Ġenesi

31 Maż-żmien, hu semaʼ lil ulied Laban jitkellmu u jgħidu: “Ġakobb ħa kulma kellu missierna; u minn dak li kellu missierna hu ġemaʼ dan il-​ġid kollu.”+ 2 Meta Ġakobb kien iħares lejn wiċċ Laban, ara, ma kienx għadu l-​istess miegħu bħal qabel.+ 3 Fl-aħħar, Ġeħova qal lil Ġakobb: “Erġaʼ lura lejn art missirijietek u lejn qrabatek,+ u jien inkun miegħek.”+ 4 Imbagħad Ġakobb bagħat isejjaħ lil Rakele u lil Lea biex jiġu l-​għalqa, ħdejn il-​merħla tiegħu, 5 u qalilhom:

“Qed nara li wiċċ missierkom m’għadux l-​istess miegħi bħal qabel;+ imma l-​Alla taʼ missieri wera li hu miegħi.+ 6 U intom tafu li lil missierkom qdejtu b’ħilti kollha.+ 7 U missierkom qarraq bija u biddilli ħlasi għaxar darbiet, imma Alla ma ħalliehx jagħmilli ħsara.+ 8 Jekk minn banda kien jgħidli, ‘L-​imnaqqxin ikunu ħlasek,’ il-​merħla kollha kien ikollha frieħ imnaqqxin; imma jekk mill-​banda l-​oħra kien jgħidli, ‘Dawk bl-​istrixxi jkunu ħlasek,’ il-​merħla kollha kien ikollha frieħ bl-​istrixxi.+ 9 Għalhekk, Alla kien jieħu l-​merħla taʼ missierkom u jagħtiha lili.+ 10 Sa fl-​aħħar ġara li, fi żmien meta l-​merħla saħnet, erfajt għajnejja u rajt dehra f’ħolma,+ u, ara, il-​bdabad li kienu qed jitilgħu fuq il-​merħla kienu bl-​istrixxi, imnaqqxin, u ttikkjati.+ 11 U l-​anġlu taʼ l-​Alla l-​veru qalli fil-​ħolma, ‘Ġakobb!’ u jien wiġibtu, ‘Hawn jien.’+ 12 U hu kompla, ‘Jekk jogħġbok, erfaʼ għajnejk u ara li l-​bdabad li qed jitilgħu fuq il-​merħla huma bl-​istrixxi, imnaqqxin, u ttikkjati, għax jien rajt kulma qed jagħmillek Laban.+ 13 Jien l-​Alla l-​veru taʼ Betel,+ fejn int dlikt kolonna+ u fejn ħliftli ħalfa.+ Issa qum, oħroġ minn din l-​art u erġaʼ lura lejn art twelidek.’”+

14 U Rakele u Lea wiġbuh u qalulu: “Għad baqgħalna xi sehem mill-​wirt f’dar missierna?+ 15 M’aħniex qisna barranin għalih ladarba biegħna, u qed ikompli kontinwament jiekol saħansitra mill-​flus mogħtijin għalina?+ 16 Għax ir-​rikkezzi kollha li Alla ħa mingħand missierna huma tagħna u taʼ wliedna.+ Għalhekk, issa agħmel kulma qallek Alla.”+

17 Imbagħad Ġakobb qam u tellaʼ lil uliedu u lin-​nisa tiegħu fuq l-​iġmla;+ 18 u beda jsuq il-​merħla kollha tiegħu u l-​ġid kollu li kien ġemaʼ,+ il-​merħla li kien kiseb u li kien ġemaʼ fil-​Fiddien-aram, sabiex imur għand missieru Iżakk lejn l-​art taʼ Kangħan.+

19 Issa Laban kien mar iġiżż in-​nagħaġ tiegħu. Sadanittant, Rakele serqet it-​terafim*+ li kienu taʼ missierha. 20 U Ġakobb qarraq b’Laban is-​Sirjan, għax ma kienx qallu li kien se jaħrab. 21 U ħarab, hu u kulma kellu, u qam u qasam ix-​Xmara.*+ Imbagħad dawwar wiċċu lejn ir-​reġjun muntanjuż taʼ Gilegħad.+ 22 Iktar tard, fit-​tielet jum, lil Laban qalulu li Ġakobb kien ħarab. 23 U ħa miegħu lill-​irġiel tiegħu u mar jiġri+ warajh distanza taʼ sebat ijiem mixi u laħqu fir-​reġjun muntanjuż taʼ Gilegħad. 24 U Alla ġie għand Laban is-​Sirjan+ f’ħolma bil-​lejl+ u qallu: “Oqgħod attent li ma tkellimx lil Ġakobb, la tajjeb u lanqas ħażin.”+

25 Għalhekk, Laban mar ħdejn Ġakobb, għax Ġakobb kien waqqaf it-​tinda tiegħu fuq il-​muntanja u Laban kien ikkampja maʼ l-​irġiel tiegħu fir-​reġjun muntanjuż taʼ Gilegħad. 26 Imbagħad Laban qal lil Ġakobb: “X’għamilt, li saħansitra wasalt biex tqarraq bija u ġarrejt lill-​bniet tiegħi bħal ilsiera meħudin bis-​sejf?+ 27 Għala kellek taħrab bil-​moħbi u tqarraq bija u ma tgħidlix, biex kont nibagħtek bil-​ferħ u bl-​għanjiet,+ bit-​tanburlin u bl-​arpa?+ 28 U ma tajtnix ċans inbus it-​tfal u l-​bniet tiegħi.+ Issa int aġixxejt taʼ iblah. 29 Għandi s-​setgħa f’idi li nagħmlilkom il-​ħsara,+ imma l-​Alla taʼ missierkom il-​lejl l-​ieħor kellimni u qalli, ‘Oqgħod attent li ma tkellimx lil Ġakobb, la tajjeb u lanqas ħażin.’+ 30 U issa li fil-​fatt tlaqt minħabba li tant kont imxennaq għal dar missierek, għala, iżda, sraqt l-​allat tiegħi?”+

31 Ġakobb wieġeb u qal lil Laban: “Kien għaliex bżajt.+ Għax għedt bejni u bejn ruħi, ‘Int se tiħodli bil-​forza l-​bniet tiegħek.’ 32 Għand min issib allatek, ma jibqax ħaj.+ Quddiem l-​irġiel tagħna, ara għalik innifsek x’għandi li hu tiegħek u ħudu għalik.”+ Imma Ġakobb ma kienx jaf li Rakele kienet serqithom.+ 33 Għalhekk, Laban daħal fit-​tinda taʼ Ġakobb u fit-​tinda taʼ Lea u fit-​tinda taż-​żewġ ilsiera nisa,+ imma ma sabhomx. Fl-​aħħar, hu ħareġ mit-​tinda taʼ Lea u daħal fit-​tinda taʼ Rakele. 34 Issa Rakele kienet ħadet it-​terafim, u poġġiethom fil-​basket tas-​sarġ li n-​nisa jużaw fuq il-​ġemel, u baqgħet bil-​qiegħda fuqhom. Għalhekk, Laban fittex fit-​tinda kollha, imma ma sabhomx. 35 Imbagħad qalet lil missierha: “Ħa ma tixgħelx ir-​rabja f’għajnejn sidi,+ għaliex ma nistax inqum quddiemek, għax għandi dak li s-​soltu jkollhom in-​nisa.”+ Għalhekk, kompla jfittex bir-​reqqa, imma t-​terafim ma sabhomx.+

36 U Ġakobb irrabja+ u beda jitlewwem maʼ Laban, u Ġakobb issokta jgħid lil Laban: “Għala ġrejt warajja+ qisni wieħed li wettaq xi delitt?+ Xi dnub għamilt? 37 Issa li fittixt f’ġidi kollu, x’sibt mill-​ġid kollu taʼ darek?+ Poġġih hawnhekk quddiem l-​irġiel tiegħi u l-​irġiel tiegħek,+ u ħa jiddeċiedu huma bejnietna.+ 38 Ili għoxrin sena miegħek. In-​nagħaġ u l-​mogħoż tiegħek ma kellhomx korrimenti fil-​ħlas,+ u qatt ma kilt mill-​imtaten tal-​merħla tiegħek. 39 Ma ġibtlek ebda annimal imbiċċer.+ Jien innifsi kont nagħmel tajjeb għalih. Sew jekk wieħed minnhom kien jinsteraq bi nhar u sew jekk kien jinsteraq bil-​lejl, kont titlob kont tiegħu minn idi.+ 40 Kemm-il darba bi nhar kienet tkiddni s-​sħana u bil-​lejl il-​kesħa, u n-​ngħas kien itir minn għajnejja.+ 41 Għoxrin sena ili f’darek. Qdejtek erbatax-il sena għaż-​żewġt ibniet tiegħek u sitt snin għall-​merħla tiegħek, u int biddiltli ħlasi għaxar darbiet.+ 42 Kieku l-​Alla taʼ missieri,+ l-​Alla t’Abraham u l-​Biżaʼ taʼ Iżakk,+ ma kienx miegħi, kont tibgħatni b’idi vojta. Alla ra l-​miżerja tiegħi u t-​taħbit taʼ idejja, u għalhekk widdbek il-​lejl l-​ieħor.”+

43 Imbagħad Laban wieġeb u qal lil Ġakobb: “Il-​bniet huma l-​bniet tiegħi u t-​tfal it-​tfal tiegħi u l-​merħla l-​merħla tiegħi, u kulma qed tħares lejh hu tiegħi u tal-​bniet tiegħi. X’nistaʼ nagħmel jien illum kontra dawn jew kontra wliedhom li huma wildu? 44 Issa, ejja, ħa nagħmlu patt,+ jien u int, u dan irid iservi bħala xiehda bejni u bejnek.”+ 45 Għaldaqstant, Ġakobb ħa ġebla u waqqafha bħala kolonna.+ 46 Imbagħad Ġakobb qal lill-​irġiel tiegħu: “Iġbru l-​ġebel!” U huma ġabru l-​ġebel u għamluh gozz.+ Imbagħad kielu hemmhekk fuq il-​gozz. 47 U Laban beda jsejjaħlu Ġegar-saħaduta,* imma Ġakobb sejjaħlu Galgħed.*

48 U Laban qal: “Illum dan il-​gozz hu xiehda bejni u bejnek.” Huwa għalhekk li sejjaħlu Galgħed,+ 49 u T-​Torri taʼ l-​Għassa, għax qal: “Ħa jibqaʼ għassa Ġeħova bejni u bejnek meta ma nkunux qed naraw lil xulxin.+ 50 Jekk taħqar lill-​bniet+ tiegħi u jekk tieħu nisa oħrajn minbarra l-​bniet tiegħi, ħadd ma jkun qed jarana. Ara! Alla jkun xhud bejni u bejnek.”+ 51 U Laban issokta jgħid lil Ġakobb: “Hawn dan il-​gozz u hawn il-​kolonna li waqqaft bejni u bejnek. 52 Dan il-​gozz hu xhud, u l-​kolonna hi xi ħaġa li tixhed,+ li jien m’iniex se ngħaddi lil hinn minn dan il-​gozz kontrik u li int mhux se tgħaddi lil hinn minn dan il-​gozz u minn din il-​kolonna kontrija għall-​ħsara.+ 53 Ħalli l-​alla* t’Abraham+ u l-​alla taʼ Naħor+ jiġġudikaw bejnietna, l-​alla taʼ missierhom.” Imma Ġakobb ħalef bil-​Biżaʼ taʼ missieru Iżakk.+

54 Imbagħad Ġakobb offra sagrifiċċju fuq il-​muntanja u stieden lill-​irġiel tiegħu biex jieklu l-​ħobż.+ Għaldaqstant, kielu l-​ħobż u għaddew il-​lejl fuq il-​muntanja. 55 U fil-​għodu Laban qam kmieni, bies+ lit-​tfal u lill-​bniet tiegħu, u berikhom.+ Imbagħad Laban telaq biex imur lura lejn postu.+