Żjara fl-​Italja

L-​ITALJA hija pajjiż taʼ kuntrasti—minn xtut twal sa katini taʼ muntanji mħarbtin; minn sjuf jikwu fin-​Nofsinhar għal xtiewi inġazzati fit-​Tramuntana. Hija wkoll pajjiż vulkaniku, iżda ftit vulkani biss—bħalma huma Stromboli u l-​Muntanja Etna—huma attivi.

L-​Italja hija waħda mill-​iktar pajjiżi fl-​Ewropa miżgħudin bin-​nies. Għaddiet minn taħt idejn ħafna popli, inkluż l-​Għarab, il-​Biżantini, il-​Griegi, in-​Normanni, u l-​Feniċi.

Il-​pajjiż hu mogħni b’teżori storiċi u artistiċi. Fdalijiet tal-​qedem Griegi u Rumani jew arkitettura Barokka u taʼ żmien ir-​Rinaxximent qegħdin bħallikieku jiddandnu f’ħafna mill-​bliet kbar u żgħar tal-​Italja. Xogħlijiet taʼ pittura, statwi tal-​irħam, u funtani jagħtu l-​krettu tagħhom lil artisti bħal Bernini, Michelangelo, u Raphael.

L-​ikel hu xi ħaġa importanti fil-​ħajja taʼ kuljum u ħafna drawwiet huma marbutin mat-​tisjir lokali. L-​għaġin spiss jingħata bħala l-​ewwel platt, u wara jisserva laħam jew ħut bil-​ħaxix. Iż-​żejt taż-​żebbuġa jintuża bl-​abbundanza għax jiġi prodott hemmhekk fuq skala kbira. Il-​pizza u r-​risotto huma żewġ platti Taljani popolari.

It-​Taljani magħrufin li huma dħulin, ospitabbli, u soċjevoli. Huma jħobbu jaqbdu diskursati m’oħrajn, allura huwa komuni li tara n-​nies iparlaw fil-​pjazez jew mitlufin f’xi diskursata vivaċi waqt xi passiġġata.

Il-​biċċa l-​kbira mill-​popolazzjoni tal-​Italja jgħidu li huma Kattoliċi Rumani, imma ftit imorru l-​knisja regolarment. Jintqal li l-​influwenza tal-​knisja battiet fl-​aħħar għaxriet taʼ snin. Dan għaliex in-​nies injoraw regoli li ilhom żmien twil stabbiliti dwar l-​abort u d-​divorzju.

Ix-​Xhieda taʼ Ġeħova sejrin tajjeb fl-​Italja. Huma magħrufin sew li jgħallmu l-​Bibbja bħala parti mill-​ministeru pubbliku tagħhom, kif ukoll li jgħixu skont il-​prinċipji tagħha. Hemm iktar minn 3,000 kongregazzjoni tax-​Xhieda taʼ Ġeħova madwar il-​pajjiż, u ħafna minn dawn il-​kongregazzjonijiet qed jilħqu lil nies li jitkellmu b’lingwi oħrajn minbarra t-​Taljan. Il-​bżonn għal tagħlim mill-​Bibbja b’lingwi barranin jidher mill-​fatt li matul perijodu reċenti t’għaxar snin, in-​numru tan-​nies barranin fl-​Italja ttriplika.