GES-⁠Y malɛkã sẽn pakd bãensã roogo. Rap nins sẽn yitã yaa a Zezi tʋm-​tʋmdbã. Bɩ d ges bũmb ning sẽn kɩt tɩ b kẽes-⁠b bãensã.

Vʋʋsem sõngã sẽn sig a Zezi karen-​biisã zugã poor bilfu, a Pɩɛɛr ne a Zã yika daar a ye n debd Zerizalɛm wẽnd-​doogẽ wã. B sẽn ta wẽnd-​doogã noorã, b yãa rao sẽn yaa põore. A roga ne a komslmã. Nebã talld-⁠a-⁠la daar fãa n wat wẽnd-​doogã noor t’a bõosd neb nins sẽn wat be wã. A sẽn yã a Pɩɛɛr ne a Zã wã, a bõos-⁠b-⁠la bũmbu. Yãmb mii tʋm-​tʋmdbã sẽn maan bũmb ning bɩ?

B yalsame n ges raoã, t’a Pɩɛɛr yeel yaa: ‘Mam ka tar ligd ye. La mam na n kõo foo bũmb ninga mam sẽn tarã. Ne a Zezi yʋʋre, bɩ f yik n kẽne.’ Dẽ poore, a Pɩɛɛr gãda raoã nug rɩtg n zẽk-⁠a t’a kell n yik n yals yĩngr n sɩng kẽna. Nebã sẽn yã yel-​solemdã, b yɛɛsame la b sũurã yɩɩ noog wʋsgo.

A Pɩɛɛr yeela nebã tɩ yaa ne Wẽnnaam ning sẽn vʋʋg a Zezi wã pãng la yẽ ne a Zã sẽn maan yel-​solem-​kãngã wã. La a Pɩɛɛr ne a Zã sẽn wa n gomdã, Zʋɩf rãmbã tũudmã taoor dãmb kẽer n wa. B sũurã yikame, a Pɩɛɛr ne a Zã sẽn togsd nebã t’a Zezi vʋʋgame wã yĩnga. Rẽ n so tɩ b yõk a Pɩɛɛr ne a Zã n kẽes bãense.

Vẽkembeoogã, tũudmã taoor dãmb wʋsg tigma taaba, n kɩt tɩ b tall a Pɩɛɛre, a Zã ne rao ning b sẽn sãoogã n wa. B soka a Pɩɛɛre ne a Zã yaa: ‘Yaa ne pãn-​bʋg la yãmb sẽn maan yel-​solem-​kãnga wã?’

A Pɩɛɛr leok-⁠b lame tɩ yaa ne Wẽnnaam ning sẽn vʋʋg a Zezi wã pãnga. La maan-​kʋʋdbã ra pa mi b sẽn na n maan bũmb ning ye. Bala bãmb mengã ra yãame t’a Pɩɛɛr ne a Zã tõog n sãooga raoã. Dẽnd b yeela tʋm-​tʋmdbã tɩ b ra le saag n gom a Zezi yell abada. Rẽ poore b bas-⁠b lame tɩ b looge.

La tʋm-​tʋmdbã ra ket n gomda a Zezi yell ne nebã, la b sãoogd bãad dãmbã. Nebã ra gomda yel-​soalem nins b sẽn maandã yell zĩig fãa. La neb wʋsg n da yit tẽns sẽn pa zãr ne Zerizalɛm n wat ne bãad dãmb tɩ tʋm-​tʋmdbã sãoogd-⁠ba. Woto kɩtame tɩ sũ-kiir yõk tũudmã taoor dãmb tɩ b yõg tʋm-​tʋmdbã n kẽes bãense. La tʋm-​tʋmdbã pa kaoos bãensã roogẽ ye.

Baraar yʋng bala, Wẽnnaam malɛk n wa n pak bãensã roogo. Yãmb pa ne fotã zug sɩda? Malɛkã yeel-⁠b lame yaa: ‘Kẽng-⁠y n tɩ yaas-⁠y Wẽnnaam doogã pʋgẽ n kell n moon nebã koɛɛgã.’ Vẽkembeoogã yibeoogo, tũudmã taoor dãmb tʋma neb tɩ b tɩ yiis tʋm-​tʋmdbã bãensã roogẽ n wa, la b tɩ mikame tɩ tʋm-​tʋmdbã ka be ye. B wa n yã-b lame tɩ b be wẽnd-​doogẽ wã n zãmsd nebã, tɩ b tall-⁠b n kẽng Zʋɩf rãmbã bʋ-​kaoodbã ro-​kãseng pʋgẽ.

Tũudmã taoor dãmb yeel-⁠b lame yaa: ‘Tõnd yeela yãmb tɩ y ra le gom a Zezi yell yɛs ye. La yãmb pidsa Zerizalɛm ne y zãmsgã.’ Tʋm-​tʋmdbã yeelame yaa: ‘Tõnd segd n saka Wẽnnaam n yɩɩd ninsaala.’ Dẽnd b kell n moona koe-​noogã n ka bas ye. D segd n dɩka b togs-⁠n-​taare.

YÃMB sẽn ne rao ning sẽn yĩgã yʋʋr la a Etɩɛn. Yaa a Zezi karen-​biig sẽn sɩd sakd Wẽnnaam ne a sũur fãa. La ges-⁠y bũmb ning sẽn paam-⁠a masã! Rapã lobd-⁠a-⁠la ne kug-​bɛda. La bõe yĩng tɩ b kis a Etɩɛn hal n wa lobd-⁠a kug woto?

Wẽnnaam kɩtame t’a Etɩɛn maan yel-​soalma. La ra-​kãensã ra pa nong rẽ ye. B ra wẽeda no-​koɛɛm ne a Etɩɛn a sẽn zãmsd nebã bũmb ningã zugu. La Wẽnnaam kõo a Etɩɛn yam wʋsgo, t’a tõog n wilg vẽeneg tɩ ra-​kãensã pa togsd sɩd ye. Woto puuga rapã sũy n paase, tɩ b yõk a Etɩɛn la b bao neb n kɩt tɩ b rõd-⁠a.

Maan-​kʋʋdbã kãsmã soka a Etɩɛn yaa: ‘Nebã sẽn gomdã yaa sɩd bɩ?’ A Etɩɛn togsa bũmb ning sẽn be Biiblã pʋgẽ wã. Baasgẽ wã a yeelame tɩ pĩnd wẽndẽ wã me, nin-​wẽns n da kis a Zeova no-​rɛɛsdbã. A le yeela nebã woto: ‘Yãmb me wõnda nin-​kãensã. Yãmb kʋʋ Wẽnnaam tʋm-​tʋmd a Zezi, la yãmb pa tũud Wẽnnaam noyã ye.’

Tũudmã taoor dãmb sẽn wʋm dẽ wã, b sũyã puuga wʋsg hal tɩ b wãbd b yẽnã. La a Etɩɛn zẽka a neng n ges yĩngr n yeel yaa: ‘Ges-⁠y-​yã, mam nee a Zezi sẽn yas Wẽnnaam dɩtgo.’ Rapã sẽn wʋm dẽ n paasã, b yẽda b tʋbã, la b naag taab n yõk-⁠a n veo n yiis tẽngã kɩrenga.

B sẽn ta be wã, b yeesa b futã n kɩs bi-​bɩɩg a Soll t’a gũ. Yãmb pa ne a Soll fotã zug sɩda? Dẽ poore, rapã sɩngame n lobd a Etɩɛn kuga. A Etɩɛn yĩgimdame n pʋʋs Wẽnnaam n yeel yaa: ‘Zeova, da sɩbg-⁠b yel-​kãngã yĩng ye.’ A Etɩɛn da miime tɩ yaa tũudmã taoor dãmb sẽn da belg nebã yĩng la kẽer sẽn sak n lobd yẽ kugã. A sẽn pʋʋs n sa wã, a kiime.

Ned sã n maan yãmb wẽngã, yãmb maanda a soabã n lebs bɩ? Yãmb kota Wẽnnaam t’a sɩbg-⁠a bɩ? A Etɩɛn ne a Zezi pa maan woto ye. B ra nonga neb nins sẽn pa nong-​bã menga. Bɩ d modg n maan wa bãmba.