20:⁠28) Yaa rap tẽeb sẽn tar pãnga. B lʋɩta taoor n get tigingã neb yelle. Pa “modgr yĩng ye, la yaa ne yamleoogo, . . . ka ligd yĩng ye, la yaa nonglem yĩnga.” (1 Pɩɛɛr 5:1-⁠3) Bõe la kãsem-dãmbã maand tõnd sõngr yĩnga?

B geta tõnd yelle, d neer yĩnga. Kãsem-dãmbã wilgda tõnd sẽn segd tũudmã wɛɛngẽ, la b sõngd tõnd sẽn na yɩl tɩ d ket n tat Wẽnnaam yam. B sẽn mi tɩ yaa Wẽnnaam n yãk-⁠b tɩ b get a nin-buiidã yellã, b pa baood n na n dɩ naam b zug ye. B pʋd n tʋmda tõnd neer la d sũ-noog yĩnga. (2 Korẽnt dãmba 1:⁠24) Kãsem-dãmbã modgdame n na n bãng tigingã ned kam fãa sõma, n tõog n ges a yell neer wa pe-kɩɩm sõng sẽn get a pesg fãa yell to-⁠to wã.—⁠Yelbũna 27:⁠23.

B sõngda tõnd tɩ d maand Wẽnnaam daabã. Semen fãa, kãsem-dãmbã lʋɩta taoor n get d tigissã yelle, tõnd tẽebã kengr yĩnga. (Tʋʋma 15:⁠32) B leb n lʋɩta taoor koɛɛgã mooneg pʋgẽ, n naagd tõnd n moondẽ la b sõngd-⁠d tɩ d paamd minim tʋʋmdã buk fãa pʋgẽ.

B kengda ned fãa pɛlga. Kãsem-dãmbã mi n sõsda ne ned kam fãa tigissã zĩigẽ wall b tɩ kaag-⁠a a yirã, n sõng-⁠a bɩ n keng a pɛlga. Woto yaa sẽn na yɩl tɩ zood ning ned fãa sẽn tar ne a Zeova wã pãng paase.—⁠Zak 5:⁠14, 15.

Kãsem-dãmbã tʋmda wʋsg tigingã pʋgẽ. La b fãa la bal yaa zak soben-dãmb me sẽn tʋmde, tɩ b tʋʋmã la b zakã rãmb yell gesg rɩkd b sẽkã. Saam-⁠bi-kãensã sẽn tʋmd sõma wã toga ne waoogr la pẽgre.—⁠1 Tesalonik rãmba 5:⁠12, 13.

• Kãsem-dãmbã tʋʋmd yaa bõe tigingã pʋgẽ?

• Bõe la kãsem-dãmbã maand tɩ wilgdẽ tɩ tõnd ned kam fãa yell pak-b lame?

B sõngda kãsem-​dãmbã sulli. Kẽer yaa kom-​bɩɩse, la sãnda yʋʋm vẽsgame. Yaa neb tẽeb sẽn tar pãnga, neb b sẽn tõe n kɩs sɩda, la sẽn tʋmd b tʋʋmd neere. B geta tigingã tʋʋm kẽer sẽn tar yõod wʋsg yelle. Woto kɩtdame tɩ kãsem-​dãmbã tõe n paam n wɩng ne nebã sõngr la b zãmsgo.

B tʋmda tʋʋm sẽn tar yõodo. B yãkda kẽer tɩ b yaa sãamb-​reegdba, n deegd neb nins sẽn wat tigissã. B tõe n yãka sãnda me tɩ b get sɛbã yelle, tigingã ligd geelgo, koe-moonegã zĩis la wʋmbã teed yelle. B sõngda ne Rĩungã roog yell gesg me. Kãsem-​dãmbã tõe n bõosa kãsemb-​sõngd t’a sõngd tigingã ned sẽn kʋʋle. Sẽn yaa tʋʋm ning fãa la b bobl kãsemb-sõngdbã, b sẽn tʋmd

ne yamleoogã kɩtame tɩ tigingã neb waoogd-⁠ba.​—⁠1 Tɩmote 3:⁠13.

B yaa kiris-​neb sẽn kõt mak-​sõngo. Yaa b zʋg-​sõma wã yĩng n kɩt tɩ b yãk-⁠b tɩ b yaa kãsemb-​sõngdbã. B sõssã d sẽn kelgd tigissã sasa wã kengda d tẽebã. B sẽn kõt mak-​sõng koɛɛgã mooneg pʋgẽ wã kɩtame tɩ tõnd me tar yẽesem. B sẽn sakd n teend kãsem-​dãmbã sullã sõngdame tɩ sũ-noog la zems-n-taar be tigingã pʋgẽ. (Efɛɛz rãmba 4:⁠16) Tarẽ-n-​tarẽ, b wat n tõe n yɩɩ kãsem-dãmba.

• Ãnd dãmb n tõe n yɩ kãsemb-sõngdba?

• Wãn to la kãsemb-sõngdbã sõngd tigingã?

Biiblã babg ning b sẽn gʋls ne gɛrkã pʋgẽ, b gomda a Barnabas ne tʋm-tʋmd a Poll yell wʋsgo. Yɩɩ yel-gɛtb sẽn da gilgd n kaagd tigimsã. Bõe yĩnga? Bala, b ra baooda b tẽed-n-taasã neer ne b sũy fãa. A Poll ra yeelame t’a ratame n “leb n kẽng n tɩ ges ba-biisã” n bãng b kibare. A sakame n na n tog soay n zãage, n tɩ keng b pelse. (Tʋʋma 15:⁠36) Yaa woto me ne tõnd tigims sul yel-gɛtbã.

B wat n kengda tõnd raoodo. Tigims sull yel-gɛtã kaagda tigims sõor sẽn na ta 20. A kaagda tiging fãa rasem a yopoe pʋgẽ, la naoor a yiib yʋʋmd fãa. Nin-​kãensã ne b pagbã minim tõe n nafa tõnd hal wʋsgo. B modgdame n bãngd tigimsã ned fãa sõma, n yãagd tõnd koɛɛgã mooneg pʋgẽ la d Biibl karen-biisã nengẽ. B tũuda kãsem-dãmbã n kaagd tigimsã neba. Tigissã la tigs-kãsemsã sasa, b sõssã d sẽn kelgdã kengda d raoodo.—Tʋʋma 15:35.

B rata tigimsã nebã fãa neere. Tigims sul yel-​gɛtbã rata ne b sũy fãa tɩ tigimsã neb tẽeb tall pãnga. B sã n kaag tiginga, b tigimda kãsem-dãmbã la kãsemb-sõngdbã n ges modgr ning tigingã sẽn maane, la b kõ-b sagls sẽn na n sõng-​⁠b b tʋʋmdã pʋgẽ. B sõngda so-pakdbã sẽn na yɩl tɩ b tʋm b tʋʋmdã neere. B sẽn paamd n bãngd nin-paalsã sẽn wat tigissã la modgr ning b sẽn maandã noom-​⁠b lame. Yel-​gɛtb kãensã tʋmda ne yamleoogo, tɩ b ned kam fãa yaa d ‘tʋmd-n-taag’ sẽn tʋmd tõnd neer yĩnga. (2 Korẽnt dãmba 8:⁠23) Bɩ d tall tẽeb la d yɩ wẽn-sakdb wa nin-kãensã.—Hebre dãmba 13:⁠7.

• Bõe yĩng tɩ tigims sul yel-gɛtbã kaagd tigimsã?

• Wãn to la d tõe n dɩ b kaagrã nafa?

Sabab wakate, a Zeova Kaset rãmbã yɩta tao-tao n ges b sẽn na n maaneg n tɩ sõng b saam-biis nins sababã sẽn paamã. Woto wilgdame tɩ d nonga taab hal wʋsgo. (Zã 13:⁠34, 35; 1 Zã 3:⁠17, 18) Bõe la d maand n sõngd-ba?

D toonda ligdi. Pipi kiris-nebã wakatẽ, kom kãseng sẽn wa n zĩnd Zide soolmẽ wã, Ãntios saam-biisã toola ligdi, n sõng kiris-nebã sẽn da be be wã. (Tʋʋma 11:⁠27-30) Rũndã-rũndã me, d sã n wʋm tɩ yel-beed n paam d saam-biisi, ned fãa kõta a sẽn tare, tɩ tigingã reeg n tool sẽn na yɩl tɩ b paam sẽn yaa tɩlae wã.—⁠2 Korẽnt dãmba 8:⁠13-15.

D kẽngdame n tɩ sõng-ba. Kãsem-dãmb nins sẽn be sababã sẽn zĩndẽ wã modgdame n bãng tiging fãa neb sẽn beẽ, la b keelem. B mi n yãka sull sẽn na n ges tɩ nebã paam rɩɩbo, ko-yɩlemde, futu, gãag zĩig la tɩbsgo. A Zeova Kaset rãmb sẽn tar minim tʋʋm kẽer pʋsẽ sakd n yãka b ligd n tog sore, n tɩ sõng nebã wall b maneg bɩ n lebs n me rot la Rĩung roto. D sẽn yaa nin-buiid sẽn nong taaba, la d paamd bãngr naag-taab-​⁠n-tʋmã pʋgẽ wã kɩtame tɩ toog wakat bɩ d yɩt tao-tao n sõngd d taabã. D sõngda “neb nins sẽn yaa tõnd ba-biis a Zezi tẽebã yĩngã,” la sã n tõe me, d sõngda neb a taabã, baa b sẽn be tũudum ning fãa pʋgẽ.​—⁠Galat dãmba 6:⁠10.

D kõt-b-la belsgo. Sabaab sẽn paam a soab sẽn dat n yɩɩd yaa belsgo. Yel-pakr wakate, d paamda belsg a Zeova sẽn yaa “belsg fãa Wẽnnaamã” nengẽ. (2 Korẽnt dãmba 1:​3, 4) La sabab sã n paam neba, tõnd taasd-b-la pʋlem-nood nins sẽn be Biiblã pʋgẽ wã, tɩ b bãng tɩ ka la bilfu, Wẽnnaam Rĩungã na n kɩtame tɩ yɛl nins fãa sẽn wat ne toog la namsgã sa.—Wilgri 21:4.

• Bõe n kɩt t’a Zeova Kaset rãmbã tõe n sõng b saam-biisã tao-tao yel-beed wakate?

• Bõe n be Biiblã pʋgẽ tɩ d tõe n taas sabaab sẽn paam-b rãmbã tɩ bels-ba?

A Zezi kũumã sẽn wa n kolgdẽ wã, daar a yembre, a sõsa ne a Pɩɛɛr la a Zak ne a Zã la a Ãndere. A sẽn wa n togsd-b bãnd ning sẽn na n wilg a waoongã wakatã, a soka woto: “Ãnda n yaa tʋm-tʋmd sẽn tũud sɩd la sẽn tar yam, t’a Zu-​soabã kõ-a noor t’a ges a zakã yelle, n moeneg a zakã wa sẽn zemse?” (Matɩe 24:3, 45; Mark 13:3, 4) A Zezi ra pa gomd rɩɩb sɩd-sɩd yell ye. Yaa bãngr ning d sẽn tõe n paam Wẽnnaam zugã la a sẽn mak ne rɩɩbã. A ra ratame t’a karen-biisã bãng tɩ yaoolem wakatã, yẽ sẽn yaa b “Zu-soabã” na n yãka neb tɩ b ges sẽn tũud-b yẽ wã yell tũudmã wɛɛngẽ wakat buud fãa. La na n yɩɩ ãnd dãmba?

Yaa sul-​bil sẽn yaa kiris-​neb sẽn paam vʋʋsem sõngã zaeebo.“Tʋm-tʋmdã” yaa a Zeova Kaset rãmbã Siglgã taoor lʋɩtb Sulli. A geta a Zeova nin-buiidã yell tũudmã wɛɛngẽ, wakat sẽn zemse. D sɩd teega tʋm-tʋmdã t’a get d yelle, ‘n moeneg-d wa sẽn zemse.’—⁠Luk 12:⁠42.

A geta Wẽnnaam nin-buiidã yelle. (1 Tɩmote 3:15) A Zezi rɩka a Zeova siglgã babg ning sẽn be tẽngã zugã n gũnug tʋm-tʋmdã, t’a get bũmb nins fãa b sẽn maand siglgã pʋgẽ wã yelle. Wala makre, yẽ n get siglgã rot ne masĩn dãmbã yelle, koɛɛgã mooneg yelle, la a zãmsd tõnd ne tigimsã maasem. Sẽn na yɩl tɩ d paam bãngr Wẽnnaam zug wa d sẽn dat la wakat sẽn zemse, “tʋm-tʋmd sẽn tũud sɩd la sẽn tar yamã” yiisda sɛba, la a sigind tigs la tigis-kãsemse.

Tʋm-tʋmdã tũuda sɩda, bala a tũuda sẽn be Biiblã pʋgẽ wã, la a tũud Biiblã sẽn yeel tɩ koe-noogã segd n mooname wã. A sẽn get Kiristã tẽng zug paoongã yell to-to wã wilgdame me t’a tara yam. (Tʋʋma 10:42) A Zeova ningda tʋm-tʋmdã modgrã barka, bala nebã kaoogd n wata a siglgã pʋgẽ, t’a sẽn maand bũmb nins b tẽebã kengr yĩngã me tar paasgo.—Ezai 60:22; 65:13.

• Ãnd la a Zezi yãk t’a na n ges sẽn tũud-b yẽ wã yell tũudmã wɛɛngẽ?

• Bõe n wilgd tɩ tʋm-tʋmdã tũuda sɩda, la a tar yam?

Pipi kiris-nebã wakatẽ, yaa “Zerizalɛm tʋm-tʋmdbã ne kãsem-dãmbã” n da lʋɩ b siglgã taoore. Sul-bil kãngã n da rɩkd sard kiris-neb nins fãa sẽn paam vʋʋsem sõng zaeebã yʋʋr yĩnga. (Tʋʋma 15:⁠2) Nand tɩ b rɩk sardo, b rengd n bao n bãnga Gʋlsg Sõamyã sẽn yet rẽ zugu, la b bas tɩ vʋʋsem sõngã wilg-b sore. (Tʋʋma 15:⁠25) Tõnd Siglgã taoor lʋɩtb Sullã me maanda woto.

Wẽnnaam yãk-b-la a raabã maaneg yĩnga. Siglgã taoor lʋɩtb Sullã neb sẽn paam vʋʋsem sõng zaeebã nonga Wẽnnaam Gomdã wʋsgo. B tara minim n tõe n ges koɛɛgã mooneg yelle. B leb n tara minim d tũudmã yɛl welgr pʋgẽ. B tigimda taab semen fãa n get b sẽn tõe n sõng a Zeova Kaset rãmbã sẽn be dũni gill zugã to-to. Sẽn na yɩl n kõ saam-biisã sagls sẽn tik Biiblã zugu, b toonda tigimsã lɛta wall b tʋmd tigims sul yɛl-getbã bɩ neb a taaba. Ra yaa woto me pipi kiris-nebã wakatẽ. Rẽ fãa kɩtame tɩ Wẽnnaam nin-buiidã naag taab yam a ye n tũud-​⁠a. (Tʋʋma 16:4, 5) Siglgã taoor lʋɩtb Sullã n get tɩ d paamd sẽn yaa tɩlae d tẽebã kengr yĩngã. B sagenda tõndo, tɩ d wɩngd ne koɛɛgã moonego. Bãmb n leb n get b sẽn bobl-b rãmb tʋʋmd siglgã pʋgẽ wã yãkr yelle.

B sakdame tɩ vʋʋsem sõngã wilgd-b sore. Siglgã taoor lʋɩtb Sullã teega a Zeova sẽn yaa yĩngr la tẽng naabã, la a Zezi sẽn yaa tigingã zugã, n paamd sor-wilgri. (1 Korẽnt dãmba 11:3; Efɛɛz rãmba 5:23) B pa tagsd tɩ b soo Wẽnnaam nin-buiidã ye. Bãmb ne kiris-neb nins fãa sẽn paam vʋʋsem sõng zaeebã ‘pʋgda Pe-bilã a sẽn kẽnd zĩig ninga fãa.’ (Wilgri 14:⁠4) Siglgã taoor lʋɩtb Sullã tara mi-beoog wʋsg ne tõndo, d sẽn pʋʋsd b yĩngã.

• Pipi kiris-nebã wakatẽ, ãnd dãmb n da yaa b taoor-lʋɩtba?

• Rũndã-rũndã, Siglgã taoor lʋɩtb Sullã maanda wãn n paamd Wẽnnaam sor-wilgri?

Betɛll yaa hebre gom-bila, t’a võorã yaa ‘Wẽnnaam doogo.’ (Sɩngre 28:⁠17, 19) Tẽns wʋsg pʋgẽ, a Zeova Kaset rãmbã tara Betɛlle. Yʋ-kãng zemsame, bala yaa be la b sigind koɛɛgã mooneg la b sõngdẽ t’a kẽngd taoore. Siglgã taoor lʋɩtb Sullã bee d Betɛll kãsengẽ wã Niuyorke, Etazĩni soolmẽ wã, n get tʋʋmd ning sẽn tʋmd d Betɛll dãmb a taabã pʋsẽ wã yelle. B boonda sẽn tʋmd-​⁠b Betɛll dãmbẽ wã tɩ Betɛll zak rãmba. Sɩd me, b vɩɩ ne taab wa zak a ye neba, n tʋmd ne taaba, n naagd taab n dɩtẽ la b naagd taab n zãmsd Biiblã.—⁠Yɩɩl Sõamyã 133:⁠1.

B yaa wa zak a ye rãmba, n pa tʋmd ligd yĩng ye. Pagb la rap nins sẽn be Betɛll dãmbẽ wã yãka yam n maand a Zeova raabã ne b sũy fãa, n kẽesd b sẽkã fãa Rĩungã tʋʋm pʋgẽ. (Matɩe 6:⁠33) B baa a ye pa reegd kiuug yaood ye. La yaa Betɛllã n kõt-​⁠b gãag zĩig ne rɩɩbo, la ligd bilf tɩ b tõe n da bũmb a taab sẽn yaa tɩlae. Betɛllã zak ned fãa tara a tʋʋmde. Kẽer tʋmda biru rãmbẽ, sãnda ragendã zĩigẽ bɩ roog ning pʋgẽ b sẽn tigimd taab n dɩtẽ wã. Neb a taab me tʋmda sɛbã yiisg zĩigẽ, kẽer yẽesda rotã, sãnda pɛgda futu, tɩ neb a taab manegd masĩn dãmbã la rotã.

B tʋmda wʋsg Rĩungã koɛɛg mooneg yĩnga. Betɛll pʋgẽ, b sẽn maandã fãa yaa sẽn na yɩl n sõng tɩ koe-noogã ta neb wʋsgo. Wala makre, yaa ne Betɛll dãmbã maasem la y sẽn paam sebrã y sẽn zãadã. Siglgã taoor lʋɩtb Sullã rengd n gesame tɩ b gʋls bũmb ning b sẽn na n wa ning sebrã pʋgẽ wã, n yaool n tũnug ne ẽntɛrnetã n tool rẽ sɛbã lebgr sull dãmb sẽn be Betɛll dãmbẽ wã. B sã n lebg sebrã n sa, b toond-​⁠a-​⁠la Betɛll sãnda pʋsẽ tɩ b yiis n tool tigimsã sõor sẽn yɩɩd 110 000. Tʋʋm-kãngã fãa pʋgẽ, ned fãa maanda a sẽn segd n maanã, n miẽ tɩ teenda koɛɛgã mooneg sẽn tar yõod n yɩɩdã.​—⁠Mark 13:⁠10.

• Ãnd dãmb n tʋmd Betɛll dãmbẽ wã, la wãn to la b get b yelle?

• B sẽn maand Betɛll dãmbẽ wã fãa teenda tʋʋm-bʋg sẽn tar yõodo?

Betɛllã zak rãmb tʋmda tʋʋm toor-toor sẽn na yɩl tɩ koɛɛgã mooneg kẽng taoor b tẽngẽ wã, bɩ tẽns a taab me pʋsẽ. Neb kẽer lebgda sɛba, tɩ neb a taab yiisdẽ, tɩ sãnda ningd kartõ rãmb pʋsẽ, tɩ kẽer me get sɛbã bĩngr yelle, tɩ sãnda maand CD la video rãmba, tɩ kẽer me tʋmd tʋʋm a taaba.

Betɛll fãa tara sull sẽn get a tʋʋmã yelle. Betɛll fãa pʋgẽ, Siglgã taoor lʋɩtb Sull yãkda kãsem-dãmb a tã bɩ sẽn yɩɩd rẽ, tɩ b get tʋʋm nins b sẽn tʋmd b tẽngẽ wã bɩ tẽns a taab pʋsẽ wã yelle. Nin-kãensã gʋlsda Siglgã taoor lʋɩtb Sullã n wilgd-b tʋʋmdã sẽn kẽngd taoor to-to, tɩ yell sã n beẽ me bɩ b togs-ba. Woto sõngda Siglgã taoor lʋɩtb Sullã, tɩ b bãngd b sẽn na n gom bũmb nins yell sɛbã pʋsẽ, bɩ tigissã la tigis-kãsemsã sasa. Siglgã taoor lʋɩtb Sull yãkda ned t’a kaagd Betɛll dãmbã, n kõt sull ning sẽn get tʋʋmã yellã sagls sẽn sõngd-​⁠b tɩ b tʋmd b tʋʋmã neere. (Yelbũna 11:⁠14) Betɛll kaagr sasa, tẽngã saam-biisã tigimda taaba, tɩ kaagdã sõs ne-​⁠b n keng b raoodo.

B sõngda tigimsã. B sã n na n lugl tiginga, sull ning sẽn get Betɛllã yellã n kõt sore. Bãmb me n get b babgẽ so-pakdbã, misioneer dãmbã la tigims sul yel-​gɛtbã yelle. Leb n yaa bãmb n get tigis-kãsemsã siglg la Rĩungã rot meeb yelle, la b getẽ me tɩ tigimsã paamd sɛb la bũmb nins fãa sẽn yaa tɩlae wã. Tʋʋm nins fãa b sẽn tʋmd Betɛllẽ wã sõngdame tɩ koɛɛgã mooneg yɩ wa sẽn segdã.—1 Korẽnt dãmba 14:33, 40.

• Wãn to la Betɛll dãmbã yel-gɛtbã sõngd Siglgã taoor lʋɩtb Sulli?

• Bõe tʋʋmd la b tʋmd Betɛll dãmbẽ wã?

D yiisda sɛb ne buud-goam sẽn ta 750, sẽn na yɩl tɩ “koe-noogã” ta “dũniyã soolem fãa, la buud fãa, la goam toɛy-toɛyã fãa la nebã fãa.” (Wilgri 14:⁠6) Wãn to la d tõogd n tʋmd tʋʋm-kãngã sẽn pa nana wã? D tara neb sẽn be tẽns toɛy-toɛy pʋsẽ n sõngd ne sɛbã gʋlsgo, tɩ neb a taab sõngd n lebgdẽ. B fãa yaa a Zeova Kaset rãmba.

B rengd n gʋlsa ne ãngilindi. Sull n be d Betɛll kãsengẽ wã n get d sɛbã gʋlsg yelle, tɩ Siglgã taoor lʋɩtb get b tʋʋmdã yelle. Yaa sul-kãng n get d seb-gʋlsdbã sẽn be Betɛll kãsengẽ wã la Betɛll dãmb kẽer pʋsẽ wã tʋʋmd yelle. D sẽn tar seb-gʋlsdb sẽn be zĩis toor-toorã sõngdame tɩ d tõogd n yiisd sɛb sẽn noom neb buud fãa.

B toonda Betɛll dãmb a taabã bũmb ning b sẽn gʋlsã. B sã n ges tɩ b sẽn gʋlsã yaa sõma, b toonda rẽ Betɛll dãmbã sẽn be dũniyã gill zugã tɩ b sɩng lebgre. Sul nins sẽn lebgd sɛbã modgdame n tũusd gom-biisã sõma tɩ b võorã zems kɛpɩ ne b sẽn yeel ne ãngilindã, sẽn na yɩl n sõng nebã tɩ b wʋm sɩdã b buud-goamã pʋgẽ.—Koɛɛg Soaba 12:⁠10.

Ordinatɛɛr dãmbã sõngdame tɩ tʋʋmdã kẽngd tʋʋl-tʋʋlle. Yaa sɩd tɩ ordinatɛɛr pa tõe n lebg sɛbã a toor ye. Baasgo, gom-biis võor ne bũmb a taab n be ordinatɛɛr dãmbã pʋsẽ, n sõngdẽ tɩ b tõe n lebgd sɛbã tʋʋl-tʋʋlle. Sẽn paase, a Zeova Kaset rãmbã maana tʋʋm-teoog b sẽn boond tɩ MEPS, n tar n tʋmd ordinatɛɛr pʋgẽ tɩ sõngd-b tɩ b yiisd sɛb sẽn tar fot-rãmba, buud-goam kobs pʋgẽ.

Bõe yĩng tɩ d modgd n lebgd sɛbã ne buud-goam wʋsgo, baa d sẽn mi tɩ sẽn gomd-b buud-goam kẽer pa waoogã? Bala a Zeova ratame tɩ “nebã [buud, MN] fãa paam fãagr la b bãng sẽn yaa sɩdã.”—⁠1 Tɩmote 2:3, 4.

• Wãn to la d maand n wa tõog n yiis d sɛbã?

• Bõe yĩng tɩ d lebgd d sɛbã ne buud-goam wʋsgo?

Yʋʋmd fãa, a Zeova Kaset rãmbã yiisda Biibl milyõ rãmb la sɛb a taab n kõt nebã, n pa koosdẽ ye. D meta Rĩung rot la Betɛll dãmba, la d get b yelle. D geta sẽn tʋmd-b Betɛll dãmbẽ wã la misioneer dãmbã yelle. Sabab sã n mi n maan me, d sõngda nebã. Tõe tɩ y rat n bãnga d sẽn maand to-to n paamd ligdã n tʋmd tʋʋm-kãensã.

D pa reegd piig pʋɩɩr wall d pɩʋʋgd ne lepr n kot ligd ye. Baa ne tʋʋm nins fãa tõnd sẽn tʋmd koɛɛgã mooneg yĩngã sẽn baood ligd wʋsgã, d pa bõosd ligd ye. Sẽn yɩɩd yʋʋm koabg masã, Gũusg Gasg a ye pʋgẽ, d yeelame tɩ d kɩsa sɩd t’a Zeova n yaa tõnd sõngda, la tɩ d “pa na n tol n bõos wall d kos ninsaalbã teelg ye.” Sɩd me, d zɩ n maan a buud ye.—⁠Matɩe 10:⁠8.

Nebã kõta ligd ne yamleoog n teend tõnd tʋʋmdã. Neb wʋsg kõta ligd n teend d tʋʋmdã, b sũy sẽn noom ne d sẽn sõngd nebã tɩ b bãngd Biiblã yĩnga. A Zeova Kaset rãmbã meng kẽesda b sẽkã, b pãngã, b tarmã la b minimã ne yamleoogo, n sõngdẽ t’a Zeova raabã maand dũniyã gill zugu. (1 Kibaya 29:⁠9) D Rĩungã rotẽ wã la d tigis-​kãsemsã sasa, kogend n be tɩ sẽn dat-a fãa tõe n tɩ ning ligdi. Zĩig n be tõnd sɩt wɛɛbã sẽn yaa jw.org pʋgẽ tɩ y tõe n kẽ n tool kũuni. Neb nins sẽn kõt ligdã sʋka, wʋsg tarem pa waoog ye. B yaa wa pʋg-kõorã sẽn ning ligd bõoneg a yiib wẽnd-doogã ligd ningr zĩigẽ t’a Zezi pẽgã. (Luk 21:​1-4) Dẽnd wakat-wakate, ned fãa tõeeme n “yãk ligd n bĩngi,” sẽn na yɩl n kõ ‘wa sẽn zems a sẽn tags a sũur pʋgẽ.’​—⁠1 Korẽnt dãmba 16:⁠2; 2 Korẽnt dãmba 9:⁠7.

D kɩsa sɩd t’a Zeova na n kell n kɩtame tɩ neb nins sẽn dat n ‘waoog yẽ ne b paoongã,’ kõt kũun n teend Rĩungã tʋʋmde, a raabã pidsg yĩnga.​—⁠Yelbũna 3:⁠9.

• Bõe la d maand tɩ yaa toor ne tũudum a taabã?

• D maanda bõe ne ligdã nebã sẽn kõt ne yamleoogã?

D boonda d sẽn tigimd taab zĩig ningã tɩ Rĩung roogo. Woto zemsame, bala zãmsg ning d sẽn paamd be wã tara loees ne Wẽnnaam Rĩungã, a Zezi sẽn da moond n gomd a yell n yɩlemdẽ wã.—⁠Luk 8:⁠1.

Yaa be la tũudum hakɩkã neb tigimd taaba. Be la d sigind bũmb nins fãa sẽn sõngd tõnd tɩ d moond koɛɛgã. (Matɩe 24:⁠14) D Rĩung rotã bedrem la b neerem pa taab ye. La d pa met-⁠b kẽeng-kẽenga, wall d nags-⁠b tɩ loog nug me ye. Rĩung rot wʋsg pʋsẽ, tigims wʋsg n tigimd n deesd taaba. D sõorã sẽn tar paasgã kɩtame tɩ d me Rĩung rot tusa yʋʋmã noorã. D sã n na n mage, dũniyã gill zugu, yaa a nu la d met daar fãa. La d maanda wãn n tõogd n metẽ?—⁠Matɩe 19:⁠26.

Yaa ligdã b sẽn kõt Rĩung rot meeb yĩngã n sõngde. B toonda ligd kãng Betɛllẽ wã tɩ b bĩngdẽ, tɩ tiging sã n wa rat n me wall a maneg Rĩung roog bɩ b yãk n kõ.

Yaa neb toor-toor n sõngd n metẽ, n pa reegd yaood ye. Tẽns wʋsg pʋgẽ, d tara sul sẽn gilgd n met Rĩung roto. Sul-kãens ne neb a taab sẽn sõngd ne yamleoog meta Rĩung rot b sẽn be tẽng ning pʋgẽ wã bɩ tẽn-kɩremsẽ wã. Rĩung roog meeb sasa, bãmb n get tʋʋmdã yelle, la b wilgd b tẽed-⁠n-taasã sẽn wat n sõngdẽ wã tɩ b tʋmdẽ. Tẽns a taab pʋsẽ, b yãka saam-biis sẽn tar minim rotã meeb wɛɛngẽ, tɩ Rĩung roog meeb sasa bɩ b get tʋʋmdã fãa yelle, tɩ neb sẽn tar bãngr tʋʋm kẽer pʋsẽ me wat n sõngd ne yamleoogo. La tʋm-tʋmdbã wʋsg yaa tigingã neba. Yaa ne Wẽnnaam vʋʋsem sõngã sõngre, n paas a nin-buiidã sẽn tʋmd ne b sũy fãa wã yĩng la d tõogd n tʋmd tʋʋm-kãensã fãa.—⁠Yɩɩl Sõamyã 127:⁠1; Kolos rãmba 3:⁠23.

• Bõe yĩng tɩ d boond tõnd sẽn tigimd taab zĩig ningã tɩ Rĩung roogo?

• D maanda wãn n met d Rĩung rotã dũniyã gill zugu?

B sã n yeel t’a Zeova Kaset rãmbã Rĩung roogo, b zoe n pʋda a Zeova yʋʋrã. Rẽ n so tɩ d getẽ tɩ naag n maneg Rĩungã roog bɩ n sõng t’a yɩ yɩlemd n sakd gesg yaa zu-zẽkre, la bũmb d sẽn maand n waoogd a Zeova. Ned fãa tõe n kẽesa a toogo.

Bũmb sã n dat manegr Rĩungã roogẽ, y tõe n sõngame. Yʋʋmd fãa, d maagda d yĩng n ges bũmb sã n pa be Rĩungã roogẽ la yɩngã n dat manegre. Woto, d yãta zĩis nins sẽn dat manegrã n maneg tao-tao tɩ roogã ket n yaa sõma, n da wa sãam ligd zaalem ye. (2 Kibaya 24:13; 34:10) Rĩungã rot segd n yɩɩ sõma la yɩlma, bala d Wẽnnaamã waoogr zĩig segd n yɩɩ woto. D sã n naagd n manegd Rĩungã roogo, d wilgdame tɩ d nonga a Zeova ne d sũur fãa, la tɩ d nanda zĩig ning d sẽn kẽnd n waoogd-a wã. (Yɩɩl Sõamyã 122:⁠1) Woto kɩtdame me tɩ neb a taabã pẽgda.—2 Korẽnt dãmba 6:⁠3.

• Bõe yĩng tɩ d pa segd n maan laas-laas ne d Rĩungã roog zãabo?

• D maanda wãn tɩ d Rĩungã roog yaa yɩlemd wakat fãa?

Yãmb mi n dat n maana vaeesg n paas y bãngrã Biiblã zug bɩ? B goma ned yell Biiblã pʋgẽ, wall yaa zĩig bɩ bũmb a to tɩ y rat n bãng sõma bɩ? Zu-loɛɛg la y tara, n dat n bãng Wẽnnaam Gomdã sẽn tõe n sõng-y tɩ y welg-a to-to bɩ? Sã n yaa rẽ, bɩ y bãng tɩ Rĩungã roog sɛb bĩngr zĩigã tõe n sõng-y lame.

Bũmb nins sẽn tõe n sõng-y tɩ y maan vaeesgã bee be. Tõe tɩ y pa tar sɛb nins fãa a Zeova Kaset rãmbã sẽn yiisã ye. Sɛb wʋsg n yaool n be Rĩungã roog sɛb bĩngr zĩigẽ. Wakat ning me, Biibl dãmb toor-toore, sebr sẽn bilgd gom-biis võore, la sɛb a taab n be be. Nand tɩ tigissã sɩnge, la b saabã poore, ned fãa tõe n maana vaeesg beenẽ. Ordinatɛɛr sã n be be, b tõe n ninga Watchtower Library a pʋgẽ, tɩ f sã n pak-a bɩ f tõe n yã tõnd sɛb buud toor-toor n karme, n tõe n gẽes vɛrse bɩ gom-biig võore, la f tõe n bãng b sẽn wɛgs goam kẽer to-to.

Sõngda Kiris-nebã vɩɩm la b tʋʋma tigsgã karen-biisã. Tigingã sɛb bĩngr zĩigã tõe n sõng-y lame tɩ y segend y sõssã sõma. Yaa Kiris-nebã vɩɩm la b tʋʋma tigsgã yel-gɛt n get sɛba bĩngr zĩig yelle. Yẽ n get tɩ b ningd sɛb nins sẽn yi paalmã, la tɩ b bĩngrã yɩ sõma. Lekollã yel-gɛt wall sẽn zãmsd-a yãmb Biiblã tõe n wilg-y-la y sẽn tõe n maan vaeesgã to-to. La d pa tog n dɩk sebr beenẽ n zã n loog ye. Sẽn paase, d tog n gesa sɛbã yell sõma la d ra gʋls b pʋsẽ ye.

Biiblã yetame tɩ d sã n dat n ‘yã Wẽnnaam bãngrã sẽn yaa to-to,’ d segd n sakame n bao-a ‘wa ned sẽn baood arzɛgse.’ (Yelbũna 2:1-5) Rĩungã roog sɛb bĩngr zĩigã tõe n sõng-y lame tɩ y sɩng rẽ maanego.

• Bõe n be Rĩungã roog sɛb bĩngr zĩigẽ, n tõe n sõng-y tɩ y maan vaeesgo?

• Ãnd n tõe n sõng-y tɩ y bãng n maan vaeesg sɛbã bĩngr zĩigẽ?

A Zezi ra yeela a karen-biisã woto: ‘Bɩ yãmb vẽenem yãg nebã sʋka, tɩ bãmb tõe n yã yãmb tʋʋm-sõmã, la b waoog yãmb Ba sẽn be saasẽ’ wã. (Matɩe 5:16) Sẽn na yɩl tɩ d vẽenemã yãg sõma, d tʋmda ne ẽntɛrnetã la tʋʋm-teed a taaba. Yaa d sit wɛɛbã sẽn yaa www.pr418.com pʋgẽ la y tõe n paam a Zeova Kaset rãmbã tʋʋmdã kibaya, la y bãng b sẽn tẽed bũmb ninsã. La bõe n pʋd n be beenẽ?

Ne Biiblã maasem, d leoka sogsg nebã sẽn nong n sokdẽ. D sɩtã pʋgẽ, y tõe n yãa sogsg sẽn tar yõod nebã sẽn nong n sokdẽ, la b leoore. Wala makre, Namsgã na n wa saame bɩ? ne Sẽn ki-bã tõe n sɩd vʋʋgame bɩ? seb-vãadã bee ẽntɛrnetã pʋgẽ ne sẽn yɩɩd buud-goam 600. Y leb n tõe n paama Les Saintes Écritures — Traduction du monde nouveau wã ne sẽn yɩɩd buud-goam 130. Sɛb me sẽn sõngd tɩ d zãms Biiblã, wa Biiblã sɩd yetame tɩ bõe? sebrã, n paas Gũusg Gasgã ne Réveillez-vous ! nins sẽn yi paalmã bee be. Y tõe n karma seb-kãens wall y kelg bɩ y telesarz kẽer ne forma PDF bɩ EPUB. Y tõeeme me n ẽnprim bũmb sẽn be sɛb kẽer pʋgẽ ne buud-gom-zẽnga, n tik rẽ zug n sõs ne ned sẽn gomd buud-gom-kãnga, n dat n bãng Biiblã n paase. Video-rãmb n be mugsã goamã buk wʋsg pʋgẽ. Y tõe n telesarza teyatr dãmb sẽn tik Biiblã zug me n kelg bɩ y gese, pa rẽ bɩ yɩɩn-noodo, n mi n kelgdẽ.

Y paamda kibay sẽn yaa takɩ a Zeova Kaset rãmbã zugu. Tõnd sɩt wɛɛbã pʋgẽ, y tõe n paama kiba-paal ne video-rãmb sẽn wilgd tõnd tʋʋmdã d sẽn tʋmd ãndũni gillã, n paas kibay sẽn gomd a Zeova Kaset rãmbã yelle, la sẽn wilgd b sẽn sõngd nebã to-​⁠to sabaab wakate. D sɩtã pʋgẽ me, y tõe n paam n bãnga tigs-kãsems wakat la b zĩisi, la y yã Betɛll dãmb adɛrse.

Ne tʋʋm-te-kãensã maasem, d kɩtdame tɩ vẽenem ning sẽn be Biiblã pʋgẽ wã yãgd dũniyã tɛk fãa, baa tẽns nins sẽn zãr wʋsg tɩ waoodã waoogẽ wã. D pʋʋsd n kotame t’a Zeova “koɛɛgã saag” dũniyã tɛk fãa, a yʋʋrã waoogr yĩnga.—2 Tesalonik rãmba 3:1.

• Wãn to la d sit wɛɛbã, www.pr418.com sõngd neb wʋsg tɩ b bãngd Biiblã sẽn yet bũmb ningã?

• Bõe la yãmb rat n gẽes tõnd sit wɛɛbã pʋgẽ?