A PƖƐƐR ne a Zã sẽn loogã poore, a Maari paa a Zezi yaoogã noor n sɩng yãbre. Wala tõnd sẽn zoe n yã poorẽ wã, a lɩkame n ges yaoogã pʋgẽ n yã malɛgs a yiibu. Malɛgsã sok-⁠a lame yaa: ‘Bõe yĩng tɩ fo yãbda?’

A Maari leokame yaa: ‘B rɩka m Zusoabã tɩ m ka mi b sẽn gãneg-⁠a zĩig ning ye.’ A Maari wẽnegame n yã rao tɩ raoã sok-⁠a yaa: ‘Fo baooda ãnda?’

A Maari ra tẽedame tɩ yaa rao ning sẽn get-⁠a tɩɩsã yellã, la tɩ tõe tɩ yaa yẽ n dɩk kũumã. Rẽ n so t’a yeel raoã yaa: ‘Sã n yaa yãmb n dɩk-⁠a bɩ y wilg maam yãmb sẽn gãneg-⁠a zĩig ninga.’ La rao ning sẽn da gomd ne-⁠a wã yaa a Zezi. A sẽn da pa le wõnd pĩndã yĩnga, a Maari ka bãng-⁠a ye. La a sẽn pʋd a Maari yʋʋrã, a Maari bãngame tɩ yaa a Zezi. A zoeeme n tɩ yeel karen-​biisã yaa: ‘Ad mam yãa Zusoabã!’

Baraarã me, karen-​biis a yiib n da rebd Emayus tɩ rao a ye wa tũud-⁠b n kẽnda. B sẽn kʋ a Zezi wã yĩng kɩtame t’a karen-​biisã sũy ra sãam wʋsgo. La raoã sẽn da tũud-​bã sõsa ne-⁠ba, n togs-⁠b bũmb wʋsg sẽn be Biiblã pʋgẽ, tɩ b sũyã yɩ noogo. La b sẽn wa n yals n na n dɩ wã, karen-​biisã bãngame tɩ sẽn da tũud-⁠a bãmbã yaa a Zezi. Rẽ poore a Zezi menemame, la karen-​biis a yiibã zoee tao-​tao n leb Zerizalɛm n na n tɩ togs tʋm-​tʋmdbã tɩ b yãa a Zezi.

Nand tɩ karen-​biis a yiibã ta Zerizalɛmmã, a Zezi pukame t’a Pɩɛɛr yã-a. Karen-​biis a taabã sẽn wʋm dẽ wã, b sũyã yɩɩ noog wʋsgo. Karen-​biis a yiibã me taa Zerizalɛm n togs tʋm-​tʋmdbã tɩ bãmb me yãa a Zezi. La b sẽn wa n togsdẽ wã, yel-​solemd n maane. Yãmb mii sẽn yɩ bũmb ning bɩ?

Ges-⁠y foto wã. A Zezi karen-​biisã bee roog pʋgẽ. La baa ne roogã sẽn sogã a Zezi puka be. Ad a karen-​biisã sũy segd n yɩɩ noogo! Yãmb sõdame n ges yaa naoor a wãn la a Zezi sẽn vẽneg a meng a vʋʋgrã raar t’a karen-​biisã yã-a wã bɩ? Yaa naoor a nu.

La a Zezi sẽn wa n na n puk roogã pʋgẽ wã tɩ tʋm-​tʋmd a Toma ka be be ye. A sẽn wa wã karen-​biisã yeel-⁠a lame tɩ bãmb yãa a Zezi. La a Toma yeelame tɩ yẽ mengã sã n pa yã a Zezi, a pa na n tẽ ye. Rasem a nii loogr poore, karen-​biisã le tigma taab roog pʋgẽ, n sog roogã. Wakat kãng t’a Toma me ra bee be. Zĩig pʋgẽ bala, a Zezi puka roogã pʋgẽ. A Toma meng sẽn yã-a wã, a tẽeme masã.

A ZEZI vʋʋgrã poore, a vẽnega a meng naoor wʋsg n paas t’a karen-​biisã yã-a. Daar a yembr menga, yaa karen-​biis sẽn ta bãmb kobs-⁠nu n naag taab n yã-a. A sã n da vẽneg a menga, yãmb mii a sẽn gomd bũmb ning yell bɩ? Yaa Wẽnnaam rĩungã yelle. Bala a Zeova tʋm-⁠a-⁠la tẽngã zug t’a wa gom rẽ yelle. La a Zezi kell n maana woto baa a vʋʋgrã poor menga.

Yãmb ket n tẽra Wẽnnaam rĩungã sẽn yaa bũmb ning bɩ? Yaa Wẽnnaam goosneema sẽn be saasẽ. Wẽnnaam yãka a Zezi t’a yaa goosneem-​kãng naaba. Wala tõnd sẽn zoe n yã wã, a Zezi rɩlga neba, n sãoog bãad dãmbã, la a vʋʋg neb sẽn ki menga, tɩ woto wilgdẽ t’a na n yɩɩ na-​sõngo.

La a Zezi sã n wa na n dɩ naam yʋʋm tusrã, tẽngã na n yɩɩ wãn to? Tẽngã gill na n yɩɩ arzãna. Zabã, bãasã, bi-​beelmã la kũumã meng ka na n le zĩnd ye. D miime tɩ na n sɩd yɩɩ woto bal kɛpɩ, bala Wẽnnaam naana tẽngã n dat t’a yɩ arzãn tɩ nebã vɩɩmd a zugu. Yaa rẽ n so tɩ sɩngrẽ wã, a maan zĩ-neer ning b sẽn boond tɩ Edɛnnã. A Zezi na n kɩtame tɩ tẽngã yɩ arzãn wa Wẽnnaam sẽn da rat tɩ yɩ to-⁠to wã.

Yaa rasem 40 pʋgẽ la a Zezi sẽn da vẽnegd a meng t’a karen-​biisã yãt-⁠a wã. Rẽ kɩtame tɩ b bãng t’a sɩd vʋʋgame. La masã, a na n leba saasẽ. Nand t’a looge, a yeela a karen-​biisã yaa: ‘Kell-⁠y n pa-⁠y Zerizalɛm hal tɩ ta daar ning y sẽn na n paam vʋʋsem sõngã.’ Yãmb mii vʋʋsem sõngã sẽn yaa bũmb ning bɩ? Yaa Wẽnnaam pãnga. D tõe n mak-⁠a-⁠la ne sebgã. Pãn-​kãng na n sõnga a Zezi karen-​biisã tɩ b maan Wẽnnaam daabã. A Zezi leb n yeel-⁠b lame tɩ b segd n moona koɛɛgã tɩ ta dũniyã tɛk fãa.

A Zezi sẽn yeel woto wã poore, yel-​solemd n maane. A sɩnga zẽkre, n loogd saasẽ. Yãmb pa ne foto wã sɩda? Sawadg n wa n lud a Zezi, t’a karen-​biisã ye pa ne-⁠a ye. A karen-​biisã ra pa na n le yã-a yɛs ye. A Zezi rʋʋ saasẽ, n sɩng naam dɩɩb a karen-​biisã sẽn be tẽng zugã zugu.