Fo sẽn zãms Biiblã ne a Zeova Kaset rãmbã kɩtame tɩ f bãng sɩdã. Yaa vẽeneg tɩ fo sẽn bãng bũmb ninsã sõnga foo tɩ f paam zood sõma ne Wẽnnaam. Sõng-f lame me tɩ f kɩs sɩd tɩ Wẽnnaam Rĩungã sã n wa kɩt tɩ tẽngã lebg arzãna, vɩɩmã na n yɩɩ noogo. Fo maneg n kɩsa sɩd ne Wẽnnaam Gomdã. Sẽn paase, fo sẽn tigimd ne kiris-nebã, f zoe n paamda bark wʋsgo. Fo bãnga a Zeova sẽn get a nin-buiidã yell to-to rũndã-rũndã.—Zak. 8:23.

Fo sẽn segend f meng n na n deeg lisgã, tigingã kãsem-dãmb na n sõsa ne foo n bãng f sã n mii bũmb nins kiris-nebã sẽn tẽede, tɩ yaa tɩlɛ tɩ f bãngã. (Ebre. 6:1-3) Bɩ a Zeova kell n ning-f barka, fo sẽn modgd n na n bãng-a n paasã, la a sõng-f tɩ f wa paam keoor ning a sẽn kãabã.—Zã 17:3.

1. Bõe yĩng tɩ fo rat n deeg lisgu?

2. Bõe la fo mi a Zeova zugu?

• “A Zeova n yaa Wẽnnaam sɩd-sɩd saasẽ la tẽngã zugu. Wẽnnaam a to kae ye.”—Tõo. 4:39.

• “Yãmb a soab ning yʋʋr sẽn yaa a Zeova wã, yãmb y ye tãa bal n yaa sẽn ka-a to dũniyã tɛk fãa.”—Yɩɩn. 83:18.

3. Bõe yĩng tɩ tar yõod tɩ f pʋt Wẽnnaam yʋ-peellã?

• “Woto wã, ad yãmb sẽn tog n pʋʋs to-to: ‘Tõnd Ba sẽn be saasẽ, bɩ yãmb yʋʋr paam waoogre.’”—Mat. 6:9.

• “Ned ning fãa sẽn pʋʋsd ne a Zeova yʋʋrã na n paama fãagre.”—Rom. 10:13.

4. Biiblã pʋgẽ, gom-bi-bʋs la b tũnugd ne n bilgd a Zeova sẽn yaa a soabã?

• “A Zeova, tẽngã ween-vɩɩsã fãa Naandã yaa Wẽnnaam wakat fãa yĩnga.”—Eza. 40:28.

• “Tõnd Ba sẽn be saasẽ.”—Mat. 6:9.

• “Wẽnnaam yaa nonglem.”—1 Zã 4:8.

5. Bõe la f tõe n kõ Wẽnnaam a Zeova?

• “Yãmb segd n nonga a Zeova sẽn yaa yãmb Wẽnnaamã ne y sũurã fãa, ne y sɩɩgã fãa, ne y yamã fãa, la ne y pãngã fãa.”—Mark 12:30.

• “Yaa yãmb Wẽnnaam a Zeova la y segd n waooge. Yaa yẽ a ye bal la y segd n sak ne y sũur fãa.”—Luk 4:8.

6. Bõe yĩng tɩ fo segd n maan sɩd ne a Zeova?

• “M biiga, yɩ yam soab n noog m sũuri, tɩ m tõog n leok sẽn baood-a mam noorã.”—Yel. 27:11.

7. Ãnda la fo pʋʋsda, la ãnda yʋʋr la fo tũnugd ne n pʋʋsdẽ?

• “Sɩd-sɩdã, mam [a Zeezi] yeta yãmb tɩ bũmb ning yãmb sẽn na n kos m ba, b na n kõo yãmb mam yʋʋrã yĩnga.”—Zã 16:23.

8. Bõe ne bõe la y tõe n pʋʋs n kose?

• “Ad yãmb sẽn tog n pʋʋs to-to: ‘Tõnd Ba sẽn be saasẽ, bɩ yãmb yʋʋr paam waoogre. Bɩ yãmb Rĩungã wa. Bɩ y raabã maan tẽngã zugu, wa sẽn maand saasẽ wã. Bɩ y kõ tõnd rɩɩb rũndã daarã yĩnga, la y kõ tõnd sugr d yel-wẽnã yĩnga, wa tõnd me sẽn kõ d bɛɛgdbã sugrã. 13 Ra bas-y tõnd tɩ d maan yel-wẽnd makr sasa ye. Fãag-y tõnd wẽng soabã nugẽ.’”—Mat. 6:9-13.

• “Ad bas-m-yam ning tõnd sẽn tar ne Wẽnnaamã: Yaa tɩ sẽn wa n yaa bũmb ning fãa la d kos tɩ zems ne a raabã, a kelgda tõndo.”—1 Zã 5:14.

9. Bõe n tõe n wa kɩt t’a Zeova pa kelg ned pʋʋsgo?

• “B na n boola a Zeova n kos sõngre, la a pa na n leok-b ye. . . . b tʋʋm-wẽnsã yĩnga.”—Mii. 3:4.

• “A Zeova nin bee nin-tɩrsã zutu, t’a tʋbã kelgd b pʋʋsgã. La a Zeova zabda ne sẽn maand-b wẽngã.”—1 Pɩy. 3:12.

10. A Zeezi Kirist yaa ãnda?

• “A Sɩmo-Pɩyɛɛr leokame yaa: ‘Yãmb yaa Kiristã, Wẽnnaam ning sẽn vɩ wã Biigã.’”—Mat. 16:16.

11. Bõe yĩng t’a Zeezi wa tẽngã zugu?

• “Ninsaal biigã pa wa tɩ neb sõng-a ye. A waame n na n sõng nebã, la a kõ a vɩɩmã tɩ yɩ yaood neb wʋsg yĩnga.”—Mat. 20:28.

• “Mam [a Zeezi] segd n moona Wẽnnaam Rĩungã koe-noogã tẽns a taab pʋsẽ me. Bala yaa bõn-kãng yĩng la b tʋm maam.”—Luk 4:43.

12. Bõe la y tõe n maan n wilg tɩ y sũur nooma ne a Zeezi sẽn ki tɩ yɩ maoongã?

• “A kii nebã fãa yĩnga, sẽn na yɩl tɩ neb nins sẽn vɩ wã ra le vɩ b mens yĩnga, la b vɩ a soab ning sẽn ki bãmb yĩng n lebg n vʋʋgã yĩnga.”—2 Kor. 5:15.

13. A Zeova kõo a Zeezi tõ-bʋgo?

• “Wẽnnaam kõo maam noor tɩ m ges bũmb fãa yell saasẽ la tẽngã zugu.”—Mat. 28:18.

• “Wẽnnaam zẽk-a lame n kõ-a naam sẽn yaa kãsenga, la a kõ-a yʋʋr sẽn yɩɩd yʋy a taabã fãa ne yamleoogo.”—Fili. 2:9.

14. Fo kɩsa sɩd t’a Zeova Kaset rãmbã Siglgã taoor lʋɩtb Sullã n yaa “tʋm-tʋmd sẽn tũud sɩd la sẽn tar yamã” a Zeezi sẽn yãkã bɩ?

• “Ãnda n yaa tʋm-tʋmd sẽn tũud sɩd la sẽn tar yamã, a zu-soabã sẽn yãk t’a ges a zakã rãmb yelle, n kõt-b rɩɩb wakat sẽn zemsã?”—Mat. 24:45.

15. Vʋʋsem sõngã yaa ned bɩ?

• “Tɩ malɛkã leok-a yaa: ‘Vʋʋsem sõngã na n waa fo zugu, tɩ Sẽn ka-a to wã pãng bui foo. Rẽ n so tɩ b na n bool fo sẽn na n dog a soabã tɩ sõngo, la Wẽnnaam Bi-ribla.’”—Luk 1:35.

• “Woto wã, baa yãmb sẽn yaa nin-wẽnsã sã n tõe n kõ y kambã bũmb sẽn yaa sõma, sẽn yɩɩd fãa, yãmb Ba sẽn be saasẽ wã kõn kõ vʋʋsem sõngã neb nins sẽn kot rẽ wã sɩda?”—Luk 11:13.

16. Ne vʋʋsem sõngã maasem, bõe la a Zeova maan-yã?

• “Yɩɩ ne a Zeova gomdã la b maan saasã. Yɩɩ ne a noorã pemsem la b maan bũmb nins fãa sẽn be saasẽ wã.”—Yɩɩn. 33:6.

• “Vʋʋsem sõngã sã n wa sig yãmb zutu, yãmb na n paama pãnga. Yãmb na n yɩɩ mam kaset rãmb . . . hal n tãag dũniyã zĩig ning sẽn zãr n yɩɩdã.”—Tʋʋ. 1:8.

• “Gʋls-sõamyã bãngr-gomd baa a ye pa yit ninsaal tagsgẽ ye. Bala zɩ n tũ ne ninsaal raab tɩ bãngr-gomd wa ye. La yaa neb n togs Wẽnnaam koees wa sẽn zems vʋʋsem sõngã sẽn vẽneg-ba.”—2 Pɩy. 1:20, 21.

17. Wẽnnaam Rĩungã yaa bõe?

• “Saasẽ Wẽnnaamã na n lugla rĩung sẽn pa na n tol n sãame. Buud baa a ye pa na n tol n deeg rĩun-kãng ye. A na n wãa rĩun-kãensã fãa, n kɩt tɩ b meneme, tɩ yẽ a ye pa wakat fãa.”—Dãn. 2:44.

18. Bark bʋs la Wẽnnaam Rĩungã na n wa ne tɩ naf foo?

• “A na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye. Bũmb nins sẽn da be pĩndã loogame.”—Vẽn. 21:4.

19. Bõe n kɩt tɩ fo miẽ tɩ Wẽnnaam Rĩungã sẽn na n wa ne bark ninsã na n pidsa ka la bilfu?

• “Karen-biisã kolgame n na n yã-a bãmb ne taab sʋk bala, n yeele: ‘Bɩ y togs-d wɛ! Bõn-kãensã na n zĩnda wakat bʋgo, la bõe n na n yɩ bãnd n wilg tɩ yãmb waame, la tɩ dũniyã rabda a saabẽ?’ A Zeezi leoka bãmb yaa: ‘. . . Buud na n yika zabr ne buud a to, tɩ rĩung yik zabr ne rĩung a to. Kom la tẽn-digimdg na n zĩnda zĩig-zĩiga. Sẽn paase, Rĩungã koe-no-kãngã na n moona dũniyã tɛk fãa tɩ yɩ kaset buud toɛy-toɛyã fãa yĩnga. Yaa rẽ poor la saabã na n ta.’”—Mat. 24:3, 4, 7, 14.

• “Bɩ f bãng tɩ yaoolem wakatã, yɛlã na n yɩɩ kãn-kãe hal tɩ vɩɩmã lebg toogo. Bala nebã na n yɩɩ beed dãmba, neb sẽn nong ligdi, wuk-m-mens rãmba, waoog-m-mens rãmba, neb sẽn nong tʋya, ba-rãmb la ma-rãmb kɩɩsdba, sõm-zɩtba, neb sẽn pa maand sɩda, neb sẽn pa tar nonglem, neb sẽn pa baood laafɩ, tẽn-kãn-neba, neb sẽn pa tar yõk-m-menga, nen-kɛglem dãmba, neb sẽn kis sẽn sõmbe, zãmb dãmba, tʋb-pa-wʋmdba, neb sẽn pid ne wuk-m-menga, neb sẽn nong yõ-noogr n pa nong Wẽnnaam ye. B wõnda wẽn-sakdba, la b pa vɩ wa wẽn-sakdb ye.”—2 Tɩm. 3:1-5.

20. Bõe la fo tõe n maan n wilg tɩ Rĩungã tara yõod ne foo?

• “Bɩ y rengd n baood Wẽnnaam Rĩungã ne a tɩrlmã wakat fãa.”—Mat. 6:33.

• “A Zeezi yeela a karen-biisã yaa: ‘Ned sã n dat n tũ maam, bɩ a kɩɩs a mengã raabo, la a rɩk a namsg ra-luk n pʋg maam wakat fãa.’”—Mat. 16:24.

21. A Sʋɩtãan ne a zĩn-dãmbã yaa ãnda rãmba?

• “Yãmb yita Sʋɩtãanã sẽn yaa y ba wã nengẽ, . . . A ra yaa nin-kʋʋd a sẽn wa n sɩngã.”—Zã 8:44.

• “Rẽ n so tɩ b lob wag-bedrã tẽngã zugu. Yẽ n yaa wag-kʋdrã b sẽn boond tɩ Munaafɩɩk la Sʋɩtãanã, soab ning sẽn kẽesd dũniyã fãa moogã. B lob-a-la tẽngã zugu, la b naaga a malɛgsã me n lobe.”—Vẽn. 12:9.

22. Bõe la a Sʋɩtãan yeel n dõd a Zeova, la neb nins sẽn tũud-a wã?

• “Pagã yeela waafã yaa: ‘Tõnd tõe n dɩɩ tɩɩs nins fãa sẽn be zẽedẽ wã biisi. La sã n yaa ne tɩɩg ning sẽn be zẽedã tẽn-sʋkã, Wẽnnaam yeelame: “Yãmb pa segd n dɩ a biisã ye. Y pa segd n sɩɩs-a meng ye. Sã n pa rẽ, y na n kiime.”’ Rẽ la waafã yeel pagã yaa: “Hakɩɩka, yãmb pa na n ki ye. Bala Wẽnnaam miime tɩ daar ning yãmb sẽn na n dɩ a bila, yãmb ninã na n pukame tɩ y lebg wa Wẽnnaam, n mi sõma ne wẽng n bake.’”—Sɩng. 3:2-5.

• “A Sʋɩtãan yeela a Zeova yaa: ‘Gãongo, gãong yĩnga. Ninsaal na n sak n kõo bũmb nins fãa a sẽn tarã a vɩɩmã yĩnga.’”—Zoob 2:4.

23. Bõe la f tõe n maan n wilg t’a Sʋɩtãan sẽn yeelã yaa ziri?

• “Bao n bãng fo . . . Wẽnnaamã la f tũ-a ne f sũur fãa.”—1 Kib. 28:9.

• “Hal n tãag m kũum, mam kõn bas m burkĩndã ye!”—Zoob 27:5.

24. Bõe yĩng tɩ ninsaalbã yaa kiidba?

• “Yaa woto la yel-wẽndã tũ ne rao a yembr n kẽ dũni wã, tɩ kũum tũ ne yel-wẽndã n wa, tɩ kũum ta nebã fãa, b fãa sẽn maan yel-wẽnã yĩnga.”—Rom. 5:12.

25. Ned sã n ki, a le mii bũmb bɩ?

• “Nin-vɩɩsã miime tɩ b na n kiime, la sẽn ki-bã pa mi baa fʋɩ ye. B leb n pa tar keoore, bala b yĩma b yell fasɩ.”—Koɛ. 9:5.

26. Koe-no-bʋg n be sẽn ki-bã yĩnga?

• “Wẽnnaam na n vʋʋga nin-tɩrsã ne sẽn pa-b nin-tɩrsã me.”—Tʋʋ. 24:15.

27. Neb a wãn n na n tɩ naag a Zeezi n dɩ naam saasẽ?

• “Mam yãa Pe-bilã sẽn yas Siyõ tãngã zugu, tɩ neb tus-koabg la tus pis-naas la a naas sẽn tar a yʋʋrã ne a Ba wã yʋʋr tɩ gʋls b rĩyẽ wã be ne-a.”—Vẽn. 14:1.

Fo sẽn zãms Biiblã, f bãnga a Zeova sẽn dat tɩ f maan bũmb ninsã, la fo sẽn tõe n maan to-to n tũ a noyã sẽn yaa tɩrsã. Tõeeme tɩ fo sẽn bãng bũmb ninsã kɩtame tɩ f toeem f yel-manesem kẽere, la f tagsg sẽn da yaa a soab vɩɩmã zugã. Fo sẽn yãk yam n na n tũ a Zeova noyã sẽn yaa tɩrsã, fo paamame n tõe n lebg koe-moond n tʋmd a tʋʋmã tɩ tat a yam.

Sogsg nins sẽn pʋgdã na n sõnga foo tɩ f bãng a Zeova sẽn dat tɩ f maanã vẽenega. Leb n na n tẽeg-f-la bũmb kẽer f sẽn tog n maan n tõog n yɩ a Kaset soab sẽn tat a yam. Woto na n kɩtame tɩ f sɩd bãng tɩ tara yõod tɩ f maan bũmb fãa ne sũur-kaset sẽn yaa sõma, a Zeova waoogr yĩnga.—2 Kor. 1:12; 1 Tɩm. 1:19; 1 Pɩy. 3:16, 21.

Fo sẽn zãms Biiblã n ta masã wã, yaa vẽeneg tɩ fo rata ne f sũur fãa n sak a Zeova naamã, la f lebg a siglgã neda. Sogsgã la vɛrse-rãmbã b sẽn wilgã na n sõng-f lame tɩ f bãng f sã n mii bũmb ning sẽn kɩt tɩ f segd n sak a Zeova sẽn sigl yɛlã to-to tigingã pʋgẽ la zakã pʋgẽ wã, la f sã n wʋmda kiris-ned sẽn segd n sak tẽngã taoor dãmbã võore. Na n sõnga foo tɩ f maneg n nand a Zeova sẽn sigl yɛlã to-to sẽn na yɩl n zãms a nin-buiidã la a keng b tẽebã. Wala makre, tigissã f sẽn tõe n kẽng la f kẽes f toog sõssã pʋsẽ wã.

Sẽn paase, bab-kãngã na n wilga vẽeneg tɩ f segd n moonda koɛɛgã wakat fãa, n sõng nebã tɩ b bãng a Zeova, la a sẽn maand bũmb nins ninsaalbã yĩngã. (Mat. 24:14; 28:19, 20) Sẽn na n baase, na n kɩtame tɩ f bãng tɩ rɩk f meng n kõ Wẽnnaam a Zeova n deeg lisgã pa reem yell ye. Fo tõe n kɩsa sɩd t’a Zeova sũur yaa noogo, a sẽn ne tɩ fo ratame n dɩ bũmb nins a sẽn maand fo yĩngã nafa wã.

1. No-bʋg la kiris-nebã segd n tũ kãadmã wɛɛngẽ? Sã n yaa ne Biiblã, bõe bal n kõt ned sor t’a tõe n kao a kãadem?

• “Yãmb nan pa karem tɩ sẽn naan-a bãmb hal sɩngrẽ wã naan-b-la rao la paga, la t’a yeelame: ‘Yaa rẽ n kɩt tɩ rao na n bas a ba ne a ma n zĩnd ne a paga, la b yiibã na n yɩɩ yĩng a yembr’ la? Dẽnd bãmb pa le yaa yiib yɛs ye. B lebga yĩng a yembre. Woto wã, bũmb nins Wẽnnaam sẽn lagem taabã, bɩ ned ra welg-b ye. . . ned sã n kao kãadem ne a pag tɩ pa a sẽn yo yĩng n tɩ rɩk pag a to, a yoodame.”—Mat. 19:4-6, 9.

2. Bõe yĩng tɩ rao ne pag sẽn vɩ ne taab segd n kẽng kãdengẽ n tɩ gʋls b kãadmã tɩ zems ne laloa wã sẽn yetã? Yãmb sã n kẽe kãadem, y sẽn kẽ kãadem to-to wã zemsa ne laloa wã sẽn wilgã bɩ?

• “Ket n tẽegd-b tɩ b sakd nanambsã ne pãn-soaadbã, tɩ b segl n sa tʋʋm-sõng buud fãa yĩnga.”—Tɩt 3:1.

• “Bɩ kãadem zĩnd waoogr nebã fãa sʋka, la bɩ kãadem gãag ra rẽgem ye. Bala Wẽnnaam na n kaoo sẽn tʋmd-b raglem tʋʋmã ne yoaadbã bʋʋdo.”—Ebre. 13:4.

3. Fo segd n maana bõe zakã pʋgẽ?

• “M biiga, kelg f ba wã kiblgu, la f ra bas f ma wã sẽn zãms foo bũmb ningã me ye.”—Yel. 1:8.

• “Sɩd yaa a pag zu-soab wa Kiristã sẽn yaa tigingã zu-soabã, . . . Pʋg-sɩdba, kell-y n nong-y y pagbã, wa Kiristã me sẽn nong tigingã n kõ a meng a yĩngã,”—Efɛɛ. 5:23, 25.

• “Ba-rãmba, ra maand-y bũmb sẽn yikd y kambã sũy ye. La bɩ y kell n wub bãmb a Zeova kiblgã la a saglsã pʋsẽ.”—Efɛɛ. 6:4.

• “Kamba, sakd-y y ba-rãmbã la y ma-rãmbã bũmb fãa pʋgẽ, bala rẽ nooma Zu-soabã.”—Kolo. 3:20.

• “Bɩ yãmb a pagbã sulg y mens n sak y sɩdbã.”—1 Pɩy. 3:1.

4. Bõe yĩng tɩ d segd n wilg tɩ d nanda vɩɩmã?

• “[Wẽnnaam] n kõt ninsaalbã fãa vɩɩm, vʋʋsem la bũmb fãa. . . . Yaa yẽ maasem yĩng la tõnd vɩya, n kẽnd la d beẽ.”—Tʋʋ. 17:25, 28.

5. Bõe yĩng tɩ d pa segd n kʋ neda, bɩ n yiis pʋga?

• “Rap a yiib sã n zabd taaba, n fão pag sẽn tar pʋg . . . La yõor sã n yãke, fo segd n kõo vɩɩm vɩɩm yĩnga.”—Yik. 21:22, 23.

• “Yãmb ninã yãa maam m sẽn wa n be m ma wã pʋgẽ wã.Mam yĩngã wil fãa ra gʋlsa yãmb sebrã pʋgẽ, n wilgd b maanegã raya,tɩ b baa a ye nan kae meng ye.”—Yɩɩn. 139:16.

• “A Zeova kisa . . . nus sẽn daagd bʋʋm dãmb zɩɩm.”—Yel. 6:16, 17.

6. No-bʋg la Wẽnnaam kõ zɩɩmã wɛɛngẽ?

• “Lak-y y mens ne . . . zɩɩm, ne rũng sẽn sãre.”—Tʋʋ. 15:29.

7. Bõe yĩng tɩ d segd n nong d tẽed-n-taasã?

• “Mam kõta yãmb tõ-paalga: Bɩ y nong taaba. Nong-y taab wa mam sẽn nong yãmb to-to wã. Yãmb sã n nong taaba, nebã fãa na n bãngame tɩ yãmb yaa mam karen-biisi.”—Zã 13:34, 35.

8. Bã-loangdg sã n tar neda, sẽn na yɩl n da long neb a taabã, a) Bõe yĩng t’a pa segd n mobg ned wall n mok-a? b) Bõe yĩng t’a sũur pa segd n yiki, neb kẽer sã n pa boond-a b zagsẽ? d) Ned sã n tẽed tɩ bã-loangdg n tar-a, n yaool n dat n bao pag bɩ sɩda, bõe yĩng t’a segd n deng n kẽng logtor-yir tɩ b yãk a zɩɩmã n gese? e) Bã-loangdg sã n tar neda, bõe yĩng t’a segd n togs kãsem-dãmbã sull yel-gɛtã t’a lisgã daar nan pa ta?

• “Da tall-y ned baa a ye samd n zʋʋg y sẽn segd n nong taabã ye. . . . ‘Fo segd n nonga f to wa f menga.’ Nonglem pa maand a to wẽng ye.”—Rom. 13:8-10.

• “Ra bao-y y mens nafr bal ye. Bao-y y taabã nafr me.”—Fili. 2:4.

9. Bõe yĩng t’a Zeova rat tɩ d kõt d taabã sugri?

• “Bɩ y maand sũ-mar ne taaba, la y sakd n kõt taab sugr baa ned sã n wa tar yell ne a to. A Zeova sẽn sak n kõ yãmb sugrã, yãmb me segd n maana woto.”—Kolo. 3:13.

10. F tẽed-n-taag sã n wẽg foo wall a kãneg-fo, wãn to la f tõe n welg yellã?

• “Fo saam-biig sã n maan yel-wẽnde, kẽng n tɩ togs-a a kongrã foo ne yẽ sʋk bala. A sã n kelg foom, fo le paama f saam-biigã. La a sã n pa kelge, bɩ f kẽng n tɩ bao nin-yɛng wall neb a yiib tɩ b yãag-fo, sẽn na yɩl tɩ bũmb fãa yɩ vẽeneg ne neb a yiib bɩ a tãab kaseto. La a sã n pa kelg bãmba, bɩ f togs tigingã. La a sã n baas n pa kelg tigingã, bɩ f ges-a wa bu-zẽng neda, la wa yõor-yaood dɛɛgda.”—Mat. 18:15-17.

11. A Zeova tagsg yaa wãn ne

▪ yoobo?

▪ pʋʋs bõn-naands wall tũnug ne-b n pʋʋse?

▪ rao ne rao wall pag ne pag sẽn kẽed ne taaba?

▪ wagdem?

▪ par n bao ligdi?

▪ la rãam yũ tɩ looge?

• “Da belg-y y mens ye. Sẽn tʋmd-b raglem tʋʋma, bõn-naands pʋʋsdba, yoaadba, rap sẽn sakd tɩ rap gãe-ba, rap sẽn gãe rapa, wagda, yão-be-neba, rã-yũud-kãase, nin-tʋʋdba, la fãadb pa na n paam Wẽnnaam Rĩungã ye.”—1 Kor. 6:9, 10.

12. Yoobã wɛɛngẽ, rat n yeel tɩ kẽ ne ned sẽn pa f pag wall sɩdã wɛɛngẽ, bõe la fo yãk yam n na n maane?

• “Zoe-y yoobo!”—1 Kor. 6:18.

13. Bõe yĩng tɩ d segd n zãag d mens ne tɩt wall bũmb a taab sẽn tõe n wa kɩt tɩ d lebg b yamba, wall d pa tõe n tags sõma, tɩ pa logtor n kõ-d sore?

• Bɩ “y kõ y yĩnsã tɩ yɩ maoong sẽn vɩ, sẽn yaa sõngo, sẽn tat Wẽnnaam yam, rat n yeel tɩ y tʋm Wẽnnaam tʋʋmdã ne y yamã. Bɩ y ra le bas tɩ dũni-kãngã neb kɩt tɩ y yɩ wa bãmb ye. Bɩ y maneg y yamã tɩ kɩt tɩ y toeeme, n tõog n kɩs sɩd tɩ Wẽnnaam daabã yaa sõma, tɩ sakda ne-a, la tɩ zemsa zãnga.”—Rom. 12:1, 2.

14. Manesem-bʋs sẽn yaa zĩn-dãmb yɛl la Wẽnnaam kis-yã?

• “Yãmb sʋkã, b pa segd n yã . . . ned sẽn bʋgd bagre, ned sẽn maand tɩto, ned sẽn baood n na n bãng beoog yɛla, ned sẽn rabsd a taaba, ned sẽn gomd ne zĩn-dãmba, ned sẽn togsd beoog yɛla, la ned sẽn gomd ne kɩɩms ye.”—Tõo. 18:10, 11.

15. Ned sã n maan yel-wẽn-kãsenga, n dat n le paam a Zeova lohorem, bõe la a segd n maan tao-tao?

• “Mam wa n baas n vẽnega m yel-wẽndã n togs yãmba. Mam pa lud m kongrã ye. Mam yeelame: ‘Mam na n vẽnega m beegrã n togs a Zeova.’”—Yɩɩn. 32:5.

• “Ned bee yãmb sʋkã n ka laafɩ bɩ? Bɩ a bool tigingã kãsem-dãmbã, la bɩ b pʋʋs a yĩnga, la b sõog-a kaam a Zeova yʋʋr yĩnga. Pʋʋsgã b sẽn pʋʋs ne tẽebã na n kɩtame tɩ bãadã paam laafɩ, t’a Zeova me kɩt t’a yiki. Sẽn paase, a sã n da maana yel-wẽna, a na n paama sugri.”—Zak 5:14, 15.

16. Fo sã n bãng tɩ f tẽed-n-taag n maan yel-wẽn-kãsenga, bõe la f segd n maane?

• “Ned sã n yã bũmb b sẽn maan tɩ pa sõma, wall a wʋmame tɩ b gomd rẽ yelle, n wa wʋm tɩ b moond zãma wã sʋk n dat tɩ b wa kõ rẽ kaset t’a pa togse, a na n paama yel-wẽnd taale. B na n sɩbg-a-la a kongrã yĩnga.”—Maan. 5:1.

17. B sã n yeel tɩ ned pa le yaa a Zeova Kaset soaba, d manesem segd n yɩɩ wãn ne-a?

• “Ra le maan tũud-n-taar ne ned b sẽn boond tɩ saam-biiga, t’a yaool n yaa yoaada, wall yão-be-neda, wall bõn-naands pʋʋsda, wall nin-tʋʋsa, wall rã-yũud-kãaga, wall fãad ye. Da rɩ-y ne ned a woto meng ye.”—1 Kor. 5:11.

• “Ned sã n wa yãmb nengẽ n pa tar zãms-kãnga, bɩ y ra reeg-a y zagsẽ wall y pʋʋs-a ye.”—2 Zã 10.

18. Bõe yĩng tɩ y zo-rãmbã segd n yɩ neb sẽn nong a Zeova?

• “Sẽn kẽnd-a ne yam dãmbã na n lebga yam soaba, la sẽn tũud-a yalemb na n paama zu-loeese.”—Yel. 13:20.

• “Da belg-y y mens ye. Tũud-n-ta-wẽns sãamda minim-sõamyã.”—1 Kor. 15:33.

19. Bõe yĩng t’a Zeova Kaset rãmbã pa kẽesd b toog politikã yɛlẽ?

• “Bãmb pa dũniyã rẽnd wa ma-me [a Zeezi] sẽn pa dũniyã rẽndã.”—Zã 17:16.

20. Bõe yĩng tɩ f segd n sak tẽngã taoor dãmba?

• “Bɩ ned kam fãa sak nanambsã, bala naam ka be tɩ sã n pa Wẽnnaam n kõ sor ye. Nanambs nins sẽn be n dɩt naam toor-toorã yaa Wẽnnaam n bas tɩ b rɩt naam.”—Rom. 13:1.

21. Ninsaalbã laloa sã n kɩɩsd Wẽnnaam noore, bõe la d segd n maane?

• “Wẽnnaam n yaa naab ning tõnd sẽn segd n sakã, pa ninsaalbã ye.”—Tʋʋ. 5:29.

22. Vɛrse-bʋs n tõe n sõng foo tɩ f bãng n yãk tʋʋmde, n yaool n pa kẽes f toog dũniyã yɛlẽ?

• “Buud pa na n zẽk sʋʋg n zab ne buud a to, la b kõn le zãms zabr me ye.”—Mii. 4:3.

• “Mam neba, yi-y-yã a [Babilon-kãsengã] pʋgẽ, y sã n pa rat n naag-a a yel-wẽnã pʋgẽ, la y sã n pa rat n paam a toodã.”—Vẽn. 18:4.

23. Pemsem kokr la reem bʋs buud n yaa sõma, la bʋs buud la f segd n zãag f meng ne?

• “A Zeova . . . kisa ned sẽn nong nen-kɛglem tʋʋma.”—Yɩɩn. 11:5.

• “Kisg-y sẽn yaa wẽnga, la y gãd sẽn yaa sõma kãn-kãe.”—Rom. 12:9.

• “Bũmb nins fãa sẽn yaa sɩda, bũmb nins fãa sẽn tar yõodo, bũmb nins fãa sẽn yaa tɩrse, bũmb nins fãa sẽn yaa yɩlma, bũmb nins fãa sẽn tog ne nonglem, bũmb nins fãa sẽn tar kaset-sõngo, bũmb nins fãa sẽn yaa sõma, la bũmb nins fãa sẽn tog ne pẽgre, bɩ y ket n tagsd bõn-kãens yelle.”—Fili. 4:8.

24. Bõe yĩng t’a Zeova Kaset rãmbã pa naagd tũudum a taabã neb n pʋʋsdẽ?

• “Yãmb pa tõe n dɩt ‘a Zeova taablẽ wã,’ la y rɩt zĩn-dãmbã taablẽ ye.”—1 Kor. 10:21.

• “A Zeova yetame: ‘Woto yĩnga, bɩ y yi bãmb sʋk la y lak y mense, la y ra le sɩɩs bõn-dẽgdã, la mam na reeg yãmba.’”—2 Kor. 6:17.

25. Biiblã vɛrse-bʋs n tõe n sõng foo tɩ f bãng f sã n tõe n naag n maana tigr ninga?

• “La b tɩ naaga bu-zẽmsã, n dɩk b togs-n-taare. B ra waoogda bu-zẽmsã bõn-naandse, tɩ rẽ lebg bẽdg b yĩnga.”—Yɩɩn. 106:35, 36.

• “Sẽn ki-bã pa mi baa fʋɩ ye.”—Koɛ. 9:5.

• “Bãmb pa dũniyã rẽnd wa ma-me sẽn pa dũniyã rẽndã.”—Zã 17:16.

• “wakat sẽn loogã yãmb maana dũniyã nebã raabo, la masã sekame. Yãmb da naaga b nin-yoolem tʋʋmã pʋgẽ, b tʋʋm-wẽnsã ratem, b rã-tɩgrã, b reem sẽn naag ne tʋʋm-yoodã, b sẽn yũud rãam n wagsd taabã, la b bõn-naands pʋʋsgã sẽn yaa bũmb sẽn kɩɩsd tõogã pʋgẽ.”—1 Pɩy. 4:3.

26. Kiba-bʋs n be Biiblã pʋgẽ n gomd rogem daar tẽegr kibs yelle? Kiba-kãens sõngda tõnd tɩ d bãng bõe?

• “Rasem a tãab-n-soabã daar yɩɩ a Farawõ rogem daar tẽegr kibsa, t’a maan kibs a tʋm-tʋmdbã fãa yĩnga. A yiisa bõn-yũudl kɩtbã naab ne bur-wẽedbã naab a tʋm-tʋmdbã taoore. A lebsa bõn-yũudl kɩtbã naab a tʋʋmdẽ wã, . . . La a luula bur-wẽedbã naaba.”—Sɩng. 40:20-22.

• “B sẽn wa n maand a Erood rogem daar tẽegr kibsa, a Erodiyaad bi-puglã saoo nebã taoor tɩ yɩ a Erood noog wʋsgo, t’a wẽen t’a na n kõ-a-la bũmb ning fãa a sẽn na n kose. La a ma wã sagl-a lame t’a tɩ yeel yaa: ‘Bɩ y sagl a Zãmbatiis zugã laag pʋgẽ n wa kõ maam.’ Rĩmã tʋmame tɩ b tɩ fiuug a Zã zugã bãensã roogẽ.”—Mat. 14:6-8, 10.

27. Bõe yĩng tɩ f segd n tũud kãsem-dãmbã saglse?

• “Bɩ y kelg sẽn lʋɩt-b taoor yãmb sʋkã, la y sulg y mens n sak-ba, bala b geta yãmb yell wakat fãa, n miẽ tɩ Wẽnnaam na n kaoa b bʋʋd tɩ zems b tʋʋma. Bɩ y maan woto sẽn na yɩl tɩ b tʋm ne sũ-noog la ra yɩ ne siri, bala rẽ pa na n naf yãmb ye.”—Ebre. 13:17.

28. Bõe yĩng tɩ tar yõod tɩ foo ne f zakã rãmb yãk wakat n karemd Biiblã la y zãmsd-a?

• “A nonga a Zeova tõogã wʋsgo. A sikda a koɛɛg n karemd a tõogã wĩndg la yʋngo. Yẽ na n yɩɩ wa tɩɩg b sẽn sel kʋɩlg noore, tɩɩg sẽn womd biis a womb wakate, t’a vãadã me pa kʋɩtẽ ye. Bũmb ning fãa yẽ sẽn maand na n yãka nenga.”—Yɩɩn. 1:2, 3.

29. Bõe yĩng tɩ fo nong tigissã kẽnd la f kẽesd f toogo?

• “Mam na n moona m saam-biisã yãmb yʋʋrã. Mam na n pẽga yãmb tigingã pʋgẽ.”—Yɩɩn. 22:22.

• “Bɩ d tẽegd taab yelle, sẽn na yɩl n sõng taab tɩ d bɩɩs nonglem la d tʋm tʋʋm-sõma. Bɩ d ra bas taab tiging wa neb kẽer sẽn minim n maandẽ wã ye. La bɩ d kengd taab raoodo, sẽn yɩɩd fãa, d sẽn ne tɩ daarã kolgdame wã yĩnga.”—Ebre. 10:24, 25.

30. Tʋʋm nins a Zeezi sẽn kõ tõndã sʋka, bʋg n tar yõod n yɩɩda?

• “Bɩ y kẽng n tɩ sõng buud toɛy-toɛyã fãa neb tɩ b yɩ mam karen-biisi, n lis bãmb . . . la y zãms bãmb tɩ b tũ bũmb nins fãa mam sẽn yeel yãmbã.”—Mat. 28:19, 20.

31. D sã n wa na n kõ kũun n teel Rĩungã tʋʋm wall n sõng d tẽed-n-taase, manesem-bʋg n tat a Zeova yam?

• “Waoog a Zeova ne f bõn-sõma wã.”—Yel. 3:9.

• “Bɩ ned kam fãa maan wa a sẽn tags a sũurẽ, la pa ne nen-gãneng wall ne modgr ye. Bala Wẽnnaam nonga ned ning sẽn kõt ne sũ-noogo.”—2 Kor. 9:7.

32. Kiris-nebã miime tɩ b tõe n wa sega zu-loe-bʋse?

• “Sũ-noog rãmb la neb nins b sẽn namsd tɩrlem yĩngã, bala saasẽ Rĩungã yaa bãmb n so. Yãmb yaa sũ-noog rãmba, sã n mik tɩ b paoogda yãmb mam yĩnga, n namsd yãmb la b rõt yãmb ne wẽng buud fãa. Maan-y sũ-noog la y kɩdme, yãmb keoorã sẽn be saasẽ wã sẽn yaa kãsengã yĩnga. Bala yaa woto me la b nams no-rɛɛsdbã sẽn zĩnd sẽn deng yãmbã.”—Mat. 5:10-12.

33. Bõe yĩng tɩ ned sã n deeg ligs n lebg a Zeova Kaset soab bɩ yaa zu-zẽkre?

• “Yãmb gomdã lebga bũmb sẽn kõt maam sũ-noogo, la sẽn kɩtd tɩ m kɩdemdẽ, bala mam zãada yãmb yʋʋrã.”—Zer. 15:16.

Naoor wʋsgo, yaa a Zeova Kaset rãmbã tigis-kãsemsã sasa la nebã reegd lisgu. Lisgã sõsg baasgẽ, sõsdã na n kosa sẽn dat-b n deeg lisgã tɩ b yiki, n zẽk b koees n leok sogsg a yiibu. Sogsgã yaa:

1. Rẽ yĩnga, yãmb teka yam n kos y yel-wẽnã sugri, n dɩk y meng n kõ a Zeova, la y sak tɩ yaa ne a Zeezi Kirist maasem la a fãagd nebã bɩ?

2. Rẽ yĩnga, yãmb miime tɩ y sẽn na n deeg lisgã, wilgdame tɩ y lebga a Zeova Kaset soaba, la a siglgã ned bɩ?

Sẽn dat-b n deeg lisgã sã n leok sogs-kãensã tɩ n-ye vẽenega, b ‘kõta kaset’ zãma wã taoore, tɩ b sɩd tẽeda a Zeezi maoongã, la tɩ b rɩka b mens zãng n kõ a Zeova n na n maan a raabã. (Rom. 10:9, 10) Rẽ n so tɩ neb nins sẽn dat n deeg lisgã segd n deng n tags sogs-kãensã zug neer la b pʋʋs rẽ wɛɛngẽ, sẽn na yɩl n tõog n leok ne pʋ-peelem.

Yãmb pʋʋsa a Zeova n dɩk y meng n kõ-a, n pʋlm-a tɩ y na n tũu yẽ a ye tãa, la tɩ yaa a raabã maaneg n na n tall yõod n yɩɩd ne yãmb bɩ?

Masã, yãmb kɩsa sɩd zãng tɩ y segd n deega lisg tigis-kãseng ning sẽn watã sasa bɩ?

Fu-bʋs buud la ned segd n ning a lisgã reegr sasa? (1 Tɩm. 2:9, 10; Zã 15:19; Fili. 1:10)

D segd n manega d mens ne sik-m-meng la gũusgu, sẽn na yɩl n wilg tɩ d “tũuda Wẽnnaam.” Sẽn dat n deeg-b lisgã pa segd n ning fut sẽn wõnd fut nins dũniyã neb sẽn wae n ningd n deemd koomã wall fut sẽn tar piblisite-rãmb bɩ bũmb a taab ye. B segd n ninga fut sẽn yaa sõma, yɩlma, sẽn sakd gesg la sẽn zems ne yɛlã sẽn yaa to-to wã.

Manesem-bʋg la ned segd n tall a lisgã reegr sasa? (Luk 3:21, 22)

A Zeezi kõo kiris-nebã mak-sõng lisgã reegr wɛɛngẽ. A ra miime tɩ lisgã pa reem yell ye. Sẽn paase, a yel-manesmã la a tʋʋm-tʋmdɩ wã wilga rẽ. Woto yĩnga, lisgã zĩigẽ ka kʋʋsem zĩiga, reem zĩiga, koom deeng zĩiga, wall zĩig b sẽn na n maan bũmb tɩ lisgã lebg wa reem yell ye. Sẽn deegd-a lisgã pa segd n maan tɩ yaa wa a paama tõogr sẽn yaa kãseng ye. Baa ne lisgã sẽn yaa sũ-noog sasa wã, f segd n wilga f sũ-noogã ne manesem sẽn waoogd Wẽnnaam.

Fo sã n kẽnd tigissã wakat fãa la f nong n be ne f tẽed-n-taasã, wãn to la na n sõng foo tɩ f pids bũmb ning f sẽn pʋlem a Zeova wã?

F lisgã poore, bõe yĩng tɩ yaa tɩlɛ tɩ f ket n zãmsd Biiblã la f moond koe-noogã wakat fãa?