DAAR a yembre, a Zezi yeela rao a ye t’a segd n nonga a taabã. La raoã soka a Zezi tɩ ãnd n yaa yẽ to? A Zezi ra mii raoã sẽn tagsd bũmb ninga. A ra tagsdame tɩ yaa yẽ buudã neb ne a tũudmã neb bal la a segd n nongẽ. La d ges a Zezi sẽn yeel raoã bũmb ninga.

Wakat ninga, a Zezi sã n dat n zãms neba bũmbu, a tũnugda ne kibare. Dẽnd a na n togsa raoã kibar t’a bãng sẽn yaa ned ning la yẽ to. Kibarã gomda Samari rao ne Zʋɩf a ye yelle. Tõnd ra zoe n yãa poorẽ wã tɩ Zʋɩf rãmbã wʋsg ra kisa Samari nebã. La kelg-⁠y kibar ning a Zezi sẽn togsã:

Daar a yembre, Zʋɩf a ye n yi Zerizalɛm n dabd Zeriko, tɩ fãadb tek n yõk-⁠a n deeg a ligdã fãa la b pãb-⁠a t’a rat n ki tɩ b bas-⁠a sorã zug la b looge.

La Zʋɩf rãmbã maan-​kʋʋd a ye n wa n loogdẽ, n yã rao ning wagda wã sẽn pãbã. Yãmb mii a sẽn maan bũmb ning bɩ? A bʋdgame n looge. Zʋɩf rãmbã tũudmã taoor soab a to me n wa n loogd so-​kãng zugu. Yaa Levi neda. A yalsame bɩ? Ayo, yẽ me pa yals n na n sõng rao ning b sẽn pãbã ye. Ges-⁠y fotã zug tɩ y na yã maan-​kʋʋdã ne Levi nedã sẽn loogde.

La yãmb mii ned ning sẽn yals n sõngd raoã bɩ? Yaa Samari neda. Rao ning wagda wã sẽn pãbã yaool n da yaa Zʋɩf. La Samari nedã tɩbsa Zʋɩfã noadã, la rẽ poore a tall-⁠a lame n kẽng sik-​zĩigẽ t’a na n vʋʋse, la a tɩp n baase.

A Zezi sẽn togs kibarã n sa, a soka ned ning sẽn da sok-⁠a wã yaa: ‘Sã n yaa ne foo, neb a tãabã sʋka, ãnda n yaa ned ning wagda wã sẽn pãbã to? Yaa maan-​kʋʋdã bɩ, Levi nedã bɩ, bɩ yaa Samari nedã?’

Raoã leokame tɩ yaa Samari nedã, bala yaa yẽ n ges raoã yelle.

A Zezi yeel-⁠a lame yaa: ‘Yaa sɩda. Bɩ fo me kẽng n tɩ maan woto.’

A Zezi sẽn da zãmsd nebã to-⁠to wã pa noom yãmb sɩda? Tõnd sã n karemd a Zezi sẽn yeel bũmb ning Biiblã pʋgẽ wã, d na n bãnga bũmb wʋsgo.

A ZEZI sẽn wa n gilgd zĩig fãa wã, a ra sãoogda bãad dãmba. Nebã ra togsda zĩig fãa t’a Zezi sãoogda bãad dãmba. Rẽ n kɩt tɩ nebã ra talld põeyã, zoense, mugs la bãad dãmb a taab n wat a Zezi nengẽ t’a sãoogd-⁠ba.

A Zã sẽn lis a Zezi wã yɩɩda yʋʋm a tãab masã. A Zezi yeela a tʋm-​tʋmdbã tɩ ka la bilfu, yẽ na n kẽnga Zerizalɛm la b na n tɩ kʋʋ yẽ beenẽ, la tɩ rẽ poore a na n lebg n vʋʋgame. La nand t’a kũumã daar ta, a ra ket n gilgdame la a sãoogd bãad dãmbã.

Daar a yembre, a Zezi zãmsa nebã vʋʋsg daare. Vʋʋsg daarã yaa daar Zʋɩf rãmbã sẽn da pa segd n tʋme. Pag ning yãmb sẽn ne fotã zugã bẽedame. Yʋʋm 18 masã la a sẽn zõr n pa tõe n doog a mengã. La a Zezi sɩɩs-⁠a lame, t’a sãoog n tõe n doog masã.

La tũudmã taoor dãmb sũur puugame tɩ b ned a ye yeel nebã yaa: ‘Rasem a yoob n be tõnd sẽn tõe n tʋme. Bɩ y wa ra-​kãens n wa paam maagre, la y ra le wa vʋʋsg daar ye.’

La a Zezi yeel-⁠b lame yaa: ‘Yãmb yaa nin-​wẽnse. Rẽ yĩnga yãmb ka lokd y bõens n kẽnd n yũnugd koom vʋʋsg daar sɩda? La pʋg-​kãngã sẽn yaa nimbãan-​ned n bẽed hal yʋʋm piig la a nii wã la yãmb yeel tɩ b ra sãoog vʋʋsg daare?’ A Zezi sẽn gom woto wã kɩtame tɩ yãnd yõk-⁠ba.

Rẽ poore, a Zezi ne a tʋm-​tʋmdbã yikame n na n kẽng Zerizalɛm. B sẽn yi Zeriko tẽngã bala, zoens a yiib sẽn yaa bõos rãmb n wʋm t’a Zezi ra loogdame tɩ b zẽk b koees n yeel yaa: ‘Zezi, sõng tõndo.’

A Zezi boola zoensã kɛɛng n sok-⁠b yaa: ‘Bõe la yãmb dat tɩ m maan n kõ-yã?’ Zoensã leokame yaa: ‘Zusoaba, maan sugr la f kɩt tɩ d ninã puki.’ A Zezi sɩɩsa b ninã, la b ninã puka zĩig pʋgẽ tɩ b ne masã. Yãmb mii bũmb ning sẽn kɩt t’a Zezi maan yel-​solem kãensã fãa wã bɩ? Yaa a sẽn nong nebã la a rat tɩ b tẽ-a wã yĩnga. Sẽn paase, kɩtame tɩ d bãng t’a sã n wa rɩt a naamã, ned baa a ye pa na n le bẽ ye.