A Moiiz kõo mak-sõng nonglmã wɛɛngẽ

WÃN TO LA NED WILGD NONGLEM?

Ned sã n nong a to, a wilgda rẽ ne a no-goamã la a tʋʋmã. A sakd n monga a meng bũmb kẽer a soabã yĩnga.

WÃN TO LA A MOIIZ WILG NONGLEM?

A Moiiz ra wilgdame t’a nonga Wẽnnaam. Bõe la a maan n wilg rẽ? Pipi Zã 5:3 yeelame tɩ “Wẽnnaam nonglem yaa tɩ tõnd sak bãmb tõogo.” A Moiiz saka Wẽnnaam tõodã. Bũmb nins fãa Wẽnnaam sẽn yeel t’a maanã, a sak n maaname. A sã n da yeel-a t’a maan bũmb sẽn sek rabeem, a sakdame. Wala makre, a sẽn yeel-a t’a tɩ gom ne a Faraõ sẽn da yaa na-toaagã. A sã n da yeel-a me t’a maan bũmb sẽn wõnd yaa nana, a sakdame. Wala a sẽn yeel-a t’a rɩk a rasaarã n tees mog-miuugã. Biiblã yeelame t’a Moiiz “maana bũmb fãa wa Zusoabã sẽn da yeel yẽ wã.”—Yikri 40:16.

A Moiiz ra wilgdame t’a nonga a taabã me. Israyɛll nebã sẽn da mi tɩ yaa ne a Moiiz maasem la a Zeova wilgd bãmb sorã, b sã n da wa tar zu-loeese, b wata a nengẽ. Biiblã yeelame tɩ nebã ra wata “a Moiiz taoor yibeoog hal tɩ ta zaabre.” (Yikri 18:13-16) Mams-y n ges-y-yã a Moiiz sẽn da kelgd nebã zu-loees daarã tõrã sẽn da yaamsd-a to-to. La a sẽn da nong nin-buiidã, a ra maanda rẽ ne sũ-noogo.

A Moiiz sẽn da sõngd nebã b zu-loeesã pʋgẽ wã toor sẽn ka be, a ra pʋʋsda b yĩng me. A ra pʋʋsda neb sẽn beeg-a yĩng menga. Wala makre, a tão a Miryam sẽn yẽgem ne-a t’a Zeova lob-a wãoodã, a pa kɩdem ye. A yɩɩ tao-tao n pʋʋs n yeel woto: “M Wẽnnaam, m bõosd-y lame, bɩ y maag-a.” (Sõdbo 12:13) Pa nonglem n kɩt t’a Moiiz kos woto sɩda?

RẼ WILGDA TÕND BÕE?

D tõe n dɩka a Moiiz togs-n-taare, n wilgdẽ tɩ d nonga Wẽnnaam wʋsgo. Woto na n kɩtame tɩ d sakd Wẽnnaam noyã ‘ne d sũyã fãa.’ (Rom dãmba 6:17) D sã n sakd a Zeova ne d sũy fãa, d noogda a sũuri. (Yelbũna 27:11) Leb n nafd-d lame. Sɩd me, d sã n maand Wẽnnaam daabã d sẽn nong-a yĩnga, d pa na n maand sẽn yaa tɩrg bal ye, d na n maanda rẽ ne sũ-noogo.—Yɩɩl Sõamyã 100:2.

D tõe n dɩka a Moiiz togs-taar me n nong d taabã, n sakd n mongd d mens bũmb wʋsg b yĩnga. Wala makre, d zo-rãmb wall d roagdb sã n wa togs tõnd b zu-loeese, d sẽn nong-bã, 1) d na n kelg-b-la ne d sũur fãa, 2) d na n wilgame tɩ b yellã namsd-d lame, la 3) tɩ d rata b neere.

D tõe n pʋʋsda d taabã yĩng me wa a Moiiz. Sasa ninga, neb sã n togs tõnd b zu-loeese, d tõe n tagsame tɩ d pa tar d sẽn maande, n yeel tɩ “d sẽn tõe yaa d pʋʋs b yĩng bala.” La tẽeg-y tɩ Biiblã yeelame tɩ “nin-tɩrg pʋʋsg a sẽn pʋʋs ne a sũur fãa” tara pãnga. (Zak 5:16) Tõnd pʋʋsgã tõe n kɩtame t’a Zeova sõng neda. Rẽnd bũmb pa be d sẽn tõe n maan tɩ naf d ned n zʋʋg d sẽn na n pʋʋs Wẽnnaam a yĩng ye.a

Pa vẽeneg tɩ d tõe n dɩka yam a Moiiz mak-sõngã pʋgẽ sɩda? Baa a sẽn da yaa ninsaal balã, a kõo mak-sõng sẽn ka to tẽebã wɛɛngẽ, sik-m-mengã la nonglmã wɛɛngẽ. D sã n dɩkd a Moiiz togs-n-taar n paasdẽ, na n nafa tõnd la d taabã wʋsgo.—Rom dãmba 15:4.