Yãmb ra miime bɩ?

Pĩnd wẽndẽ wã, ned sã n da rat n tũ koom-koglg n tog sore, a maanda wãna?

A POLL rãmb wakatẽ wã, koom-kogend sẽn da rɩkd neb bal ra ka wae ye. Ned sã n da rat n tũ koom-koglg n tog sore, a ra segd n soka nebã n ges b sã n mii koom-koglg sẽn wʋkd teed n debd yẽ sẽn dat n kẽngẽ wã, la sẽn na n sak n dɩk neba. (Tʋʋ. 21:2, 3) Baa koom-koglgã pa tat so-toagdã sẽn datẽ wã, a tõe n tek n sigame, n bao koom-koglg a to sẽn na n tall-a n kolg a sẽn debdẽ wã.—Tʋʋ. 27:1-6.

Koom-kogendã rãmb ra tara wakat yʋʋmdã pʋgẽ, n togd soayã. B ra pa tolg n tar ray takɩ me n loogdẽ ye. Sebg bɩ bũmb a to sã n rãmb mogrã, b viigda so-toakã. Kẽer me tõe n vɩɩga b so-toak tẽeb ziri yĩnga. Wala makre, gãabg sã n zĩnd koom-koglgã zug n yãbe, wall b sã n yã koom-koglg sẽn sãam n dɩga. Koom-kogendã rãmb ra tũuda sebgã sẽn teesdẽ wã n kẽnda. Yaa b sã n ges tɩ sebgã teesda b sẽn debdẽ wã la b loogda. So-toagd sã n paam koom-koglg sẽn tõe n dɩk-a, a kẽngda koom-kogendã yalsg zĩigẽ ne a teedã n tɩ gũudẽ, hal tɩ b wa moon tɩ b na n loogame masã.

A Lionel Casson yaa kʋdemd yel-mita. Ad a sẽn yeele: “Rom tẽngã rãmb ra maana bũmb tɩ ned sã n da rat n tũ koom-koglg n tog sor bɩ a soab pa namsd n gẽes a toor ye. Rom koom-kogendã yalsg zĩig ra bee Tɩɩbr kʋɩlgã noore. Zĩ-kẽeng n da be Ostiy tẽngã sẽn pa zãr ne be wã, tɩ biru-rãmb wʋsg be be. Biru-rãmbã wʋsg ra yaa koom-kogendã rãmb n so. B koom-kogendã me yita zĩis toɛy-toɛya: Naarbon tẽngã sẽn be Fãrens masã wã koom-kogendã rãmb ra tara b biru be. Kartaaz tẽngã sẽn be Tinizi masã wã koom-kogendã rãmb ra tara b biru me be. . . . Tẽns a taab me ra tara biru-rãmb be. Ned sã n da baood koom-koglg n na n tog sore, a ra kẽngda biru-rãmbã sẽn beẽ wã bala, n bao tẽng sẽn teesd yẽ sẽn debdẽ wã, n kẽ tẽn-kãng biru wã pʋgẽ n soke.”

Ned sã n da kẽ koom-koglg n na n tog sore, ra pa rɩkd sẽk wʋsgo, la tõe n waa ne yelle. A Poll sẽn wa n gilgd n moond koɛɛgã, a ra kẽeda koom-kogendo. La naoor a tãab fãa la sãam-yã, t’a ra be a pʋgẽ.—2 Kor. 11:25.