Yãmb ra miime bɩ?

Sɩnga wãn tɩ zʋɩf-rãmbã wa tar karen-doto?

GƐRK gom-bil ning b sẽn lebg tɩ karen-doogã rat n yeelame tɩ “tiginga,” bɩ “tigim taaba.” Woto zemsame, bala hal pĩnd wẽndẽ, yaa be la zʋɩf-rãmbã ra tigimd taab n zãmsd Gʋls-sõamyã la b pʋʋsd Wẽnnaam. Biiblã babg ning b sẽn da gʋls ne ebre wã pʋgẽ, b pa gomd karen-do-kãensã yell vẽeneg-vẽeneg ye. La d sã n karem Biiblã babg ning b sẽn da gʋls ne gɛrkã, d neeme tɩ pipi kiris-nebã wakatã tɩ tigsg zĩis a woto ra waeeme.

Bãngdb wʋsg yetame tɩ yaa zʋɩf-rãmbã sẽn wa n be yembd Babilondã la b sɩng taab tiging karen-dot pʋsẽ. Sebr a yembr yeelame: “B sẽn da be be n pa tar wẽnd-doogo, tɩ yaa tẽn-sãanga, tɩ b ra rat belsg b sũ-sãangã pʋgẽ wã, b ra tigimda taab wakat-wakate, n karemd Gʋls-sõamyã. Tog n da yaa vʋʋsg rayã la b ra maand woto.” Baa b sẽn wa n leb b ba-yirã, wõnda b ra ket n tigimda taab n pʋʋsdẽ la b karemd Gʋls-sõamyã, hal n lugl karen-dot zĩis nins fãa b sẽn da beẽ.

Pipi kiris-nebã wakatã tɩ zʋɩf-rãmbã karen-dotã ra lebga zĩis b sẽn tigimd taab tũudmã yɛl yĩnga, la nin-buiidã yɛl a taab me yĩnga. Ra yaa woto b sẽn tɩ be zĩis ninsã fãa, wala makre, Moayẽnoriyã, Mediterane mogrã foollã, la baa Israyɛll tẽnsẽ wã. A Lee Levine sẽn yaa Zerizalɛm inivɛrsite karen-saambã yeelame tɩ “ra yaa zĩis b sẽn kẽnd zãmsg yĩnga, la b lagemd taab be n dɩt b kibs-rãmbã, tɩ bʋ-kaoodbã me tigimd be bʋʋdã yĩnga, tɩ b bĩngd ligdã b sẽn deegd nin-buiidã nengẽ wã me be, la b mi n tigimd taab politik wall nin-buiidã yɛl a taab yĩnga.” A paasame tɩ “sẽn tɩ yɩɩd fãa, ra yaa tũudmã yɛl yĩnga.” Dẽnd a Zeezi sẽn da wae n kẽnd karen-dotẽ wã pa lingr ye. (Mark 1:21; 6:2; Luk 4:16) Be, a ra paamd n zãmsda nebã, n wilgd-b Wẽnnaam daabã, la a kengd b raoodo. Kiris-neb tigingã luglg poore, tʋm-tʋmd a Poll me ra nong n moonda koɛɛgã karen-dotã pʋsẽ. Yaa be la neb nins sẽn baood Wẽnnaamã ra wae n debda. Rẽ n so t’a Poll sã n da ta tẽngẽ, naoor wʋsgo, yaa karen-doogẽ wã la a rengd n kẽng n tɩ moon koɛɛgã.—Tʋʋ. 17:1, 2; 18:4.