Salm

145 L-Alla u r-Re tiegħi, jien se nonorak,

Se nfaħħar lil ismek għal dejjem taʼ dejjem.

 2 Se nfaħħrek il-ġurnata kollha;

Se nfaħħar lil ismek għal dejjem taʼ dejjem.

 3 Ġeħova hu kbir u jistħoqqlu kull tifħir;

Il-kobor tiegħu ħadd ma jistaʼ jifhmu.

 4 Il-ġenerazzjonijiet li ġejjin se jfaħħruk għal dak li għamilt;

Se jitkellmu dwar l-affarijiet li int għamilt bil-qawwa tiegħek.

 5 Huma se jitkellmu dwar kemm hi tal-għaġeb il-qawwa tiegħek,

U jien se nimmedita dwar l-affarijiet mill-isbaħ li għamilt int.

 6 Huma se jitkellmu dwar l-affarijiet impressjonanti li għamilt int,*

U jien se nxandar il-kobor tiegħek.

 7 Huma se jitkellmu bil-ferħ hekk kif jiftakru dwar il-qalb tajba kbira tiegħek,

U se jgħajtu bil-ferħ minħabba li int ġust.

 8 Ġeħova hu qalbu tajba* u ħanin,

Ma jirrabjax malajr u juri ħafna mħabba u lealtà.*

 9 Ġeħova hu qalbu tajba maʼ kulħadd,

U l-ħniena tiegħu tidher f’kulma jagħmel.

10 Ġeħova, kulma għamilt int se jigglorifikak,

U l-leali tiegħek se jfaħħruk.

11 Huma se jxandru l-glorja tas-saltna tiegħek,

U jitkellmu dwar il-qawwa li għandek.

12 B’hekk, in-nies isiru jafu dwar l-affarijiet li int għamilt bil-qawwa tiegħek

U dwar is-sbuħija tas-saltna glorjuża tiegħek.

13 Is-saltna tiegħek se tibqaʼ għal dejjem,

U int se tmexxi fuq il-ġenerazzjonijiet kollha.

14 Ġeħova qed iqajjem lil dawk li qed jaqgħu

U jsaħħaħ lil dawk imtaqqlin bil-problemi.

15 In-nies kollha jduru lejk għall-għajnuna;

Int tagħtihom l-ikel meta jkollhom bżonn.

16 Int tiftaħ idejk

U taqtaʼ x-xewqa taʼ kull ħaġa ħajja.

17 Ġeħova hu ġust f’kulma jagħmel

U leali f’kollox.

18 Ġeħova hu qrib dawk kollha li jgħajtulu għall-għajnuna,

Dawk kollha li jgħajtulu b’mod sinċier.*

19 Hu se jaqtaʼ x-xewqa taʼ dawk kollha li għandhom rispett kbir lejh;*

Hu jismagħhom meta jgħajtulu għall-għajnuna u jsalvahom.

20 Ġeħova jipproteġi lil dawk kollha li jħobbuh,

Imma lill-ħżiena se jeqridhom għalkollox.

21 Jien se nfaħħar lil Ġeħova;

Jalla n-nies kollha jfaħħru lil ismu l-qaddis għal dejjem taʼ dejjem.