Sɩnga wãn tɩ d wa beẽ, la bõe yĩng tɩ d namsdẽ?

Koɛɛg-koɛɛga, Sɩngr sebrã sẽn yaa Biiblã pipi sebrã wilgda sẽn sɩng to-to tɩ bũmb fãa wa beẽ wã n yet woto: “Hal sɩngr wakate, Wẽnnaam naana saasã la tẽngã.” (Sɩngre 1:1) Wẽnnaam sẽn naan tɩɩsã la rũmsã n sa, a naana d yaab a Ãdem ne a Hawa. B ra yaa toor ne rũmsã, bala a naan-b lame tɩ b tõe n dɩk yẽ togs-n-taare, n tall zʋg-sõma, la b tõe n yãk yam b toore. Dẽnd bãmb meng n da yãkd b sẽn na n maanega, yaa sõma tɩ yaa wẽnga. B sã n da sak Wẽnnaam noyã, bãmb ne b kambã la b yagensã ra na n naaga taab n vɩɩmd ne laafɩ la sũ-noog wakat sẽn pa sate, wa Wẽnnaam sẽn datã.

La malɛk a ye n yãk yam n belg ninsaalbã tɩ b maan yẽ raabo. Rẽ tɛka, a lebga Sʋɩtãana, sẽn dat n yeel tɩ “kɩɩsda.” A tũnuga ne waaf n belg a Hawa, n yeel-a t’a tõe n paamame t’a vɩɩmã yɩ sõma tɩ pa tũ ne Wẽnnaam sõngr ye. A Ãdem ne a Hawa tũu Sʋɩtãanã raabã, n kong b Naandã lohormã. B sẽn yãk yam n maan sẽn yaa wẽngã, b bõna vɩɩm sẽn kõn sa wã, la kɩtame tɩ tõnd fãa lebg yel-wẽn-maandba, neb sẽn pa zems zãnga, la kiidba.

Zĩig pʋgẽ, Wẽnnaam wilgame t’a na n maana bũmb tɩ yellã paam tɩɩm, t’a Ãdem kambã la a yagensã wa tõog n vɩɩmd wakat sẽn kõn sa. Wẽnnaam yeelame tɩ “yagenga,” ned sẽn yaa toor fasɩ ne neb a taabã, n na n wa sãam Sʋɩtãanã la a kɩt tɩ zu-loees nins a Sʋɩtãan ne a Ãdem la a Hawa sẽn wa ne wã fãa sa. (Sɩngre 3:15) La ‘yagengã’ na n yɩɩ ãnda? Kaoosg zugẽ la b ra na n wa bãnge.

La a Sʋɩtãan maana a sẽn tõe fãa n na n gɩdg Wẽnnaam daabã pidsgu. Tao-tao bal tɩ yel-wẽnã la tʋʋm-wẽnsã piuugame. Wẽnnaam wa n yeelame t’a na n kɩtame tɩ saag ni n sãam nin-wẽnsã. A yeela nin-tɩrg a Nowe t’a ka koom-koglgo, tɩ yẽ ne a zakã rãmba, la rũms nins a sẽn na n kẽesã paam n põse.

A Nowe ne a zakã rãmb zĩnda koglgã pʋgẽ n maan yʋʋmde. B sẽn wa n yi wã tɩ tẽngã yɩlga zãnga. La b ra ket n pa mi ‘yagengã’ sẽn na n yɩ ned ning ye.

—Tika Sɩngr sak a 1-11; Ziid 6, 14, 15; Wilgr 12:9.