Speċjalista tal-​Kliewi Tispjega Għala Għandha Fidi f’Alla

Għidilna ftit dwar it-​tfulija tiegħek.

Meta kelli disaʼ snin, il-​familja tiegħi telqet minn Franza biex tmur tgħix fi Spanja. Il-​ġenituri tiegħi kienu Kattoliċi, imma jiena ma bqajtx nemmen f’Alla meta kelli 16-​il sena. Għalija, ir-​reliġjon ma kinitx importanti għall-​ħajja. Jekk xi ħadd kien jistaqsini kif bdiet il-​ħajja jekk m’hemmx Alla, kont inwieġeb, “Għalissa, ix-​xjentisti ma jistgħux jispjegaw dan, imma xi darba jirnexxilhom.”

X’qanqlek tistudja dwar il-​mard tal-​kliewi?

Studjajt fi skola medika f’Montpellier, Franza. Hemmhekk, professur kellimni dwar li naħdem fin-​nefroloġija, qasam tal-​mediċina li jinvolvi l-​kliewi. Dan ix-​xogħol kien jinkludi r-​riċerka kif ukoll il-​ħarsien taʼ pazjenti, u dan kien eżatt dak li ridt nagħmel. Fl-​1990, bdejt nieħu sehem f’riċerka dwar l-​użu kliniku tal-​ormon ġenetiku erythropoietin (EPO) biex tiġi kontrollata l-​produzzjoni taċ-​ċelluli ħomor fl-​għadam. F’dak iż-​żmien, kien meqjus bħala qasam pjuttost ġdid tar-​riċerka.

X’ġiegħlek tibda taħseb dwar Alla?

Lura fl-​1979, ir-​raġel tiegħi, Floréal, beda jistudja l-​Bibbja max-​Xhieda taʼ Ġeħova. Imma jiena ma kontx interessata. Bħala tifla, kont xbajt mir-​reliġjon. Minkejja dan, żewġi u wliedi saru Xhieda, u kważi l-​ħbieb kollha tagħna kienu Xhieda wkoll. Waħda minnhom, Patricia, issuġġeriet li nipprova nitlob. Qaltli: “Jekk m’hemm ħadd fis-​sema, m’int se tkun tlift xejn, imma jekk hemm xi ħadd, se tara x’jiġri.” Snin wara, bdejt naħseb dwar x’inhu l-​iskop tal-​ħajja, u ftakart f’dak li kienet qaltli Patricia. Bdejt nitlob biex nifhem.

Għala bdejt taħseb dwar x’inhu l-​iskop tal-​ħajja?

L-​attakk terroristiku fuq il-​World Trade Center fi New York ġegħelni nitħasseb dwar għala hemm tant ħażen fis-​soċjetà. Ħsibt: ‘Il-​fanatiżmu reliġjuż jipperikola l-​futur tagħna. Imma jiena mdawra bix-​Xhieda taʼ Ġeħova li huma nies paċifiċi. Mhumiex estremisti. Huma jsegwu l-​Bibbja. Forsi missni nara dak li tgħid.’ Għalhekk, bdejt naqra l-​Bibbja jien stess.

Bħala tabiba, sibtha bi tqila biex temmen f’Ħallieq?

Le. Kelli rispett profond għall-​mod sofistikat kif ġisimna hu magħmul. Pereżempju, il-​mod kif il-​kliewi tagħna jikkontrollaw l-​ammont taʼ ċelluli ħomor fid-​demm jgħaġġibni.

Għala tgħid hekk?

Bħalma forsi taf, iċ-​ċelluli ħomor tad-​demm iġorru l-​ossiġnu. Jekk titlef ħafna demm jew jekk tmur fl-​għoli ħafna, ġismek mhux se jkollu biżżejjed ossiġnu. Il-​kliewi tagħna għandhom sensors tal-​ossiġnu. Meta jindunaw li m’hemmx biżżejjed ossiġnu fid-​demm, huma jibdew il-​produzzjoni tal-​EPO, u l-​livell tal-​EPO fid-​demm jistaʼ jitlaʼ sa elf darba iktar minn dak li kien qabel. L-​EPO jistimula l-​mudullun biex jipproduċi iktar ċelluli ħomor, u dawn iġorru iktar ossiġnu madwar il-​ġisem. X’meravilja! Il-​ħaġa tal-​iskantament hi li studjajt dan il-​proċess għal iktar minn 10 snin qabel ma ntbaħt li Alla biss setaʼ joħloq sistema tant eleganti.

X’deherlek mill-​Bibbja?

Kont qrajt ħafna kotba tal-​istorja u rumanzi famużi, imma mill-​ewwel indunajt li l-​Bibbja kienet differenti. Il-​pariri tagħha tant huma prattiċi li bilfors li ġejjin minn xi sors superjuri għall-​bniedem. Il-​karattru taʼ Ġesù affaxxinani. Rajt li kien persuna reali. Kellu s-​sentimenti u kellu l-​ħbieb. Peress li ma ridtx nuża l-​pubblikazzjonijiet tax-​Xhieda taʼ Ġeħova, għamilt riċerka f’enċiklopediji u f’xogħlijiet taʼ referenzi oħra meta kelli xi mistoqsijiet.

Fuqiex għamilt riċerka?

Fost affarijiet oħra, kelli kurżità dwar il-​mod kif il-​Bibbja bassret is-​sena tal-​magħmudija taʼ Ġesù. Turi eżatt kemm kien se jgħaddi żmien bejn l-​20 sena tal-​ħakma tal-​ħakkiem Persjan Artaserse u s-​sena li fiha Ġesù kellu jippreżenta lilu nnifsu bħala l-​Messija.a Jiena mdorrija nagħmel riċerka—hi parti minn xogħli. Għalhekk, għamilt riċerka fil-​kotba tal-​istorja biex nikkonferma d-​dati tal-​ħakma t’Artaserse u d-​dati tal-​ministeru taʼ Ġesù. Fl-​aħħar, wasalt għall-​konklużjoni li din il-​profezija tal-​Bibbja kienet twettqet eżatt fil-​ħin u fil-​waqt u li bilfors kienet imnebbħa minn Alla.