A ZEZI bee Oliiv tɩɩs tãngã zugu. Rap a naas nins sẽn be ne-⁠a wã yaa a tʋm-​tʋmdba. Yaa a Ãndere ne a ma-​biig a Pɩɛɛre, la a Zak ne a ma-​biig a Zã. Roog ning yãmb sẽn ne yɩɩgã yaa Zerizalɛm wẽnd-​doogã.

A Zezi sẽn zomb bõn-​bilã n kẽ Zerizalɛmmã taa rasem a yiibu. La yaa talaat daar masã. Yibeoogã, a Zezi ra bee wẽnd-​doogẽ wã. Maan-​kʋʋdbã da rat n yõk-⁠a lame n kʋ, la b yɛɛsdame bala nebã ra nonga a Zezi.

A Zezi yeelame tɩ maan-​kʋʋdbã yaa wa wiis la wag-​toos buudu, la tɩ Wẽnnaam na n sɩbg-⁠b-⁠la b tʋʋm-​wẽnsã yĩnga. Rẽ poore, a Zezi kẽngame n tɩ rʋ Oliiv tɩɩs tãngã zugu, t’a tʋm-​tʋmdb a naasã bʋʋg-⁠a be n na n sok-⁠a bũmbu. Yãmb mii b sẽn sok a Zezi bũmb ning bɩ?

Tʋm-​tʋmdbã da rat n bãnga bũmb nins sẽn na n zĩnd beoog daare. B ra miime t’a Zezi na n wa kɩtame tɩ wẽnemã fãa sa. La b da rat n bãnga sẽn na n wa yɩ wakat ninga. Wakat bʋg la a Zezi ra tog n sɩng a naamã rɩɩbo?

A Zezi ra miime t’a sã n wa na n sɩng a naamã rɩɩbo, a karen-​biis nins sẽn na n be-⁠b tẽng zug wakat kãngã wã ra pa na n yã-a ye. Bala a na n dɩɩ a naamã saasẽ. Rẽ n so t’a wilg a tʋm-​tʋmdbã yɛl kẽer sẽn na n maan tẽngã zugu, a sã n wa rɩt a naamã saasẽ. Yel-​kãens la bʋse?

A Zezi yeelame tɩ zab-​bɛd n na n zĩndi, tɩ bãas la kom na n yõka neb wʋsgo, tɩ nebã na n maana tʋʋm-​beed wʋsgo, la tɩ tẽn-​digimdgã me na n zĩnda zĩis wʋsgo. A Zezi leb n yeelame tɩ Wẽnnaam rĩungã koe-​noog na n moona dũniyã gill zugu. Tõnd nee woto fãa rũndã-rũndã bɩ? N-⁠ye! Dẽnd d tõe n kɩsa sɩd t’a Zezi rɩta naam saasẽ masã. Ka la bilfu, a na n kɩtame tɩ wẽnemã fãa sa tẽngã zugu.

A ZEZI ne a tʋm-​tʋmdb 12 wã bee ro-​bedr pʋgẽ n na n dɩ Pakã rɩɩbo. Yaa lamusã daar yʋngo. Rao ning sẽn yitã yaa a Zida Iskariot. A rebd n na n tɩ wilga maan-​kʋʋdbã b sẽn tõe n paam a Zezi zĩig ning n yõke.

Arbã daar mengã, a Zida tɩ sok-⁠b lame yaa: ‘Mam sã n sõng yãmb tɩ y yõk a Zezi, yãmb na n kõo maam bõe?’ B leok-⁠a lame tɩ b na n kõ-a-⁠la wanzuri ligd pis-​tã. Rẽ n kɩt t’a Zida rebd b nengẽ n na n tɩ peeg-⁠b tɩ b wa yõk a Zezi. Ad yaa wẽnem menga!

A Zezi ne a tʋm-​tʋmdbã rɩɩ Pakã rɩɩb n sa masã. La a Zezi sɩnga kibs a to. A rɩka bur n kõ a tʋm-​tʋmdbã n yeel-⁠b yaa: ‘Bɩ y reeg n dɩ, bala yãoã makda mam yĩngã mam sẽn na n kõ yãmbã.’ A rɩka divẽ me n kõ-b n yeel yaa: ‘Bɩ y reeg n yũ, bala yãoã makda mam zɩɩmã sẽn na n daag yãmb yĩngã.’ Biiblã pʋgẽ, b boonda a Zezi sẽn maanã tɩ ‘Zusoabã kũum tẽegre,’ bɩ ‘Soaalã rɩɩbo.’

Israɛll nebã ra maanda Pakã kibs n tẽegd Wẽnnaam malɛkã sẽn da pa kʋ bãmb kambã n yaool n kʋ Ezipt nebã kom-​dẽemsã yelle. La masã, a Zezi ratame t’a karen-​biisã tẽegd a yelle, la b tẽegd a sẽn ki bãmb yĩngã me yelle. Yaa rẽ yĩng la a sẽn yeel-⁠b tɩ b maand yẽ kũumã tẽegr yʋʋmd fãa wã.

Rẽ poore, a Zezi yeela a tʋm-​tʋmdbã tɩ b tẽ Wẽnnaam ne b sũyã fãa la b ra zoe rabeem ye. B yɩɩla yɩɩl n pẽg Wẽnnaam n yaool n yi. Zĩigã ra zʋʋga wʋsgo. Bɩ d ges b sẽn na n kẽng zĩig ning masã.