A bãngr-goamã fãa pidsdame
“Yãmb Zusoab a Wẽnnaam sẽn da yeel tɩ b na n maana bũmb nins fãa n kõ yãmbã, b maaname n ka tol n bas ba a ye tɩ vaal ye.”—ZOZUE 23:14.
BIIBLÃ SƖD YAA TOOR BƖ? Nebã miime tɩ pĩnd wẽndẽ neb nins sẽn da togsd beoog yellã goam võor wʋmb yaa toogo, tɩ d pa tõe n teeg-b ye. Horoskopã rãmb me goam yaa woto. Bãngdb kẽer tikda yɛlã sẽn yaa to-to wã n magd n wilgd sẽn tõe n wa beoogo. La b pa wilgd yɛl takɩ ye. La Biiblã bãngr-goamã yẽ wilgda yɛlã takɩ. A goamã fãa pidsdame, baa a sã n deng n togs bũmb sẽn na n wa maan yʋʋm wʋsg poore.—Ezai 46:10.
WALA MAKRE: Yʋʋm kobs-nu la zak sẽn deng a Zezi rogmã, Wẽnnaam vẽnega a Daniɛll t’a yã bõn-makr sẽn wilg tɩ Gɛrɛs na n zaba ne Meed la Pɛrs soolmã n tõog-a ne tʋʋlem. A paasame tɩ Gɛrɛs rĩmã pãng sã n wa lebg wʋsgo, a soolmã na n welgame, tɩ ‘soolem a naas n na n yi yẽ soolmã pʋgẽ,’ la tɩ “bãmb pãng ka na n ta pipi soabã ye.”—Daniɛll 8:5-8, 20-22.
KƲDEMD YƐL-MITBÃ SẼN WILGI: Yʋʋm kobs-yi la zak a Daniɛll kũumã poore, a Alɛgsãndr le Gãrã lebga Gɛrɛs rĩma. Sẽn wa n na n maan yʋʋm piig t’a tõoga Meed la Pɛrs rãmbã, la a yalg Gɛrɛs rĩungã tɩ ta Indus kʋɩlgã sẽn be Pakistã wã. La a ki a sẽn wa n tar yʋʋm 32 bala. Rẽ poore, a Alɛgsãndr soda-nanambsã wa n zaba taab Ipsus sẽn be Aazimineerã noore. Soda-nanambs a naas n tõog zabrã, n welg soolmã n pʋɩ taaba. La b baa a ye pa tol n paam pãng wa a Alɛgsãndr ye.
YÃMB TAGSG YAA WÃNA? Sebr a to beeme n tar bãngr-goam sẽn pidsd woto sɩda? Vẽenega, Biiblã yaa sebr sẽn pa wõnd taaba.
[Goam sẽn tar pãnga seb-neng a 4]
“Biiblã bãngr-goamã . . . sõor yaa wʋsgo, tɩ ned pa tol n tõe n yeel tɩ b pidsgã yaa segb-segb ye.”—A LAWYER EXAMINES THE BIBLE, BY IRWIN H. LINTON
[Fotã soaada]
© Robert Harding Picture Library/SuperStock