A ZEZI vʋʋgrã poore, a vẽnega a meng naoor wʋsg n paas t’a karen-​biisã yã-a. Daar a yembr menga, yaa karen-​biis sẽn ta bãmb kobs-⁠nu n naag taab n yã-a. A sã n da vẽneg a menga, yãmb mii a sẽn gomd bũmb ning yell bɩ? Yaa Wẽnnaam rĩungã yelle. Bala a Zeova tʋm-⁠a-⁠la tẽngã zug t’a wa gom rẽ yelle. La a Zezi kell n maana woto baa a vʋʋgrã poor menga.

Yãmb ket n tẽra Wẽnnaam rĩungã sẽn yaa bũmb ning bɩ? Yaa Wẽnnaam goosneema sẽn be saasẽ. Wẽnnaam yãka a Zezi t’a yaa goosneem-​kãng naaba. Wala tõnd sẽn zoe n yã wã, a Zezi rɩlga neba, n sãoog bãad dãmbã, la a vʋʋg neb sẽn ki menga, tɩ woto wilgdẽ t’a na n yɩɩ na-​sõngo.

La a Zezi sã n wa na n dɩ naam yʋʋm tusrã, tẽngã na n yɩɩ wãn to? Tẽngã gill na n yɩɩ arzãna. Zabã, bãasã, bi-​beelmã la kũumã meng ka na n le zĩnd ye. D miime tɩ na n sɩd yɩɩ woto bal kɛpɩ, bala Wẽnnaam naana tẽngã n dat t’a yɩ arzãn tɩ nebã vɩɩmd a zugu. Yaa rẽ n so tɩ sɩngrẽ wã, a maan zĩ-neer ning b sẽn boond tɩ Edɛnnã. A Zezi na n kɩtame tɩ tẽngã yɩ arzãn wa Wẽnnaam sẽn da rat tɩ yɩ to-⁠to wã.

Yaa rasem 40 pʋgẽ la a Zezi sẽn da vẽnegd a meng t’a karen-​biisã yãt-⁠a wã. Rẽ kɩtame tɩ b bãng t’a sɩd vʋʋgame. La masã, a na n leba saasẽ. Nand t’a looge, a yeela a karen-​biisã yaa: ‘Kell-⁠y n pa-⁠y Zerizalɛm hal tɩ ta daar ning y sẽn na n paam vʋʋsem sõngã.’ Yãmb mii vʋʋsem sõngã sẽn yaa bũmb ning bɩ? Yaa Wẽnnaam pãnga. D tõe n mak-⁠a-⁠la ne sebgã. Pãn-​kãng na n sõnga a Zezi karen-​biisã tɩ b maan Wẽnnaam daabã. A Zezi leb n yeel-⁠b lame tɩ b segd n moona koɛɛgã tɩ ta dũniyã tɛk fãa.

A Zezi sẽn yeel woto wã poore, yel-​solemd n maane. A sɩnga zẽkre, n loogd saasẽ. Yãmb pa ne foto wã sɩda? Sawadg n wa n lud a Zezi, t’a karen-​biisã ye pa ne-⁠a ye. A karen-​biisã ra pa na n le yã-a yɛs ye. A Zezi rʋʋ saasẽ, n sɩng naam dɩɩb a karen-​biisã sẽn be tẽng zugã zugu.

GES-⁠Y neb nins sẽn be foto wã zugã. Yaa a Zezi karen-​biisi. B tũu a Zezi goamã n pa Zerizalɛm. B ra tigma taab roog pʋgẽ n gũudẽ. La bʋʋr sẽn yaa kãseng n wa n maane. Ra wõnda seb-​kãseng rãamde. Rẽ poore, bug-​witim n puk karen-​biig fãa zugẽ. Yãmb pa ne bugmã sẽn wit ned kam fãa zugẽ sɩda? La woto fãa rat n yeelame tɩ bõe?

Yaa yel-​solemde. A Zezi sẽn leb saasẽ n be a Ba wã nengẽ wã, a kɩtame tɩ Wẽnnaam vʋʋsem sõngã sig a karen-​biisã zutu. Yãmb mii vʋʋsem sõngã sẽn kɩt tɩ karen-​biisã maan bũmb ning bɩ? B fãa sɩngame n gomd goam buud toor-​toor masã.

Nebã wʋsg sẽn da be Zerizalɛmmã wʋma bʋʋrã n wa n na n gese. Sãamb me n da wa Zerizalɛm n na n maan Israɛll nebã kibs ning b sẽn boond tɩ Pãntekotã. B sẽn wʋm karen-​biisã sẽn da gomd bãmb buudã goam n wilgd Wẽnnaam sẽn maan bũmb ninsã, ling-⁠b-⁠la wʋsgo.

Rẽ n so tɩ b yeel yaa: ‘Nin-​kãensã pa Galile neb sɩda? La maana wãn tɩ b gomd tõnd buudã goamã?’

Dẽ, a Pɩɛɛr yikame n zẽk a koɛɛg n togs b sẽn kʋ a Zezi to-⁠to, la a togs t’a Zeova vʋʋg-⁠a lame. A leb n yeela woto: ‘Masã, a Zezi bee saasẽ, n zĩ Wẽnnaam dɩtgo. La yaa a sẽn kõ tõnd vʋʋsem sõng ning a sẽn da pʋlmã yĩng n kɩt tɩ yãmb ne yel-​soalem kãensã wã.’

A Pɩɛɛr sẽn yeel woto wã, neb wʋsg sũy sãama b sẽn wʋm bũmb ning sẽn paam a Zezi wã. Rẽ n kɩt tɩ b sok-⁠a woto: ‘Bõe la d segd n maane?’ La a Pɩɛɛr leokame yaa: ‘Yãmb segd n toeema y zʋgã la y reeg lisgu.’ Baraarã bala, sẽn na ta neb tus a tã n deeg lisgu, n lebg a Zezi karen-​biisi.