‘Kien Qisni Qed Niekol L-Għasel’
F’NOFS l-1993, ġewwa Altus, Oklahoma, fl-Istati Uniti, missier imħasseb, surġent fil-Qawwa taʼ l-Ajru Amerikana, talab għal gwida biex jgħin lil bintu, li kien qed ikollha problemi fiż-żwieġ u kienet qed taħsibha jekk tiddivorzjax. L-għada fil-għodu wieħed mix-Xhieda taʼ Jehovah ħabbatlu l-bieb u offrielu l-ħarġa taʼ l-Awake! tat-8 taʼ Lulju, 1993, li ttrattat is-suġġett “Divorce—The Door to a Happier Life?” (Id-Divorzju—Il-Bieb għal Ħajja Iktar Ferħana?)
Għalkemm ir-raġel qatt ma kienu għoġbuh ix-Xhieda u qatt qabel ma kien semagħhom, mill-ewwel aċċetta u qara r-rivista Awake! Iktar tard wera xi skritturi u xi punti minnha lil bintu. Hu qara wkoll il-ħarġa taʼ It-Torri taʼ l-Għassa li kien ħallielu maʼ l-Awake! Din kien fiha artiklu li ġagħlu jaħseb fil-fond dwar it-twemmin li dejjem ħaddan tat-Trinità. Hu rrealizza li t-talba tiegħu f’konnessjoni maʼ bintu kienet qed tiġi mwieġba, u madankollu, beda jberren f’moħħu għala Alla kien qed juża nies li ma jemmnux fit-Trinità biex iweġiblu talbu. Irraġuna li, biex iwieġeb it-talb Alla żgur li ma kienx se juża nies li ma jgħallmux il-verità.
B’hekk, ġie mqanqal li jċempel is-Sala tas-Saltna tax-Xhieda taʼ Jehovah biex jakkwista xi letteratura li tispjega iktar fid-dettall it-twemmin tagħhom rigward it-Trinità. Ir-raġel li wieġeb it-telefon kien qed jattendi għal-laqgħa taʼ l-anzjani Kristjani. Is-surġent mar immedjatament fis-Sala tas-Saltna, fejn ngħatalu l-ktieb Int Tistaʼ Tgħix Għal Dejjem Fil-Ġenna Fuq L-Art u l-browxer Għandek Int Temmen fit-Trinità?
Dik il-lejla stess, ir-raġel qara l-browxer kollu. Waqt li kien qed jaqrah sar tant eċċitat li, iktar tard kif qal hu, kellu jieqaf ftit u jgħid lilu nnifsu, ‘Ikkalma ftit. Dan ma jistax ikun. Din ħaġa li ma titwemminx.’ Il-browxer ippreżenta l-prova tal-Bibbja kontra d-duttrina tat-Trinità tant ċar li meta qrah, hu spjega, “kien sempliċement qisni qed niekol l-għasel.” L-għada fil-għaxija attenda għal-laqgħa tax-Xhieda taʼ Jehovah għall-ewwel darba u tgħaxxaq b’dak li samaʼ.
Wara l-ewwel studju tiegħu tal-Bibbja max-Xhieda taʼ Jehovah u diskussjoni bir-reqqa dwar il-ħarsa tal-Bibbja fuq it-tipjip, qered is-sigaretti li kellu u qatt ma reġaʼ pejjep. Kien jinżamm studju tal-Bibbja miegħu diversi drabi kull ġimgħa. Tliet xhur wara li qara l-browxer dwar it-Trinità, u wara li rtira mill-militar, beda jieħu sehem fix-xogħol taʼ l-ippridkar pubbliku max-Xhieda. Tliet xhur wara ssimbolizza d-dedikazzjoni tiegħu lil Alla Jehovah u tgħammed. Issa qed jaqdi bħala ministru full-time.