Wẽnnaam sẽn maan n na n fãag ãdem-biisã

Wẽnnaam yeela nin-tɩrg a Abrahaam tɩ ‘yageng’ ning sẽn tog n wa wã na n yɩɩ yẽ roogã neda. Ne yagen-kãng maasem, “buud fãa” neb na n paama barka. (Sɩngre 22:18) Kaoosg zugẽ, a Zakoob sẽn yaa a Abrahaam yagengã yika ne a zakã rãmb n tɩ zĩnd Ezipti. B wa n lebga bu-kãsenga, tɩ b boond-b tɩ Israyɛll neba.

La Ezipt naab a ye sẽn yaa nin-toaag n wa n kɩt tɩ Israyɛll nebã lebg yembse, hal tɩ Wẽnnaam wa tʋm no-rɛɛs a Moiiz t’a na n tɩ yiis-ba. Tũu ne yel-solemd tɩ mog-miuugã pasg zĩis a yiib tɩ b tõog n looge. Rẽ poore, Wẽnnaam kõo Israyɛll nebã tõod piigã la noy a taaba, sẽn na yɩl n wilg-b sẽn segd la a kogl-ba. Tõodã ra wilgda maand nins b sẽn segd n maane, n paam b yel-wẽnã sugri. Wẽnnaam kɩtame t’a Moiiz togs-b tɩ yẽ na n wa tʋma no-rɛɛs a to. No-rɛɛs-kãng n na n yɩ ‘yagengã.’

Sẽn kolg yʋʋm kobs-nu loogr poore, Wẽnnaam yeela rĩm a Davɩɩd tɩ ‘yageng’ ning yẽ sẽn yeel Edɛn zẽedã zĩigẽ t’a watame wã na n dɩɩ naam, la a naamã na n yɩɩ wakat fãa yĩnga. Yẽ n na n yɩ Mesi wã, fãagd ning Wẽnnaam sẽn yãk t’a na n fãag ãdem-biisã la a kɩt tɩ tẽngã lebg arzãnã.

Bilf-bilfu, Wẽnnaam vẽnega a Davɩɩd la no-rɛɛsdb a taab tɩ b reng n togs bũmb wʋsg Mesi wã zugu. B yeelame t’a na n yɩɩ sik-m-meng soab la nin-bʋgsgo, la t’a naamã sasa, komã, wẽgbã la zabã na n saame. Wakat kãnga, zems-n-taar na n zĩndã nebã sʋka, la baa bãmb ne rũmsã sʋka. Bãasã, namsgã la kũumã Wẽnnaam sẽn da pa rat tɩ zĩndã na n saame, tɩ sẽn ki-bã meng vʋʋg n vɩɩmd tẽngã zugu.

Wẽnnaam kɩtame tɩ no-rɛɛs a Miise reng n togs tɩ Mesi wã na n doga Betlehɛm. A kɩtame me tɩ no-rɛɛs a Daniɛll yeel tɩ b na n wa kʋ-a lame. La Wẽnnaam na n vʋʋg-a lame n kɩt t’a lebg rĩm saasẽ. A Daniɛll yeelame me tɩ Mesi wã Rĩungã na n wa reega ninsaalbã goosneemã rãmbã fãa zĩiga. La rẽ yĩnga, Mesi wã sɩd waa wa b sẽn deng n togsã bɩ?

—Tika Sɩngr sak 22-50 la Yikri, Tõodo, 2 Sãmwɛll, Yɩɩll Sõamyã, Ezai, Daniɛll, Miise, Zakari 9:9.