SAK 36
D yɩ pʋ-peelem dãmb bũmb fãa pʋgẽ
Ned buud fãa rata zo-rãmb sẽn yaa pʋ-peelem dãmba. A Zeova me ratame t’a zo-rãmbã yɩ pʋ-peelem dãmba. La d sẽn be dũni sẽn pid ne neb sẽn pa pʋ-peelem dãmb pʋgẽ wã yĩnga, rẽ pa nana ye. D sã n yaa pʋ-peelem soab bũmb fãa pʋgẽ, a nafa wã yaa bõe?
1. Sẽn tɩ yɩɩd fãa, yaa bõe yĩng la d sẽn dat n yɩ pʋ-peelem dãmbã?
D sã n maand pʋ-peelem ne d taabã, d wilga a Zeova tɩ d nong-a lame, la d waoogd-a. Tags-y n ges-y: A Zeova mii bũmb ning d sẽn tagsde, la d sẽn maande. (Ebre-rãmbã 4:13) D sã n yãk yam n na n yɩ pʋ-peelem dãmba, a nee rẽ, la noogda a sũuri. A Gomdã pʋgẽ, b yetame t’a Zeova ‘kisa nin-wẽnga, la a yaa nin-tɩrsã zoa.’ (Yel-bũnã 3:32)
2. Wãn to la d tõe n wilg daar fãa tɩ d yaa pʋ-peelem dãmbã?
A Zeova ratame tɩ d ‘gomd sɩd ne taaba.’ (Zakari 8:16, 17) Rat n yeelame tɩ bõe? Yaa ne d zakã rãmb la d gomd ne, tɩ yaa ne d tʋmd-n-taase, d tẽed-n-taase, bɩ goosneema wã tʋm-tʋmdba, d pa yagd ziri, wall n kõ kibay sẽn pa sɩd zãng ye. Ned sẽn yaa pʋ-peelem soab pa zuud a to, wall n zãmb-a ye. (Karm-y Yel-bũn 24:28 la Efɛɛz rãmb 4:28.) A yaooda lãmpo nins fãa a sẽn segd n yao wã me. (Rom dãmbã 13:5-7) Yaa yel-kãensã tɩ yaa yɛl a taab pʋsẽ, d ‘zãada d mens ne pʋ-peelem bũmb fãa pʋgẽ.’—Ebre-rãmbã 13:18.
3. D sã n yaa pʋ-peelem dãmba, a nafa wã yaa bõe?
Nebã sã n mi tɩ tõnd yaa pʋ-peelem soaba, b na n kɩsa tõnd sɩda. D sõngdame me tɩ tigingã neb sẽn yaa wa zak a ye rãmba, n nong taabã yam gãe bãane. D sũur-kasetã me pa na n ningd-d taal ye. Tõnd pʋ-peelmã tõe n kɩtame tɩ “Wẽnnaam sẽn yaa tõnd Fãagdã zãmsgã paam waoogre,” la kɩt me tɩ neb sẽn mi-a wa rat n tũ-a.—Tɩte 2:10.
D BAO N BÃNG N PAASE
D ges tõnd pʋ-peelmã sẽn noogd a Zeova sũur to-to, rẽ sẽn nafd tõnd to-to, la d sẽn tõe n wilg tɩ d yaa pʋ-peelem dãmb to-to, vɩɩmã yɛl toor-toor taoore.
4. Pʋ-peelmã noogda a Zeova sũuri
Karm-y Yɩɩn-sõamyã 44:21 la Malaki 3:16, tɩ rẽ poor bɩ y leok sogsgã:
Ne yãmba, bõe yĩng tɩ d pa segd n tags tɩ d tõe n solga bũmb t’a Zeova pa bãnge?
Yãmb tagsdame t’a Zeova tagsg yaa wãna, d sã n yãk yam n na n togs sɩda, baa sã n pa nana?
Biig sã n togsd sɩda, noogda a roagdbã sũuri. D sã n togsd sɩda, noogda a Zeova sũuri
5. D maand pʋ-peelem wakat fãa
Neb wʋsg tagsdame tɩ pa wakat fãa la f tõe n yɩ pʋ-peelem soab ye. Bɩ d ges bõe yĩng tɩ d segd n yɩ pʋ-peelem dãmb wakat fãa. Ges-y VIDEO wã.
Karm-y Ebre-rãmb 13:18, tɩ rẽ poor bɩ y gom d sẽn tõe n maan pʋ-peelem to-to ne . . .
d zakã rãmba.
lekollẽ wã bɩ tʋʋmã zĩigẽ.
yɛl a taab taoore.
6. Pʋ-peelmã nafda tõndo
Sɩngrẽ wã, tõe n wõnda pʋ-peelmã wata ne zu-loees kẽere. La kaoosg zugẽ, d wat n mikame tɩ d sã n maand pʋ-peelem wakat fãa, rẽ la sõma n yɩɩda. Karm-y Yɩɩn-sõamyã 34:12-16, tɩ rẽ poor bɩ y leok sogsgã:
Wãn to la pʋ-peelmã kɩtd tɩ yãmb vɩɩmã lebgd sõma?
A. Pag ne a sɩd sã n maand pʋ-peelem ne taaba, paasda b kãadmã pãnga
B. Tʋm-tʋmd sã n yaa pʋ-peelem soaba, a patrõ wã na n kɩs-a-la sɩda
D. Tẽng-n-biig sã n yaa pʋ-peelem soaba, a paamda yʋ-noog goosneema wã tʋm-tʋmdb taoore
NEB KẼER SẼN YETE: “Sã n yaa yel-bõones pʋgẽ la f yagd ziri, rẽ pa maneg n yaa yell woto ye.”
Bõe yĩng tɩ yãmb kɩs sɩd t’a Zeova kisa ziri buud fãa?
KƲMSGO
A Zeova ratame t’a zo-rãmbã yɩ pʋ-peelem dãmba, b no-goam la b sẽn maand fãa pʋgẽ.
Lebg-n-gese
Togs-y yɛl kẽer pʋgẽ d sẽn tõe n wilg tɩ d yaa pʋ-peelem dãmba.
Bõe yĩng tɩ d pa segd n tags tɩ d tõe n solga bũmb t’a Zeova pa bãnge?
Bõe yĩng tɩ yãmb dat n maand pʋ-peelem wakat fãa?
BŨMB A TAABA
Wãn to la roagdbã tõe n sõng b kambã tɩ b yɩ pʋ-peelem dãmba?
D sã n pidsd d sẽn pʋlem tɩ d na n maaname wã, nafa wã yaa bõe?
D segd n yaoo lãmpo, baa ne b sẽn na n maan bũmb ning ne rẽ wã pa zems bɩ?
“D segd n yaooda lãmpo-rãmbã bɩ?” (Yʋʋmd 2011 bõn-bɩʋʋng kiuug pipi daar Gũusg Gasgã)
Bõe n kɩt tɩ rao a ye sẽn da yaa pʋ-lik soab toeeme, n lebg ned sẽn maand pʋ-peelem masã?