YÃMB sẽn ne rao ning sẽn yĩgã yʋʋr la a Etɩɛn. Yaa a Zezi karen-​biig sẽn sɩd sakd Wẽnnaam ne a sũur fãa. La ges-⁠y bũmb ning sẽn paam-⁠a masã! Rapã lobd-⁠a-⁠la ne kug-​bɛda. La bõe yĩng tɩ b kis a Etɩɛn hal n wa lobd-⁠a kug woto?

Wẽnnaam kɩtame t’a Etɩɛn maan yel-​soalma. La ra-​kãensã ra pa nong rẽ ye. B ra wẽeda no-​koɛɛm ne a Etɩɛn a sẽn zãmsd nebã bũmb ningã zugu. La Wẽnnaam kõo a Etɩɛn yam wʋsgo, t’a tõog n wilg vẽeneg tɩ ra-​kãensã pa togsd sɩd ye. Woto puuga rapã sũy n paase, tɩ b yõk a Etɩɛn la b bao neb n kɩt tɩ b rõd-⁠a.

Maan-​kʋʋdbã kãsmã soka a Etɩɛn yaa: ‘Nebã sẽn gomdã yaa sɩd bɩ?’ A Etɩɛn togsa bũmb ning sẽn be Biiblã pʋgẽ wã. Baasgẽ wã a yeelame tɩ pĩnd wẽndẽ wã me, nin-​wẽns n da kis a Zeova no-​rɛɛsdbã. A le yeela nebã woto: ‘Yãmb me wõnda nin-​kãensã. Yãmb kʋʋ Wẽnnaam tʋm-​tʋmd a Zezi, la yãmb pa tũud Wẽnnaam noyã ye.’

Tũudmã taoor dãmb sẽn wʋm dẽ wã, b sũyã puuga wʋsg hal tɩ b wãbd b yẽnã. La a Etɩɛn zẽka a neng n ges yĩngr n yeel yaa: ‘Ges-⁠y-​yã, mam nee a Zezi sẽn yas Wẽnnaam dɩtgo.’ Rapã sẽn wʋm dẽ n paasã, b yẽda b tʋbã, la b naag taab n yõk-⁠a n veo n yiis tẽngã kɩrenga.

B sẽn ta be wã, b yeesa b futã n kɩs bi-​bɩɩg a Soll t’a gũ. Yãmb pa ne a Soll fotã zug sɩda? Dẽ poore, rapã sɩngame n lobd a Etɩɛn kuga. A Etɩɛn yĩgimdame n pʋʋs Wẽnnaam n yeel yaa: ‘Zeova, da sɩbg-⁠b yel-​kãngã yĩng ye.’ A Etɩɛn da miime tɩ yaa tũudmã taoor dãmb sẽn da belg nebã yĩng la kẽer sẽn sak n lobd yẽ kugã. A sẽn pʋʋs n sa wã, a kiime.

Ned sã n maan yãmb wẽngã, yãmb maanda a soabã n lebs bɩ? Yãmb kota Wẽnnaam t’a sɩbg-⁠a bɩ? A Etɩɛn ne a Zezi pa maan woto ye. B ra nonga neb nins sẽn pa nong-​bã menga. Bɩ d modg n maan wa bãmba.

YÃMB mii ned ning sẽn gãe tẽngã bɩ? Yaa a Solle. Yaa yẽ n da gũud rap nins sẽn lob a Etɩɛn kugã futu. Yãmb nee vẽenemã sẽn yãgdã bɩ? Yaa bõe n maane?

A Etɩɛn kũumã poore, a Soll namsa a Zezi karen-​biisã wʋsgo. A ra kẽeda zak-​zak n yõgd karen-​biisã n tʋgd n kẽesd bãens roogẽ. Karen-​biisã wʋsg zoeeme n kẽng tẽns a taaba, la b kell n moona koe-​noogã beenẽ. La a Soll me ra ket n gilgda tẽnsã n gẽesd-⁠ba. Daar a yembre, a yikame n debd Damase, la bũmb n tek n maan sorã zugu.

Vẽenem n yi saasẽ zĩig pʋgẽ n gũbg a Soll t’a lʋɩ tẽnga. Yãmb pa ne fotã zug sɩda? Rẽ poore, koɛɛg n yeel yaa: ‘Soll, Soll! Bõe yĩng tɩ fo namsd maam?’ Rap nins sẽn da tũud a Sollã nee vẽenemã la b wʋmd koɛɛgã, la b ka wʋmd goamã võor ye.

A Soll sokame yaa: ‘Yãmb yaa ãnda, Zusoaba?’

Tɩ koɛɛgã leok yaa: ‘Maam la a Zezi, fo sẽn namsd a soabã.’ A Zezi yeela woto, bala a Soll sã n namsd a karen-​biisã yaa wa yẽ mengã la a namsda.

A Soll sokame yaa: ‘Zusoaba, bõe la m segd n maane?’

T’a Zezi yeel-⁠a yaa: ‘Yik n kẽng Damase. Fo sã n ta be, ned n na n wilg foo f sẽn segd n maan bũmb ninga.’ A Soll yikame n wok a ninã, la a pa ne bũmb ye. A lebga zoanga. Dẽnd rap nins sẽn da pʋgd-⁠a wã gãda a nugã n na n tall-⁠a n kẽng Damase.

A Zezi yeela a karen-​biig a Ananias sẽn be Damasã woto: ‘Yik n kẽng sor ning sẽn boond tɩ tɩrgã n ta a Zida zakẽ wã n sok rao ning b sẽn boond t’a Sollã yelle. Mam yãka yẽ t’a na n yɩ m tʋm-​tʋmda.’

A Ananias sɩd sakame n kẽnge. A sẽn ta wã, a sɩd yãa a Solle. A sẽn yã-a wã, a tik-⁠a-⁠la ne a nusã n yeel yaa: ‘Zusoabã tʋma maam tɩ m wa kɩt tɩ f ninã puk la f pid ne vʋʋsem sõngo.’ Wakat kãng bala, bũmb sẽn wõnd nod-​pagd n yi a Soll ninẽ wã n lʋɩ, t’a ninã puki, t’a tõe n le yã.

Wẽnnaam kõo a Soll tõog t’a na n moon tẽns wʋsg neba. Yaa yẽ la b sẽn wa n boond tɩ tʋm-​tʋmd a Pollã. D na n goma a yell taoore. La nananda, bɩ d ges Wẽnnaam sẽn tʋm a Pɩɛɛr t’a tɩ maan bũmb ninga.