GES-⁠Y batayo wã sẽn bõrd koomã pʋgẽ! Yãmb nee nebã sẽn be koomẽ wã bɩ? Kẽer zoe n paam n yiime. A Poll me paam n yiime. Yãmb ne-⁠a-⁠la fotã zug bɩ? Bɩ d ges bũmb ning sẽn maane.

Tẽeg-⁠y tɩ b ra kẽesa a Poll bãens yʋʋm a yiib Sezaare. La rẽ poore, b kɩtame tɩ yẽ ne bi-​bees a wãn kẽ batayo n na n kẽng Rom. B sẽn wa n yõsgd Kɛrɛtã, seb-​kẽeng n yiki. Sebgã ra fugda wʋsg hal tɩ rapã pa tõe n wẽn batayo wã meng ye. Wĩndgã ra pukdame n tãag a kõom tɩ b pa tol n yã-a ye. Yʋng me b ra pa tõe n yã ãdsã ye. Sẽn kaoos rasem wʋsgã yĩnga, neb nins sẽn da be batayo wã pʋgẽ wã wa n tẽedame tɩ b fãa na n kiime.

La a Poll yikame n yeel yaa: ‘Yãmb ned ba a yembr ka na n ki ye, yaa batayo wã bal n na n sãame, bala Wẽnnaam malɛk n wa mam nengẽ yʋngã n yeel maam yaa: “Polle, ra zoe rabeem ye, yaa tɩlae tɩ fo ta Rom naab a Sezaar nengẽ. La gese, Wẽnnaam na n fãaga foo ne neb nins fãa sẽn be batayo wã pʋgẽ wã.” ’

Sebgã sẽn sɩngã taa rasem 14 masã. Rasem piig la a naas raarã yʋn-​sʋka, batayo wã rãmb yãame tɩ koomã boogdame. Zĩigã sẽn da yaa lik tɩ b yɛɛsd tɩ batayo wã na n tɩ fãoo pĩigã yĩnga, b loba kud-​zɩsd a naas sẽn loe ne sɛn dãmb koomã pʋgẽ tɩ tʋg n sud tẽnga. Vẽkembeoogã, b yãa mogrã rʋʋnd tɩ b mak n na n ta be.

La b sẽn wa n kolgd rʋʋndã, batayo wã rʋʋ kunkubr n ka ye tõe n loog ye. Mogrã koom pem-⁠a lame t’a sɩng sãango. Sodaas naab ning sẽn da get-⁠a bi-​beesã yellã yeelame yaa: ‘Bɩ neb nins sẽn mi rugbã reng n kẽ koomẽ wã n dug n ta tẽngã, tɩ neb a taabã sẽn kellã gãd koglgã ra-​pegdã n paam n dug n yi.’ B sɩd maana woto tɩ neb kobs-⁠yi la pis-​yopoe la a yoob nins sẽn da be batayo wã pʋgẽ wã fãa põse. Sɩd yɩɩ wa malɛkã sẽn da yeelã.

B sẽn sig tẽng ningã yʋʋr la Malte. Beenẽ nebã yaa nin-​sõma. B gesa neb nins sẽn da be batayo wã pʋgẽ wã yell neere. Sebgã sẽn wa n yõkã, b kẽesa a Poll batayo a to pʋgẽ t’a na n kẽng Rom.

RAO ning nus sẽn sẽb ne bãensã yaa a Polle. B yõk-⁠a lame n pag Rom la b kɩt tɩ sodaag gũud-⁠a. A Poll gũudame tɩ Rom naab a Sezaar wa bʋ-⁠a. Baa ne b sẽn pag-⁠a wã, b sakdame tɩ neb wat n get-⁠a.

A Poll sẽn ta Rom tɩ rasem a tãab poore, a tʋmame tɩ b tɩ bool Zʋɩf rãmbã taoor dãmb tɩ b wa yẽ nengẽ. Rom Zʋɩf rãmb wʋsg sɩd waame t’a Poll gom a Zezi yelle, la Wẽnnaam rĩungã yell ne-⁠ba. Kẽer tẽeme n lebg kiris-​neba, la kẽer pa tẽ ye.

A Poll moona sodaas nins sẽn da gũud-⁠b yẽ wã me. A Poll sẽn zĩnd roogẽ yʋʋm a yiibã fãa, a moona neb nins fãa sẽn wa n ges-⁠a be wã. Rẽ kɩtame tɩ baa a Sezaar zakã rãmb wʋm Wẽnnaam rĩungã koe-​noogo, tɩ kẽer meng lebg kiris-​neba.

La yaa ãnd la sẽn zĩ n gʋlsdẽ wã? Yaa a Tɩmote. B ra kẽesa yẽ me bãens roogẽ koe-​moonegã yĩnga, la masã b yiis-⁠a lame t’a wa n na n sõng a Polle. Yãmb mii a Tɩmote sẽn gʋlsd bũmb ningã bɩ?

Yãmb ket n tẽra Filip ne Efɛɛz tẽnsã yell bɩ? Yaa kibar 110 soabã pʋgẽ la d gom b yelle. A Poll sõngame n lugl tigims tẽn-​kãensã pʋsẽ. La a sẽn be bãens masã wã, a gʋlsda kiris-​neb nins sẽn be beenẽ wã. Lɛta nins a sẽn gʋlsã bee Biiblã pʋgẽ. Yaa Efɛɛz rãmb sebrã la Filip rãmb sebrã. Dẽnd fotã zugã, a Poll togsda a Tɩmote a sẽn segd n gʋls bũmb ning n tool b zo-​rãmb nins sẽn yaa kiris-​neb n be Filipã.

Filip kiris-​nebã maana a Poll neer wʋsgo. B toola a Poll kũun hal bãensã roogẽ, t’a Poll gʋlsd n na n pʋʋs-⁠b barka. Yaa a Epafordit n tall kũunã n kẽnge. La a sẽn wa n ta be wã, a bẽeme hal n da na n ki. La a yĩnsã sãoome masã t’a na n leb Filipi. A na n zãa lɛtr ning a Poll sẽn kɩt t’a Tɩmote gʋlsã n tɩ kõ Filip kiris-​nebã.

A Poll zĩnda bãensã roogẽ n gʋls lɛta a yiib n paase. Lɛtr a ye yɩɩ Kolos kiris-​nebã yĩnga. Yãmb mii b sẽn boond seb-​kãngã to-⁠to Biiblã pʋgẽ bɩ? B boondame tɩ Kolos rãmb sebre. A gʋlsa lɛtr a to wã n tool a zoa a Filemo me sẽn da be Kolosã. Lɛtrã pʋgẽ, a gomda a Filemo yamb a Onezim yelle.

A Onezim soos n yiime n zoe n kẽng Rom. A zĩnda Rom n wʋm t’a Poll bee bãens roogẽ be. A sẽn wʋm dẽ wã, a kẽnga a Poll nengẽ t’a moon-⁠a koɛɛgã. Rẽ poor bilfu, a Onezim lebga kiris-​neda. A sẽn zoe n bas a zu-​soabã sãamda a sũurã masã. La yãmb mii a Poll sẽn gʋls a Filemo n yeel bũmb ning bɩ?

A Poll gʋlsame n bõos a Filemo t’a kõ a Onezim sugri. A yeel-⁠a-⁠la woto: ‘Mam tʋmda a Onezim fo nengẽ. Da reeg-⁠a wa f yamb bal ye. Reeg-⁠a wa f ba-⁠bi-​nongr me.’ A Onezim sẽn wa n na n leb Kolosã, a zãa lɛtr ning a Poll sẽn gʋls Kolos kiris-​nebã, la lɛtr ning a sẽn gʋls a Filemo wã me n kẽnge. A Filemo sẽn bãng t’a yambã lebga kiris-​nedã, a sũurã yɩɩ noog wʋsgo.

A Poll sẽn gʋls Filip nebã la a Filemo wã, a togs-⁠b-⁠la kiba-​noodo. A yeela Filip nebã yaa: ‘Mam na n tʋma a Tɩmote t’a wa yãmb nengẽ, la mam meng na n wa ges-⁠y-⁠la ka la bilfu.’ A yeela a Filemo me yaa: ‘Segl gãag zĩig fo zakẽ wã mam yĩnga.’

B sẽn wa n yiis a Poll bãensã, a gilga tẽns wʋsg n ges a tẽed-⁠n-​taasã. La b le wa n yõk-⁠a lame n kẽes roog Rom yɛsa. A bãngame tɩ so-​kãngã a na n kiime. Rẽ n so t’a gʋls n yeel a Tɩmote t’a wa tao-​tao. A lɛtrã pʋgẽ, a yeela woto: ‘Mam tũu Wẽnnaam sõma, la a na n kõo maam keoore.’ B sẽn kʋ a Pollã yʋʋm a wãn poore, sodaas n leb n wa sãam Zerizalɛm tẽngã, la so-​kãngã yaa Rom sodaase.

La kibay a taab me n be Biiblã pʋgẽ. A Zeova kɩtame tɩ tʋm-​tʋmd a Zã gʋls Biiblã sɛb kẽer tɩ Wilgr sebrã be sʋka. Wilgr sebrã gomda bũmb nins sẽn na n wa maan ka la bilfã yelle. Bɩ d gom rẽ yell masã.