Ġie Disinjat?

Il-​Munqar tal-​Għasfur taʼ San Martin

● Peress li tivvjaġġa b’veloċità taʼ kważi 300 kilometru fis-​siegħa, il-​ferrovija Ġappuniża taʼ veloċità kbira hi waħda mill-​iktar ferroviji li tiġri fid-​dinja. Sa ċertu punt, is-​suċċess tagħha hu grazzi għal għasfur żgħir—l-​għasfur taʼ San Martin. Għala?

Ikkunsidra: Biex ifittex ikla delizzjuża, l-​għasfur taʼ San Martin jistaʼ jogħdos mingħajr ma jtajjar ħafna ilma. Dan il-​fatt interessa lil Eiji Nakatsu, inġinier li mexxa l-​provi tal-​ferrovija taʼ veloċità kbira. Hu ħaseb dwar kif l-​għasfur taʼ San Martin jadatta ruħu b’ħeffa kbira mill-​arja b’reżistenza baxxa għall-​ilma b’reżistenza għolja. Kien importanti li tinstab it-​tweġiba biex tissolva problema partikulari li kellha din il-​ferrovija. “Meta ferrovija tidħol b’ħeffa kbira ġo mina dejqa,” jispjega Nakatsu, “din tiġġenera mewġ tal-​pressjoni tal-​arja li bil-​mod il-​mod jikber f’mewġ kbir ħafna. Dan jasal sal-​ħruġ tal-​mina bil-​veloċità tal-​ħoss, u jiġġenera mewġ bi frekwenza baxxa li jipproduċi ħoss kbir u vibrazzjoni ajrudinamika tant qawwija li residenti li jgħixu 400 metru ’l bogħod ilmentaw mal-​awtoritajiet.”

Ittieħdet id-​deċiżjoni li l-​parti taʼ quddiem tal-​ferrovija taʼ veloċità kbira tiġi disinjata fuq il-​munqar tal-​għasfur taʼ San Martin. X’kien ir-​riżultat? Din il-​ferrovija issa tivvjaġġa b’veloċità t’10 fil-​mija iktar u taħli 15 fil-​mija inqas enerġija. Iżjed minn hekk, il-​pressjoni tal-​arja li tipproduċi l-​ferrovija tnaqqset bi 30 fil-​mija. B’hekk, m’hemmx ħoss kbir hekk kif il-​ferrovija tgħaddi minn ġo mina.

Int X’Taħseb? Il-​munqar tal-​għasfur taʼ San Martin ġie b’kumbinazzjoni? Jew ġie disinjat?

[Sors tal-istampa f’paġna 29]

Għasfur taʼ San Martin jogħdos: Woodfall/Photoshot; ferrovija taʼ veloċità kbira: AP Photo/Kyodo