Wẽnnaam Gomdã sẽn yete

Wãn to la y tõe n paam Wẽnnaam zoodo?

Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.

1. Wẽnnaam kelgda pʋʋsg fãa bɩ?

A Zeova sakame tɩ neb buud fãa tõe n pʋʋs-a. (Yɩɩl Sõamyã 65:3) La pa pʋʋsg fãa la a kelgd ye. Israɛll nebã sẽn da wa n maand yel-wẽnã n pa basdẽ wã, Wẽnnaam yeel-b lame t’a pa le kelgd b pʋʋsgã ye. (Ezai 1:15) Biiblã yeelame me tɩ rao sã n namsd a paga, Wẽnnaam pa kelgd a pʋʋsg ye. (1 Pɩɛɛr 3:7) La ned sẽn maan yel-wẽn-kãsems sã n yaool n tek yam n kos sugri, Wẽnnaam kelgda a soab pʋʋsgo.—Karm-y 2 Kibay 33:9-13.

2. Wãn to la y segd n pʋʋse?

Pʋʋsgã yaa zu-zẽkr bũmbu, a naaga bũmb nins d sẽn maand Wẽnnaam tũudmã pʋgẽ wã me. Woto kɩtame tɩ yaa a Zeova a ye bal la d segd n pʋʋse. (Matɩe 4:10; 6:9) La d fãa sẽn yaa koangdbã yĩnga, d segd n pʋʋsa a Zezi maasem yĩnga. Bala yẽ n “yaa sor” ning d sẽn tõe n tũ n ta Wẽnnaam nengẽ. (Zã 14:6) A Zeova ratame tɩ d pelgd d pʋg n pʋʋsd-a. A pa rat tɩ d togsd goam d sẽn zãms ne zugu, wall d karemd pʋʋsg sebr pʋg ye.—Karm-y Matɩe 6:7; Filip rãmb 4:6, 7.

Naandã wʋmda pʋʋsg d sẽn pʋʋs d sũurẽ menga. (1 Sãmwɛll 1:12, 13) A kõo sor tɩ d tõe n pʋʋs-a sasa buud fãa. Makre, d gãandg la d yikr wakate, d sã n wa na n dɩ, la d sã n wa tar zu-loeese.—Karm-y Yɩɩl Sõamyã 55:23; Matɩe 15:36.

3. Bõe yĩng tɩ kiris-nebã tigimd taaba?

Tõog n paam Wẽnd zood la f kell n yɩ a zoa pa nana ye. Bala d vɩɩ ne neb sẽn pa tar tẽebo, la sẽn yaand sẽn tẽed-b Wẽnnaam pʋlem-noodã. (2 Tɩmote 3:1, 4; 2 Pɩɛɛr 3:3, 13) Woto kɩtame tɩ d segd n tigimd ne d tẽed-n-taasã n kengd taab raoodo.—Karm-y Hebre dãmb 10:24, 25.

Y sã n yõg zood ne neb sẽn nong Wẽnnaam, tõe n sõng-y lame tɩ y paam Wẽnnaam zoodo. Y sã n kẽnd a Zeova Kaset rãmbã tigissã, n ne b ned kam fãa sẽn wilgd a tẽeb to-to wã, tõe n kenga y tẽebo.—Karm-y Rom dãmb 1:11, 12.

4. Bõe me n tõe n sõng-y tɩ y paam Wẽnnaam zoodo?

Y sã n bʋgsd bũmb nins y sẽn bãng Biiblã pʋgẽ wã zugu, tõe n sõng-y lame tɩ y paam Wẽnnaam zoodo. Bʋgsd-y-yã a tʋʋmã zugu, a sẽn wilgd a nin-buiidã sor to-to wã la a pʋlemsã zugu, la y pʋʋsdẽ. Rẽ na n kɩtame tɩ y tall mi-beoog ne Wẽnnaam, a nonglmã la a yamã yĩnga.—Karm-y Zozue 1:8; Yɩɩl Sõamyã 1:1-3.

Yaa y sã n tar tẽeb ne Wẽnnaam, rat n yeel tɩ y sã n kɩs-a sɩd bal la y tõe n paam a zoodo. La tẽeb yaa wa bõn-vɩɩga, n dat tɩ y get a yelle. Y segd n dɩlgda y tẽebã. Rẽ baoodame tɩ y lebgd n tẽegd bũmb nins sẽn kɩt tɩ y tẽed Wẽnnaamã.—Karm-y 1 Tesalonik rãmb 5:21; Hebre dãmb 11:1, 6.

5. Y sã n paam Wẽnnaam zoodo, wãn to la na n naf-yã?

A Zeova geta neb nins sẽn nong-a wã yelle. A kogend-b-la ne bũmb nins fãa sẽn tõe n sãam b tẽebã, n kɩt tɩ b wa kong vɩɩm sẽn kõn sa wã. (Yɩɩl Sõamyã 91:1, 2, 7-10) A wilgd-d-la d sẽn segd n vɩɩmd to-to tɩ kogl d laafɩ wã la kõ-d sũ-noogo, la kɩt tɩ d vɩɩmã tall barka.—Karm-y Yɩɩl Sõamyã 73:27, 28; Zak 4:4, 8.

Y sã n dat vẽnegr n paase, bɩ y karem Biiblã sɩd yetame tɩ bõe? sebrã sak 17 soabã. A Zeova kaset rãmbã n yiis-a.