BÕE n maan biig ning sẽn gãe tẽngã? A yii fenetrẽ n yak n lʋɩ. A wee n pa ki la? Rap a yiib nins sẽn yãgd n wat n na n ges-⁠a wã yaa a Poll ne a Tɩmote.

Yaa Torwas la yel-​kãngã maan-​yã. A Poll ra bee be n sõsd ne karen-​biisã. A ra miime t’a na n kaoosame n yaool n le yã-ba, bala vẽkembeoogã a ra segd n kẽe batayo n kẽng zĩig a to. Yaa rẽ n so t’a sõs ne-⁠b n tãag yʋn-​sʋka.

Bi-​riblã yʋʋr la a Etiisi. A ra zĩi fenetrẽ wã n suusdẽ, n wa sɩng gõeem n kell n yi be n yak n lʋɩ. A yaool n da bee etaas a yiib zĩigẽ. Nebã bee bʋʋm la b sẽn yɛɛsã, bala b sẽn zẽk-⁠a wã b mikame t’a kiime.

A Poll sẽn yã tɩ bi-​riblã kiime wã, a gãand n bʋʋga biigã, n mobg-⁠a la a yeel nebã tɩ b ra yɛɛs tɩ bũmb pa tar-⁠a ye. Sɩd me, a Poll vʋʋga biigã. Ad yɩɩ yel-​solemd tɛkẽ! Nebã sũy yɩɩ noog hal wʋsgo.

Nebã fãa lebg n dʋʋ roogẽ wã n na n dɩ. A Poll kell n sõsame n tãag yibeoogo. La a Etiis pa le saag n gũs koe! Rẽ poore, a Poll ne a Tɩmote la neb nins sẽn da tũud-​bã kẽe batayo n na n tog sore. Yãmb mii b sẽn da rebd zĩig ning bɩ?

Yaa naoor a tãab-⁠n-​soab masã la a Poll sẽn gilg tẽnsã n moon koɛɛgã. A sẽn wa n lebg so-​kãngã wã, a tek n yalsa Efɛɛz n maan yʋʋm a tãab tõr be. Rẽ kɩtame tɩ gilgr a tãab-⁠n-​soabã kaoos n yɩɩg yiib-⁠n-​soabã.

Batayo wã yii Torwas n tek n yals Mile bilfu. Efɛɛz sẽn da pa zãr ne Mile wã yĩnga, a Poll boola Efɛɛz tigingã kãsem dãmb tɩ b wa Mile t’a sõs ne-⁠ba, bala a ra pa na n le yã-b yɛs ye. Batayo wã sẽn wa n dat n loogã, kãsem dãmbã sũy sãamame, a Poll sẽn loogdã yĩnga.

Batayo wã wa n taa Sezaare masã. A Poll zĩnda karen-​biig a Filip nengẽ, la no-​rɛɛs a Agabis wa n yeela a Poll t’a sã n kẽng Zerizalɛm, b na n yõk-⁠a lame n kẽes bãense. Sɩd yɩɩ woto. La b reng n kẽesa a Poll bãens yʋʋm a yiib Sezaare, n yaool n na n tall-⁠a n kẽng Rom tɩ Rom naab a Sezaar na n kao a bʋʋdo. Bɩ d ges bũmb ning sẽn maane, b sẽn wa n debd Romã.

GES-⁠Y batayo wã sẽn bõrd koomã pʋgẽ! Yãmb nee nebã sẽn be koomẽ wã bɩ? Kẽer zoe n paam n yiime. A Poll me paam n yiime. Yãmb ne-⁠a-⁠la fotã zug bɩ? Bɩ d ges bũmb ning sẽn maane.

Tẽeg-⁠y tɩ b ra kẽesa a Poll bãens yʋʋm a yiib Sezaare. La rẽ poore, b kɩtame tɩ yẽ ne bi-​bees a wãn kẽ batayo n na n kẽng Rom. B sẽn wa n yõsgd Kɛrɛtã, seb-​kẽeng n yiki. Sebgã ra fugda wʋsg hal tɩ rapã pa tõe n wẽn batayo wã meng ye. Wĩndgã ra pukdame n tãag a kõom tɩ b pa tol n yã-a ye. Yʋng me b ra pa tõe n yã ãdsã ye. Sẽn kaoos rasem wʋsgã yĩnga, neb nins sẽn da be batayo wã pʋgẽ wã wa n tẽedame tɩ b fãa na n kiime.

La a Poll yikame n yeel yaa: ‘Yãmb ned ba a yembr ka na n ki ye, yaa batayo wã bal n na n sãame, bala Wẽnnaam malɛk n wa mam nengẽ yʋngã n yeel maam yaa: “Polle, ra zoe rabeem ye, yaa tɩlae tɩ fo ta Rom naab a Sezaar nengẽ. La gese, Wẽnnaam na n fãaga foo ne neb nins fãa sẽn be batayo wã pʋgẽ wã.” ’

Sebgã sẽn sɩngã taa rasem 14 masã. Rasem piig la a naas raarã yʋn-​sʋka, batayo wã rãmb yãame tɩ koomã boogdame. Zĩigã sẽn da yaa lik tɩ b yɛɛsd tɩ batayo wã na n tɩ fãoo pĩigã yĩnga, b loba kud-​zɩsd a naas sẽn loe ne sɛn dãmb koomã pʋgẽ tɩ tʋg n sud tẽnga. Vẽkembeoogã, b yãa mogrã rʋʋnd tɩ b mak n na n ta be.

La b sẽn wa n kolgd rʋʋndã, batayo wã rʋʋ kunkubr n ka ye tõe n loog ye. Mogrã koom pem-⁠a lame t’a sɩng sãango. Sodaas naab ning sẽn da get-⁠a bi-​beesã yellã yeelame yaa: ‘Bɩ neb nins sẽn mi rugbã reng n kẽ koomẽ wã n dug n ta tẽngã, tɩ neb a taabã sẽn kellã gãd koglgã ra-​pegdã n paam n dug n yi.’ B sɩd maana woto tɩ neb kobs-⁠yi la pis-​yopoe la a yoob nins sẽn da be batayo wã pʋgẽ wã fãa põse. Sɩd yɩɩ wa malɛkã sẽn da yeelã.

B sẽn sig tẽng ningã yʋʋr la Malte. Beenẽ nebã yaa nin-​sõma. B gesa neb nins sẽn da be batayo wã pʋgẽ wã yell neere. Sebgã sẽn wa n yõkã, b kẽesa a Poll batayo a to pʋgẽ t’a na n kẽng Rom.