Yɛl sẽn sɩd zi̇̃ndi, pa soalem ye
‘Mam feesa bõn-kãens fãa hal b sɩngrẽ n bãng b sẽn yɩ to-to wã.’—LUK 1:3.
BIIBLÃ SƖD YAA TOOR BƖ? Soalmã pʋsẽ, b wae n togsda kiba-noodo, la b pa nong n wilgd zĩis la wakat takɩ ye. B pa gomd neb sẽn sɩd zĩnd me yell ye. La Biiblã kibay yẽ yaa takɩ, tɩ karemdbã tõe n bas b yam t’a “goamã gill yaa sɩda.”—Yɩɩl Sõamyã 119:160.
WALA MAKRE: Biiblã wilgame tɩ “Babilon naab a Nebukadnezaar . . . talla [Zida rĩm] a Zozakin n kẽng Babilon,” la tɩ kaoosg zugẽ, “Babilon naab a Evill-Merodak yiisa [a Zozakin] bi-beesã roog pʋgẽ. Yaa yẽ naamã reegr yʋʋmd bala.” Sẽn paase, “rĩmã kõ a Zozakin dɩɩb daar fãa n tãag a kũum.”—2 Rĩm dãmba 24:11, 15; 25:27-30.
TẼN-VAEESDBÃ SẼN YÃ: Babilon raboogã pʋgẽ, tẽn-vaeesdbã yãa tãnd sẽn tar gʋlsem. B wilgame tɩ yɩ a Nebukadnezaar a yiib-n-soabã wakatẽ la b gʋls-a. Gʋlsmã wilgda rɩbd nins b sẽn da kõt neb nins sẽn be bãens roogã la na-yirã neb kẽere. Nin-kãensã sʋka, b sõdga “a Jaʼukînu [a Zozakin]” sẽn yaa “Jâhudu (Zida) tẽngã rĩmã” ne a zakã rãmba. La bõe la tẽn-vaeesdbã yã a Evill-Merodak sẽn yaa a soab ning sẽn ledg a Nebukadnezaarã zugu? B yãa tãnd rʋk Suuz tẽngã noore, tɩ b gʋls a zugã woto: “Babilon rĩm a Amil-Marduk [Evill-Merodak] sẽn yaa Babilon rĩm a Nebukadnezaar biigã na-yiri.”
YÃMB TAGSG YAA WÃNA? Rẽ yĩnga, tũudum sebr a to beeme n togsd kʋdemd yɛl takɩ woto sɩda? Vẽenega, Biiblã yaa sebr sẽn pa wõnd a taaba.
[Goam sẽn tar pãnga seb-neng a 5]
“D tõe n kɩsa sɩd ne Biiblã sẽn wilgd yɛlã sẽn zĩnd wakat ning la zĩis ninsã, n yɩɩd pĩnd wẽndẽ sebr buudã fãa.”—A SCIENTIFIC INVESTIGATION OF THE OLD TESTAMENT, BY ROBERT D. WILSON
[Foto seb-neng a 5]
Tãnd b sẽn yã Babilon t’a tar gʋlsem sẽn gomd zida rĩm a Zozakin yelle
[Fotã soaadba]
© bpk, Berlin/Vorderasiatisches Museum, SMB/Olaf M. Tessmer/Art Resource, NY