A ZEZI ne a tʋm-​tʋmdb 12 wã bee ro-​bedr pʋgẽ n na n dɩ Pakã rɩɩbo. Yaa lamusã daar yʋngo. Rao ning sẽn yitã yaa a Zida Iskariot. A rebd n na n tɩ wilga maan-​kʋʋdbã b sẽn tõe n paam a Zezi zĩig ning n yõke.

Arbã daar mengã, a Zida tɩ sok-⁠b lame yaa: ‘Mam sã n sõng yãmb tɩ y yõk a Zezi, yãmb na n kõo maam bõe?’ B leok-⁠a lame tɩ b na n kõ-a-⁠la wanzuri ligd pis-​tã. Rẽ n kɩt t’a Zida rebd b nengẽ n na n tɩ peeg-⁠b tɩ b wa yõk a Zezi. Ad yaa wẽnem menga!

A Zezi ne a tʋm-​tʋmdbã rɩɩ Pakã rɩɩb n sa masã. La a Zezi sɩnga kibs a to. A rɩka bur n kõ a tʋm-​tʋmdbã n yeel-⁠b yaa: ‘Bɩ y reeg n dɩ, bala yãoã makda mam yĩngã mam sẽn na n kõ yãmbã.’ A rɩka divẽ me n kõ-b n yeel yaa: ‘Bɩ y reeg n yũ, bala yãoã makda mam zɩɩmã sẽn na n daag yãmb yĩngã.’ Biiblã pʋgẽ, b boonda a Zezi sẽn maanã tɩ ‘Zusoabã kũum tẽegre,’ bɩ ‘Soaalã rɩɩbo.’

Israɛll nebã ra maanda Pakã kibs n tẽegd Wẽnnaam malɛkã sẽn da pa kʋ bãmb kambã n yaool n kʋ Ezipt nebã kom-​dẽemsã yelle. La masã, a Zezi ratame t’a karen-​biisã tẽegd a yelle, la b tẽegd a sẽn ki bãmb yĩngã me yelle. Yaa rẽ yĩng la a sẽn yeel-⁠b tɩ b maand yẽ kũumã tẽegr yʋʋmd fãa wã.

Rẽ poore, a Zezi yeela a tʋm-​tʋmdbã tɩ b tẽ Wẽnnaam ne b sũyã fãa la b ra zoe rabeem ye. B yɩɩla yɩɩl n pẽg Wẽnnaam n yaool n yi. Zĩigã ra zʋʋga wʋsgo. Bɩ d ges b sẽn na n kẽng zĩig ning masã.

A ZEZI ne a tʋm-​tʋmdbã sẽn yi roogẽ wã poore, b kẽnga Gɛtsemane tɩɩsã zĩigẽ. B ra zoe n kẽnga be naoor wʋsgo. B sẽn ta wã, a Zezi yeel-⁠b lame tɩ b yals ka n pʋʋs la b ra gũs ye. Yẽ mengã zãaga bilf n tɩ yĩgimd n fõgen a neng tẽng n pʋʋsdẽ.

Wakat a wãn poore, a lebg n waa a tʋm-​tʋmdbã nengẽ. Yãmb mii b sẽn da maand bũmb ning bɩ? B ra gõeeme! A Zezi yaool n da yeel-⁠b-⁠la naoor a tãab tõr tɩ b ra gũs ye. A sã n tɩ pʋʋs n lebg n wa fãa, a mikdame tɩ b gõeeme. La naoor a tãab-⁠n-​soabã, a Zezi yeel-⁠b-⁠la woto: ‘Yaa bõe tɩ yãmb gõeyã? Mam bɛɛbã na n yõka maam masã.’

Wakat kãng bala, b wʋma neb wʋsg rãamde. B yãa rap sẽn zãad sʋʋs ne kãn la b zãad bugum n watẽ. B sẽn wa n kolgã, nin-⁠yend n yi nebã sʋk n ta a Zezi taoor n mok-⁠a. Yaa a Zida Iskariote. Yãmb pa ne-⁠a fotã zug sɩda? La bõe yĩng t’a Zida ta n mok a Zezi?

A Zezi sok-⁠a lame yaa: ‘Zida, fo zãmbda maam ne mokr la?’ A Zida ra yeela rapã tɩ yaa ned ning yẽ sẽn na n mokã la a Zezi. A Zezi bɛɛbã kolgame n na n yõk-⁠a, la a Pɩɛɛr ra pa rat n sak tɩ b yõk a Zezi faag-​faag ye. A wõoga a sʋʋgã n na n kɛ rao ning sẽn da yas a sɛɛgẽ wã. La sʋʋgã ka paam raoã zug ye, yaa a rɩtg tʋbrã la a fiuug-​yã. La a Zezi sɩɩsa raoã tʋbr tɩ maage.

Rẽ poore a Zezi yeela a Pɩɛɛr yaa: ‘Sui f sʋʋgã a wʋʋgẽ. Fo ka mi tɩ mam tõe n bõosa m Ba t’a kɩt tɩ malɛgs wʋsg wa sõng maam la?’ Vẽenega, a Zezi ra tõe n pʋʋsa a Ba wã n bõos sõngre. La a Zezi ka maan woto, bala a miime t’a bɛɛbã segd n yõk-⁠a lame masã. Rẽ n so t’a bas tɩ b yõk-⁠a n tall n looge. Bɩ d ges bũmb ning sẽn na n paam a Zezi masã.