Biiblã gomda bũmb nins sẽn maan pĩndã yelle, la pa rẽ bal ye. A gomda bũmb nins sẽn na n wa maan ka la bilfã me yelle. Ninsaal baa a ye pa tõe n togs rẽ ye. Rẽ n kɩt tɩ d miẽ tɩ Biiblã yita Wẽnnaam nengẽ. La Biiblã yetame tɩ bõe n na n maan ka la bilfu?

A gomda Wẽnnaam zab-​kãseng yelle. Zab-​kãngã pʋgẽ, Wẽnnaam na n kɩtame tɩ wẽnemã fãa la nin-​wẽnsã me menem zãnga, la a fãag neb nins sẽn sakd n maand a raabã. A Zezi Kirist sẽn yaa rĩm ning Wẽnnaam sẽn yãkã na n kɩtame tɩ neb nins sẽn sakd n maand Wẽnnaam daabã tõog n vɩɩmd ne laafɩ la sũ-noogo, la a kɩt tɩ b baa a ye ra le bẽ bɩ n ki ye.

Wẽnnaam na n kɩtame tɩ tẽngã lebg arzãna. Yãmb sũurã pa noom sɩda? La tõnd sã n dat n vɩɩmd arzãnã pʋgẽ, bõe la d segd n maane? Sebrã baasgẽ, d na n yãa d sẽn segd n maan bũmb ning n tõog n paam bõn-​sõma nins Wẽnnaam sẽn na n kõ neb nins sẽn maand a raabã. Bɩ y karem babg a nii wã tɩ y na bãng bũmb nins sẽn na n maan ka la bilfã sõma.

YÃMB nee bõe fotã zugu? Yaa wed-⁠mo-​peels sẽn zoete. Ges-⁠y b sẽn yit zĩig ningã. B yii saasẽ n zoet sawatã zug n sigda. La rẽ yĩnga wed-​moos sɩd-​sɩd bee saasẽ bɩ?

Ayo, yãmb sẽn ne wã pa wiid sɩd-​sɩd ye. Bala wed-​moos pa tõe n zoe sawatã zug ye. La Biiblã yaool n gomda wed-​moos sẽn be saasẽ yelle. Bõe yĩnga?

Pĩnd wẽndẽ wã, b ra nong n zombda wed-​moos n kẽnd zaba. Dẽnd Biiblã sã n yetẽ tɩ neb n zao wed-​moos saasẽ n sigda, yaa sẽn na n wilg tɩ Wẽnnaam na n zaba ne ninsaalbã sẽn be tẽng zugã. Yãmb mii b sẽn boond zab-​kãngã to-⁠to bɩ? B boond-⁠a lame tɩ Armagedõ. Wẽnnaam na n zaba zab-​kãngã ne nebã n kɩt tɩ wẽnemã fãa sa tẽngã zugu.

Yaa a Zezi n na n lʋɩ taoor n zab Armagedõ zabrã. Tẽeg-⁠y tɩ yaa a Zezi la a Zeova yãk t’a na n yɩ a goosneemã naaba. Yaa rẽ yĩng la a Zezi sẽn fõgen naam puglã. A sẽn zãad sʋʋgã wilgdame t’a na n kʋʋ Wẽnnaam bɛɛbã fãa. Wẽnnaam sẽn na n kʋ nin-​wẽnsã segd n linga tõnd bɩ?

Lebg-⁠y n ges-⁠y kibar 10 zĩigẽ. Bõe la yãmb ne fotã zugu? Yaa sa-​kãsengã sẽn kʋ nin-​wẽnsã. Yaa ãnd n kɩt tɩ sa-kãsengã ni? Yaa a Zeova. Masã, bɩ y lak kibar 15 wã zĩigẽ. Yaa bõe la yãmb ne be? Yaa a Zeova sẽn kɩt tɩ bugum ni n sãam Sodom ne Gomoorã.

Lak-⁠y kibar 33 wã zĩigẽ me n gese. Ges-⁠y bũmb ning sẽn paam Ezipt nebã wed-​moosã la b wed-​rʋʋdbã. Yaa ãnd n kɩt tɩ koomã rɩ-​ba? Yaa a Zeova. A maana woto n na n fãag a nin-​buiidã. Ges-⁠y kibar 36 ne 76 masã. Beenẽ, y na n yãame tɩ Israɛll nebã tʋʋm-​wẽnsã yĩnga, a Zeova sɩbg-⁠b lame, baa ne b sẽn yaa a nin-​buiidã menga.

Dẽnd a Zeova sẽn na n kɩt t’a saasẽ tãb-​biisã wa menes nin-​wẽnsã la wẽng buud fãa tẽngã zugã pa segd n ling tõnd ye. La bõe n na n maan rẽ poore? Bɩ y ges sẽn pʋgdã tɩ y na bãnge.