Sẽn pa baood-b wʋsgã paamda sũ-noogo

A DÃNIYƐLL NE A MIRYAM yaa rao ne a pag sẽn da be Barselon, Ɛspayn soolmẽ wã. B kẽe kãadem yʋʋmd 2000 bõn-bɩʋʋng kiuugã. A Dãniyɛll yeelame: “Tõnd vɩɩmã ra yaa wa neb a taabã. Tõnd tʋʋmã ra yaooda sõma, tɩ d ra tar tõog n dɩt rɛstoorã-bɛdẽ, n togd soaya, la d yeelgd fut ligd sẽn toe. D ra wae n yita koe-moonegã me.” La bũmb n wa n maan tɩ b vɩɩmã toeeme.

Yʋʋmd 2006 rasem a tãab tigis-kãsengã sasa, sõsg a ye n yɩ a Dãniyɛll noog wʋsgo. Sõsgã sasa, sõsdã sokame: “Rẽ yĩnga d maanda d pãng sẽn tõe fãa n na n sõng ‘neb nins b sẽn yõg n na n tɩ kʋ wã’ tɩ b rɩk vɩɩm sẽn pa satã sor bɩ?” (Yel. 24:11) Sõsdã wilgame tɩ d fãa segd n taasa nebã Wẽnnaam koɛɛgã, bala yaa yõor yelle. (Tʋʋ. 20:26, 27) A Dãniyɛll yeelame: “Mam yamẽ, yaa wa a Zeova ra gomda ne maam.” Sõsdã leb n wilgame tɩ d sã n tʋmd a Zeova tʋʋmã wʋsgo, d sũ-noogã paasdame. A Dãniyɛll ra miime tɩ yaa sɩda. Bala, a pag a Miryam ra zoe n yaa so-pakda, t’a neẽ tɩ kõt-a-la sũ-noog wʋsgo.

Sõsgã sɩd kẽe a Dãniyɛll, hal t’a yãk yam n na n toeem bũmb kẽer a vɩɩmã pʋgẽ. A booga a tʋʋmã, n lebg so-pakda. A tags n gesa yẽ ne a pagã sũ-noog sẽn na n paas to-to, b sã n yãk yam n na n tɩ moon koɛɛgã zĩis koe-moondb sẽn pa waooge.

SƖNGRẼ WÃ PA YƖ NANA, LA BAASA NEERE

Yʋʋmd 2007 sig-noy kiuugã, a Dãniyɛll ne a Miryam basa b tʋʋmã, n yik n na n tɩ zĩnd Panama. B ra zoe n kẽnga be n tɩ maan rasem a wãna. Yaa Karayiib mogrã koom sʋk tẽnsẽ la b na n moond koɛɛgã masã. B boonda be tɩ Bokas dɛll Toro Arsipelago. Yaa Guayimi buudã nebã n yaa wʋsg beenẽ. A Dãniyɛll ne a Miryam magame n mik tɩ ligdã b sẽn kẽgsã na n kɩtame tɩ b tõog n zĩnd be kiis a nii.

B sã da na n kẽng koom sʋk tẽngẽ, n kẽeda batayo, tɩ b sã n ta bɩ b tabd wiid n gilgd n moond koɛɛgã. B ket n tẽra b sẽn na n tab weef pipi n maan sẽn kolg kilo 32. B rʋʋ tãense. Rẽ tɩ zĩigã ra tʋʋlame me. Yaamsã wʋma a Dãniyɛll hal t’a naan n sobge. La Guayimi buudã neb ra reegd-b-la neere, sẽn yɩɩd fãa b sẽn wa n zãms b buud-gomdã n tõe n sõs bilfã. Pa kaoos la b sɩng Biiblã zãmsg ne neb 23.

La b ligdã wa n saame, tɩ lebg sũ-sãanga. A Dãniyɛll yeelame: “Tõnd da yãbdame, n tagsd d sẽn na n lebg n leb Ɛspayn wã. D sẽn da na n loog n bas neb nins d sẽn zãmsd Biiblã ra namsd-d-la wʋsgo.” La kiuug poor bala, b paama kiba-noogo. Ad a Miryam sẽn yeele: “Filiyallã yãka tõnd tɩ d lebg zall so-pakdba. Tõnd sẽn paam n na n pa wã yɩ-d-la noog wʋsgo!”

BŨMB NING SẼN KÕT-B SŨ-NOOG N YƖƖDÃ

Bũmb kẽer sẽn toeem a Zeova siglgã pʋgẽ wã kɩtame tɩ yʋʋmd 2015 wã tɛka, a Dãniyɛll ne a Miryam pa le yaa zall so-pakdb ye. Bõe la b ra na n maan masã? B kɩsa sɩd ne yɩɩn-gʋlsdã sẽn yeel bũmb ning Yɩɩn-sõamyã 37:5 wã. A yeelame: “Bas f yell ne Sẽn-Ka-Saabo, teeg bãmba, la bãmb na manege.” B le lebga wakat fãa so-pakdba, n paam tʋʋmd n tõe n ges b mens yelle. Rũndã-rũndã, b bee Beragʋwaas tigingẽ wã, Panama.

A Dãniyɛll yeelame: “Nand tɩ tõnd yi Ɛspayn, d ra sokda b meng d sã n na n tõog n vɩɩmda ne teed bilf bala. Rũndã-rũndã, d maanda woto, la bũmb sẽn yaa tɩlɛ pa paoog-d ye.” Bõe n kõt-b sũ-noog n tɩ yɩɩda? Ad b sẽn yeele: “D paam n sõngda sik-m-mens rãmb tɩ b bãngd a Zeova. Sũ-noog ning rẽ sẽn kõtã pa tar mak-n-taag ye!”