Il-​Kristjanità fl-​Azzjoni f’Nofs it-​Taqlib

KOLLOX beda għal għarrieda jum wieħed f’April taʼ l-​1994. Il-​presidenti tal-​Burundi u taʼ l-​Irwanda mietu meta kkraxxja l-​ajruplan li kienu fuqu. F’temp taʼ ftit sigħat, l-​Irwanda nħakmet minn mewġa enormi taʼ vjolenza. Fi ftit iktar minn tliet xhur, iktar minn 500,000 Irwandi​—irġiel, nisa, u tfal—​sfaw mejtin. Xi wħud jirreferu għal dan il-​perijodu bħala “l-​ġenoċidju.”

Nofs is-​7,500,000 abitant taʼ l-​Irwanda kellhom jaħarbu. Dan kien jinkludi 2,400,000 li fittxew refuġju f’pajjiżi ġirien. Dan kien l-​akbar eżodu taʼ refuġjati u l-​iktar wieħed mgħaġġel taʼ l-​istorja moderna. Kampijiet tar-​refuġjati ġew imwaqqfin malajr fiz-​Zaire (issa msejjaħ ir-​Repubblika Demokratika tal-​Kongo), fit-​Tanzanija, u fil-​Burundi. Xi wħud minn dawn il-​kampijiet​—l-​akbar fid-​dinja—​ipprovdew kenn għal 200,000 ruħ.

Fost ir-​refuġjati kien hemm ħafna mix-​Xhieda taʼ Jehovah, nies li jħobbu l-​paċi u li japplikaw il-​prinċipji tal-​Bibbja f’ħajjithom. Jgħixu f’liema art jgħixu, huma jżommu newtralità stretta u japplikaw il-​prinċipju inkorporat f’dawn il-​kliem taʼ Isaija 2:4: “Huma jibdlu x-​xwabel tagħhom f’sikek tal-​moħriet, u l-​lanez tagħhom fi mnieġel. Ebda ġens ma jerfaʼ x-​xabla kontra ġens ieħor, u s-​sengħa tal-​gwerra ma jitgħallmuhiex iżjed.” Ix-​Xhieda taʼ Jehovah huma rrikonoxxuti maʼ kullimkien bħala grupp reliġjuż li ma pparteċipax fil-​ġenoċidju fl-​Irwanda.

Ġesù Kristu qal li s-​segwaċi tiegħu “m’humiex tad-​dinja.” Madankollu, minħabba li huma “fid-​dinja,” mhux dejjem ikunu jistgħu jiskappaw mit-​taqlib tan-​nazzjonijiet. (Ġwann 17:11, 14) Matul il-​ġenoċidju fl-​Irwanda, tilfu ħajjithom xi 400 Xhud. Madwar 2,000 Xhieda u persuni interessati fil-​messaġġ tas-​Saltna saru refuġjati.

Il-fatt li m’huma ebda parti mid-​dinja jfisser li x-​Xhieda taʼ Jehovah ma jagħmlu xejn meta jfaqqaʼ xi diżastru? Le. Il-​Kelma t’Alla tgħid: “Jekk ħuk jew oħtok ma jkollhomx x’jilbsu u jonqoshom l-​ikel taʼ kuljum, u wieħed minnkom jgħidilhom: ‘Morru bis-​sliem, isħnu u kulu sa tixbgħu’, bla ma jagħtihom dak li hu meħtieġ għall-​ġisem, dan x’jiswa? Hekk ukoll il-​fidi: jekk tkun weħidha u ma jkollhiex l-​għemil, tkun mejta fiha nfisha.” (Ġakbu 2:15-17) L-​imħabba lejn il-​proxxmu tqanqal ukoll lix-​Xhieda biex jgħinu lil dawk li m’għandhomx l-​istess twemmin reliġjuż tagħhom.—Mattew 22:37-40.

Għalkemm ix-​Xhieda taʼ Jehovah mad-​dinja kollha xtaqu ħafna li jgħinu lill-​kredenti sħabhom li kienu qed jiffaċċjaw is-​sitwazzjoni diżastruża fl-​Irwanda, l-​inkarigu tal-​koordinazzjoni tal-​ħidma biex tingħata l-​għajnuna ġie mogħti lill-​aħwa taʼ l-​Ewropa tal-​Punent. Fis-​Sajf taʼ l-​1994, tim taʼ Xhieda volontieri mill-​Ewropa malajr kienu pronti biex jgħinu lil ħuthom fl-​Afrika. Ġew imwaqqfin kampijiet u sptarijiet temporanji organizzati tajjeb għar-​refuġjati Rwandin. Ammonti enormi taʼ ħwejjeġ, kutri, ikel, u letteratura Biblika intbagħtulhom bl-​ajru jew bil-​baħar b’xi mezzi oħrajn. Iktar minn 7,000 persuna milquta​—kważi t-​triplu tan-​numru taʼ Xhieda taʼ Jehovah fl-​Irwanda f’dak il-​perijodu—​ibbenefikaw mill-​ħidma biex tingħata l-​għajnuna. Sa Diċembru taʼ dik is-​sena, eluf taʼ refuġjati, inklużi l-​biċċa l-​kbira taʼ dawk li kienu Xhieda taʼ Jehovah, reġgħu lura lejn l-​Irwanda biex jerġgħu jibnu ħajjithom mill-​ġdid.

Gwerra fil-​Kongo

Fl-​1996, faqqgħet gwerra fir-​reġjun tal-​Lvant tar-​Repubblika Demokratika tal-​Kongo. Din in-​naħa tal-​Kongo tinsab ħdejn il-​fruntiera maʼ l-​Irwanda u l-​Burundi. Għal darb’oħra reġaʼ kien hemm stupri u qtil. In-​nies bdew jaħarbu biex isalvaw ħajjithom f’nofs bullits ivenvnu u rħula jinħarqu. Ix-​Xhieda taʼ Jehovah nqabdu fil-​konfużjoni, u mietu xi 50. Xi wħud inqatlu minn bullits li ma kinux intenzjonati għalihom. Oħrajn ġew maqtulin għax kienu jappartjenu lil xi grupp etniku partikulari jew għax tfixkluhom maʼ l-​għedewwa. Raħal wieħed fejn kienu joqogħdu 150 Xhud, inqered bin-​nar. Fi rħula oħrajn bosta djar u xi Swali tas-​Saltna ġew maħruqin għalkollox. Imċaħħdin minn djarhom u minn dak li kienu jippossiedu, ix-​Xhieda ħarbu lejn postijiet oħrajn u ġew megħjunin minn adoraturi sħabhom hemmhekk.

Wara l-​gwerra jiġi l-​ġuħ, hekk kif il-​prodotti jiġu rvinati, il-​ħażniet taʼ l-​ikel jiġu misruqin, u l-​mezzi biex jitqassmu l-​provisti jiġu mwaqqfin. L-​ikel li huwa disponibbli jkun iqum ħafna. F’Kisangani, fil-​bidu taʼ Mejju taʼ l-​1997, kilo patata kien iqum madwar tliet dollari Amerikani, ħafna iktar milli jifilħu jħallsu l-​biċċa l-​kbira tan-​nies. Il-​maġġuranza tan-​nies setgħu jieklu biss ikla waħda kuljum. M’għandniex xi ngħidu, wara l-​iskarsezzi taʼ l-​ikel jiġi l-​mard. Nuqqas taʼ nutriment idgħajjef il-​kapaċità tal-​ġisem milli jiġġieled kontra l-​malarja, mard fl-​imsaren, u problemi fl-​istonku. It-​tfal, b’mod partikulari, isofru minn dan il-​mard u jmutu.

Jiddeterminaw Kemm Hu Kbir il-​Bżonn

Għal darb’oħra, ix-​Xhieda taʼ Jehovah fl-​Ewropa kienu ħfief biex iwieġbu għall-​bżonn. S’April taʼ l-​1997, tim taʼ Xhieda li marru biex jagħtu l-​għajnuna u li kien jinkludi żewġ tobba kien wasal bil-​mediċini u l-​flus. F’Goma, ix-​Xhieda lokali kienu diġà organizzaw kumitati li jipprovdu għajnuna biex jiddeterminaw x’kienet is-​sitwazzjoni ħalli b’hekk setgħet tingħata l-​għajnuna fil-​pront. It-​tim qagħad jesplora l-​belt u l-​inħawi taʼ madwar. Intbagħtu messaġġiera biex iġibu rapporti minn postijiet iktar ’il bogħod. Inkisbet informazzjoni minn Kisangani wkoll, li hi belt li tinsab ’il fuq minn 1,000 kilometru lejn il-​Punent taʼ Goma. L-​aħwa lokali għenu fil-​koordinazzjoni tal-​ħidma biex tiġi pprovduta l-​għajnuna f’Goma, fejn jgħixu xi 700 Xhud.

Wieħed mill-​anzjani Kristjani f’Goma qal: “Konna kommossi ħafna meta rajna lil ħutna li kienu ġew minn daqstant bogħod biex jgħinuna. Qabel ma ġew, għenna lil xulxin. L-​aħwa kellhom jaħarbu mill-​kampanja għal ġo Goma. Xi wħud kienu tilfu djarhom, u ħallew l-​għelieqi tagħhom. Aħna lqajniehom fi djarna u qsamna magħhom ħwejjiġna u l-​ftit ikel li kellna. Ftit li xejn stajna nagħmlu lokalment. Xi wħud minna kienu qed isofru minħabba nuqqas taʼ nutriment.

“Madankollu, l-​aħwa mill-​Ewropa ġabulna l-​flus li bihom stajna nixtru l-​ikel, li kien skars u għoli ħafna. L-​ikel wasal f’mument kruċjali, peress li ħafna ma kellhom xejn x’jieklu fi djarhom. Aħna qassamna l-​ikel kemm lix-​Xhieda u anki lil uħud li ma kinux. Kieku l-​għajnuna ma waslitx meta fil-​fatt waslet, kienu jmutu ħafna iktar, speċjalment tfal. Jehovah salva lin-​nies tiegħu. Uħud li ma kinux Xhieda baqgħu impressjonati ferm. Ħafna kkummentaw dwar l-​unità u l-​imħabba tagħna. Xi wħud ammettew li tagħna hija r-​reliġjon vera.”

Għalkemm l-​ikel inxtara lokalment u ntużaw xi mediċini, kien meħtieġ iżjed minn hekk. Kien hemm bżonn taʼ ħwejjeġ u kutri, kif ukoll iktar provisti taʼ ikel u mediċina. Kien hemm bżonn ukoll t’għajnuna biex jerġgħu jinbnew djar li kienu nqerdu.

In-​Nies Jagħtu b’Mod Ġeneruż

L-​aħwa fl-​Ewropa għal darb’oħra kienu ħerqanin biex jgħinu. L-​uffiċċju tal-​fergħa tax-​Xhieda taʼ Jehovah f’Louviers, Franza, għamel appell lill-​kongregazzjonijiet fl-​inħawi tar-​Rhône Valley, kif ukoll fin-​Normandija, u lil xi kongregazzjonijiet f’Pariġi. Hawnhekk kien jidħol prinċipju ieħor: “Min jiżraʼ ftit, jaħsad ftit; u min jiżraʼ ħafna, jaħsad ħafna. Kull wieħed għandu jagħti skond ma jidhirlu hu minn rajh, mhux fuq il-​qalb jew bilfors; għax Alla jħobb lil min jagħti bil-​ferħ.”—2 Korintin 9:6, 7.

Eluf ħatfu bil-​ferħ l-​opportunità biex jagħtu. Fis-​Swali tas-​Saltna bdew jaslu bil-​gzuz kaxxi u xkejjer taʼ ħwejjeġ, żraben u affarijiet oħrajn, u dawn imbagħad ittieħdu fl-​uffiċċju tal-​fergħa tax-​Xhieda taʼ Jehovah fi Franza. Hemmhekk, 400 volontier kienu lesti biex jieħdu sehem fil-​fażi li kien imiss tal-​proġett “Għin liz-​Zaire”. Hekk kif l-​oġġetti li ngħataw bdew ġejjin bil-​gzuz, dawn il-​volontieri għażlu, twew, u ppakkjaw il-​ħwejjeġ f’kaxxi li ġew imqassmin fi gruppi taʼ 30. It-​tfal kienu ħasbu f’ħuthom iż-​żgħar fl-​Afrika u bagħtulhom il-​ġugarelli​—karozzi tal-​logħob ileqqu, żugragi, pupi, u teddy bears. Dawn ġew ippakkjati flimkien maʼ l-​affarijiet neċessarji għall-​ħajja. B’kollox, imtlew u ntbagħtu bil-​baħar lejn il-​Kongo disaʼ containers taʼ 12-il metru l-​wieħed.

Kemm intbagħtet għajnuna lejn l-​Afrika Ċentrali bis-​saħħa t’eluf taʼ Xhieda mill-​Belġju, Franza, u l-​Isvizzera? Sa Ġunju taʼ l-​1997 l-​ammont totali kien taʼ 500 kilo mediċina, 10 tunnellati gallettini li fihom ħafna proteini, 20 tunnellata taʼ ikel ieħor, 90 tunnellata ħwejjeġ, 18,500 par żarbun, u 1,000 kutra. Ġiet ukoll mibgħuta letteratura Biblika bl-​ajru. Dan kollu kien apprezzat ferm, billi farraġ lir-​refuġjati u għenhom biex jissaportu l-​provi tagħhom. Il-​provisti b’kollox kienu jiswew kważi 1,000,000 dollaru Amerikan. Kontribuzzjonijiet bħal dawn kienu evidenza tal-​fratellanza u l-​imħabba fost dawk li jaqdu lil Jehovah.

Id-​Distribuzzjoni fil-​Kongo

Hekk kif l-​affarijiet bdew jaslu fil-​Kongo, żewġt aħwa rġiel u oħt waslu minn Franza biex jaħdmu mal-​kumitati lokali tal-​ħidma biex tingħata l-​għajnuna. Rigward il-​gratitudni murija mix-​Xhieda Kongoliżi, Joseline qalet: “Irċevejna ħafna ittri t’apprezzament. Waħda oħt fqira tatni ornament tal-​malakiti. Oħrajn tawna r-​ritratt tagħhom. X’ħin konna sejrin, l-​aħwa nisa bdew ibusuni, jgħannquni, u jibku. Jien bdejt nibki wkoll. Ħafna għamlu kummenti bħal, ‘Jehovah huwa tajjeb. Jehovah jaħseb fina.’ Mela huma rrikonoxxew li l-​kredtu għal dan l-​għoti kien jappartjeni lil Alla. Meta konna qed inqassmu l-​ikel, l-​aħwa bdew ifaħħru lil Jehovah bil-​għanjiet tas-​Saltna. Kienet veru xi ħaġa li tmisslek qalbek.”

Wieħed mill-​membri tat-​tim kien tabib jismu Loic. Ħafna ffollaw fis-​Sala tas-​Saltna u stennew bil-​paċenzja wieħed wara l-​ieħor biex jagħtihom l-​għajnuna tiegħu. Billi riedet tagħmel xi ħaġa hi wkoll, waħda oħt Kongoliża għamlet u kkontribwiet madwar 40 doughnut għal dawk li kienu qed jistennew biex jarahom it-​tabib. Peress li kien hemm xi 80 persuna jistennew, ħadu nofs doughnut kull wieħed.

Għajnuna lil Uħud li ma Kinux Xhieda

Din l-​għajnuna umanitarja ma kinitx illimitata biss għax-​Xhieda taʼ Jehovah. Oħrajn ibbenefikaw ukoll, l-​istess bħalma ħafna bbenefikaw fl-​1994. Dan huwa f’armonija maʼ Galatin 6:​10, li jistqarr: “Mela, dment li għandna ż-​żmien ħa nagħmlu l-​ġid maʼ kulħadd, l-​iktar maʼ qrabatna fil-​fidi.”

Ix-Xhieda qassmu l-​mediċini u l-​ħwejjeġ lil diversi skejjel primarji u lil orfanatrofju ħdejn Goma. Fl-​orfanatrofju hemm 85 tifel u tifla. Iktar qabel, meta kienu marru biex jeżaminaw is-​sitwazzjoni, l-​aħwa fit-​tim għall-​għajnuna kienu żaru l-​orfanatrofju u wegħdu li jipprovdulhom 50 kaxxa gallettini li fihom ħafna proteini, kaxxi bil-​ħwejjeġ, 100 kutra, mediċini, u ġugarelli. It-​tfal ifformaw ringiela fil-​bitħa u kantaw għall-​viżitaturi. Imbagħad għamlu talba speċjali​—kien possibbli li jkollhom ballun tal-​futbol biex ikunu jistgħu jilagħbu bih?

Xi ġimgħat wara, it-​tim għall-​għajnuna wettaq il-​wegħda tiegħu li jġib il-​provisti. Billi baqaʼ impressjonat bil-​ġenerożità u b’dak li kien qara fil-​letteratura Biblika li kien ingħata, id-​direttur taʼ l-​orfanatrofju qal li kien se jsir wieħed mix-​Xhieda taʼ Jehovah. U lit-​tfal tawhom ballun tal-​futbol? “Le,” wieġeb Claude, il-​koordinatur tat-​tim għall-​għajnuna minn Franza. “Tajniehom żewġ blalen tal-​futbol.”

Il-​Kampijiet tar-​Refuġjati

L-​għajnuna ma kinitx illimitata għall-​Kongo. Eluf taʼ refuġjati kienu ħarbu miż-​żona tal-​gwerra għal pajjiż fil-​qrib fejn kienu ġew imwaqqfin malajr tliet kampijiet tar-​refuġjati. Ix-​Xhieda vvjaġġaw s’hemmhekk, ukoll, sabiex jaraw x’setaʼ jsir. Meta ġie ppreparat dan ir-​rapport, il-​kampijiet kienu qed jipprovdu kenn għal 211,000 refuġjat, il-​biċċa l-​kbira mill-​Kongo. Madwar 800 kienu Xhieda u t-​tfal tagħhom u wħud interessati fl-​aħbar tajba tas-​Saltna. Problema li qamet immedjatament fil-​kampijiet kienet in-​nuqqas taʼ ikel. F’kamp wieħed kien hemm ikel biżżejjed għal tlett ijiem biss, u dan kien jinkludi fażola li kienu għaddew tliet snin minn fuqha.

Minkejja dan, ix-​Xhieda ma kinux qalbhom maqtugħa. Għalkemm ftit kellhom letteratura Biblika, huma kkonduċew laqgħat għall-​apert b’mod regulari biex jibnu lilhom infushom spiritwalment. Ukoll, huma kellhom ħafna x’jagħmlu f’li jippridkaw l-​aħbar tajba tas-​Saltna t’Alla lil oħrajn fil-​kampijiet.—Mattew 24:14; Lhud 10:24, 25.

It-tim taʼ Xhieda li kien inkarigat biex jiddetermina l-​bżonnijiet taʼ l-​aħwa kien jinkludi tabib. Għalkemm l-​awtoritajiet ħallewhom joqogħdu ftit jiem biss f’kull kamp, huma għamlu konsulti mediċi. Ħallew mediċina u flus maʼ l-​anzjani Kristjani. B’hekk, l-​aħwa setgħu jibqgħu ħajjin. Huma kienu jisperaw ukoll li x-​Xhieda li kien hemm fil-​kampijiet setgħu jerġgħu lura lejn art twelidhom malajr.

Xi ngħidu għall-​futur? Ġesù Kristu bassar li żmienna kien se jkun wieħed taʼ taqlib kbir, żmien immarkat bi gwerer u nuqqas taʼ ikel. (Mattew 24:7) Ix-​Xhieda taʼ Jehovah jafu li s-​Saltna t’Alla biss se ttemm is-​sofferenza li teżisti llum fuq l-​art. Taħt il-​ħakma tagħha, id-​dar tagħna, l-​art, se ssir ġenna taʼ paċi, abbundanza, u hena dejjiemi għall-​umanità ubbidjenti. (Salm 72:1, 3, 16) Sadanittant, ix-​Xhieda se jipproklamaw l-​aħbar tajba taʼ dik is-​Saltna tas-​sema u se jkomplu jgħinu wkoll lill-​adoraturi sħabhom u lil oħrajn fi żminijiet taʼ bżonn.

[Kumment f’paġna 4]

Mill-​1994 ’l hawn, ix-​Xhieda taʼ Jehovah fl-​Ewropa biss bagħtu iktar minn 190 tunnellata taʼ ikel, ħwejjeġ, mediċini, u provisti oħrajn bħala għajnuna lejn ir-​reġjun tal-​Great Lakes fl-​Afrika

[Kaxxa f’paġna 6]

L-​Imħabba Kristjana fil-​Prattika

Fost dawk li pparteċipaw bil-​ħerqa fil-​proġett “Għin liz-​Zaire” fi Franza kien hemm Ruth Danner. Meta kienet tifla, hi kienet inżammet priġuniera fil-​kampijiet tal-​konċentrament tan-​Nazi minħabba l-​fidi Kristjana tagħha. Hi kkummentat: “Konna ferħanin ħafna li stajna nagħmlu xi ħaġa għal ħutna fl-​Afrika! Imma kien hemm xi ħaġa li għamlitni ferħana d-​doppju. Fl-​1945, meta jien u l-​familja tiegħi wasalna lura d-​dar mill-​Ġermanja, ma kellna assolutament xejn. Anki l-​ħwejjeġ li kellna fuqna konna ssellifniehom. Malajr, iżda, irċevejna għajnuna materjali minn ħutna spiritwali fl-​Amerka. Għalhekk, din il-​ħidma biex ngħinu lil ħutna fl-​Afrika tatni ċ-​ċans li npatti għall-​qalb tajba li ġiet murija lejna żmien ilu. Xi privileġġ huwa li tkun parti minn familja kbira bħal din t’aħwa li jpoġġu l-​imħabba Kristjana fil-​prattika!”—Ġwann 13:34, 35.

[Stampa f’paġna 7]

Dalwaqt​—ġenna taʼ l-​art b’abbundanza għal kulħadd