B sẽn na n bʋd Rĩungã bõn-buudã pipi, Portigall soolmẽ wã

SAAM-BIIG a George Young ra bee batayo pʋgẽ n dabd Erope. Berzill la a yi-yã. A zĩi batayo wã pʋgẽ, tɩ ko-wiisã wat n pãbd batayo wã, t’a tagsd a sẽn tɩ moon Rĩungã koɛɛgã Berzillã, hal t’a sũur noomẽ.a A wa n basa rẽ, n tagsd zĩig ning b sẽn kɩt t’a rabd masã n na n tɩ moon koɛɛgã. Yaa Ɛspayn ne Portigalle. Koe-noogã ra nan pa ta beenẽ ye. A saagdame t’a sã n ta, a na n pʋɩɩ seb-vãad tus 300, la a segl bũmba fãa tɩ saam-biig a Rutherford wa wɛgs sõss tɩ neb kʋʋng tigim n kelge.

Yʋʋmd 1925 wã la saam-biig a George Young ta Lisbon. A taame n mik tɩ tẽngã gudgame. Revolisiyõ wã rãmb tõog n toeema naamã sẽn dɩt to-to wã, tɩ pa le yaa rĩm n so tẽngã ye. B tõogame me tɩ lohorem ning Katolik tũudmã sẽn da tarã booge. Nin-buiidã paama lohorem wʋsgo, la gudgrã ra nan pa sa ye.

Saam-biig a George Young sẽn wa n segend bũmb fãa sẽn na yɩl tɩ saam-biig a Rutherford wa wɛgs a sõsgã, goosneemã kɩtame tɩ lebg sodaasã n get tẽngã tʋʋmd noor fãa yelle, bala neb n mak n na n sik naabã. Siglg a ye (Société biblique britannique et étrangère) sekertɛɛr n yeel saam-biig a George Young tɩ yaa vẽeneg tɩ neb wʋsg n na n bao n gɩdg a sẽn dat n maanã. La ne rẽ fãa, saam-biig a George Young tɩ kosa kolɛɛs Kamowɛs ɛspoorã maaneg zĩiga, n na n tigim nebã be tɩ b kelg sõsgã, tɩ b sake.

Saam-biig a Rutherford sõsgã daar wa n taame. Yɩɩ sig-noy kiuugã rasem 13. Nebã ra gũuda sõsgã ne b sũur fãa. B maana sɛb n tabl zĩis wʋsgo, tɩ zʋrno-rãmbã me moon n togs nebã sõsgã gom-zug sẽn yet tɩ: “D sẽn na n maanega, n wa paam n vɩɩmd wakat sẽn kõn sa tẽngã zugu.” Tũudmã taoor dãmb sũy yikame tɩ b yɩ tao-tao n wilg b zʋrnallã pʋgẽ tɩ nebã gũus ne “ziri no-rɛɛsdbã” sẽn nan wa wã. Neb n wa Kamowɛs ɛspoorã maaneg zĩigẽ, n yals noorẽ wã n pʋɩ sɛb b sẽn yiis n na n kɩɩs saam-biig a Rutherford sẽn zãmsd nebã bũmb ninsã. B sẽn pʋɩyã taa sɛb tusa.

Baa ne rẽ, neb ka tɛk n wa. Zĩigã reega neb tus a yi, tɩ sẽn ta rẽ me pa yɩnga, vɩʋʋg sẽn da pa le be wã yĩnga. Kẽer rʋʋ esɛll-dãmb buud sẽn da yage, n na n paam n kelge, tɩ sãnda rʋ ɛspoorã teedo.

La saam-biigã pa wɛgs a sõsgã tɩ yell pa zĩnd ye. Bɛɛbã ra kaasdame, la b pãbd goeelsã n sãamdẽ. Baa ne rẽ, saam-biig a Rutherford kell n tõoga a sũuri, n bao taabl n dʋ sẽn na yɩl t’a goamã yit sõma. A sõs n tãaga yʋn-sʋk la bala. Sõsgã poore, neb tusr la kobs-yi la zak n kõ b yʋy la b adɛrs-rãmb tɩ b na n toond-b sɛb sẽn wɛgsd Biiblã goam. Vẽkembeoogã, zʋrnall a ye (O Século) pʋgẽ, b goma saam-biig a Rutherford sõsgã yelle.

Yʋʋmd 1925 bõn-bɩʋʋng kiuugã, b sɩnga Gũusg Gasgã yiisg Portigall tẽngẽ wã ne portigɛ. B ra zoe n yiisd-a-la Berzill tẽngẽ wã. Wakat kãnga, a Virgílio Ferguson sẽn da yaa Biiblã Zãmsda, n be Berzillã ra segend n na n yik n waa Portigall n sõng ne Rĩungã koɛɛgã moonego. Yẽ ne saam-biig a Young ra zoe n naaga taab n tʋm Berzilli, Biiblã Zãmsdb biru-bilẽ wã. Pa yã n kaoos la a Virgílio ne a pag a Lizzie rɩk sor n na n le wa paam saam-biig a Young ye. Saam-biig a Ferguson waoongã kell n zemsame, bala ra pa na n kaoos la saam-biig a Young loog ye. A ra segd n tɩ moona koɛɛgã Iniyõ Sovietik la zĩis a taaba.

Sodaasã wa n yikame n deeg naamã n dɩt ne toolem. Kɩtame tɩ sẽn dat-b n gɩdg d tʋʋmdã paam pãnga. Saam-biig a Ferguson talla raood n kell pa, la a maan bũmb kẽer n kogl Biiblã Zãmsdbã sõor sẽn da paoodã. A leb n sõngame me tɩ b tʋʋmdã paam pãnga. A kosa sor tɩ b na n maand tigissã a zakẽ wã. Yʋʋmd 1927 zĩ-likr kiuugã la b kõ-a sore.

Sodaasã naamã pipi yʋʋmdã, Portigall neb sẽn yɩɩd 450 n kõ b yʋy sẽn na yɩl tɩ b toond-b Gũusg Gasgã. Sẽn paase, ne seb-biyã la seb-vãadã maasem, koe-noogã taa tẽns nins fãa Portigall sẽn da so wã. Ãngola, Asoore, Gowa, Kapvɛɛre, Madɛɛre, Mozãmbiki, la Timoor Oriyãntalle.

Yʋʋmd 1929 wã, a Manuel da Silva Jordão waa Lisbon. Yaa Portigall rao sẽn yaa zaardiniye. A sẽn wa n be Berzillã la a paam n kelg sõsg saam-biig a Young sẽn wɛgse. Zĩig pʋgẽ, a bãngame t’a sẽn wʋmã yaa sɩda, tɩ rẽ kɩt t’a sak n na n sõng saam-biig a Ferguson tɩ b moon koɛɛgã. Rẽ n so t’a yãk yam n lebg so-pakda. Siglgã sɛbã yiisg la b pʋɩɩbã sẽn maneg n sigl sõma wã, Lisbon tigingã b sẽn nan lugl paalmã paama pãng hal sõma.

Yʋʋmd 1934, saam-biig a Ferguson ne a pagã ra tog n leba Berzill. La rẽ tɩ b paam n bʋda Rĩungã bõn-buudã sõma. Ɛspayn zabrã sasa, la dũni gill zabr a yiib-n-soabã sasa, Erop soolmã ra gudgame, la ne rẽ fãa, a Zeova Kaset rãmbã sẽn da be Portigallã tõog n kell n maana sɩd ne a Zeova. B wa n yaa wa bugum sẽn yaa kɩɩ-kɩɩ, la yʋʋmd 1947 wã, a John Cooke wa n paas-b lame tɩ b lebg n yẽeg sõma. Yẽ n yɩ misioneer sẽn maan Gileyaad lekollã sẽn wa be pipi. Rẽ poore, koe-moondbã sõor talla fɩɩgr woo fɩɩgr bala. Yʋʋmd 1962 soabã, goosneemã wa n gɩdga a Zeova Kaset rãmbã tũudmã. La baa ne rẽ, koe-moondbã sõor kell n talla fɩɩgre. Yʋʋmd 1974 yʋʋm-sar kiuugã, goosneemã lebg n kõ-b-la sore. Rẽ tɩ koe-moondbã sõor yɩɩda tus 13.

Rũndã-rũndã, yaa sẽn yɩɩd koe-moondb tus 50 n moond Wẽnnaam Rĩungã koe-noogã Portigalle, la ko-sʋk tẽnsẽ b sẽn gomd portigɛ, wala Asoor la Madɛɛre. Koe-moondb kẽer yaa sẽn paam-b n kelg saam-biig a Rutherford sõsgã yʋʋmd 1925 wã yagense.

D pʋʋsda a Zeova bark wʋsgo, la d pʋʋsd d tẽed-n-taas nins sẽn sɩng tʋʋmdã barka, b sẽn tall raood n sak n tʋm Wẽnnaam tʋʋmdã ne b sũy fãa wã. B yɩɩ ‘Kirist tʋmtʋmdb buud a taabã sʋka.’—Rom. 15:15, 16.—D sẽn maan pĩnd wẽndẽ, Portigall soolmẽ wã.