Eżodu

25 U Ġeħova kellem lil Mosè+ u qallu: 2 “Kellem lil ulied Israel, biex jiġbruli kontribuzzjoni: Mingħand kull raġel li qalbu tqanqlu għandkom tiġbruhieli l-​kontribuzzjoni.+ 3 U din hi l-​kontribuzzjoni li għandkom tiġbruli mingħandhom: deheb,+ fidda,+ ram aħmar,+ 4 ħajt blu, suf miżbugħ vjola ħamrani, materjal lewn l-​iskarlat,* għażel fin, xagħar tal-​mogħoż,+ 5 ġlud tal-​muntun miżbugħin ħomor, ġlud tal-​bumerin, u injam taʼ l-​akaċja;+ 6 żejt għad-​dawwala,+ żejt tal-​balzmu+ għaż-​żejt tad-​dlik+ u għall-​inċens ifuħ;+ 7 ħaġar taʼ l-​oniċi u ħaġar biex jiġi ingastat għal fuq l-​efod+ u l-​pettoral.*+ 8 U jagħmluli santwarju, biex ngħammar f’nofshom.+ 9 Skond kulma qed nurik bħala l-​mudell tat-​tabernaklu* u l-​mudell tat-​tagħmir kollu tiegħu, hekk għandkom tagħmluh.+

10 “U jagħmlu Arka mill-​injam taʼ l-​akaċja,+ żewġ kubiti u nofs it-​tul tagħha, kubitu u nofs il-​wisaʼ tagħha, u kubitu u nofs l-​għoli tagħha. 11 U tiksiha b’deheb pur.+ Trid tiksiha minn ġewwa u minn barra, u tagħmlilha bordura tad-​deheb dawramejt.+ 12 U tagħmlilha erbaʼ ħolqiet mid-​deheb imdewweb u tpoġġihom ’il fuq mill-​erbaʼ saqajn tagħha, b’żewġ ħolqiet fuq ġenb wieħed tagħha u żewġ ħolqiet fuq il-​ġenb l-​ieħor tagħha.+ 13 U tagħmel lasti mill-​injam taʼ l-​akaċja u tiksihom bid-​deheb.+ 14 U tgħaddi l-​lasti minn ġol-​ħoloq fuq il-​ġnub taʼ l-​Arka sabiex iġġorr l-​Arka bihom. 15 Il-lasti għandhom jibqgħu fil-​ħoloq taʼ l-​Arka. M’għandhomx jitneħħew minnha.+ 16 U fl-​Arka tqiegħed it-​testimonjanza li se nagħtik.+

17 “U tagħmel għatu tad-​deheb pur, żewġ kubiti u nofs it-​tul tiegħu u kubitu u nofs il-​wisaʼ tiegħu.+ 18 U tagħmel żewġ kerubini tad-​deheb. Għandek tagħmilhom maħdumin bil-​martell fuq iż-​żewġt itruf taʼ l-​għatu.+ 19 U agħmel kerubin wieħed f’tarf minnhom u l-​kerubin l-​ieħor fit-​tarf l-​ieħor.+ Fuq l-​għatu għandkom tagħmluhom il-​kerubini fiż-​żewġt itruf tiegħu. 20 U l-​kerubini jkunu biż-​żewġ ġwienaħ tagħhom miftuħin ’il fuq, jgħattu l-​għatu bi ġwinħajhom, b’wiċċhom lejn xulxin.+ Lejn l-​għatu għandhom iħarsu l-​uċuħ tal-​kerubini. 21 U tqiegħed l-​għatu+ fuq wiċċ l-​Arka, u fl-​Arka tqiegħed it-​testimonjanza li se nagħtik. 22 U nidhirlek hemmhekk u nitkellem miegħek minn fuq l-​għatu,+ minn bejn iż-​żewġ kerubini li qegħdin fuq l-​arka tat-​testimonjanza, iva, kulma se nikkmandak għal ulied Israel.+

23 “U tagħmel mejda+ mill-​injam taʼ l-​akaċja, żewġ kubiti t-​tul tagħha u kubitu l-​wisaʼ tagħha u kubitu u nofs l-​għoli tagħha. 24 U tiksiha b’deheb pur u tagħmlilha bordura tad-​deheb dawramejt.+ 25 U tagħmlilha xifer dawramejt il-​wisaʼ taʼ id, u tagħmel il-​bordura tad-​deheb għax-​xifer tagħha dawramejt.+ 26 U tagħmlilha erbaʼ ħolqiet tad-​deheb u tpoġġi l-​ħoloq fl-​erbaʼ kantunieri fejn hemm l-​erbaʼ saqajn.+ 27 Il-ħoloq għandhom ikunu qrib ix-​xifer bħala appoġġ għal-​lasti biex tinġarr il-​mejda.+ 28 U tagħmel il-​lasti mill-​injam taʼ l-​akaċja u tiksihom bid-​deheb, u jridu jġorru l-​mejda bihom.+

29 “U tagħmel il-​platti u l-​kwies tagħha, u l-​buqari u l-​iskutelli tagħha li bihom iferrgħu l-​offerti tal-​likwidi. Għandek tagħmilhom tad-​deheb pur.+ 30 U trid tpoġġi l-​ħobż tal-​preżenza fuq il-​mejda quddiemi l-​ħin kollu.+

31 “U tagħmel gandlier tad-​deheb pur. Il-​gandlier għandu jinħadem bil-​martell.+ Minnu għandhom joħorġu l-​bażi, il-​friegħi, il-​fjuri, il-​boċċi, u l-​petali tiegħu. 32 U sitt fergħat joħorġu mill-​ġnub tiegħu, tliet fergħat tal-​gandlier minn ġenb wieħed tiegħu u tliet fergħat tal-​gandlier mill-​ġenb l-​ieħor tiegħu.+ 33 Tliet kalċijiet forma taʼ fjura tal-​lewż qegħdin fuq il-​friegħi taʼ ġenb wieħed, bil-​boċċi u l-​petali bejniethom, u tliet fjuriet forma taʼ fjura tal-​lewż fuq il-​friegħi tal-​ġenb l-​ieħor, bil-​boċċi u l-​petali bejniethom.+ Hekk għandhom isiru s-​sitt fergħat li joħorġu mill-​gandlier. 34 U fuq il-​gandlier hemm erbaʼ fjuriet forma taʼ fjura tal-​lewż, bil-​boċċi u l-​petali tiegħu bejniethom.+ 35 U l-​boċċa taħt żewġ fergħat toħroġ minnu u l-​boċċa taħt iż-​żewġ fergħat l-​oħra toħroġ minnu u l-​boċċa taħt jerġaʼ żewġ fergħat oħra toħroġ minnu, għas-​sitt fergħat li joħorġu mill-​gandlier.+ 36 Il-boċċi tagħhom u l-​friegħi tagħhom għandhom joħorġu minnu. Kollox biċċa waħda maħdum bil-​martell, u tad-​deheb pur.+ 37 U tagħmillu sebaʼ msiebaħ; u l-​imsiebaħ iridu jkunu mixgħulin, u jdawlu l-​parti taʼ quddiemu.+ 38 U l-​imqassijiet li jżommu l-​ftila u r-​reċipjenti għall-​ftejjel maħruqin tiegħu huma tad-​deheb pur.+ 39 B’talent deheb pur għandu jagħmlu, b’dawn l-​għodod kollha tiegħu. 40 U qis li tagħmilhom skond il-​mudell tagħhom li ntwerielek fuq il-​muntanja.+