Salm

83 Alla tiegħi, tibqax kwiet;

Jalla titkellem u taġixxi, l-Alla Qaddis.

 2 L-għedewwa tiegħek qed ilestu biex jiġġieldu;

Dawk li jobogħduk jaġixxu b’arroganza.*

 3 B’makakkerija u bil-moħbi, huma jippjanaw kontra l-poplu tiegħek;

Jiftiehmu kontra dawk li huma għeżież għalik.*

 4 Huma jgħidu: “Ejjew ħa neqirduhom għalkollox bħala poplu,

Ħalli ħadd ma jibqaʼ jiftakar isem Iżrael.”

 5 Bi ħsieb wieħed, huma ppjanaw strateġija;

Dawk li ngħaqdu flimkien* kontrik huma

 6 L-Edomin, l-Ismagħelin, il-Mowabin, u l-Ħagrin.

 7 Ukoll Gebal, Għammon, Għamalek,

U l-Filistja flimkien man-nies taʼ Tir.

 8 Anki l-Assirja ngħaqdet magħhom;

Huma jappoġġaw lil dawk li jiġu minn* Lot. (Sela)

 9 Agħmlilhom bħalma għamilt lil Midjan,

Bħalma għamilt lil Sisera u lil Ġabin fil-wied taʼ Kison.

10 Huma nqerdu għalkollox f’Għajn-dor;

Saru demel għall-art.

11 Lin-nobbli tagħhom, agħmilhom bħal Għoreb u Żeb,

U lill-mexxejja tagħhom, agħmilhom bħal Żebaħ u Salmunna,

12 Għax huma qalu: “Ejja nieħdu l-art fejn joqgħod Alla.”

13 Alla tiegħi, agħmilhom bħal ħaxix niexef li jtir maʼ riefnu,

Bħal tiben li jtajru r-riħ.

14 Bħalma nar jaħraq il-foresta

U fjamma tqabbad il-muntanji,

15 Jalla tiġri warajhom bil-maltempata tiegħek

U twerwirhom bir-riefnu tiegħek.

16 Umiljahom,*

Sabiex jgħajtu lil ismek, Ġeħova.

17 Jalla jiġu mġiegħla jistħu u jitwerwru għal dejjem;

Jalla jiġu ddiżonorati u jinqerdu;

18 Jalla n-nies ikunu jafu li int, li ismek hu Ġeħova,

Int biss l-Iktar Għoli fuq l-art kollha.