Neb wʋsg pa le kẽnd b wẽn-dotẽ wã, bala b pa ne rẽ yõod ne-b ye. La bõe yĩng tɩ y segd n kẽnd a Zeova Kaset rãmbã tigissã? Rẽ yõod yaa bõe?

Y na n paamd n tigimda ne neb sẽn nong taaba, n dat taab neere. Pipi kiris-nebã ra tara tigimsi, n tigimd taab n waoogd Wẽnnaam, n zãmsd Biiblã la b kengd taab raoodo. (Hebre dãmba 10:24, 25) B ra nonga taaba, hal tɩ b sã n tigim bɩ ned fãa miẽ t’a bee ne a zo-rãmba, ne a saam-biis hakɩka. (2 Tesalonik rãmba 1:3; 3 Zã 14,15) Tõnd me maanda wa pipi kiris-nebã, tɩ rẽ kõt-d sũ-noogo.

Y na n bãngda y sẽn na n tũ Biiblã saglsã to-to. Wẽnnaam pĩnd nin-buiidã sã n da na n tigmi, rapã, pagbã la kambã fãa naagdame. Tõnd me tigimda woto, tɩ rap sẽn tar minim sõngd-d tɩ d bãngd d sẽn na n tũ Biiblã saglsã to-to. (Tõodo 31:12; Nehemi 8:8) Tigissã sasa, d naagda taab n yɩɩndẽ, tɩ sõs kẽer pʋgẽ bɩ d tõe n kẽes d toogo. Woto kɩtame tɩ d paamd n gomd d sẽn tẽed bũmb ninsã yelle.—Hebre dãmba 10:23.

Y na n paamdame tɩ y tẽebã kengdẽ. Tʋm-tʋmd a Poll ra yeela a wakatẽ tiging a ye woto: “Yãmb yamleoog tara maam tɩ mam dat n yã yãmba, . . . tɩ mam sã n ta yãmb sʋka, tõnd na lagem taab n paam daood ne tẽeb ning sẽn yaa yãmb dẽnd ne mam dẽndã.” (Rom dãmba 1:11, 12) D sẽn tigimd ne d tẽed-n-taasã wakat fãa wã kengda d tẽebã, tɩ d rat n modg tɩ d sẽn maandã fãa zemsd ne Biiblã sẽn yetã.

Modg-y n wa-y tõnd tigissã tɩ y na n bãngame tɩ sɩd yaa woto. Kõomã yaa zaalem, b pa na n pɩʋʋg ne lepr n kotẽ tɩ y ning ligd ye.

• Tõnd sẽn tigimd taabã, d rɩkda ãnd dãmb togs-n-taare?

• D sẽn kẽnd tigissã, nafa bʋs la d paamda?

Baa d tog n kẽna nao, wall d pãrg weoogo, bɩ d tũ saaga, d kẽnda d tigissã wakat fãa. Bõe yĩng t’a Zeova Kaset rãmbã modgd n tigimd ne b tẽed-n-taasã, baa ne zu-loeesã la yaamsã?

Tigissã nafda tõndo. A Poll yeela kiris-nebã tɩ b “tẽeg taab yelle.” (Hebre dãmba 10:24) A gomdã rat n yeelame tɩ d bao n bãng ned fãa sõma. Dẽnd wilgdame tɩ d taabã yell segd n pak-d lame. D sã n bao n bãng tigingã neb a taabã sõma, d na n yãame tɩ kẽer tõog n maoo ne zu-loees sẽn wõnd tõnd rẽndã, la tɩ b tõe n sõnga tõnd me tɩ d tõoge.

Tigissã paasda tõnd ne taab zoodã. Tõnd tẽed-n-taasã d sẽn tigimd ne wã pa neb d sẽn mi woto bal ye. Yaa d zo-rãmb hakɩka. Sasa ning me, d mi n sega taab n sõs la d kok pemsem. Wãn to la woto fãa nafd tõndo? Sõngda tõnd tɩ d nand taaba, tɩ d nonglmã paasdẽ. Rẽ n so tɩ d tẽed-n-taag sã n wa be zu-loɛɛg pʋgẽ, d sõngd-a lame, bala yaa d zoa hakɩka. (Yelbũna 18:24) D sã n tigimd taab wakat fãa, d wilgdame tɩ d geta taab yell neere.—1 Korẽnt dãmba 12:25, 26.

Bao-y y zo-rãmbã neb nins sẽn maand Wẽnnaam daabã sʋka. Yaa a Zeova Kaset rãmbã sʋk bal la y tõe n paam zo-rãmb a woto. Bɩ y ra bas tɩ bũmb gɩdg-y tɩ y pa kẽnd a Zeova Kaset rãmbã tigissã ye.

• Bõe yĩng tɩ tigissã kẽnd yaa tõnd mengã nafr yĩnga?

• Rabʋr la y na n wa tõnd tigissã, n bãng sẽn yaa to-to?

Naoor wʋsgo, pipi kiris-nebã sã n da tigim taaba, b yɩɩndame, n pʋʋse, n karem Wẽnnaam Gomdã la b sõs a zugu. B ra pa tar yel-maandɩ ye. (1 Korẽnt dãmba 14:⁠26) Tõnd me tigissã sasa, woto la d maanda.

D paamda zãmsg sẽn yit Biiblã pʋgẽ. Sibr bɩ hat daare, tiging fãa kelgda sõsg minit 30 pʋgẽ. Yaa sõsg sẽn wilgd Biiblã saglsã yõod ne tõndo, la a goamã sẽn pidsd to-to rũndã-​rũndã. Ned fãa lakda a Biibl n tũud vɛrse rãmbã karengo. Sõs-kãng poore, d naagda taab n zãms “Gũusg Gasgã” lɛɛr a ye pʋgẽ. Wakat kãnga, ned fãa tõe n zẽka a nug n leok sogsgã. “Gũusg Gasgã” zãmsg sõngda tõnd tɩ d bãng n tũ Biiblã saglsã. Dũniyã gill zugu, d tigimsã sõor yɩɩda 110 000, la d fãa zãmsda bõn-yɛng Gũusg Gasgã pʋgẽ.

D paamda minim n tõe n zãms neb a taabã. D tigimda taab raar a to me n maand tigisg sẽn tar babs a tãabo, tɩ b boondẽ tɩ Kiris-nebã vɩɩm la b tʋʋma. Kiuugã sõssã fãa na-kẽndrã bee Kiris-nebã vɩɩm la b tʋʋma sebrã pʋgẽ. Tigsgã sɩngda ne D sẽn bãng Biiblã kareng pʋgẽ. Sõs-kãngã sõngda tõnd tɩ d wʋm Biiblã zĩig ning b sẽn wilg tigingã neb tɩ b reng n karmã võore. Rẽ poore, babg ning sẽn yet tɩ Moon-y koɛɛgã sõma wã pʋgẽ, b wilgda d sẽn tõe n tall Biiblã n sõs ne ned to-to, la bũmb a taaba. Sõsg fãa poore, b kõta sagls sẽn na n paas d karengã sõmblem la d goamã minim. (1 Tɩmote 4:⁠13) D baasda ne D wilg tɩ d yaa kiris-neb hakɩɩka. Babg kãng wilgda d sẽn tõe n tũ Biiblã noy to-to d vɩɩma pʋgẽ. Naaga ne sogsgo, tɩ ned fãa tõe n kẽes a toogo, tɩ sõngd-d tɩ d wʋmd Biiblã goam võor sõma.

D kɩsa sɩd tɩ y sã n wat tõnd tigissã, y sũur na n yɩɩ noog wʋsg ne y sẽn na n wʋm bũmb ning sẽn yit Biiblã pʋgẽ wã.—Ezai 54:13.

• Y sã n wa a Zeova Kaset rãmbã tigissã, bõe la y na n wʋme?

• Tõnd tigsg bʋg la y rat n wa semen ning sẽn watã?

Yãmb sã n ges seb-kãngã fot-rãmb nins sẽn wilgd a Zeova Kaset rãmb sẽn be b Rĩungã rotẽ wã, y mikdame tɩ b manega b mens sõma. Bõe yĩng tɩ d manegd d mens sõma n kẽnd d tigissã?

Wilgdame tɩ d waoogda d Wẽnnaamã. Yaa sɩd tɩ Wẽnnaam nifẽ, pa nin sẽn ne wã n tar yõod n yɩɩd ye. (1 Sãmwɛll 16:⁠7) La d sã n debd d tigissã, d rata ne d sũur fãa n wilg tɩ d waoogda Wẽnnaam la d tẽed-​⁠n-taasã. Y sã n na n kẽng naab nengẽ, yaa vẽeneg tɩ y na n manega y meng sõma, sẽn yaa naab nengẽ la y rebdã yĩnga. Woto me, d sẽn manegd d mens to-​⁠to n kẽnd tigissã wilgdame tɩ d waoogda a Zeova sẽn yaa “Rĩm sẽn so zamaan fãa” wã. Wilgdame me tɩ d miime tɩ d tigissã zĩig yaa Wẽnnaam pẽgr zĩiga.​—⁠1 Tɩmote 1:⁠17.

Wilgdame tɩ d sɩd tũuda Biiblã sẽn yetã. Biiblã pʋgẽ, b sagenda kiris-nebã tɩ b manegd b mensã ne “yõk-​⁠m-meng la gũus-​⁠m-menga,” wa neb sẽn “sakd Wẽnnaam.” (1 Tɩmote 2:​9, 10) Maneg f meng ne “yõk-​⁠m-mengã” rat n yeelame tɩ f ra ningd yʋ-bao futu, fut sẽn sẽbd bɩ sẽn pa lut yĩngã babs nins sẽn segd n solgã ye. Gũus-​⁠m-mengã me na n sõnga tõnd tɩ d bãng n yãk fu-sõma sẽn pa wilg-​⁠m-meng futu, la sẽn pa yonglg ye. Woto pa rat n yeel tɩ d pa tar sor n na n ning d yam fut ye. Tõnd sã n manegd d mensã sõma tɩ sakd gesgo, “tõnd Fãagdã kareng paamda waoogr” tɩ pa tũ ne goam ye. Leb n ‘waoogda Wẽnnaam’ mengã sẽn yaa d Fãagdã. (Tɩt 2:⁠10; 1 Pɩɛɛr 2:⁠12) D sẽn manegd d mens sõma n kẽnd d tigissã kɩtdame tɩ nebã pẽgd tõnd tũudmã.

Baa yãmb sã n tagsdẽ tɩ y futã yaa kʋda, bɩ y ra bas tɩ rẽ gɩdg-​⁠y tɩ y pa kẽnd tigissã ye. B wee n yaa yɩlma, n sakd gesgo. Pa tɩlae tɩ yɩ fut ligd sẽn yaa toog bɩ fu-paal ye.

• Tõnd sẽn manegd d mens n kẽnd tigissã yõod yaa bõe?

• Biiblã noy bʋs n sõngd tõnd tɩ d bãng d sẽn segd n maneg d mens to-to?

Y sã n zãmsda Biiblã ne a Zeova Kaset soaba, tõe tɩ y modgdame n segend zãmsgã nand t’a wa. Bãng-y tɩ y sã n dat n dɩ tigissã me yõod sõma, y segd n deng n segla y menga. Y sã n maand woto n pa vaandẽ, na n naf-y lame n yɩɩda.

Yãk-y wakatã la zĩig ning y sẽn na n zĩnd n zãmsã. Wakat bʋg la y tõe n zãms sõma tɩ y yamã pa yuusi? Yi-beoog pĩnd nand tɩ y sɩng y tʋʋmã bɩ, bɩ yaa yʋngo, kambã sẽn wat n kẽ gãaga? Yãk-y sẽk zãmsgã yĩnga. Baa y pa tõe n zãms n kaoos bɩ y yãk tɩ zems y sẽn tõe, la y ra bas tɩ bũmb tiis-y ye. Bao-y zĩig bʋrg sẽn kaẽ, la y kiis y radio wã, televiziõ wã, wall y selilɛɛrã tɩ ra tiis-y ye. Y sã n pʋʋs n yaool n sɩng zãmsgã, na n sõng-y lame tɩ y yamã gãande, tɩ y tõog n zãms Wẽnnaam Gomdã sõma tɩ kẽ-yã.​—⁠Filip rãmba 4:​6, 7.

Rẽeg-y sokr fãa leoore, la y segl y meng n wa tõog n leoke. Reng-y n karm-y zãmsgã gom-zugã, la y ges gom-zu-bõonesã sẽn tar loees ning ne gom-zugã. Ges-y fot-rãmbã, la sogsg nins sẽn kʋmsd zãmsgã. Woto na n sõng-y lame tɩ y zoe n bãng zãmsgã sẽn gomd bũmb ning yellã. Rẽ poor bɩ y karem sull fãa, la y gẽes sokrã leoore. Karm-y vɛrse rãmbã, la y bao bũmb ning sẽn be be n wilgdẽ tɩ b sẽn yeel sullã pʋgẽ wã yaa sɩdã. (Tʋʋma 17:⁠11) Y sã n yã leoorã, bɩ y rẽeg gom-biis a wãn sẽn na n sõng-y tɩ y wa tõog n leok nana-nana. Woto, tigissã sasa y tõe n zẽka y nugu, n leok koɛɛg-koɛɛg ne y meng goama.

Y sã n dengd n zãmsd bũmb nins d sẽn na n yã tigissã sasa wã, y na n bãnga “bõn-paals” Biiblã pʋgẽ n paas y sẽn da zoe n mi wã.​—⁠Matɩe 13:⁠51, 52.

• Wãn to la y tõe n segl y meng tigissã yĩnga?

• Bõe la y tõe n maan n tõogd n leokd sogsgã tigissã sasa?

Hal pĩnd wẽndẽ wã, a Zeova ra yeelame tɩ zak fãa yãk wakat takɩ n sõsd yẽ goamã zugu, tɩ kengd b tẽebã la paasd b zems-​⁠n-​​taarã. (Tõodo 6:​6, 7) Rẽ n so t’a Zeova Kaset rãmbã me maand woto. Zak fãa yãka wakat semen fãa, n naagd taab n sõsd Biiblã sẽn yetã zug tɩ tar yamleoogo, la zemsd ne zakã rãmbã. Baa y sã n yaa y yembre, woto na n sõnga yãmb tɩ y zoodã ne Wẽnnaam paasdẽ.

Wakat kãnga, y paasda yãmb ne a Zeova zoodã pãnga. “Bɩ y kolg Wẽnnaam, la bãmb na kolg yãmba.” (Zak 4:⁠8) Y sã n karemd Biiblã n bãngd bũmb wʋsg a Zeova mengã zugu, la a sẽn maan bũmb ninsã, y na n nong-a lame n paase. Y sã n date, y tõe n sɩngda y zak pʋgẽ Biibl zãmsgã ne Biiblã karengo, n tũud b sẽn wilg Kiris-nebã vɩɩm la b tʋʋma na-kẽndrã pʋgã. Y tõe n pʋɩɩ karengã tɩ ned fãa karem t’a taabã kelge, tɩ sã n sa bɩ y sõs bũmb ning y sẽn bãngã zugu.

Wakat kãnga, zakã rãmb nonglmã ne taab paasdame. Zak rãmb sã n naagd taab n zãmsd Biiblã, kɩtdame tɩ b nonglmã ne taabã paasdẽ. Baa kamb kae, paasda pagã ne a sɩdã zems-​⁠n-​​taarã. Zãmsgã segd n bee yamleoog la kõt sũ-noogo, tɩ ned fãa gũud wakat kãng ne yãgbo. Roagdbã segd n gesame tɩ b sẽn na n sõs bũmb ning zugã zems ne kambã. B tõe n yãka sõss kẽer Gũusg Gasgã bɩ Réveillez-​​vous ! wã pʋgẽ, pa rẽ bɩ tõnd sit wɛɛbã sẽn yaa jw.org pʋgẽ. Y tõe n goma zu-loɛɛg kambã sẽn tar lekollẽ wã yelle, la b sẽn tõe n mao ne rẽ to-​⁠to. Y tõeeme me n naag taab n ges JW télédiffusion (tv.jw.org) wã, tɩ rẽ poor bɩ y sõs a zugu. Y leb n tõeeme me n zãms Rĩungã yɩɩl nins d sẽn na n yɩɩl tigissã sasa wã, la y mi n naag taab n yũ bɩ n dɩ zãmsgã poore.

• Bõe yĩng tɩ d yãk wakat takɩ n zãmsd Biiblã ne d zakã rãmba?

• Wãn to la roagdbã tõe n maan tɩ zak pʋgẽ zaabr Biibl zãmsg wakat tall yamleoogo?

Ges-y fot-rãmbã. Bõe yĩng tɩ nebã nens be laado? B bee d tigis-kãseng zĩigẽ. Pĩnd wẽndẽ wã, Wẽnnaam da yeela a nin-buiidã tɩ b tigimd taab naoor a tãab yʋʋmd fãa. Tõnd me tara tigis-kãsems d sẽn gũud wakat fãa ne yãgbo. (Tõodo 16:⁠16) Yʋʋmd pʋgẽ, d maanda rasem a tãab tigis-kãsenga, n paas daar a ye tigis-​kãseng naoor a yiibu. Tigis-kãensã yõod yaa bõe?

Paasda tõnd zems-​⁠n-taarã pãnga. A Zeova pẽgr “neb tiging pʋgẽ” ra nooma Israyɛll nebã. Tõnd me sã n tigim taab n pẽgd a Zeova, noom-​⁠d-​⁠la wʋsgo. (Yɩɩl Sõamyã 26:⁠12; 111:⁠1) Tigis-kãensã sasa, d paamd n yãta tigims a taab saam-biisi, la tẽns a taab saam-biis menga. Ned fãa zãada rɩɩb n wa, tɩ vʋʋsgã sasa bɩ d rɩt tigis-kãsengã zĩigẽ la d sõsd ne taab hal tɩ be yamleoogo. (Tʋʋma 2:⁠42) Tigis-kãsemsẽ wã, d sɩd neeme tɩ d yaa saam-biis sẽn be dũniyã gill zugu, la sẽn nong taaba.​—⁠1 Pɩɛɛr 2:⁠17.

• Sõngda tõnd tɩ d wɩngd ne a Zeova tũubu. Israyɛll nebã sã n da tigim taaba, b ra paamdame tɩ b bilgd-​⁠b Gʋlsg Sõamyã tɩ b ‘wʋmd a võore.’ (Nehemi 8:​8, 12) Tõnd me sũy yaa noog d sẽn paamd zãmsg sẽn yit Biiblã pʋgẽ d tigis-kãsemsã sasa wã. Tigis-kãseng fãa gom-zug yita Biiblã pʋgẽ. D kelgda sõss ne bool-​⁠n-sogse, la d get mak-n-wilg toor-toor sẽn sõngd tõnd tɩ d bãng d sẽn tõe n maan Wẽnnaam daabã to-​⁠to. D sã n kelgd neb kibay sẽn wilgd tɩ b ket n tũuda a Zeova sõma baa ne vɩɩmã sẽn yaa toogã, kengda d raoodo. Tigis-​kãsengã sasa, d geta teyatr sẽn tik Biiblã zugu, sẽn kɩtd tɩ Biiblã kibay yaa vẽeneg d yamẽ, la kõt-d saglse. Tigis a tãabã fãa sasa, neb nins sẽn segl b mens lisgã yĩngã reegda lisgu. Bõe yĩng tɩ d nong d tigs-kãsemsã?

• Yãmb sã n wa tõnd tigs-kãsengẽ, a yõodã na n yɩɩ bõe ne-yã?

A Zezi kũumã sẽn wa n kolgã, a yeela woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:⁠14) La ra na n maana wãn tɩ koɛɛgã ta dũniyã tɛk fãa? Yaa d sẽn na n tũ mak-sõng ning a Zezi sẽn kõ a sẽn wa n be tẽngã zugã.​—⁠Luk 8:⁠1.

D bʋʋgda nebã b zagsẽ n sõsd ne-ba. A Zezi tʋma a karen-biisã tɩ b moon zak-zaka, n wilg-b b sẽn tog n maan to-to. (Matɩe 10:⁠11-13; Tʋʋma 5:⁠42; 20:⁠20) B ra yãka zĩis n kõ koe-moondb kãensã, tɩ b segd n moon be. (Matɩe 10:​5, 6) Rũndã-rũndã me, tõnd sigla d koe-moonegã sõma tɩ tiging fãa tar zĩig n moondẽ. Woto kɩtame tɩ d tũud noor ning a Zezi sẽn kõ, n yeel tɩ d “moon nebã sʋka, n kɩs kasetã.”​—⁠Tʋʋma 10:⁠42.

D modgd n kẽnda zĩig ning fãa d sẽn tõe n yã nebã. A Zezi meng kõo mak-sõngo, n da moond neb wʋsg sẽn nong n beẽ, wala mogrã noor bɩ bulg noore. (Mark 4:⁠1; Zã 4:​5-15) Zĩig ning fãa d sẽn tõe, tõnd me sõsda ne nebã Biiblã zugu. Tõe n yaa soayã noy, koosmã zĩisẽ, raasẽ la gaar dãmbẽ. D mi n tũnugda ne telefõnnã me. D sã n paam segbo, d taasda koɛɛgã d yagse, d tʋmd-n-taase, d karen-bi-taas la d roagdba. D sẽn modgd n maand woto wã sõngame tɩ neb milyõ rãmb sẽn be dũniyã gill zug wʋm “fãagr koɛɛgã.”​—Yɩɩl Sõamyã 96:2.

Ãnd soab la yãmb dat n taas Wẽnnaam Rĩungã koe-noogã, n sõng-a t’a bãng rẽ sẽn tõe n toeem a vɩɩmã to-to? Yãmb sẽn paam n wʋm koe-noogã, bɩ y sõng neb a taab me tɩ b wʋme!

• Koe-no-bʋg la b segd n moon dũniyã gill zugu?

• Wãn to la a Zeova Kaset rãmbã rɩkd a Zezi togs-n-taar koɛɛgã mooneg wɛɛngẽ?

Naoor wʋsgo, so-​​pakd yaa ned sẽn lʋɩt taoor n maneg sor tɩ neb a taabã tõe n tũ. A Zezi yɩɩ so-​​pakda, bala Wẽnnaam tʋm-​⁠a-​⁠la tẽngã zug t’a wa tʋm tʋʋmd sẽn kõt vɩɩm, la a pak sor nebã sẽn tog n tũ n paam fãagrã. (Matɩe 20:⁠28) Rũndã-rũndã, kiris-​​neb hakɩkã maanda wa a Zezi, n kẽesd b sẽkã koɛɛgã mooneg pʋgẽ, n sõngd nebã tɩ b ‘lebgd a karen-​​biisi.’ (Matɩe 28:⁠19, 20) Neb kẽer kẽesa b mens zãng tʋʋm-​​kãngã pʋgẽ tɩ d boond-​⁠b tɩ so-​​pakdba.

So-pakd yaa ned sẽn kẽes a meng zãng koɛɛgã mooneg pʋgẽ. A Zeova Kaset rãmbã fãa yaa koe-moondba. La kẽer baoo sẽk bɩ tʋʋmd sẽn pa rɩkd b sẽkã, n tõogd n moond lɛɛr 70 kiuug fãa tɩ d boond-b tɩ wakat fãa so-pakdba. Sãnda me yaa so-pakdb sẽn yaa zalle, tɩ b tʋm-b tɩ b tɩ moond zĩis koe-moondb sẽn pa beẽ bɩ sẽn pa waoogẽ. B moonda lɛɛr 130 bɩ sẽn yɩɩd rẽ kiuug fãa. So-pakdbã pa baood teed wʋsg vɩɩmã pʋgẽ ye. B kɩsa sɩd t’a Zeova na n gesame tɩ b paam sẽn yaa tɩlae wã. (Matɩe 6:31-33; 1 Tɩmote 6:6-8) Neb nins sẽn pa tõe n kẽes b meng zãngã mi n yãka yam n na n moon lɛɛr 30 bɩ 50 kiuugu, tɩ d boond-b tɩ sõngr so-pakdba.

So-pakdbã tʋmda b sẽn nong a Zeova la nebã yĩnga. A Zezi ra getame tɩ neb wʋsg n pa mi Wẽnnaam la a raabã, n dat sõngre. Tõnd me tagsda woto. (Mark 6:34) La tõnd sẽn mi bũmb ninsã tõe n sõng-b-la masã menga, tɩ b bãng tɩ beoog daarã na n yɩɩ neere. Yaa so-pakdbã sẽn nong nebã yĩng n kɩt tɩ b kẽesd b sẽkã koe-moonegã pʋgẽ, n tʋmd b pãng tɛk n sõngd nebã tɩ b bãng Wẽnnaam. (Matɩe 22:39; 1 Tesalonik rãmba 2:8) B sẽn maand woto wã kengda b tẽebã la b zoodã ne Wẽnnaam, la b paamd sũ-noog wʋsgo.—Tʋʋma 20:35.

• So-pakd tʋʋmd yaa bõe?

• Bõe n kɩt tɩ neb kẽer kẽes b mens zãng koɛɛgã mooneg pʋgẽ?

Wakat fãa, a Zeova Kaset rãmbã modgdame n na n paam zãmsg sẽn yit Wẽnnaam nengẽ. Lekoll toɛy-toɛy la b sigl sẽn na yɩl n sõng neb nins sẽn kẽes b mens zãng Rĩungã koɛɛgã mooneg pʋgẽ wã tɩ b tʋm ‘b tʋʋmdã neere.’—⁠2 Tɩmote 4:⁠5.

So-pakrã tʋʋmd lekolle: Ned sã n sɩng wakat fãa so-pakrã n maan yʋʋmde, a tõe n paam n kẽnga lekol-kãng sẽn kaoosd rasem a yoobã. B mi n maand-a-la Rĩung roogẽ. Lekol-kãngã yaa sẽn na yɩl n sõng so-pakdbã tɩ b paas b zoodã ne a Zeova, tɩ b paam minim sõma koɛɛgã mooneg pʋgẽ, la b tõog me n kell n tʋm tʋʋm-kãng ne b sũy fãa n da bas ye.

Rĩungã koe-moondb lekolle: B sigla lekol-kãngã sẽn kaoosd kiis a yiibã, n na n sõng so-pakdb sẽn kaoos tʋʋmdã pʋgẽ, la sẽn dat tɩ b tʋm-b zĩig koe-moondbã raab sẽn yaa kãseng n yɩɩda. B rɩkda koe-moond kãseng a Zezi Kirist togs-n-taare, tɩ yaa wa b sẽn yet tɩ “Ad maam, bɩ y tʋm maam.” (Ezai 6:⁠8; Zã 7:⁠29) B sẽn basd b nebã n tɩ vɩ zĩig a to wã mi n yaa toogo, tɩ yaa tɩlae tɩ b mong b mens bũmb kẽere. Tẽn-sãangã neb minimdã, b rɩɩbã, waoodã bɩ tʋʋlgã la yɛl a taab pa le wõnd b sẽn da beẽ wã ye. Wakat ninga, yaa tɩlae tɩ b zãms tẽngã neb buud-gomde. Sẽn kẽngd-b lekol-kãngã yaa so-pakdb sẽn kẽ kãadem wall n pa kẽ kãadem, n tar yʋʋm 23 tɛka, la sẽn pa loog yʋʋm 65. Lekollã sõngd-b lame tɩ b paam zʋg-sõma n tõog n tʋm b tʋʋmdã neere, la b paam minim sẽn na n kɩt t’a Zeova siglgã tõe n bobl-b tʋʋm buud toor-toore.

Gileyaad lekollã: Gileyaad lekollã sẽn sɩng yʋʋmd 1943 tɛkã, yaa neb 8 000 la zak n paam zãmsg be n lebg misioneer dãmba, tɩ b tʋm-b tẽns toɛy-toɛy pʋsẽ tɩ b tɩ moon koɛɛgã n kõ Wẽnnaam ‘kaset hal sõma,’ tɩ koɛɛgã ta “dũniyã tɛk fãa.” (Tʋʋma 13:⁠47) Wala makre, misioneer dãmb sẽn na n kẽng Peeru pipi tɩ tiging ra pa be be ye. La masã, yaa tigims 1 000 la zak n be be. Zapõ me, misioneer dãmbã sẽn ta be pipi t’a Zeova Kaset rãmbã sõor pa ta piig ye. La b sõorã yɩɩda 200 000 masã. Lekol-kãngã sẽn kaoosd kiis a nu wã sasa, karen-biisã paamda zãmsg sõma Biiblã zugu. Yaa sẽn zoe n yaa-b zall so-pakdba, tigims sull yel-gɛtba, Betɛll tʋm-tʋmdb bɩ misioneer dãmb sẽn nan pa kẽng lekol-kãngã n tõe n kẽnge. Lekollã sasa, b paamda zãmsg sõma n tõe n sõng tɩ Wẽnnaam tʋʋmdã kẽng taoore.

• Bõe yĩng la b sẽn sigl so-pakrã tʋʋmd lekollã?

• Rĩungã koe-moondb lekollã yaa ãnd dãmb yĩnga?