Eżodu

18 Issa Ġetro, il-​qassis taʼ Midjan, il-​kunjatu taʼ Mosè,+ semaʼ b’kulma Alla kien għamel għal Mosè u għall-​poplu tiegħu Israel, kif Ġeħova kien ħareġ lil Israel mill-​Eġittu.+ 2 Għalhekk, Ġetro, il-​kunjatu taʼ Mosè, ħa lil Sefora, mart Mosè, wara li dan kien bagħatha lura d-​dar, 3 u liż-​żewġ uliedha,+ li wieħed minnhom Mosè semmieh Gersom,*+ “għaliex,” kif qal hu, “sirt resident barrani f’art barranija”; 4 u l-​ieħor semmieh Eligħeżer,*+ “għaliex,” kif qal hu, “l-​Alla taʼ missieri hu l-​għajnuna tiegħi billi ħelisni mis-​sejf tal-​Fargħun.”+

5 Għalhekk, Ġetro, il-​kunjatu taʼ Mosè, u wliedu u martu ġew għand Mosè fix-​xagħri fejn kien qed jikkampja, ħdejn il-​muntanja taʼ l-​Alla l-​veru.+ 6 Imbagħad bagħat jgħid lil Mosè: “Jien, Ġetro, il-​kunjatu tiegħek,+ ġejt għandek, kif ukoll martek u ż-​żewġ uliedha magħha.” 7 Mosè minnufih ħareġ jiltaqaʼ mal-​kunjatu tiegħu, u nxteħet fl-​art quddiemu u biesu;+ u kull wieħed staqsa lill-​ieħor kif kien sejjer. Imbagħad daħlu fit-​tinda.

8 U Mosè rrakkonta lill-​kunjatu tiegħu kulma Ġeħova kien għamel lill-​Fargħun u lill-​Eġittu minħabba Israel,+ u t-​tbatija kollha li batew fit-​triq,+ u madankollu Ġeħova ħelishom.+ 9 Imbagħad Ġetro ħassu kuntent minħabba l-​ġid kollu li Ġeħova kien għamel għal Israel billi kien ħelishom minn id l-​Eġittu.+ 10 Għaldaqstant, Ġetro qal: “Ikun imbierek Ġeħova, li ħeliskom minn id l-​Eġittu u minn id il-​Fargħun, u li ħeles lill-​poplu minn taħt idejn l-​Eġittu.+ 11 Issa naf li Ġeħova hu akbar mill-​allat l-​oħrajn kollha.+ Dan intwera meta l-​Eġizzjani aġixxew bil-​prużunzjoni kontra Israel.” 12 Imbagħad Ġetro, il-​kunjatu taʼ Mosè, ħa offerta tal-​ħruq u sagrifiċċji għal Alla;+ u Aron u x-​xjuħ kollha taʼ Israel ġew jieklu l-​ħobż mal-​kunjatu taʼ Mosè, quddiem l-​Alla l-​veru.+

13 U ġara li l-​għada Mosè qagħad bil-​qiegħda bħas-​soltu biex jaqdi bħala mħallef għan-​nies,+ u n-​nies baqgħu quddiem Mosè minn fil-​għodu sa fil-​għaxija. 14 U l-​kunjatu taʼ Mosè ra kulma kien qed jagħmel għan-​nies. Għalhekk, qallu: “X’inhu dan li qed tagħmel għan-​nies? Għala tibqaʼ waħdek bil-​qiegħda u n-​nies kollha jibqgħu quddiemek minn fil-​għodu sa fil-​għaxija?” 15 Imbagħad Mosè qal lill-​kunjatu tiegħu: “Għax in-​nies jibqgħu ġejjin għandi biex jistaqsu x’jgħid Alla.+ 16 Jekk jinqalgħalhom xi każ,+ irid jiġi għandi u jien irrid niġġudika bejn parti u oħra, u rrid ngħarraf id-​deċiżjonijiet taʼ l-​Alla l-​veru u l-​liġijiet tiegħu.”+

17 U l-​kunjatu taʼ Mosè qallu: “Mhux tajjeb kif qed tagħmel. 18 Żgur li se tegħja, kemm int u kemm dan il-​poplu li qiegħed miegħek, għax dan li qed tagħmel hu tagħbija kbira wisq għalik.+ Ma tistax tagħmlu waħdek.+ 19 Issa ismaʼ minn kliemi.+ Jien se nagħtik parir, u Alla se jkun miegħek.+ Int innifsek aqdi bħala r-​rappreżentant għan-​nies quddiem l-​Alla l-​veru,+ u int innifsek trid iġġib il-​każi għand l-​Alla l-​veru.+ 20 U wissihom dwar x’inhuma r-​regolamenti u l-​liġijiet,+ u għarrafhom it-​triq li għandhom jimxu fiha u x-​xogħol li għandhom jagħmlu.+ 21 Imma int għandek tagħżel minn fost in-​nies kollha rġiel kapaċi,+ li jibżgħu minn Alla,+ irġiel taʼ min jafdahom,+ jobogħdu l-​qligħ inġust;+ u qegħedhom fuqhom bħala kapijiet fuq l-​eluf,+ kapijiet fuq il-​mijiet, kapijiet fuq il-​ħamsinijiet, u kapijiet fuq l-​għaxriet.+ 22 U dawn iridu jiġġudikaw lin-​nies f’kull okkażjoni xierqa; u jrid jiġri li kull każ kbir iġibuh għandek,+ imma kull każ żgħir jieħdu ħsiebu huma bħala mħallfin. Għalhekk, agħmilha eħfef għalik, u huma jridu jġorru t-​tagħbija miegħek.+ 23 Jekk tagħmel dan—u Alla jkun ikkmandak—tkun tistaʼ żżomm sħiħ u, barra minn hekk, dan il-​poplu kollu jasal f’postu bis-​sliem.”+

24 Mosè minnufih semaʼ minn kliem il-​kunjatu tiegħu u għamel kulma kien qallu.+ 25 U Mosè għażel irġiel kapaċi minn Israel kollu u ħatarhom bħala kapijiet fuq in-​nies,+ bħala kapijiet taʼ l-​eluf, kapijiet tal-​mijiet, kapijiet tal-​ħamsinijiet, u kapijiet taʼ l-​għaxriet. 26 U dawn iġġudikaw lin-​nies f’kull okkażjoni xierqa. Każ iebes kienu jġibuh għand Mosè,+ imma kull każ żgħir kienu jieħdu ħsiebu huma nfushom bħala mħallfin. 27 Imbagħad Mosè sellem lill-​kunjatu tiegħu,+ u dan telaq fi triqtu lejn pajjiżu.