Yɩ-y-yã a Zeova Yembse
‘Yãmb lebga Wẽnnaam yembse.’—ROM 6:22.
1. Neb wʋsg tagsg yaa wãn ne yembdo, la bõe yĩng tɩ yembd ning yell b sẽn gomd Rom dãmb 6:22 pʋgẽ wã yaa toore?
KIRIS-NEBÃ yaa yembse, la b yembdã yaa toor ne neb wʋsg sẽn tagsdã. Sã n yaa ne wʋsgo, yamb yaa ned b sẽn namsde, la b sẽn modgd t’a tʋmd n kõt a zu-soaba. La Biiblã gomda neb sẽn yãk yam n lebg yembse, b Zu-soabã sẽn pa toaag yĩnga. Sɩd me, tʋm-tʋmd a Poll sẽn yeel tɩ kiris-nebã ‘lebga Wẽnnaam yembsã,’ rat n yeelame tɩ b maanda Wẽnnaam daabã b sẽn nong-a wã yĩnga. (Rom 6:22) Yembd a woto baooda bõe maanego? Bõe la d tõe n maan n da wa lebg a Sʋɩtãan ne a dũniyã yembse? D sã n yaa a Zeova yamba, n tʋmd a tʋʋmdã ne d sũur fãa, nafa bʋs la d paamda?
YAMBÃ SÃ N NONG A ZU-SOABÃ
2. a) Bõe n da tõe n kɩt tɩ Israyɛll ned sẽn yaa yamb yãk yam n kell n pa ne a zu-soabã? b) B sẽn da poogd yambã tʋbrã võor yaa bõe?
2 Tõog ning Wẽnnaam sẽn kõ Israyɛll nebã tõe n sõng-d lame tɩ d bãng yɩ a Zeova yambã sẽn dat n yɛɛlga. Tõogã ra wilgame tɩ Israyɛll ned sã n da lebg a to yamba, yʋʋm a yopoe soabã sɩngrẽ, a zu-soabã segd n kõ-a-la lohorem. (Yik. 21:2) La yambã sã n nong a zu-soabã n pa rat n looge, a tõe n kell n paame. A Zeova wilgame tɩ sã n wa yaa woto, zu-soabã segd n kɩtame tɩ yambã kolg kʋɩleng wall lugr sɛɛgẽ, t’a vʋdg a tʋbrã ne pĩim. (Yik. 21:5, 6) Pa zaalem la b sẽn da poogd tʋbrã ye. Bala, hebre wã goam pʋgẽ, b sã n dat n gom “sakr” yelle, b yetame tɩ “kelgre.” Rẽnd yambã sã n bas tɩ b poog a tʋbrã, a wilgdame t’a rat n kell n saka a zu-soabã. Yaa woto me ne tõnd sẽn dɩk d mens n kõ Wẽnnaamã. D pʋlmame tɩ d na n sakd-a lame, d sẽn nong-a wã yĩnga.
3. Bõe n kɩt tɩ d rɩk d meng n kõ Wẽnnaam?
3 D sẽn wa n na n deeg lisgã tɩ d zoe n yãka yam n na n maan a Zeova raabã, n yɩ a yamba. D pʋlmame tɩ d na n sak-a lame, n maand bũmb ning fãa a sẽn dat tɩ d maane. Ned pa modg tõnd tɩ d maan woto ye. Sɩd me, baa kamb nins sẽn deeg lisgã pa maan dẽ n na n noog b roagdbã sũur bal ye. Yaa b sẽn yãk b toorẽ yam n na n sak a Zeova yĩnga. Tõnd ned kam fãa rɩka a meng n kõ a Zeova sẽn yaa d Zu-soabã a sẽn nong-a wã yĩnga. Tʋm-tʋmd a Zã yeela woto: “Wẽnnaam nonglem yaa tɩ tõnd sak bãmb tõogo.”—1 Zã 5:3.
D YAA YEMBSE, N YAOOL N TAR LOHOREM
4. Bõe la d segd n maan n tõog n lebg “tɩrlem yembse”?
4 D sẽn paam t’a Zeova pak sor tɩ d lebg a yembsã noom-d-la wʋsgo. D sẽn tẽed Kiristã sẽn ki tɩ yɩ maoongã yĩnga, d paama d mens ne yel-wẽndã yembdã. Baa d sẽn ket n yaa neb sẽn pa zems zãnga, d yãka yam n lebg a Zeova ne a Zezi yembse. A Poll wilga rẽ vẽeneg a lɛtr a ye pʋgẽ, n yeele: “Bɩ yãmb me ges y mens wa kũum ne yel-wẽnã, la y ges y mens wa nin-vɩɩs ne Wẽnnaam, Kirist Zezi tũudmã pʋgẽ.” A paasame: “Yãmb ka mi tɩ yãmb sã n dɩk y mens n kõ ned n na n sak-a wa yembse, yãmb yaa yãmb sẽn sakd a soabã yembse, sã n yaa yel-wẽnã sẽn wat ne kũum, wall a sã n yaa sakr sẽn wat ne tɩrlem bɩ? La bark Wẽnnaam, yãmb sẽn da yaa yel-wẽnã yembsã, yãmb yaool n saka kareng ning b sẽn zãms yãmbã ne y sũyã fãa. Yãmb sẽn paam lohorem ne yel-wẽnã, yãmb lebga tɩrlem yembse.” (Rom 6:11, 16-18) A Poll yeelame tɩ d segd n sakda Wẽnnaam ne d “sũyã fãa.” Rẽnd d sã n dɩk d mens n kõ Wẽnnaam, d lebgda “tɩrlem yembse.”
5. Zu-loe-bʋg la tõnd ned kam fãa tara, la bõe yĩng tɩ d segd n mao ne-a?
5 La yɩl n tõog n vɩɩmd tɩ zems d sẽn dɩk d mens n kõ Wẽnnaamã pa nana ye. Bũmb a yiib n kɩt tɩ yaa toogo. Pipi, d yaa neb sẽn pa zems zãnga. Ra yaa woto ne a Poll me. Ad a sẽn yeele: “Mam nonga Wẽnnaam tõog hal ne m sũur fãa. La mam yãta tõog a to mam yĩngã wilã pʋgẽ sẽn maood ne mam pʋ-tẽer tõogo, la sẽn kẽesd maam yel-wẽnã tõog yembd pʋgẽ sẽn be mam yĩngã wilã pʋse.” (Rom 7:22, 23) D sẽn yaa neb sẽn pa zems zãngã, d segd n maoome n da wa bas tɩ d tʋls-wẽnsã kɩt tɩ d maan bũmb Wẽnnaam sẽn kis ye. Tʋm-tʋmd a Pɩɛɛr yeela woto: “Yãmb sẽn yaa burkĩmbã, da sak-y tɩ yãmb lohormã yɩ wẽng lilldg ye, la bɩ y maan wa Wẽnnaam tʋm-tʋmdba.”—1 Pɩɛ. 2:16.
6, 7. Bõe la a Sʋɩtãan maand n dat t’a dũniyã yamleoog kẽ tõndo?
6 Yiib-n-soaba, d sẽn vɩ dũni ning pʋgẽ wã bee zĩn-dãmbã nugẽ. A Sʋɩtãan sẽn yaa dũniyã naabã maanda a sẽn tõe fãa n dat tɩ d kɩɩs a Zeova ne a Zezi. A ratame tɩ d yɩ dũniyã rẽnda, n lebg a yamba. (Karm-y Efɛɛz rãmb 6:11, 12.) Sẽn na yɩl n kʋɩɩb-do, a kɩtdame tɩ bũmb nins sẽn be dũniyã pʋgẽ wã wõnd bõn-sõma, n be yamleoogo. Tʋm-tʋmd a Zã yeelame: “Bɩ y ra nong dũniyã walla bũmb nins sẽn be dũniyã pʋgẽ wã me ye. Ned sã n nong dũniyã, Ba nonglem ka be a pʋgẽ ye. Tɩ bõe, bũmb nins fãa sẽn be dũniyã n yaa yĩng ratem-wẽnga, la nin datem-wẽng ne tɩtaamã ka yit tõnd Ba nengẽ ye. Bãmb yaa dũniyã rẽnda.”—1 Zã 2:15, 16.
7 Zĩig zãnga, nebã maoodame n dat n paam arzɛk wʋsgo. A Sʋɩtãan tõogame tɩ wʋsg tẽed tɩ yaa f sã n tar ligd wʋsg la f tar sũ-noogo. Butik-bɛdã bee zĩig zãnga. Piblisite-rãmbã kɩtame tɩ nebã tagsdẽ tɩ sẽn tar yõod n yɩɩd yaa b sẽn na n paam teed wʋsgo, la b noogd b yõore. Neb n be tɩ b tʋʋm yaa bao neb sẽn dat n tog sore, tɩ b tũ taab n tɩ ges zĩ-neebã. Bãmb rãmbã maanda piblisite-rãmb n wilgd zĩ-neeb a woto sẽn beẽ. La naoor wʋsgo, y sã n naag nin-kãensã n tog sore, y mikdame tɩ yaa dũniyã yɛl bal n pak-ba. Vẽenega, dũniyã bũmb wʋsg sẽn yaa to-to wã pa sẽn na yɩl tɩ d toeem d vɩɩmã bal ye. Yaa sẽn na yɩl tɩ d wõneg dũniyã neba.
8, 9. Kiris-nebã segd n gũusa ne bõe, la bõe yĩnga?
8 A Pɩɛɛr sagla pipi kiris-nebã tɩ b gũus ne neb nins sẽn be b sʋk n tar dũniyã yamã. A yeela woto: “B getame tɩ yaa sũ-noog tɩ maan bãmb wẽngã ratem wĩntoogo. Bãmb yaa wẽns la rẽgdo, la bãmb maanda sũ-noog ne bãmb belgr bãmb sẽn maand kibs ne yãmb wakate. La ne bãmb pẽg-m-mens gom-vɩɩdã, la yĩng ratem sakr la ne daglem, bãmb belgda neb nins sẽn kos sugr paalem n yi neb nins sẽn menemã sʋkã. Bãmb kãabda nebã lohorem, la b mens yaa wẽng yembse, tɩ bõe, bũmb ning sẽn tõogd neda, a kẽesda yẽnda bõn-kãng yembdo.”—2 Pɩɛ. 2:13, 18, 19.
9 Lohorem hakɩkã paoong pa d sẽn na n maand d sẽn tõe fãa n pidsd d ‘nin datmã’ ye. Ned sã n maand woto, a lebgda dũniyã ne a Sʋɩtãan sẽn yaa dũniyã naabã yamba. (1 Zã 5:19) D sã n pa gũusi, tõe n wa lebga laogã baoob n pak-do, tɩ d lebg a yamba. La d sã n lʋɩ bẽd-kãng pʋgẽ, na n yɩɩ toog ne-d tɩ d bas laogã nonglem.
TƲƲMD SẼN KÕT SŨ-NOOG HAKƖKA
10, 11. Ãnd dãmb la a Sʋɩtãan makd n yɩɩda, la bi-bɩɩg sã n yãk yam n na n karem n zãage, zu-loe-bʋg la a tõe n paame?
10 A Sʋɩtãan nong n makda neb nins minim sẽn pa waoogã. Rũndã-rũndã, kom-bɩɩsã la a makd n yɩɩda. A sã n yã bi-bɩɩg wall ned a to sẽn yãk yam n na n lebg a Zeova yamba, zabd-a lame. A Sʋɩtãan pa rat tɩ neb nins sẽn dɩk b mens n kõ a Zeova wã tõog n kell n sak-a ye.
11 Yamb sã n da sak tɩ b poog a tʋbre, tõe tɩ na n zaba wakat bilfu. Baa sã n wa maage, na n kell n yɩɩ bãnde, tɩ ned sã n yã bɩ a miẽ t’a yaa yamba. Woto me, bi-bɩɩg sã n yãk yam n na n yɩ toor ne kom-bɩɩs a taabã, tõe n yɩɩ toog ne-a. A taabã tõe n namsd-a-la rẽ yĩng menga. Wala makre, a Sʋɩtãan tõogame tɩ neb wʋsg tagsdẽ tɩ yaa b sẽn na n tar tʋʋm-tɩrg la b paamd sũ-noog hakɩka. La kiris-nebã miime tɩ yaa ned sẽn na n lʋɩɩsd a Zeova raabã taoor bal la a tõe n paam sũ-noog hakɩka. A Zezi yeela woto: “Neb nins sẽn wʋmd Wẽnnaam goamã n sakdẽ wã, bark bee bãmb zut n yɩɩda.” (Luk 11:28) Kiris-nebã sẽn dɩk b mens n kõ a Zeova wã yaa sẽn na n maan a raabã, pa sẽn na n maan a Sʋɩtãan raab ye. B karemda Biiblã la b bʋgsd a goamã zug “wĩntoog ne yʋngo.” (Karm-y Yɩɩl Sõamyã 1:1-3.) La rũndã-rũndã, bi-bɩɩg sã n yãk yam n na n karem n zãage, naoor wʋsgo, a pa paamd sẽk n karemd Biiblã, n bʋgsd a goamã zug la a tũud a Zeova sõma ye.
12. Kom-bɩɩs wʋsg tõe n yãka yam n maan bõe?
12 Kiris-ned sã n yaa ned sẽn pa tũud a Zeova yamba, tõe n yɩɩ toog wʋsg ne-a. A Poll pipi lɛtr ning a sẽn tool Korẽnt kiris-nebã pʋgẽ, a yeela woto: “Fo ra yaa yamb f boolg wakat bɩ? Da maan yɩɩr bõn-kãng yĩng ye. La fo sã n tõe n paam lohorem, bɩ f reege.” (1 Kor. 7:21) Lohorem n são yembdo. Tẽns wʋsg pʋsẽ, laloa wã yãka yʋʋm sõor biig fãa sẽn segd n karem n ta. Rẽ poore, bi-bɩɩgã n yãkd a sã n na n karmame n paase. Bi-bɩɩg sã n yãk yam n na n karem n zãag sẽn na yɩl n wa paam tʋʋm-tɩrg bala, tõe n yɩɩ toog t’a wa lebg so-pakda.—Karm-y 1 Korẽnt dãmb 7:23.
Y NA N KAREM N ZÃAGAME BƖ?
13. Zãms-bʋg buud n nafd kiris-ned n yɩɩda?
13 A Poll yeela Kolos kiris-nebã woto: “Bɩ y gũus neer tɩ ned da sãam yãmb ne ninsaalb bãngr la b belgr sẽn ka yõodo, sẽn yaa ninsaalbã minund sẽn yaa dũniyã rẽnda la ka Kirist rẽndã ye.” (Kol. 2:8) Karen-saam-dãmb wʋsg zãmsda karen-biisã ‘ninsaalb bãngr la b belgr sẽn ka yõodo, sẽn yaa ninsaalb minundu.’ B wae n zãmsda karen-bi-bɛdã bõn-kãense, n pa wilgd-b bũmb b sẽn tõe n maan n ges b mens yell n pa teeg ned ye. Rẽ kɩtame tɩ b tar zug bãngr bala. La kiris-nebã baooda kareng sẽn na n sõng-b tɩ b tõog n paam tʋʋmd b sẽn tõe n tʋmdẽ, la b tʋmd Wẽnnaam tʋʋmdã me. B tũuda sagl ning a Poll sẽn kõ a Tɩmote wã. A yeelame: “Ned sẽn sakd Wẽnnaam la a maand sũ-noog ne a sẽn yaa bũmb ningã, yãoã tara yõod wʋsgo. Dẽ yĩnga, tõnd sã n tar dɩɩb ne futu, yãoã sekda tõndo.” (1 Tɩm. 6:6, 8) Wall tɩ kiris-nebã bao n karem n zãag sẽn na yɩl n paam dipolom-bɛd la yʋʋrã, b maanda b sẽn tõe fãa koɛɛgã mooneg pʋgẽ, n sõngd neb a taabã tɩ b lebgd Kiristã karen-biisi.—Karm-y 2 Korẽnt dãmb 3:1-3.
14. Sã n yaa ne Filip rãmb 3:8 wã, a Poll tagsg ra yaa wãn ne a sẽn paam n yaa Wẽnnaam ne Kirist yambã?
14 D gom tʋm-tʋmd a Poll mak-sõngã yelle. A karma a Gamaliɛll sẽn da yaa zʋɩf-rãmbã tõogã karen-saambã nengẽ. D tõe n dɩka zãmsg ning a sẽn paamã n mak ne rũndã-rũndã inivɛrsite-rãmbã zãmsgã. La a Poll sã n da rɩk rẽ n mak ne a sẽn paam n yaa Wẽnnaam la Kiristã yambã, a tagsg yaa wãna? A yeelame: ‘Mam geelgda bũmb fãa wa bõn-zaalse, mam sẽn bãng Kirist Zezi, mam Zu-soabã.’ A paasa woto: “Yaa bãmb yĩng la mam bas bũmb fãa n geelgd bãmb wa sagdo, tɩ mam tõe n paam Kirist.” (Fil. 3:8) Gom-kãensã tõe n sõnga kom-bɩɩsã ne b roagdbã tɩ b tõog n yãk yam karengã wɛɛngẽ tɩ zemse. (Ges-y fot-rãmbã.)
RƖ-Y ZÃMSG SẼN YAA SÕMA N YƖƖDÃ YÕODO
15, 16. Bõe la a Zeova siglgã maand sẽn na yɩl tɩ d paamd zãmsgo, la zãms-kãng yõodã yaa bõe?
15 Lekoll-bɛdã pʋsẽ, karen-biisã manesem mi n yaa wãna? B wae n tagsdame tɩ tẽngã taoor dãmb sã n maan bũmb sẽn pa noom-ba, bãmb me tara sor n tõe n kɩɩse, n wilg b sũ-pa-noaangã. (Ef. 2:2) La tigimsã pʋsẽ sẽn yaa bãan zĩisã, d paamda zãmsg sẽn yaa sõma n yɩɩda. Yaa a Zeova siglgã n zãmsd tõndo. Wala makre, tõnd ned kam fãa tõe n paam n dɩɩ Wẽnnaam tʋʋmdã lekoll b sẽn maand semen fãa wã yõodo. Lekoll-dãmb a taab me n be so-pakdbã yĩnga: Biiblã zãmsg lekoll rakõapã yĩnga, la Biiblã zãmsg lekoll sẽn kẽ-b kãadmã yĩnga. Lekoll-kãensã sõngda tõnd tɩ d sakd d Zu-soab a Zeova.
16 D tõe n paama bãngr wʋsg Index des Publications Watch Tower wall CD-ROM Watchtower Library wã pʋsẽ. Zãms-kãensã fãa yaa sẽn na yɩl tɩ d tõog n tũ a Zeova sõma. D bãngda d sẽn tõe n sõng d taabã to-to tɩ b lebg Wẽnnaam zo-rãmba. (2 Kor. 5:20) Neb nins d sẽn zãmsdã me wat n tõog n zãmsda b taaba.—2 Tɩm. 2:2.
BARK NINS WẼNNAAM YEMBSÃ SẼN PAAMDE
17. D sã n yãk zãmsg sẽn yaa sõma n yɩɩdã, bark bʋs la d na n paame?
17 Yel-bũnd ning a Zezi sẽn wẽ n gom talã-rãmb yellã pʋgẽ, a wilgame tɩ tʋm-tʋmdb a yiib nins sẽn tʋm sõma wã paama pẽgre, la tɩ b naaga b zu-soabã n maan sũ-noogo. B zu-soabã kõ-b-la tʋʋm n paase, n wilg t’a sũur nooma ne-ba. (Karm-y Matɩe 25:21, 23.) Tõnd me sã n yãk zãmsg sẽn yaa sõma n yɩɩdã, d na n paama sũ-noog la bark wʋsgo. Wala makre, a Michael ra karemda sõma lekollẽ wã. Daar a yembre, a karen-saam-dãmbã bool-a lame n sõs ne-a, n gom inivɛrsite wã kẽngr yelle. La a Michael yeel-b lame t’a pa rat n kẽng inivɛrsite, tɩ ling-ba. A yãka yam n na n zãms tʋʋmde, n tõog n get a meng yell la a yaa wakat fãa so-pakda. La rẽ yĩnga, a Michael wa n maanda a bãngẽ bɩ? Ad a sẽn yeele: “Zãmsg ning mam sẽn paam m sẽn yaa so-pakdã, n paas zãmsg ning m sẽn paam m sẽn yaa kãsem-soab masã wã naf-m-la wʋsgo. Bark nins m sẽn paamã, ne tʋʋm nins m sẽn tʋmd tigingã pʋgẽ wã yõod yɩɩda ligd ning m sẽn da tõe n paame. M sũur yaa noog m sẽn pa bao n na n karem n zãagã.”
18. Bõe yĩng tɩ y segd n yãk zãmsg sẽn yaa sõma n yɩɩdã?
18 Zãmsg sẽn yaa sõma n yɩɩdã sõngd-d lame tɩ d bãngd Wẽnnaam a Zeova raabã, la d sẽn tõe n tʋm a tʋʋmdã to-to. A sõngd-d lame tɩ d kɩs sɩd tɩ d na n wa ‘paama yolsg ne faoolem yembdã,’ n paam ‘Wẽnnaam kambã lohormã ne b ziirã.’ (Rom dãmba 8:21) La sẽn tar yõod n yɩɩda, d bãngda d sẽn tõe n wilg to-to tɩ d nonga d Zu-soab a Zeova.—Yik. 21:5.