GES-⁠Y tãensã! Ges-⁠y tɩ-​bɛdã sẽn ning puudu. Zĩigã pa neer sɩda? Ges-⁠y yĩisrã sẽn lelemd biigã nugã, la bõn-​yẽesã ne wed-​moosã. Rẽ yĩnga yãmb pa rat n vɩɩmd zĩ-kãngã buud pʋgẽ sɩda?

Arzãnã na n yɩɩ woto buudu. Wẽnnaam datame tɩ tõnd vɩɩmd arzãna pʋgẽ wakat fãa. A pa rat tɩ tõnd le nams wa nebã sẽn namsd to-⁠to rũndã-rũndã wã ye. Biiblã yeela woto: ‘Wẽnnaam na n zĩnda ne bãmba. Kũum ka na n le zĩnd ye, la sũ-sãoong bɩ yãbr walla toog kõn le zĩnd yɛs ye. Dẽenem bũmb fãa loogame.’ Yaa woto la Wẽnnaam pʋlem neb nins sẽn na n vɩɩmd arzãnã pʋgẽ wã.

Yaa a Zezi n na n maan woto fãa. Yãmb mii sẽn na n yɩ wakat ning bɩ? Yaa a sã n wa kɩt tɩ wẽnemã fãa sa la a kɩt tɩ nin-​wẽnsã me menem poore. Tẽeg-⁠y t’a Zezi sẽn wa n be tẽngã zugã, a sãoogã bãas buud toor-​toore, la a vʋʋg kũum menga. A Zezi maana woto n na n wilg a sẽn na n wa maan bũmb ning tẽngã gill zugu, a sã n wa lebg Wẽnnaam rĩungã rĩma.

Yãmb we n tags n ges vɩɩmã sẽn na n yɩ noog to-⁠to arzãnã pʋgẽ! A Zezi ne neb nins a sẽn yãkã na n dɩɩ naam saasẽ. B na n gesa nebã fãa yelle, la b kɩt tɩ b paam sũ-noogo. Masã, bɩ d ges d sẽn segd n maan bũmb ning n ta Wẽnnaam yam, n wa paam n vɩɩmd arzãnã pʋgẽ wakat fãa yĩnga.

YÃMB mii bi-​pugl kɩdgã ne a zo-​rãmbã sẽn karemd sebr ningã bɩ? Yaa sebr ning yãmb sẽn zãadã buudu. Leb n yaa kibar ning yãmb sẽn karemdã la bãmb me karemda.

Yãmb mii kibarã sẽn wilgd bũmb ning bɩ? Pipi, tɩ d sã n dat n vɩɩmd wakat sẽn pa sate, d segd n bãnga a Zeova ne a biig a Zezi. Biiblã yetame yaa: ‘Vɩɩm sẽn pa satã la woto: Yaa y sẽn na n bao n bãng sɩd Wẽnnaam sẽn ka to wã, la a biig a Zezi Kirist a sẽn tʋm tẽng zugã.’

Bõe la d tõe n maan n bãng Wẽnnaam a Zeova la a biig a Zezi? Bũmb a yembr d sẽn tõe n maan yaa d sẽn na n karem Biiblã kibay sebrã fãa. A gomda a Zeova ne a Zezi yell wʋsgo, n wilgd b sẽn zoe n maan bũmb ninsã, la b sẽn na n maan bũmb ning ka la bilfã me. La d pa segd n karem seb-​kãngã bal ye.

Yãmb nee sebr ning sẽn dɩgã bɩ? Yaa Biiblã. Kɩt-⁠y tɩ ned rɩk Biibl n karem kibay nins sẽn be sebr ning yãmb sẽn zãadã pʋgẽ wã tɩ y kelge. Biiblã wilgda tõnd sẽn segd n maan bũmb nins fãa n tõog n ta a Zeova yam la d paam vɩɩm sẽn pa satã. Rẽ n kɩt tɩ d segd n karemd Biiblã wakat fãa.

La d pa segd n bãng Wẽnnaam a Zeova ne a Zezi Kirist bal ye. Bõe yĩnga? Bala tõnd tõeeme n mi-⁠b sõmã n yaool n ka paam vɩɩm sẽn pa satã ye. D segd n maana bũmb n paase. Yãmb mii d sẽn segd n maan bũmb ning n paasã bɩ?

D segd n tũu tõnd sẽn zãmsd bũmb ninsã fãa. Yãmb ket n tẽra a Zida Iskariot yell bɩ? A ra bee a Zezi tʋm-​tʋmdb 12 wã sʋka. A Zida ra mii a Zeova ne a Zezi sõma. La a maana bõe? A lebga nin-​wẽnga, n zãmb a Zezi n kõ a bɛɛbã n deeg wanzuri ligd pis-​tã. Dẽnd a Zida ka na n paam vɩɩm sẽn pa satã ye.

La a Gehazi yẽ? Tõnd zoe n goma a yell kibar 69 wã pʋgẽ. A da rata fut la ligd a sẽn pa so ye. Rẽ kɩtame t’a yag ziri n paam rẽ. La a Zeova sɩbg-⁠a lame. Tõnd me sã n pa sak a Zeova noyã, a na n sɩbga tõndo.

La nin-​sõma wʋsg me n maan a Zeova raabã b vɩɩmã tõre. D segd n yɩɩ wa bãmba. Wala makre, biig a Sãmwɛll yɩɩ mak-​sõngo. Kibar 55 wã pʋgẽ, d yãame t’a sẽn wa n sɩng n na n tʋmd a Zeova roogẽ wã t’a tara yʋʋm a naas bɩ a nu bala. Wilgdame tɩ baa tõnd sã n yaa bilfu, d tõe n maana a Zeova raabã.

La tõnd sẽn dat n dɩk ned ning togs-⁠n-​taar n yɩɩdã yaa a Zezi Kirist. Kibar 87 wã pʋgẽ, d yãame tɩ baa a sẽn da yaa biigã, a ra bee wẽnd-​doogẽ wã n gomd a saasẽ ba wã yell ne nebã. Tõnd me segd n maana wa yẽ. D maan d sẽn tõe fãa n gom Wẽnnaam a Zeova ne a biig a Zezi Kirist yell tɩ neb wʋsg wʋme. Tõnd sã n maan woto fãa, d na n wa paam n vɩɩmdã tẽng zug arzãnã pʋgẽ wakat sẽn pa sate.