A ZEZI sẽn wa n gilgd zĩig fãa wã, a ra sãoogda bãad dãmba. Nebã ra togsda zĩig fãa t’a Zezi sãoogda bãad dãmba. Rẽ n kɩt tɩ nebã ra talld põeyã, zoense, mugs la bãad dãmb a taab n wat a Zezi nengẽ t’a sãoogd-⁠ba.

A Zã sẽn lis a Zezi wã yɩɩda yʋʋm a tãab masã. A Zezi yeela a tʋm-​tʋmdbã tɩ ka la bilfu, yẽ na n kẽnga Zerizalɛm la b na n tɩ kʋʋ yẽ beenẽ, la tɩ rẽ poore a na n lebg n vʋʋgame. La nand t’a kũumã daar ta, a ra ket n gilgdame la a sãoogd bãad dãmbã.

Daar a yembre, a Zezi zãmsa nebã vʋʋsg daare. Vʋʋsg daarã yaa daar Zʋɩf rãmbã sẽn da pa segd n tʋme. Pag ning yãmb sẽn ne fotã zugã bẽedame. Yʋʋm 18 masã la a sẽn zõr n pa tõe n doog a mengã. La a Zezi sɩɩs-⁠a lame, t’a sãoog n tõe n doog masã.

La tũudmã taoor dãmb sũur puugame tɩ b ned a ye yeel nebã yaa: ‘Rasem a yoob n be tõnd sẽn tõe n tʋme. Bɩ y wa ra-​kãens n wa paam maagre, la y ra le wa vʋʋsg daar ye.’

La a Zezi yeel-⁠b lame yaa: ‘Yãmb yaa nin-​wẽnse. Rẽ yĩnga yãmb ka lokd y bõens n kẽnd n yũnugd koom vʋʋsg daar sɩda? La pʋg-​kãngã sẽn yaa nimbãan-​ned n bẽed hal yʋʋm piig la a nii wã la yãmb yeel tɩ b ra sãoog vʋʋsg daare?’ A Zezi sẽn gom woto wã kɩtame tɩ yãnd yõk-⁠ba.

Rẽ poore, a Zezi ne a tʋm-​tʋmdbã yikame n na n kẽng Zerizalɛm. B sẽn yi Zeriko tẽngã bala, zoens a yiib sẽn yaa bõos rãmb n wʋm t’a Zezi ra loogdame tɩ b zẽk b koees n yeel yaa: ‘Zezi, sõng tõndo.’

A Zezi boola zoensã kɛɛng n sok-⁠b yaa: ‘Bõe la yãmb dat tɩ m maan n kõ-yã?’ Zoensã leokame yaa: ‘Zusoaba, maan sugr la f kɩt tɩ d ninã puki.’ A Zezi sɩɩsa b ninã, la b ninã puka zĩig pʋgẽ tɩ b ne masã. Yãmb mii bũmb ning sẽn kɩt t’a Zezi maan yel-​solem kãensã fãa wã bɩ? Yaa a sẽn nong nebã la a rat tɩ b tẽ-a wã yĩnga. Sẽn paase, kɩtame tɩ d bãng t’a sã n wa rɩt a naamã, ned baa a ye pa na n le bẽ ye.

A ZEZI sẽn puk zoens a yiibã sẽn yaa bõos rãmbã ninã poor bilfu, a kẽnga tẽng-​bil a ye sẽn pẽ Zerizalɛm. A sẽn ta wã, a yeela a karen-​biis a yiib woto: ‘Kẽ-y tẽngã pʋgẽ tɩ y na n yãa bõn-​bil b sẽn loe. Lok-⁠y-​yã n wa kõ maam.’

Karen-​biisã tɩ talla bõangã n wa t’a Zezi zomb-⁠a n na n kẽng Zerizalɛm sẽn da pa le zãrã. A sẽn wa n kolgd Zerizalɛmmã, neb wʋsg n yi n na n seg-⁠a. Bãmb wʋsg yeesa b futã n tɩʋ sorã zugu, tɩ kẽer kaood koms vãad n dɩgend sorã zug la b yetẽ yaa: ‘Bark bee rĩm ning sẽn wat a Zeova yʋʋr yĩngã zugu!’

Pĩndã, Israɛll tẽngẽ wã, rĩm-paalg ra segd n zomba bõn-​bil n kẽ Zerizalɛm n wilg nebã fãa tɩ yẽ n lebg rĩmã. Yaa rẽ la a Zezi sẽn maanã. Neb nins yãmb sẽn ne fotã zugã me wilgdame tɩ b ratame t’a Zezi yɩ b rĩma. La pa nebã fãa n sak ye. D ges bũmb ning sẽn maane, a Zezi sẽn wa n ta wẽnd-​doogẽ wã.

Wẽnd-​doogẽ wã, a sãooga koms rãmb la a puk zoens nini. Kambã sẽn yã rẽ wã, b zẽka b koees n pẽgd a Zezi. La maan-​kʋʋdbã sũy puugame tɩ b yeel a Zezi yaa: ‘Fo wʋmda kambã sẽn yetã bɩ?’

A Zezi leok-⁠b lame tɩ: ‘N-⁠ye, yãmb nan ka karem Biiblã pʋgẽ tɩ b yetẽ tɩ: “Wẽnnaam paama pẽgr sẽn yit kom-​bõoneg noyẽ la?” ’ Kambã kell n pẽga rĩm ning Wẽnnaam sẽn yãkã.

Tõnd fãa me segd n maana wa kom-​kãensã. Neb kẽer tõe n makame n na n gɩdg tõnd tɩ d ra gom Wẽnnaam rĩungã yell ye. La tõnd na n ket n gomda bõn-​sõma nins a Zezi sẽn na n wa maanã yelle.

Pa a Zezi sẽn wa n be tẽngã zugã la a sɩng a naamã rɩɩb ye. Yãmb mii sẽn yɩ wakat ning bɩ? A karen-​biisã ra sok-⁠a lame n dat n bãnge. D na n yãa rẽ kibar ning sẽn pʋgdã pʋgẽ.