Il-​Ferħ u l-​Isfidi taʼ l-​Adoloxxenza

L-​ADOLOXXENZA tistaʼ tkun żmien meraviljuż fil-​ħajja. Tabilħaqq, ħafna adoloxxenti hekk iħarsu lejha. U ħafna adulti għandhom memorji sbieħ taʼ l-​adoloxxenza tagħhom.

Fl-istess ħin, irridu nammettu li qed ngħixu fi “żmien iebes” u kritiku. (2 Timotju 3:1) Dan żied il-​pressjoni fuq iż-​żgħażagħ, pressjoni differenti minn dik li kellhom jiffaċċjaw il-​ġenerazzjonijiet taʼ qabilhom. Forsi għalhekk li Sabrina Solin Weill, editriċi esekuttiva taʼ rivista għall-​adoloxxenti, tiddeskrivi l-​esperjenza tagħhom bħala waħda mimlija sfidi. Tixbah lil xi ħadd miexi fuq ħabel imdendel fl-​arja u m’għandu xejn taħtu biex jilqgħu jekk jaqaʼ. Tabilħaqq, f’dan il-​perijodu mqalleb tal-​ħajja l-​adoloxxenti jistgħu jħossuhom bla grazzja, ansjużi, u mħawdin. Weill tikteb: “Fiż-​żmien taʼ ħajjithom fejn la huma tfal u lanqas adulti, l-​adoloxxenti jridu jiffaċċjaw l-​iktar aspetti diffiċli tat-​tfulija u tal-​ħajja taʼ l-​adulti.”

Jekk int adoloxxenti, kif tistaʼ tkampa maʼ l-​isfidi li tiffaċċja? Jekk int il-​ġenitur taʼ adoloxxenti, kif tistaʼ tiġi megħjun tiftakar kemm kienu diffiċli dawn is-​snin għalik u b’hekk tifhem aħjar minn xiex għaddej ibnek jew bintek? F’din is-​serje t’artikli nistiednu kemm liż-​żgħażagħ u kemm lill-​adulti biex jagħtu ħarsa iktar mill-​qrib lejn l-​adoloxxenza. Dan se jgħin liż-​żgħażagħ mhux biss ikampaw iżda wkoll jirnexxu fl-​adoloxxenza tagħhom.