Yãmb mi a Zeova zʋg-sõma wã fãa bɩ?
“Bɩ yãmb yɩ Wẽnnaam togs-n-taas wa kom-nongdse.”—EF. 5:1.
1. a) A Zeova zʋg-sõma bʋs yell la y wae n tagsdẽ? b) Y sã n bao n bãng Wẽnnaam zʋg-sõma wã n paase, wãn to la na n naf-yã?
Y SÃ N tagsd a Zeova zʋg-sõma wã yelle, zʋg-sõma bʋs n wat y yamẽ? Neb wʋsg tagsda a nonglmã, a tɩrlmã, a yamã, la a pãngã yelle. La d miime t’a Zeova tara zʋg-sõma a taaba. Sɩd me, b gomda a Zeova zʋg-sõma toor-toor 40 la zak yell tõnd sɛbã pʋsẽ. Rẽnd d sã n zãmsd Biiblã d ye wall ne d zakã rãmba, d tõe n bãnga bũmb wʋsg a Zeova zugu. D sã n bao n bãng a Zeova zʋg-sõma wã, wãn to la na n naf-do? D na n bãnga d saasẽ Ba wã n paase, tɩ rẽ kɩt tɩ d maneg n nand-a a zʋg-sõma wã yĩnga, la d rat n dɩk a togs-n-taare.—Zoz. 23:8; Yɩɩl 73:28.
2. a) Rɩk-y makr n wilg d sẽn tõe n maneg n nan a Zeova zʋg-sõma wã to-to. b) Sõs-kãngã la sõss a yiib nins sẽn pʋgdã na n goma bõe yelle?
2 B sã n yeel tɩ ned nanda bũmbu, rat n yeelame tɩ bõe? Rat n yeelame t’a soab miime tɩ bũmbã tara yõodo. La tõeeme n pa yɩ zĩig pʋgẽ ye. D rɩk makre: Ned n kõ yãmb rɩɩb y sẽn zɩ n dɩ. Y na n deng n wʋma a yũugã. La yaa y sã n lemb rɩɩbã la y na n bãng a noosmã. Sã n yɩ-y noogo, tõe tɩ y na n bao n bãnga a seglgo. Yaa woto me ne a Zeova zʋg-sõma wã. D rengd n bao n bãng-b lame, n bʋgs a Zeova sẽn wilgd to-to t’a tara zʋg-sõma kãensã zugu. Rẽ poore, tõnd mengã rɩkda a togs-n-taare. (Ef. 5:1) Sõs-kãngã la sõss a yiib nins sẽn pʋgdã na n goma a Zeova zʋg-sõma wã kẽer yelle. B na n wilga zʋg-sõng fãa võore, a Zeova sẽn wilg to-to t’a tara zʋg-sõng kãnga, la d sẽn tõe n dɩk a togs-n-taar to-to.
A ZEOVA PẼNEGR YAA NANA
3, 4. a) B sã n yeel tɩ ned pẽnegr yaa nana, rat n yeelame tɩ bõe? b) Bõe yĩng tɩ d tõe n kɩs sɩd t’a Zeova pẽnegr yaa nana?
3 B sã n yeel tɩ ned pẽnegr yaa nana, rat n yeelame tɩ bõe? Rat n yeelame t’a soabã nonga neba, la tɩ sẽn yaa wakat ning fãa, a sakdame tɩ b gom ne-a. Naoor wʋsgo, ned no-goam la a manesem n wilgd t’a pẽnegr yaa nana.
4 Wãn to la a Zeova wilgd t’a pẽnegr yaa nana? Baa ne a Zeova sẽn yaa yĩngr la tẽng naandã, n yaa pãng sẽn ka to soabã, a sakdame tɩ d pʋʋsd-a. A kelgda d pʋʋsgã, n leokdẽ. (Karm-y Yɩɩl Sõamyã 145:18; Ezai 30:18, 19.) D tõe n pʋʋs-a-la wakat fãa la zĩig fãa, n kaoos wa d sẽn date. D miime t’a pa na n tol n zab-d rẽ yĩng ye. (Yɩɩl 65:3; Zak 1:5) Biiblã sẽn bilgd a Zeova to-to wã kɩtame tɩ d tõe n bas d yam n pʋʋs-a. Wala makre, yɩɩl-gʋlsd a Davɩɩd yeelame t’a Zeova “tʋb wʋmda” nin-tɩrs pʋʋsgo, la t’a “nug rɩtg kogenda” bãmba. (Yɩɩl 34:16; 63:9) No-rɛɛs a Ezai mak-a-la ne rũm-kɩɩma, n yeel woto: “Yẽ zãada a pe-bi wã ne a nusi, n mobg bãmb a yãoogẽ.” (Ezai 40:11) Mams-y rẽ sẽn dat n yɛɛlgã. A Zeova ratame tɩ d bas d yam ne yẽ wa pe-bil sẽn be pe-kɩɩm yãoogẽ sẽn bas a yam to-to wã. D sã n bʋgs d Ba wã pẽnegr sẽn yaa nana to-to wã zugu, d na n maneg n nong-a lame. La wãn to la d tõe n dɩk a Zeova togs-n-taar zĩ-kãng wɛɛngẽ?
ZƲG-SÕNG KÃSEM-DÃMBÃ SẼN SEGD N TALLE
5. Bõe yĩng tɩ kãsem-dãmbã segd n yɩ neb pẽnegr sẽn yaa nana?
5 Sẽn nan pa kaoose, b kosa a Zeova Kaset rãmb sẽn be tẽns toor-toor pʋsẽ tɩ b wilg zʋg-sõng ning b sẽn nong kãsem-soab nengẽ n yɩɩda. B wʋsg leokame tɩ yaa a pẽnegr sẽn na n yaa nana. Yaa sɩd tɩ kiris-nebã fãa segd n modgame n tall zʋg-sõng kãnga, la kãsem-dãmbã n segd n tall-a n yɩɩda. (Ezai 32:1, 2) Bõe yĩng tɩ kãsem-dãmbã segd n yɩ neb pẽnegr sẽn yaa nana? Rẽ wɛɛngẽ, saam-bi-poak a ye yeela woto: “Baa kãsem-soab sã n tar zʋg-sõma wʋsgo, yaa a pẽnegr sẽn na n yaa nana bal la d tõe n paam n dɩ rẽ nafa.” A sẽn yeelã yaa sɩda. La wãn to la y tõe n kɩt tɩ y pẽnegr yɩ nana?
6. Bõe la kãsem-soab tõe n maan tɩ nebã tõogd n sõsd ne-a nana-nana?
6 Bũmb a ye kãsem-soab sẽn tõe n maan yaa a sẽn na n wilgdẽ t’a taabã yell pak-a lame, tɩ b neẽ t’a rat n sõng-b lame. Rẽ la saam-biisã la saam-bi-pogsã, baa kambã meng na n tõogd n sõsd ne-a nana-nana. (Mark 10:13-16) A Carlos sẽn yaa bi-ribl sẽn tar yʋʋm 12 wã yeela woto: “Mam sã n get kãsem-dãmbã sẽn sõsd ne nebã fãa Rĩungã roogẽ noog-noogã, noom-m lame.” La yaa vẽeneg tɩ kãsem-soab sã n tagsdẽ bal t’a pẽnegr yaa nana, pa sek ye. A manesmã n segd n wilg rẽ. (1 Zã 3:18) Wãn to?
7. Bõe yĩng tɩ d sã n ning tigis-kãseng badz bɩ nebã sakd n sõsd ne-d nana-nana, la rẽ wilgda tõnd bõe?
7 Ad makre: Sẽn nan pa kaoose, saam-biig n kẽng tigis-kãseng tẽn-zẽnga. Lebgrã, a kẽe sɩlga, n da ket n tar tigis-kãsengã badzã a yãoogẽ. Badzã zug ra gʋlsa woto: “Bɩ Wẽnnaam Rĩungã wa!” Rao a ye sẽn tʋmd sɩlgã pʋgẽ sẽn yã badzã, a yeela woto: “Bɩ a sɩd wa!” Yẽ ne saam-biigã sõsa ne taab sõma, tɩ saam-biigã kõ-a sɛba. Bõe yĩng tɩ d sã n ning tigis-kãseng badz bɩ nebã sakd n sõsd ne-d nana-nana? Nebã sã n yã badzã, b baood n bãnga tõnd sẽn dabdẽ. Sẽn paase, b neeme tɩ b sã n dat n sõs ne-d d sẽn tẽed bũmb ningã zugu, d na n sakame. Woto me, bũmb toor-toor n be kãsem-soab sẽn tõe n maane, t’a tẽed-n-taasã neẽ tɩ b sã n dat n sõs ne-a, a na n sakame. D gom bõn-kãens kẽer yelle.
8. a) Bõe la kãsem-dãmbã tõe n maan n wilg tɩ b tẽed-n-taasã yell sɩd pak-b lame? b) Wãn to la rẽ nafd tigingã neba?
8 Yaa sɩd tɩ nebã minimd yaa toor-toore. La naoor wʋsgo, y sã n pʋʋsd y tẽed-n-taasã sõma, wall y sõsd ne-b noog-noogo, kɩtdame tɩ b miẽ tɩ b yell pak-y lame. Ãnd dãmb n segd n yɩ pipi n maan rẽ? Tẽeg-y-yã a Zezi sẽn maan bũmb ningã yelle. A Matɩe wilgame tɩ daar a yembre, a Zezi ne a karen-biisã sẽn tigim taaba, a “kolgame n gom ne bãmba.” (Mat. 28:18) Woto me, kãsem-dãmbã nong n kolgda b tẽed-n-taasã n sõsd ne-ba. B sẽn maand woto wã nooma tigingã neba. Saam-bi-poak sẽn tar yʋʋm 88 n yaa so-pakd yeela woto: “Kãsem-dãmbã sẽn pʋʋsd-m ne sũ-noog la b gomd ne-m noog-noog Rĩungã roogẽ wã kɩtame tɩ m nong-ba.” Saam-bi-poak a to yeelame: “M sã n ta Rĩungã roogẽ tɩ kãsem-soab pʋʋs-m sõma, noom-m-la wʋsgo.”
SÕSD-Y NE SAAM-BIISÃ LA SAAM-BI-POGSÃ
9, 10. a) Mak-sõng bʋg la a Zeova kõ tõndo? b) Wãn to la kãsem-dãmbã tõe n dɩk a Zeova togs-n-taare?
9 D sã n dat n yɩ neb pẽnegr sẽn yaa nana, yaa vẽeneg tɩ d segd n baooda sẽk n sõsd ne d taabã. Zĩ-kãng wɛɛngẽ, a Zeova kõo mak-sõngo. Biiblã yeelame t’a “ka zãr ne tõnd fãa ye.” (Tʋʋ. 17:27) Bũmb kãsem-dãmbã sẽn tõe n maan n dɩk a Zeova togs-n-taar yaa b sẽn na n sõsd ne b tẽed-n-taasã fãa, pagba, rap la kamba. B tõe n maanda rẽ nand tɩ tigsgã sɩnge, la tigsgã poore. Saam-biig sẽn yaa so-pakd yeela woto: “Kãsem-soab sã n sok m keelem, n maag a yĩng n kelg-ma, m neeme t’a nand-m lame.” Saam-bi-poak sẽn sɩng n tũud a Zeova na maan yʋʋm 50 yeela woto: “Kãsem-dãmbã sẽn nong n sõsd ne-m tigissã poorã kɩtame tɩ m neẽ tɩ m tara yõodo.”
10 Yaa sɩd tɩ kãsem-dãmbã tara tʋʋm wʋsgo, la b sã n ta tigissã zĩigẽ, b segd n baooda sẽk n sõsd ne saam-biisã la saam-bi-pogsã.
A ZEOVA PA BAKD NED N SÕNG YE
11, 12. a) B sã n yeel tɩ ned pa bakd neb n sõnge, rat n yeelame tɩ bõe? b) Wãn to la Biiblã wilgd t’a Zeova pa bakd ned n sõnge?
11 Bũmb a to sẽn kɩt tɩ d nong a Zeova yaa a sẽn pa bakd ned n sõngã. (Tʋʋ. 10:34) B sã n yeel tɩ ned pa bakd neb n sõnge, rat n yeelame t’a maanda tɩrg ne ned buud fãa. La d sã n dat n maand nebã buud fãa neere, d segd n deng n kɩsa sɩd tɩ ned buud fãa segda ne rẽ. Ned sẽn pa bakd neb n sõngdẽ maanda nebã fãa neere, n pa get b yalẽ wall b tarem ye.
12 Zĩ-kãng wɛɛngẽ, a Zeova n kõ mak-sõng sẽn ka to. Biiblã wilgame t’a “ka tũusd neb ye.” (Karm-y Tʋʋm 10:34, 35; Tõod 10:17.) Bũmb sẽn maan a Moiiz wakatẽ wã n wilgd rẽ vẽenega.
13, 14. a) Zu-loe-bʋg la a Zelofehaad kom-pugli a nu wã ra tara? b) Yel-kãng pʋgẽ, wãn to la a Zeova wilg t’a pa tũusd neba?
13 Israyɛll nebã sẽn wa n kolg kãabg tẽngã kõomã, pʋg-sadb a nu n da tar zu-loɛɛg n pa mi b sẽn maandg ye. B zu-loɛɛgã ra yaa bʋgo? B ra miime tɩ b na n pʋɩɩ tẽngã n kõ Israyɛll nebã zak-zaka, la tɩ yaa b ba a Zelofehaad sẽn yaa Manase buudã nedã n da segd n deeg bãmb zakã pʋɩɩrã. (Sõd. 26:52-55) La bʋko, b ba wã kiime. Tõogã ra wilgame tɩ ned sã n ki, yaa a kom-dibli wã n deegd a rogem-pʋɩɩrã, t’a Zelofehaad kambã fãa yaool n yaa kom-pugli. (Sõd. 26:33) Woto wã, b ra na n pʋɩɩ tẽngã n bas a Zelofehaad kom-pugli wã bɩ?
14 B kẽnga a Moiiz nengẽ n tɩ kos sõngre. B yeela woto: “Yaa bõe tɩ d ba wã yʋʋr na n menem a buudã sʋka, b sẽn ka paam bi-riblã yĩnga? Bɩ y kõ tõnd zĩig d ba wã ba-biisã sʋka.” A Moiiz pa yeel tɩ tõogã sẽn wilg bũmb ningã bal n be ye. A “rɩka yellã n kẽng Zu-soabã nengẽ.” (Sõd. 27:2-5) A Zeova sẽn kelg yellã poore, a yeela a Moiiz woto: “A Zelofehaad kom-pugli wã tara bʋʋm. Bɩ f kõ bãmb zĩig b ba wã ba-biisã sʋk tɩ b sooge. Bɩ f rɩk zĩig ning b ba wã sẽn da na n paamã n kõ bãmba.” La pa rẽ bal ye. A Zeova kõo noor a to n yeel woto: “Ned sã n ki n ka paam bi-ribla, bɩ b rɩk a zĩigã n kõ a bi-pugla.” (Sõd. 27:6-8; Zoz. 17:1-6) Rẽ tɛka, Israyɛll ned sã n ki n pa paam bi-ribla, b rɩkda a rogem-pʋɩɩrã n kõ a bi-pugla.
15. a) Wãn to la a Zeova sẽn get a nebã fãa yell to-to wã wilgd t’a pa bakd ned n sõnge? b) Yãmb mii Biiblã kibay a taab sẽn wilgd t’a Zeova pa tũusd neb bɩ?
15 A Zeova sẽn welg yellã to-to wã wilgdame t’a sɩd pa bakd ned n sõng ye. A Zelofehaad kom-pugli wã ra pa tar ned sẽn na n sõng-b ye. La a Zeova welga b zu-loɛɛgã wa a sẽn da mi n welgd Israyɛll neb a taabã zu-loeesã. A sẽn maan woto wã, a waoog-b lame. (Yɩɩl 68:6) Kibay a taab bee Biiblã pʋgẽ n wilgdẽ t’a Zeova pa tũusd neb ye.—1 Sãm. 16:1-13; Tʋʋ. 10:30-35, 44-48.
D TÕE N DƖKA A ZEOVA TOGS-N-TAARE
16. Ra bak ned n sõngã wɛɛngẽ, wãn to la d tõe n maneg n dɩk a Zeova togs-n-taare?
16 Wãn to la d tõe n dɩk a Zeova togs-n-taare, n pa bakd ned n sõngdẽ? Tẽeg-y tɩ y sã n dat n maand nebã buud fãa neere, y segd n deng n kɩsa sɩd tɩ ned buud fãa segda ne rẽ. Tõe tɩ y tagsdame tɩ y pa tũusd neb ye. La tẽeg-y tɩ moos maana b kibar tɩ “baag pa wʋmd a zugẽ yũug ye.” Woto wã, wãn to la y tõe n bãng y sã n sɩd pa tũusd neba? Y tõe n maana wa a Zezi. Daar a ye, a sẽn wa n dat n bãng nebã sẽn yet bũmb ning yẽ zugã, a soka a zo-rãmbã woto: “Nebã yetame tɩ mam sẽn yaa Ninsaal Biigã yaa ãnda?” (Mat. 16:13, 14) Yãmb me tõe n baoa y zoa y sẽn mi t’a na n pelga a pʋg ne-yã, n sok woto: ‘Fo tagsdame tɩ mam maanda neb buud fãa neer bɩ, bɩ m bakda nebã n sõngdẽ?’ Tõe t’a yeel tɩ wakat ninga, y mi n tara manesem tɩ yaa wa y geta ned yĩng kõbgo, a tarem wall a sẽn karem n tek zĩig ningã. A sã n yeel-y woto, bõe la y segd n maane? Pʋʋs-y-yã a Zeova, n kos-a t’a sõng-y tɩ y toeeme, n tõog n maneg n dɩk a togs-n-taare.—Mat. 7:7; Kol. 3:10, 11.
17. Bõe la d tõe n maan n wilg tɩ d pa tũusd neba?
17 Tigingã pʋgẽ, bõe la d tõe n maan n wilg tɩ d rɩkda a Zeova togs-n-taare? Yaa d sẽn na n maand d tẽed-n-taasã fãa neere, la d waoogd-ba. Wala makre, d sã n dat n bool saam-biis la saam-bi-pogs d yiri, d na n bool-b lame, n pa ges b buud wall b tarem ye. D tõe n boola pʋg-kõap la kɩɩbs me. (Karm-y Galat dãmb 2:10; Zak 1:27.) Koe-moonegã sasa, d moonda talse, ra-kãag-rãmba, neb sẽn karem n zãage, sẽn pa karm-ba, tẽng-n-neb la sãamba. A Zeova siglgã yiisda sɛb toor-toor ne buud-goam na maan 600. Woto pa wilgd tɩ d pa tũusd neb sɩda?
18. D sã n bʋgs bũmb nins yell d sẽn goma zugu, na n kɩtame tɩ d maan bõe?
18 Vẽenega, d sã n bʋgsd a Zeova pẽnegr sẽn yaa nana la a sẽn pa bakd neb n sõngdẽ wã zugu, d na n maneg n nong-a lame. Woto na n kɩtame tɩ d rɩk a togs-n-taar tigingã pʋgẽ, la koe-moonegã sasa.