In-​Nisa Jgħixu Iżjed Imma Mhux Neċessarjament Aħjar

MADWAR il-​globu n-​nisa qegħdin jiżżewġu t’età akbar, ikollhom inqas tfal, u jgħixu iżjed. “Il-​ħajjiet tan-​nisa qed jinbidlu,” tirrapporta r-​rivista UNESCO Sources. Bejn l-​1970 u l-​1990, it-​tul taʼ ħajja li n-​nisa mistennijin li jgħixu wara t-​twelid żdied b’erbaʼ snin fid-​dinja żviluppata u bi kważi disaʼ snin f’pajjiżi li qegħdin jiżviluppaw. “Dan ifisser li llum, fir-​reġjuni żviluppati n-​nisa jgħixu medja taʼ sitt snin u nofs iżjed mill-​irġiel. Fir-​reġjuni li qegħdin jiżviluppaw id-​differenza hija taʼ ħames snin fl-​Amerka Latina u l-​Karibew, tliet snin u nofs fl-​Afrika u tliet snin fl-​Asja u fil-​Paċifiku.”

Minkejja dan, għal ħafna nisa, li jgħixu iżjed ma jfissirx li jgħixu aħjar. Our Planet, rivista tal-​Ġnus Magħquda, tinnota li għall-​maġġoranza tan-​nisa fid-​dinja, id-​drittijiet umani bażiċi għadhom “il-​ġelu fuq il-​kejk li qatt ma daqu. Għadhom ifittxu ħobż u ilma ordinarji.” Madankollu, saħansitra l-​affarijiet bażiċi, tgħid il-​ĠM, huma impossibbli għal miljuni taʼ nisa minħabba li l-​maġġoranza estrema taʼ nies illitterati, refuġjati, u foqra fid-​dinja kollha, huma nisa. Minkejja xi avvanzi, tikkonkludi l-​UNESCO Sources, “l-​istampa kollha għan-​nisa . . . tidher bla tama.”