SAK A 03
D tõe n tẽe Biiblã goamã bɩ?
Biiblã pʋgẽ, b pʋlma bũmb wʋsgo, la b kõt sagls buud toor-toor me. Tõe tɩ y rat n bãnga b sẽn yet bũmb ning Biiblã pʋgẽ wã, la tõe tɩ y yam yoodame. Rẽ yĩnga, y tõe n kɩsa sɩd ne pʋlems la sagls nins sẽn be seb-kʋdr a woto pʋgẽ wã bɩ? Biiblã goamã ket n tõe n nafa tõnd rũndã-rũndã bɩ? Y tõe n tẽe a sẽn yet bũmb ning beoog vɩɩmã wɛɛngẽ wã bɩ? Neb milyõ-rãmb kɩsa sɩd ne rẽ. D ges bũmb kẽer sẽn tõe n sõng yãmb me tɩ y kɩs sɩda.
1. Kibay nins sẽn be Biiblã pʋgẽ wã yaa sɩd bɩ, bɩ yaa soalma?
Biiblã yeelame t’a ‘goamã zemsame, la tɩ b yaa goam sẽn yaa sɩda.’ (Koɛɛg soaba 12:10) A sẽn gomd yɛl ninsi, la neb nins yellã sɩd zĩndame. (Karm-y Luk 1:3; 3:1, 2.) Bãngdb la tẽn-vaeesdb wʋsg kõo kaset tɩ Biiblã pʋgẽ, yɛl kẽer sẽn maan sasa ninsi, neba, zĩis la bũmb a taab yell b sẽn gomdã zemsa kɛpɩ.
2. Bõe yĩng tɩ d tõe n yeel tɩ Biiblã ket n tara yõod rũndã-rũndã?
Biiblã goma bũmb kẽer yell a wakatẽ nebã sẽn da nan pa mi. Wala makre, a goma yɛl kẽer yell siãnsã bãngdb me sẽn gomde. Yel-kãensã wʋsg wɛɛngẽ, nebã ra kɩɩsda taaba. La rũndã-rũndã, siãnsã bãngdb sak n deegame tɩ b sẽn yeel Biiblã pʋgẽ wã zemsa kɛpɩ. Wakat fãa, Biiblã goamã “yasa kãenkãe n ka tol n vigsdẽ ye.”—Yɩɩn-sõamyã 111:8.
3. Bõe yĩng tɩ d tõe n kɩs sɩd ne bũmb ning b sẽn yeel Biiblã pʋgẽ beoog-daarã wɛɛngẽ wã?
Biiblã pʋgẽ, d yãta bãngr-goama sẽn togsd yɛl ‘hal wakat sẽn zãr tɩ b nan ka maan ye.’ (Ezayi 46:10) Yɛl wʋsg sẽn zĩnd la b ra pĩnd n togs Biiblã pʋgẽ hal sẽn kaoose, tɩ sɩd wa pids kɛpɩ. Sẽn paase, b pĩnd n togsa yɛl nins sẽn maand dũniyã zugã ball-balle. Sag-kãngã pʋgẽ, d na n goma Biiblã bãngr-goam kẽer yelle. B sẽn pids to-to wã yaa wa yel-solemde.
D BAO N BÃNG N PAASE
D ges bũmb kẽer siãnsã bãngdb sẽn wilgi, tɩ kell n zems ne b sẽn da yeel Biiblã pʋgẽ wã, la d bao n bãng Biiblã bãngr-goam a wãn sẽn pids to-to.
4. Siãnsã rãmb sẽn yetã zemsa ne Biiblã goamã
Pĩnd wẽndẽ, neb wʋsg ra tẽedame tɩ tẽngã roga bũmb zugu. Ges-y VIDEO wã.
D ges bũmb ning b sẽn yeel Zoob sebrã pʋgẽ na n maan yʋʋm 3 500 rũndã wã. Karm-y Zoob 26:7, tɩ rẽ poor bɩ y leok sokrã:
Bõe yĩng tɩ b sẽn yeel tɩ dũniyã yaga vɩʋʋgẽ wã yaa lingri?
Wĩntoogã wɩngda mogrã la kʋɩlsã koom tɩ lebgd walem, n zẽkd n lebgd sawato. Rẽ poore, saagã niidame, tɩ koomã le leb mogrẽ wã, bɩ kʋɩlsẽ wã. Yaa na maan yʋʋm 200 sẽn loog woto la b yaool na n bãng koomã sẽn gilgd n wat to-to wã. La ges-y sẽn da pĩnd n yeel Biiblã pʋgẽ yʋʋm tusa sẽn looge. Karm-y Zoob 36:27, 28, tɩ rẽ poor bɩ y leok sogsgã:
Biiblã pʋgẽ, b sẽn bilg d sẽn paamd koomã to-to wã wɛɛngẽ, bõe n noom yãmba?
Vɛrse-kãensã y sẽn karmã kɩtame tɩ y maneg n tẽed Biiblã goamã bɩ?
5. Biiblã pĩnd n togsa yel-kãsems sẽn da na n wa maane
Karm-y Ezayi 44:27–45:2, tɩ rẽ poor bɩ y leok sokrã:
Babilon sãoongã wɛɛngẽ, yel-bʋs la b ra pĩnd n togs Biiblã pʋgẽ ball-ball yʋʋm 200 sẽn deng rẽ?
Kʋdemdã yɛl sɩd wilgame tɩ Pɛrs rĩm a Sirus ne a sodaasã reega Babilon tẽngã yʋʋmd 539 S.D.Z.R.b B tuu ko-sor tɩ kʋɩlgã koom sẽn da karg n gũbg tẽngã booge. B ta n mikame tɩ tẽngã kʋɩlens pakame, tɩ b kẽ n deeg-a tɩ pa tũ ne zabr ye. Yaa sẽn yɩɩd yʋʋm 2 500 la woto, la Babilon ket n yaa raboogo. Masã, d ges b sẽn da pĩnd n togs Biiblã pʋgẽ wã.
Karm-y Ezayi 13:19, 20, tɩ rẽ poor bɩ y leok sokrã:
Wãn to la bãngr-gom-kãngã pids-yã?
Babilon raboogã, Irak soolmẽ wã rũndã-rũndã
6. Biiblã pʋgẽ, b ra pĩnd n togsa yɛl d sẽn ne rũndã-rũndã
Biiblã pʋgẽ, b wilgdame tɩ d bee “yaoolem wakate.” (2 Tɩmote 3:1) D ges b sẽn da pĩnd n togs wakat kãnga wɛɛngẽ wã.
Karm-y Matiye 24:6, 7, tɩ rẽ poor bɩ y leok sokrã:
Biiblã pʋgẽ, b ra pĩnd n togsame tɩ yel-bʋs n na n zĩnd yaoolem wakatã?
Karm-y 2 Tɩmote 3:1-5, tɩ rẽ poor bɩ y leok sogsgã:
Biiblã pʋgẽ, b ra pĩnd n togsame tɩ yaoolem wakatã, nebã yel-manesem na n yɩɩ wãn-wãna?
Yel-manesem-kãensã sʋka, bʋs la yãmb ne rũndã-rũndã?
NEB KẼER SẼN YETE: “Neb wʋsg yetame tɩ Biiblã yaa soalem sebre.”
Ne yãmba, bõe n wilgd n tɩ yɩɩd tɩ d tõe n kɩsa sɩd ne Biiblã goamã?
KƲMSGO
Kʋdemdã yɛla, siãnsã la bãngr-goamã fãa wilgdame tɩ d tõe n tẽe Biiblã goamã.
Lebg-n-gese
Kibay nins sẽn be Biiblã pʋgẽ wã yaa sɩd bɩ, bɩ yaa soalma?
Wilg-y bũmb kẽer siãnsã rãmb sẽn yete, tɩ zems ne Biiblã goamã.
Yãmb tagsdame tɩ Biiblã pʋgẽ, b togsda yɛl sẽn wat beoog bɩ? Wilg-y y leoorã võore.
BŨMB A TAABA
Bũmb kẽer la b yet Biiblã pʋgẽ tɩ pa zems ne siãnsã bɩ?
Bõe n wilgd tɩ d sɩd bee yaoolem wakatã?
“Yɛl a yoob Biiblã sẽn togse, tɩ pidsd rũndã-rũndã” (Yʋʋmd 2011 sigr kiuug pipi daar Gũusg Gasgã)
Bãngr-goam b sẽn da pĩnd n togs Biiblã pʋgẽ Gɛrɛs soolmã wɛɛngẽ, tɩ wa pidsi.
Biiblã bãngr-goam sẽn sõng rao to-to t’a toeem tagsg Biiblã wɛɛngẽ.
“Mam da tẽedame tɩ Wẽnd kae ye” (Yʋʋmd 2017 Gũusg Gasgã N°a 3)
a Bãngr-gomd yaa koɛɛg Wẽnnaam sẽn kɩt tɩ b taase, n wilgd yɛl sẽn wate.
b S.D.Z.R rat n yeelame tɩ “sẽn deng a Zeezi rogmã.”