YEL-​BEED n maane. B kʋʋ a Zãmbatiisi. Rĩm a Herood pag a Herodiaad ra pa nong a Zãmbatiis ye. A maana a sẽn tõe fãa tɩ rĩmã kɩt tɩ b fiuug a Zã zugã.

A Zezi sẽn wʋm dẽ wã, a sũurã sãama wʋsg t’a kẽng weoogẽ wã n tɩ zĩ be a yembre. La neb kʋʋng bʋʋg-​a–la be. A Zezi sẽn yã kʋʋngã, b nimbãanegã yõk-⁠a lame t’a gom Wẽnnaam rĩungã yell ne-⁠b la a sãoog bãad dãmbã.

Zĩ-sobd sẽn wa n ta, a Zezi karen-​biisã kolgame n yeel-⁠a yaa: ‘Zĩ-kãngã yaa weoogo, la zĩigã zoe n zʋʋgame. Bɩ f bas nebã tɩ b loog n kẽng tẽnsã pʋsẽ n tɩ ra rɩɩbo.’

La a Zezi yeel-⁠b lame yaa: ‘Ka tɩlae tɩ b loog ye. Bɩ yãmb mens bao rɩɩb n kõ-b tɩ b rɩ.’ A Zezi wẽnegame n sok a Filip yaa: ‘Yɛ la d tõe n da rɩɩb tɩ sek nin-​kãensã fãa?’

La a Filip leokame yaa: ‘Tõnd sã n dat n da rɩɩb tɩ ned kam fãa tõog n paam baa yaa bilf menga, rẽndame tɩ d yiis ligd wʋsgo.’ T’a Ãndere yeel yaa: ‘Biig n be ka n tar bur a nu ne zĩm a yiib bala. La pa tõe n sek nebã fãa ye.’

La a Zezi yeelame tɩ b kɩt tɩ nebã zĩnd moodẽ wã. A pʋʋsa Wẽnnaam, la a sɩng burã kaoobo. Rẽ poore, a karen-​biisã pʋɩya burã ne zĩmã tɩ nebã fãa paame. Nebã ra yaa rap tus a nu, la pagb ne kamb wʋsgo. B fãa rɩɩme n tɩge, la karen-​biisã wʋka rɩ-​kɛlã n pids pet 12!

A Zezi kɩtame t’a karen-​biisã kẽ koom koglg n na n dʋʋg Galile mogrã. La seb-​kẽeng n yik ne yʋngã tɩ mogrã koom lengd koglgã, tɩ karen-​biisã yɛɛse. Yʋn-​sʋkã sẽn ta, b wa n nee ned sẽn kẽnd koomã zug n watẽ. B sẽn da ka mi sẽn yaa ned ningã yĩnga, b yɛɛsame n kelme.

La a Zezi yeel-⁠b lame yaa: ‘Da zoe-⁠y rabeem ye. Yaa maam.’ La b ket n da pa tẽed ye. Rẽ n so t’a Pɩɛɛr yeel yaa: ‘Zusoaba, sã n sɩd yaa foo, bɩ f kõ maam noor tɩ m kẽn koomã zug n wa fo nengẽ.’ A Zezi yeel-⁠a lame t’a wa. A Pɩɛɛr sɩd yii koglgẽ wã n sɩng koomã zug kẽna. La a wa n yɛɛsame n sɩng bõrbo, t’a Zezi fãag-⁠a.

Daar a to me, a Zezi kõo neb tusa rɩɩb tɩ b rɩ. Baraarã yɩɩ ne bur a yopoe ne zĩm bõones a wãn bala. La seka nebã fãa. A Zezi sẽn da get nebã yell to-⁠to wã pa noom-⁠d sɩda? A sã n wa rɩt a naamã, baa fʋɩ pa na n paoog-⁠d ye.

GES-⁠Y a Zezi sẽn mobg biigã. Wilgdame t’a nonga kambã. Rap nins sẽn yas n getẽ wã yaa a tʋm-​tʋmdbã. A Zezi yet-⁠b lame tɩ bõe?

A Zezi ne a tʋm-​tʋmdbã ra toga so-​wok n lebg n wa. B sẽn da wa n be sorã zugã, tʋm-​tʋmdbã ra wẽeda no-​koɛɛma. Dẽnd b sẽn wa n ta wã, a Zezi sok-⁠b lame yaa: ‘Yaa bõe poorẽ la yãmb sẽn da wẽed no-​koeemd ne taab sorã zugã?’ A Zezi yaool n da miime, la a sokame n na n ges a tʋm-​tʋmdbã sã n na n sak n togs-⁠a lame.

La tʋm-​tʋmdbã pa sak n na n togs-⁠a ye. Bala b ra wẽeda no-​koeemd n dat n bãng ned ning sẽn yaa kãseng n yɩɩd bãmb sʋkã. Tʋm-​tʋmdb kẽer da ratame tɩ b yeel tɩ b taabã sʋka bãmb n yɩɩde. La wãn to la a Zezi ra na n wilg-⁠b tɩ pa sõma tɩ b bao n yɩɩg b taabã?

A boola biigã n kɩt t’a yals a tʋm-​tʋmdbã fãa taoore, la a yaool n yeel-⁠b woto: ‘Mam yeta yãmb tɩ y sã n ka tek yam n lebg wa kom-​bõonego, yãmb ka na n kẽ Wẽnnaam rĩungã pʋgẽ ye. Ned ninga fãa sẽn na n sik a meng wa bi-​kãngã, a na n yɩɩ kãseng n yɩɩd Wẽnnaam rĩungã pʋgẽ.’ Yãmb mii bũmb ning sẽn kɩt t’a Zezi yet woto wã bɩ?

Bala kom-​bõonegã ka baood n na n yɩɩg b taabã ye. Dẽnd a Zezi tʋm-​tʋmdbã ra segd n yɩɩ wa kom-​bõonego, n da wẽed no-​koɛɛm n dat n bãng ned ning sẽn yaa kãseng n yɩɩd a taabã fãa ye.

A Zezi wilga sasa a taab me t’a nonga kambã. Wala makre, kiis a wãn poore, neb n tall b kamb n wa a nengẽ. Tʋm-​tʋmdbã makame n na n gɩdg-⁠ba, la a Zezi yeel-⁠b lame yaa: ‘Bas-⁠y kom-​bõonegã tɩ b wa mam nengẽ la y ra gɩdg-⁠b ye. Bala Wẽnnaam rĩungã yaa neb nins sẽn wẽnd bãmbã yĩnga.’ Rẽ poore, a Zezi reega kambã n ning-⁠b barka. Tõnd sẽn mi t’a Zezi nonga kambã noom-⁠d-⁠la wʋsgo. Ka sɩda?