Ġożwè

24 U Ġożwè ġemaʼ lit-​tribujiet kollha taʼ Israel flimkien f’Sikem+ u sejjaħ lix-​xjuħ taʼ Israel+ u l-​kapijiet u l-​imħallfin u l-​uffiċjali tiegħu, u huma waqfu quddiem l-​Alla l-​veru.+ 2 U Ġożwè kompla jgħid lill-​poplu kollu: “Hekk qal Ġeħova l-​Alla taʼ Israel, ‘Żmien twil ilu missirijietkom+ kienu jgħammru fuq in-​naħa l-​oħra tax-​Xmara,*+ Teraħ missier Abraham u missier Naħor,+ u kienu jaqdu allat oħrajn.

3 “‘Maż-​żmien, ħadt lil missierkom Abraham+ min-​naħa l-​oħra tax-​Xmara+ u ġegħeltu jimxi maʼ l-​art kollha taʼ Kangħan u kattart lil nislu.+ Għalhekk, jien tajtu lil Iżakk.+ 4 Imbagħad lil Iżakk tajtu lil Ġakobb u lil Għesaw.+ Iktar tard lil Għesaw tajtu l-​Muntanja Segħir biex jiħodha f’idejh;+ u Ġakobb u wliedu niżlu l-​Eġittu.+ 5 Iktar tard bgħatt lil Mosè u lil Aron,+ u kkastigajt l-​Eġittu b’dak li għamilt f’nofsu;+ u mbagħad ħriġtkom.+ 6 Meta kont qed noħroġ lil missirijietkom mill-​Eġittu+ u wasaltu ħdejn il-​baħar, l-​Eġizzjani marru jiġru wara+ missirijietkom b’karrijiet tal-​gwerra u suldati tal-​kavallerija sal-​Baħar l-​Aħmar. 7 U huma bdew jgħajtu lil Ġeħova.+ Għalhekk, hu qiegħed dalma bejnkom u bejn l-​Eġizzjani+ u ġab il-​baħar fuqhom u għattiehom,+ u għajnejkom raw dak li għamilt fl-​Eġittu;+ u bdejtu tgħammru fix-​xagħri għal bosta jiem.+

8 “‘Maż-​żmien ġibtkom lejn l-​art taʼ l-​Amurrin li kienu jgħammru fuq in-​naħa l-​oħra tal-​Ġordan, u huma ġġildulkom.+ Għalhekk, jien tajthom f’idejkom biex tkunu tistgħu tiħdulhom arthom, u qridthom għalkollox minn quddiemkom.+ 9 Imbagħad Balak bin Siffur,+ is-​sultan taʼ Mowab, qam u mar jiġġieled kontra Israel.+ Għalhekk, bagħat isejjaħ lil Balgħam bin Begħor biex jisħitkom.+ 10 U jien ma ridtx nismaʼ lil Balgħam.+ Għaldaqstant, hu berikkom darba wara l-​oħra.+ B’hekk, ħlistkom minn idu.+

11 “‘Imbagħad qsamtu l-​Ġordan+ u ġejtu Ġeriko.+ U s-​sidien taʼ l-​art taʼ Ġeriko, l-​Amurrin u l-​Pereżin u l-​Kangħanin u l-​Ħittin u l-​Girgasin, il-​Ħiwwin u l-​Ġebusin bdew jiġġildulkom; imma jien tajthom f’idejkom.+ 12 Għaldaqstant, jien bgħatt l-​iskuraġġiment qabilkom, u dan bil-​mod il-​mod keċċiehom minn quddiemkom+—bħalma ġara liż-​żewġ slaten taʼ l-​Amurrin—mhux bis-​sejf tagħkom u mhux bil-​qaws tagħkom.+ 13 B’hekk, tajtkom art li ma kontux tħabattu għaliha u bliet li ma kontux bnejtu,+ u bdejtu tgħammru fihom. Għelieqi tad-​dwieli u msaġar taż-​żebbuġ li ma ħawwiltux qed tieklu.’+

14 “U issa ibżgħu minn Ġeħova+ u aqduh mingħajr nuqqas u bil-​verità,+ u neħħu l-​allat li missirijietkom qdew fuq in-​naħa l-​oħra tax-​Xmara u fl-​Eġittu,+ u aqdu lil Ġeħova. 15 Issa jekk hu ħażin f’għajnejkom li taqdu lil Ġeħova, agħżlu għalikom infuskom illum lil min se taqdu,+ jekk hux l-​allat li qdew missirijietkom li kienu fuq in-​naħa l-​oħra tax-​Xmara+ jew l-​allat taʼ l-​Amurrin li qed tgħammru f’arthom.+ Imma ngħid għalija u għan-​nies taʼ dari, aħna se naqdu lil Ġeħova.”+

16 Għal dan, il-​poplu wieġeb u qal: “Lanqas biss jgħaddilna minn moħħna, min-​naħa tagħna, li nitilqu lil Ġeħova sabiex naqdu allat oħrajn. 17 Għax kien Ġeħova Alla tagħna li ħareġ lilna u lil missirijietna mill-​art taʼ l-​Eġittu,+ mid-​dar taʼ l-​ilsiera,+ u li wettaq dawn is-​sinjali kbar quddiem għajnejna+ u li baqaʼ jħarisna tul it-​triq kollha li mxejna fiha u fost il-​popli kollha li għaddejna minn ġo nofshom.+ 18 U Ġeħova keċċa minn quddiemna lill-​popli kollha,+ lill-​Amurrin, li kienu qed jgħammru fl-​art. Ngħidu għalina, aħna wkoll se naqdu lil Ġeħova, għax hu Alla tagħna.”+

19 Imbagħad Ġożwè qal lill-​poplu: “Tassew li se tkunu tistgħu taqdu lil Ġeħova? Għax hu Alla qaddis;+ hu Alla li jesiġi devozzjoni esklużiva.+ Ma jaħfirx l-​irvellar tagħkom u dnubietkom.+ 20 Jekk titilqu lil Ġeħova+ u taqdu allat barranin,+ hu wkoll idur għalikom u jagħmlilkom il-​ħsara u jeqridkom għalkollox wara li jkun għamlilkom il-​ġid.”+

21 Għalhekk, il-​poplu qal lil Ġożwè: “Le, imma lil Ġeħova se naqdu!”+ 22 Imbagħad Ġożwè qal lill-​poplu: “Intom xhieda kontrikom stess+ li minn jeddkom għażiltu lil Ġeħova, biex taqduh.”+ Għal dan, huma qalu: “Aħna xhieda.”

23 “U issa neħħu l-​allat barranin li hemm f’nofskom,+ u mejlu qlubkom lejn Ġeħova l-​Alla taʼ Israel.” 24 Għal dan, il-​poplu qal lil Ġożwè: “Lil Ġeħova Alla tagħna se naqdu, u minn leħnu se nisimgħu!”+

25 U dakinhar Ġożwè għamel patt mal-​poplu u stabbilixxa għalihom regolament u deċiżjoni ġudizzjarja+ f’Sikem. 26 Imbagħad Ġożwè kiteb dan il-​kliem fil-​ktieb tal-​liġi t’Alla+ u ħa ġebla kbira+ u waqqafha hemmhekk taħt is-​siġra immensa+ li qiegħda ħdejn is-​santwarju taʼ Ġeħova.

27 U Ġożwè kompla jgħid lill-​poplu kollu: “Ara! Din il-​ġebla se sservi taʼ xiehda kontrina,+ għax din stess semgħet il-​kliem kollu li qalilna Ġeħova, u se sservi taʼ xiehda kontrikom, biex ma tiċħdux lil Alla tagħkom.” 28 Wara dan, Ġożwè bagħat lill-​poplu, kulħadd lejn wirtu.+

29 U ġara li wara dawn l-​affarijiet Ġożwè bin Nun, il-​qaddej taʼ Ġeħova, miet fl-​età taʼ mija u għaxar snin.+ 30 Għalhekk, difnuh fit-​territorju taʼ wirtu f’Timnat-sera,+ fir-​reġjun muntanjuż t’Efrajm, fit-​tramuntana tal-​Muntanja Gagħas. 31 U Israel kompla jaqdi lil Ġeħova l-​jiem kollha taʼ Ġożwè u l-​jiem kollha tax-​xjuħ li baqgħu ħajjin wara Ġożwè+ u li kienu jafu l-​għemejjel kollha li Ġeħova għamel għal Israel.+

32 U l-​għadam taʼ Ġużeppi,+ li wlied Israel kienu ħarġu mill-​Eġittu, difnuh f’Sikem fil-​medda rabaʼ li Ġakobb kien kiseb mingħand ulied Ħamor,+ missier Sikem, għal mitt biċċa flus;+ u din saret taʼ wlied Ġużeppi bħala wirt.+

33 U Elegħażar bin Aron miet ukoll.+ Għalhekk, difnuh fl-​Għolja taʼ Fineħas ibnu,+ li hu kien tah fir-​reġjun muntanjuż t’Efrajm.